ఆద్య కాళి శతనామ స్తోత్రం Aadhya Kali Shatanama stotram with Telugu lyrics
ఆద్య కాళి శతనామ స్తోత్రం
॥ శ్రీగణేశాయ నమః ॥
॥ శ్రీఉమామహేశ్వరాభ్యాం నమః ॥
శ్రీసదాశివ ఉవాచ ॥
శృణు దేవి జగద్వన్ద్యే స్తోత్రమేతదనుత్తమమ్ ।
పఠనాత్ శ్రవణాద్యస్య సర్వసిద్ధీశ్వరో భవేత్ ॥ ౧॥
అసౌభాగ్యప్రశమనం సుఖసమ్పద్వివర్ధనమ్ ।
అకాలమృత్యుహరణం సర్వాపద్వినివారణమ్ ॥ ౨॥
శ్రీమదాద్యాకాలికాయాః సుఖసాన్నిధ్యకారణమ్ ।
స్తవస్యాస్య ప్రసాదేన త్రిపురారిరహం శివే ॥ ౩॥
స్తోత్రస్యాస్య ఋషిర్దేవి సదాశివ ఉదాహృతః ।
ఛన్దోఽనుష్టుబ్దేవతాఽఽద్యా కాలికా పరికీర్త్తితా ।
ధర్మకామార్థమోక్షేషు వినియోగః ప్రకీర్త్తితః ॥ ౪॥
ఓం అస్య శ్రీఆద్యాకాలికాశతనామస్తోత్రమన్త్రస్య శ్రీసదాశివఋషిః ।
అనుష్టుప్ఛన్దః । శ్రీ ఆద్యాకాలికా దేవతా ।
ధర్మకామార్థమోక్ష సిధ్యర్థే జపే వినియోగః ॥
హ్రీఁ కాలీ శ్రీఁ కరాలీ చ క్రీఁ కల్యాణీ కలావతీ ।
కమలా కలిదర్పఘ్నీ కపర్దీశకృపాన్వితా ॥ ౫॥
కాలికా కాలమాతా చ కాలానలసమద్యుతిః ।
కపర్దినీ కరాలాస్యా కరుణామృతసాగరా ॥ ౬॥
కృపామయీ కృపాధారా కృపాపారా కృపాగమా ।
కృశానుః కపిలా కృష్ణా కృష్ణానన్దవివర్ద్ధినీ ॥ ౭॥
కాలరాత్రిః కామరూపా కామపాశవిమోచనీ ।
కాదమ్బినీ కలాధారా కలికల్మషనాశినీ ॥ ౮॥
కుమారీపూజనప్రీతా కుమారీపూజకాలయా ।
కుమారీభోజనానన్దా కుమారీరూపధారిణీ ॥ ౯॥
కదమ్బవనసఞ్చారా కదమ్బవనవాసినీ ।
కదమ్బపుష్పసన్తోషా కదమ్బపుష్పమాలినీ ॥ ౧౦॥
కిశోరీ కలకణ్ఠా చ కలనాదనినాదినీ ।
కాదమ్బరీపానరతా తథా కాదమ్బరీప్రియా ॥ ౧౧॥
కపాలపాత్రనిరతా కఙ్కాలమాల్యధారిణీ ।
కమలాసనసన్తుష్టా కమలాసనవాసినీ ॥ ౧౨॥
కమలాలయమధ్యస్థా కమలామోదమోదినీ ।
కలహంసగతిః క్లైబ్యనాశినీ కామరూపిణీ ॥ ౧౩॥
కామరూపకృతావాసా కామపీఠవిలాసినీ ।
కమనీయా కల్పలతా కమనీయవిభూషణా ॥ ౧౪॥
కమనీయగుణారాధ్యా కోమలాఙ్గీ కృశోదరీ ।
కారణామృతసన్తోషా కారణానన్దసిద్ధిదా ॥ ౧౫॥
కారణానన్దజాపేష్టా కారణార్చనహర్షితా ।
కారణార్ణవసమ్మగ్నా కారణవ్రతపాలినీ ॥ ౧౬॥
కస్తూరీసౌరభామోదా కస్తూరితిలకోజ్జ్వలా ।
కస్తూరీపూజనరతా కస్తూరీపూజకప్రియా ॥ ౧౭॥
కస్తూరీదాహజననీ కస్తూరీమృగతోషిణీ ।
కస్తూరీభోజనప్రీతా కర్పూరామోదమోదితా ॥ ౧౮॥
కర్పూరమాలాభరణా కర్పూరచన్దనోక్షితా ।
కర్పూరకారణాహ్లాదా కర్పూరామృతపాయినీ ॥ ౧౯॥
కర్పూరసాగరస్నాతా కర్పూరసాగరాలయా ।
కూర్చబీజజపప్రీతా కూర్చజాపపరాయణా ॥ ౨౦॥
కులీనా కౌలికారాధ్యా కౌలికప్రియకారిణీ ।
కులాచారా కౌతుకినీ కులమార్గప్రదర్శినీ ॥ ౨౧॥
కాశీశ్వరీ కష్టహర్త్రీ కాశీశవరదాయినీ ।
కాశీశ్వరకృతామోదా కాశీశ్వరమనోరమా ॥ ౨౨॥
