నారద భక్తి సూత్రాలు విత్ మీనింగ్ narada bakthi sutras with Telugu lyrics and meaning

నారద భక్తి సూత్రాలు

మొదటి అధ్యాయం

1 . అధాతో భక్తిం వ్యాఖ్యాస్యామః

అటుపిమ్మట ఈ కారణమువలన భక్తిని వ్యాఖ్యానము చేయుచున్నాము .

2 . సా త్వస్మిన్ పరమప్రేమరూపా .

భగవంతునిపై ఆ భక్తి పవిత్రమైన ప్రేమ రూపము .

3 . అమృతస్వరూపా చ

ఆ భక్తి అమృత స్వరూపము .

4 . యల్లబ్ద్వ పుమాన్ సిద్ధో భవతి అమృతో భవతి తృప్తో భవతి .

అటువంటి పరాభక్తిని పొందిన పురుషుడు సిద్ధుడై , అమృతుడై , తృప్తుడగుచున్నాడు .

5 . యత్ప్రాప్య నకించిద్వాంచతి నశోచతి నద్వేష్టి రమతే నోత్సాహీ భవతి .

ఏ పరాభక్తిని పొందిన తరువాత తదన్యమగువానిని కొంచెమైనను కోరడో , లభ్యము కాని విషయములను గూర్చి శోకింపడో , తనకు సంప్రాప్తించిన అనిష్ట విషయములను ద్వేషింపడో , ఏ వస్తువునందును క్రీడింపడో జగద్వ్యా పారములందు ఉత్సాహమును చూపడో .

6 . యద్దజ్ఞ త్వా మత్తో భవతి స్తభ్దో భవతి ఆత్మారామో భవతి .

ఏ భక్తి వల్ల భగవత్స్వరూపము అవగతమయి పిచ్చివానివలె అగుచున్నాడో నిశ్చేష్టుడగుచున్నాడో , ఆత్మానందముననుభవించు వాడగుచున్నాడో

7 . సా న కామయమానా నిరోధరూపత్వాత్ .

ఆ భక్తి విషయ ప్రపంచ వాసనను నిరోధించుట వలన కోరికలు కలుగనివ్వదు 

8 . నిరోధస్తు లోక వేదవ్యాపారన్యాసః

అనన్యభక్తిచే ఈ నిరోధస్థితి జనించునపుడు వేదవ్యాపారము లోకవ్యాపారమును పోగొట్టును .

9 . తస్మిన్ అనన్యతా తద్విరోధి షూదాసీనతా చ 

భగవంతుని యందు అనన్యభక్తి కలిగి , తద్విరోధ విషయములందు నిర్లిప్త వైఖరి నవలంబించుట నిరోధ లక్షణము .

10 . అన్యాశ్రయాణాం త్యాగో నన్యతా .

ఇతర ఆశ్రయములన్నింటిని త్యజించి భగవంతుని మాత్రమే సంపూర్ణముగా ఆశ్రయించుట .

11 . లోకవేదేషు తదనుకూలాచరణం తద్విరోధి షూదాసీనతా ,

లోకవ్యవహారమందును , వేదవ్యవహార మందును విహితమైన ఆచరణ ఎలా ప్రతిపాదించబడినదో దానిని తన పరాభక్తికి అవరోధము గాకుండా అనుకూలముగా ఆచరించవలెను . ఆచరణకు విరుద్ధములైన విషయములందు సంబంధము లేక తటస్థముగ ఉదాసీనతతో ఉండాలి .

12 . భవతు నిశ్చయదార్ధ్యా దూర్ద్వం శాస్త్ర రక్షణం .

పూర్తిగా భగవద్భక్తితో జీవించవలయునని నిశ్చయించి అలా జీవిస్తున్నను శాస్త్ర రక్షణము జరుపవలెను .

13 . అన్యధా పాతిత్యా శంకయా 

     లేక పాపభీతిచేత .

14 . లోకో పితావదేవ , కింతు భోజనాది వ్యాపారస్త్వా శరీర ధారణావధి .