కలమఞ్జీరచరణా క్వణత్కాఞ్చీవిభూషణా ।
కాఞ్చనాద్రికృతాగారా కాఞ్చనాచలకౌముదీ ॥ ౨౩॥
కామబీజజపానన్దా కామబీజస్వరూపిణీ ।
కుమతిఘ్నీ కులీనార్త్తినాశినీ కులకామినీ ॥ ౨౪॥
క్రీఁ హ్రీఁ శ్రీఁ మన్త్రవర్ణేన కాలకణ్టకఘాతినీ ।
ఇత్యాద్యాకాలికాదేవ్యాః శతనామ ప్రకీర్త్తితమ్ ॥ ౨౫॥
కకారకూటఘటితం కాలీరూపస్వరూపకమ్ ।
పూజాకాలే పఠేద్యస్తు కాలికాకృతమానసః ॥ ౨౬॥
మన్త్రసిద్ధిర్భవేదాశు తస్య కాలీ ప్రసీదతి ।
బుద్ధిం విద్యాఞ్చ లభతే గురోరాదేశమాత్రతః ॥ ౨౭॥
ధనవాన్ కీర్త్తిమాన్ భూయాద్దానశీలో దయాన్వితః ।
పుత్రపౌత్రసుఖైశ్వర్యైర్మోదతే సాధకో భువి ॥ ౨౮॥
భౌమావాస్యానిశాభాగే మపఞ్చకసమన్వితః ।
పూజయిత్వా మహాకాలీమాద్యాం త్రిభువనేశ్వరీమ్ ॥ ౨౯॥
పఠిత్వా శతనామాని సాక్షాత్ కాలీమయో భవేత్ ।
నాసాధ్యం విద్యతే తస్య త్రిషు లోకేషు కిఞ్చన ॥ ౩౦॥
విద్యాయాం వాక్పతిః సాక్షాత్ ధనే ధనపతిర్భవేత్ ।
సముద్ర ఇవ గామ్భీర్యే బలే చ పవనోపమః ॥ ౩౧॥
తిగ్మాంశురివ దుష్ప్రేక్ష్యః శశివత్ శుభదర్శనః ।
రూపే మూర్త్తిధరః కామో యోషితాం హృదయఙ్గమః ॥ ౩౨॥
సర్వత్ర జయమాప్నోతి స్తవస్యాస్య ప్రసాదతః ।
యం యం కామం పురస్కృత్య స్తోత్రమేతదుదీరయేత్ ॥ ౩౩॥
తం తం కామమవాప్నోతి శ్రీమదాద్యాప్రసాదతః ।
రణే రాజకులే ద్యూతే వివాదే ప్రాణసఙ్కటే ॥ ౩౪॥
దస్యుగ్రస్తే గ్రామదాహే సింహవ్యాఘ్రావృతే తథా ।
అరణ్యే ప్రాన్తరే దుర్గే గ్రహరాజభయేఽపి వా ॥ ౩౫॥
జ్వరదాహే చిరవ్యాధౌ మహారోగాదిసఙ్కులే ।
బాలగ్రహాదిరోగే చ తథా దుఃస్వప్నదర్శనే ॥ ౩౬॥
దుస్తరే సలిలే వాపి పోతే వాతవిపద్గతే ।
విచిన్త్య పరమాం మాయామాద్యాం కాలీం పరాత్పరామ్ ॥ ౩౭॥
యః పఠేచ్ఛతనామాని దృఢభక్తిసమన్వితః ।
సర్వాపద్భ్యో విముచ్యేత దేవి సత్యం న సంశయః ॥ ౩౮॥
న పాపేభ్యో భయం తస్య న రోగేభ్యో భయం క్వచిత్ ।
సర్వత్ర విజయస్తస్య న కుత్రాపి పరాభవః ॥ ౩౯॥
తస్య దర్శనమాత్రేణ పలాయన్తే విపద్గణాః ।
స వక్తా సర్వశాస్త్రాణాం స భోక్తా సర్వసమ్పదామ్ ॥ ౪౦॥
స కర్త్తా జాతిధర్మాణాం జ్ఞాతీనాం ప్రభురేవ సః ।
వాణీ తస్య వసేద్వక్త్రే కమలా నిశ్చలా గృహే ॥ ౪౧॥
తన్నామ్నా మానవాః సర్వే ప్రణమన్తి ససమ్భ్రమాః ।
దృష్ట్యా తస్య తృణాయన్తే హ్యణిమాద్యష్టసిద్ధయః ॥ ౪౨॥
ఆద్యాకాలీస్వరూపాఖ్యం శతనామ ప్రకీర్తితమ్ ।
అష్టోత్తరశతావృత్త్యా పురశ్చర్యాఽస్య గీయతే ॥ ౪౩॥
పురస్క్రియాన్వితం స్తోత్రం సర్వాభీష్టఫలప్రదమ్ ।
శతనామస్తుతిమిమామాద్యాకాలీస్వరూపిణీమ్ ॥ ౪౪॥
పఠేద్వా పాఠయేద్వాపి శృణుయాచ్ఛ్రావయేదపి ।
సర్వపాపవినిర్ముక్తో బ్రహ్మసాయుజ్యమాప్నుయాత్ ॥ ౪౫॥
Comments
Post a Comment