భోజనాది వ్యాపారము శరీర మున్నంతవరకు ఉండును లోకవ్యవహారశాస్త్రము  అనన్యభక్తి కలుగునంత వరకు ఉండును .

15 . తల్లక్షణాని వాచ్యన్తే నానామతభేదాత్

అనేక మతభేదములవలన భక్తి లక్షణములు వివరించబడుచున్నవి .

16 . పూజాది ష్వనురాగ ఇతి పారాశర్యః

పరాశరసుతుడగు వ్యాసుడు పూజాదులయందు అనురాగమని చెప్పుచున్నాడు .

17 . కథాదిష్వితి గర్గః

గర్గాచార్యుల అభిప్రాయము భగవత్కథా విషయములందు అనురాగమని .

18 . ఆత్మరత్యవిరోధేనేతి శాండిల్యః

శాండిల్య మహర్షి ఉద్దేశ్యంలో ఆత్మ క్రీడకు విరోధములేని భగవత్కార్యములు

మంచివని .

19 . నారదస్తు తదర్పి తాఖిలాచారతా , తద్విస్మరణే పరమ వ్యాకుల తేతి .

సర్వకర్మలను భగవంతునియందే సమర్పించి యుండుట , ఆ భక్తి విస్మరిస్తే మహాబాధకు గురియగుట అని నారదమహర్షి చెప్పెను .

20 . అస్త్వేవ మేవమ్ |

ఇట్టి నిదర్శనమే పరాభక్తి యగును .

21 . యథా వ్రజ గోపికానాం

వ్రజభూమిలోని గోపికా స్త్రీల భక్తిలాగ .

22 . తత్రాపి న మహాత్య , జ్ఞాన విస్మృత్యపవాదః

అట్లుండినను భగవానుని దేహసంబంధ ప్రభావాదులను మరచిరి అందుచేతనే ఆ గోపికలు అపవాదమును పొందలేదు .

23 . తద్విహీనం జారాణామివ

అట్టి జ్ఞానపరమైన భక్తి లేనివారిని జారులందురు .

24 . నాస్త్యేవ తస్మిం స్తత్సుఖసుఖిత్వమ్ .

భగవంతుని నుండి పొందెడి తన్మయసుఖము జారస్త్రీలు తమ ప్రియుల నుండి పొందే సుఖమువంటిది కాదు .

రెండవ అధ్యాయం

25 . సాతు కర్మజ్ఞానయోగేభ్యోష్యధికతరా .

ఆ భక్తి కర్మకన్నను జ్ఞానముకన్నను , , యోగముకన్నను ఉత్తమమైనది 

.

26 . ఫలరూపత్యాత్ ,

భక్తిఫలరూపమైనది కనుక .

27 . ఈశ్వరస్యాష్యభిమానద్వేషిత్వాత్ దైన్యప్రియత్వాచ్చ

ఈశ్వరుడు కూడా అహంకారులను ద్వేషించుటచేతను దీనులను ప్రేమించుటచేతను .

28 . తస్యాః జ్ఞానమేవ సాధన మిత్యకే

ఆ భగవద్భక్తికి జ్ఞాన మొక్కటియే సాధనమని కొందరు ఆచార్యుల అభిమతము .

29 . అన్యోన్యాశ్రయత్వ మిత్యన్యే .

పరస్పరాధారమై యున్నవని మరికొందరి అభిప్రాయము .

30 . స్వయంఫలరూపతేతి బ్రహ్మకుమారాః

ఆ భక్తి స్వయముగానే ఫలరూపమైనదని బ్రహ్మకుమారులైన సనత్కుమారాదుల అభిప్రాయము .

31 . రాజగృహభోజనాదిషు తధైవ దృష్టత్వాత్ .

రాజగృహము , రాజభోజన పదార్థములు చూసినంత మాత్రంచేత వాటిని పొందినట్లుకాదు కదా !

32 . నతేన రాజపరితోషః క్షుధాశాన్తి ర్వా .

రాజు మంచివాడనే జ్ఞానముచేత రాజప్రీతి కలుగదు . భోజనపదార్ధములు రుచిగా నుండునని తెలిసినంత మాత్రమున ఆకలి నివారింపబడదు .

33 . తస్మా త్సైవ గ్రాహ్యా ముముక్షుభి :

కనుక ఆ దైవభక్తియే ముముక్షువులు ఆచరింపదగినది . 

మూడవ అధ్యాయం

34 . తస్యాః సాధనాని గాయన్త్యాచార్యాః

ఆ దైవభక్తికి ఋషులు అనేక సాధన మార్గములను గానము చేయుచున్నారు .

35 . తత్తు విషయత్యాగా త్సంగత్యాగా చ్చ
ఇంద్రియ విషయవైరాగ్యము , దుష్ట జనసాంగత్యమును విడుచుటవలన దైవభక్తి లభించును .

36 . అవ్యావృతభజనాత్ .
నిరంతర భజనవలన

37 . లోకేపి భగవద్గుణ శ్రవణ కీర్తనాత్ .
లోకవ్యవహారములందు నిమగ్నమైయున్నను భగవంతుని అనంతగుణములను శ్రవణం చేయటంచేత , కీర్తించుటచేత భగవద్ద్యానము కలుగుచున్నది .

38 . ముఖ్యతస్తు మహత్కృపయైవ భగవత్కృపా లేశా ద్వా
ముఖ్యముగా మహాత్ముల కృపాకటాక్షముచేత , ఈశ్వరానుగ్రహము చేత ఈ దైవభక్తి సంభవించుచున్నది .

39 . మహత్సంగ స్తు దుర్లభోగమ్యో మోఘశ్చ
మహాత్ముల సాంగత్యము లభించుట దుర్లభము . వారిని సంపూర్ణముగా తెలిసికొనుట చాలకష్టము . ఒకవేళ మహాత్ముల సాంగత్యము లభ్యమైనచో అమోఘము .

40 . లభ్యతేపి తత్కృపయైవ .
మహాత్ముల సాంగత్యము లభించుట కూడా భగవత్కృపయే .

41 . తస్మిం స్తజ్జనే భేదాభావాత్
భగవంతునికి భగవద్బక్తులకు మధ్య భేదభావము లేకపోవుట చేత ,

42 . తదేవ సాధ్యతాం తదేవ సాధ్యతాం
ఆ భక్తి యే సాధింపదగినది . ఆ భక్తియే సాధింపదగినది .

43 . దుస్సంగ స్సర్వధైవ త్యాజ్య :
దుష్టుని స్నేహము అన్నివిధముల వదిలివేయ తగినది . 

44 . కామ , క్రోధ , మోహ , స్మృతిభ్రంశ , బుద్దినాశ , సర్వనాశ కారణత్వాత్ .
కామము , క్రోధము , మోహము , స్మృతిభ్రంశము , బుద్ది నాశనము  సర్వనాశ
నమునకు కారణమగుటచే దుష్ట సహవాసము విడువదగినది .

45 . తరంగాయితా అపీమే సంగా త్సముద్రాయంతి
ఆదిలో ఈ కామాదులు తరంగములవలె కనపడినను దుష్టజనసంపర్గముచే సముద్రమువలె అగుచున్నవి .

46 . కస్తరతి కసరతి మాయాం ? యః సంగం త్యజతి యో మహానుభావం సేవతే నిర్మమో భవతి .
మాయను ఎవడు దాటును ? ఎవడు దాటును ? ఎవడు దుష్టసహవాసముల
వదిలివేయునో , ఎవడు మహాత్ములను సేవించునో వాడు మాయను దాటును 

47 . యో వినిక్తస్థానం సేవత , యో లోకబన్ద మున్మూలయతి ( యో ) నిస్త్రైగుణ్యో భవతి , ( యో ) యోగక్షేమంత జతి
ఎవడు ఏకాంత ప్రదేశమునందుండునో , ఎవడు లోకబంధమును త్యజించునో  ఎవడు త్రిగుణాతీతుడగునో , ఎవడు యోగక్షేమములను విడిచిపెట్టునో .

48 . యః కర్మఫలం త్యజతి , కర్మాణి సన్న్య స్యతి తతోనిర్ద్వన్ల్వో భవతి ,
ఎవడు కర్మఫలమును వదులుచున్నాడో , అహంకారపూరితకర్మలను విడిచిపెట్టుచున్నాడో , అతడు ద్వంద్వాతీతుడు .

49 . యో వేదా నపి సన్న్యస్యతి , కేవల మవిచ్చిన్నాను రాగం లభతే | |
ఎవడైతే వేదములను కూడా వదులుచున్నాడో వాడు అవిచ్చిన్నమైన ప్రేమను పొందుచున్నాడు .

50 . స తరతి స తరతి స లోకాం స్తారయతి
వాడు తరించును . వాడే తరించును . లోకములను తరింపచేయును .

నాల్గవ అధ్యాయం

51 . అనిర్వచనీయం ప్రేమస్వరూపం
భక్తి స్వరూపము నిర్వచించుటకు సాధ్యముకాదు .

52 . మూకాస్వాదనవత్ 
మూగవాడు రుచి చూచినవిధంగా ,

53 . ప్రకాశతే క్వాపి పాత్రే
ఒకానొక అరుదైన వ్యక్తియందు ప్రకాశింపబడుచున్నది .

54 . గుణరహితం కామనారహితం ప్రతిక్షణ వర్ధమానం అవిచ్ఛిన్నం సూక్ష్మతరం అనుభవరూపం .
అట్టి పరాభక్తి గుణరహితమైనది . కామనారహితమైనది ప్రతిక్షణము వృద్ధి
నొందునది . ఎడతెగనిది . మిక్కిలి సూక్ష్మమైనది . అనుభవమే స్వరూపముగా కల్గినది .

55 . తాత్ప్రాప్య తదేవావలోకయతి , తదేవ శృణోతి తదేవ భాషయతి ,తదేవ చిన్తయతి .
అట్టి పరాభక్తిని పొందిన పిమ్మట భగవంతునే చూస్తూ , భక్తి విషయములనే ఆలకిస్తూ భక్తి ప్రసంగములే చేయుచు , భగవద్భక్తినే చింతించుచుండును .

56 . గౌణీత్రిథా గుణభేదా దార్తాదిభేదా ద్వా
సత్వాదిగుణ భేదము వల్ల , ఆ మొదలైనవిషయ భేదమువల్ల గౌణీభక్తి మూడు విధములుగా నున్నది .

57 . ఉత్తరస్మా దుత్తరస్మాత్ పూర్వాపూర్వా , శ్రేయాయ భవతి .
ముందు ముందువచ్చే తామసభక్తి కన్న రాజసభక్తియు , రాజసభక్తి కన్న సాత్త్విక భక్తియు మోక్షముకొరకు ఉపకరించుచున్నది .

58 . అన్యస్మాత్ సౌలభ్యం భక్తౌ
అన్నిటికన్న భక్తి సులభము .

59 . ప్రమాణాంతర స్యానపేక్షత్వాత్ స్వయం ప్రమాణత్వాత్ ,
మోక్షవిషయమున ఇతర ప్రమాణముల నాశించక తానే ప్రమాణ మగుటవలన .

60 . శాస్త్రరూపా త్పరమానందరూపా చ్చ .
పరమశాంతరూపమై , పరమానందరూప మగుట వల్ల .

61 . లోకహానౌ చిన్తా న కార్యా , నివేదితాత్మ లోకవేద శీలత్వాత్ . 
ఆత్మ , లోకము , వేదము ఈ మూడింటిని భగవదర్పితము చేసి యుండుటచే లోకనాశము గురించి చింతించకూడదు .

62 . న తత్సిద్ధౌ లోకవ్యవహారో హేయః కిం తు ఫలత్యాగః , తత్సాధనం చ కార్యమేవ .
ఒకవేళ అనన్యభక్తి కల్గినను లోకవ్యవహారములను త్యజించరాదు . అయితే
ఫలాపేక్షను వదలి వేయవలెను . భగవదనుగ్రహపాత్రమగు సాధనములు ఆచరించదగినవే .


63 . స్త్రీ , ధన , నాస్తిక , వైరిచరిత్రం న శ్రవణీయం

స్త్రీల యొక్క ధనము యొక్క, నాస్తికుల యొక్క శత్రువుల యొక్క చరిత్రలను భగవద్భక్తులు వినకూడదు .

64 . అభిమాన దంభాదికం త్యాజ్యమ్ .
అభిమానము , డాంభికము మొదలగువానిని త్యజించవలెను .

65 . తదర్పితాఖిలాచారఃస కామక్రోధాభిమానాదికం తస్మిన్నేవ కరణీయమ్ .
భక్తుడు సమస్తకర్మలను భగవంతునియందు అర్పించి కామము , క్రోధము ,
అభిమానము మొదలగు దుర్గుణములను ఆ భగవంతునియందు లయింప జేయవలెను .

66 . త్రిరూపభంగపూర్వకం నిత్యాదాస్య నిత్యకాన్తా భజనాత్మకం ప్రేమ కార్యం ప్రేమైవకార్యం .
భక్తుడు , భక్తి , భగవంతుడు అను త్రిపుటి నతిక్రమించి భగవంతుని నిత్యసేవ చేయుచు , పతివ్రతా స్త్రీ సదా భర్తనే సేవించునట్లు భక్తి మార్గమును ఆచరించవలెను . అట్టి ప్రేమనే అనుసరించవలెను .

ఐదవ అధ్యాయం

67 . భక్తా ఏకాన్తినో ముఖ్యాః
ఏకాంతవాసులగు భగవద్భక్తులు శ్రేష్ఠులు .

68 . కంఠావరోధరోమాంశాశ్రుభిః పరస్పరం లపమానాః పావయంతి కులాని ,
పృథివీం చ .
పరమభక్తులు పరస్పరము గద్గదస్వరముతో , పులకాంకిత గాత్రులై , ఆనంద బాష్పములు రాలుచుండ భగవద్భక్తిని గూర్చి సంభాషించుకొనుచు వంశములను  లోకమును పావనము చేయుచున్నారు . 


69 . తీర్థీకుర్వన్తి తీర్థాని సుకర్మీకుర్వన్తి కర్మాణి సచ్ఛాస్త్రీ కుర్వన్తి శాస్త్రాణి . 
భక్తి శ్రేష్ఠులు తీర్థములను పుణ్యతీర్థములుగ , కర్మములను సత్కర్మలుగా , సామాన్య గ్రంథములను సచ్ఛాస్త్ర ములుగా చేయుచున్నారు . 

70 . తన్మయాః 
భగవద్భక్తులు భగవత్స్వరూపులగుచున్నారు . 

71 . మోదన్తే పితరౌ నృత్యన్తి , దేవతాః సనాధా చేయం భూర్బవతి
పరమభక్తుల జీవనసరళివల్ల పితృదేవతలు సంతోషించుచున్నారు . దేవతలు నృత్యము చేయుచున్నారు ఈ భూమి నాథునితో కూడినది యగుచున్నది .

72 . నాస్తి తేషు జాతి విద్యా రూప కుల ధన క్రియాది భేదః . 
ఆ భగవద్భక్తులయందు జాతి , విద్యా , రూప , కుల , ధన , ఉద్యోగాది భేదములు లేవు . 

73 . యత స్త దీయాః 
భగవత్సంబంధమైన వారగుటవలన . 

74 . వాదో నావలమ్బ్యః 
భగవధ్యక్తులు వాదములోనికి దిగరాదు .

75 . బాహుల్యావకాశత్వా దనియతత్వాచ్చ . 
వాదమును పెంచిన కొద్ది పెరుగుట కవకాశముండుట వల్ల , ఇట్టిదని నిర్ణయించుటకు నిర్దిష్టమైన అవధిలేనిదగుట వల్ల , వాదములకు దూరంగా ఉండాలి . 

76 . భక్తి శాస్త్రాణి మననీయాని తదుద్బోధక కర్మాణి కరణీయాని . 
పరమభక్తులు భక్తి శాస్త్రములను మననము చేయాలి ఆ శాస్త్రములు  సూచించిన మేరకు నడచుకోవాలి . 

77 . సుఖదుఃఖేచ్ఛాలాభాది త్యక్తే కాలే ప్రతీక్ష్య మాణేక్షణార్థమపి వ్యర్థం న నేయమ్ . 
భక్తులు సుఖ దుఃఖ ఇచ్ఛా లాభాదులచేత విడిచిపెట్టబడిన కాలము నిరీక్షించు చుండగా అర్ధక్షణమయిననూ వ్యర్థముగా పోనీయకూడదు . 

78 . అహింసా సత్య శౌచ దయాస్తిక్యాది చారిత్ర్యాణి పరిపాలనీయాని . 
భగవద్భక్తులు అహింస , సత్యము , శౌచము , దయ , అస్తికత్వము మున్నగు ఆచరణలు అనుసరించాలి . 

79 . సర్వదా సర్వభావేన నిశ్చింతితై ర్బగవానేన భజనీయః 
సర్వకాల సర్వావస్థలయందును అన్నిభావములచేత ఇతర చింతలు లేక భజన చేయదగినవాడు భగవంతుడు . 

80 . సః కీర్త్యమానః శ్రీఘ్రమే  వావిర్బవతి అనుభావయతి చ భక్తాన్ . 
ఆ భగవంతుడు భగవద్భక్తులచే స్తుతింపబడుచున్నవాడై త్వరితముగానే ప్రత్యక్షమగుచున్నాడు . భక్తులకు తన స్వరూపము అవగతము గలవారినిగ చేయుచున్నాడు . 

81 . త్రిసత్యస్య భక్తి రేవ గరీయసీ , భక్తి రేవ గరీయసీ . 
త్రికాలములందును మార్పులేని భగవంతుని గూర్చిన భక్తియే అతిశ్రేష్టమైనది 

82 . గుణమాహాత్మ్యా సక్తి , రూపాసక్తి , పూజాసక్తి ,
 స్మరణాసక్తి , దాస్యాసక్తి , సఖ్యాసక్తి , వాత్సల్యాసక్తి , 
కాన్తాసక్తి , ఆత్మ నివేదనాసక్తి , తన్మయతాసక్తి 
 పరమవిరహాసక్తి , రూపై కధామ్యేకాదశధా భవతి . 

భగవద్భక్తి ఒకే విధమైన జీవుల సంస్కారాభి రుచులను బట్టి పదనొకొండు 
విధములుగా ఉంటుంది . 
1 . గుణమహాత్మ్యా సక్తి , 2 . రూపాసక్తి , 3 . పూజాసక్తి 
4 . స్మరణాసక్తి 5 దాస్యాసక్తి . 6 . సఖ్యాసక్తి 
7 . వాత్సల్యాసక్తి 8 . కాంతాసక్తి 9 . ఆత్మనివేదనాసక్తి 
10 . తన్మయతాసక్తి , 11 . పరమవిరహాసక్తి 



ఇత్యేవం వదని జనజల్ప నిర్ణయా ఏకమతాః
 కుమార వ్యాసశుక శాడ్జిల్య గర్గ విష్ణు కౌడ్డిన్య
 శేషోద్ధవారుణి బలి హనుమ ద్విభీషణాదయో భక్త్యాచార్యాః 

సనత్కుమారుడు , వ్యాసుడు , శుకుడు , శాండిల్యుడు , గర్గుడు , విష్ణువనుఋషి , కౌండిల్యుడు , ఆదిశేషుడు , ఉద్ధవుడు , అరుణి , బలిచక్రవర్తి , హనుమంతుడు , విభీషణుడు మొదలగు భక్త్యాచార్యులు . పామరజనుల నిందాదూషణములకు జంకని వారై భక్తి యొక్కటియే ముక్తిని గలుగజేయునని ఏకాభిప్రాయముతో నున్నారు . 





All copyrights reserved 2012 digital media act