ఆద్యా స్తోత్రం adya stotram Telugu

 ఆద్యాస్తోత్రం

 ఓం నమ ఆద్యాయై ।
శృణు వత్స ప్రవక్ష్యామి ఆద్యా స్తోత్రం మహాఫలమ్ ।
యః పఠేత్ సతతం భక్త్యా స ఏవ విష్ణువల్లభః ॥ ౧॥

మృత్యుర్వ్యాధిభయం తస్య నాస్తి కిఞ్చిత్ కలౌ యుగే ।
అపుత్రా లభతే పుత్రం త్రిపక్షం శ్రవణం యది ॥ ౨॥

ద్వౌ మాసౌ బన్ధనాన్ముక్తి విప్రవక్త్రాత్ శ్రుతం యది ।
మృతవత్సా జీవవత్సా షణ్మాసం శ్రవణం యది ॥ ౩॥

నౌకాయాం సఙ్కటే యుద్ధే పఠనాజ్జయమాప్నుయాత్ ।
లిఖిత్వా స్థాపయేద్గేహే నాగ్నిచౌరభయం క్వచిత్ ॥ ౪॥

రాజస్థానే జయీ నిత్యం ప్రసన్నాః సర్వదేవతా ।
ఓం హ్రీం బ్రహ్మాణీ బ్రహ్మలోకే చ వైకుణ్ఠే సర్వమఙ్గలా ॥ ౫॥

ఇన్ద్రాణీ అమరావత్యామవికా వరుణాలయే।
యమాలయే కాలరూపా కుబేరభవనే శుభా ॥ ౬॥

మహానన్దాగ్నికోనే చ వాయవ్యాం మృగవాహినీ ।
నైఋత్యాం రక్తదన్తా చ ఐశాణ్యాం శూలధారిణీ ॥ ౭॥

పాతాలే వైష్ణవీరూపా సింహలే దేవమోహినీ ।
సురసా చ మణీద్విపే లఙ్కాయాం భద్రకాలికా ॥ ౮॥

రామేశ్వరీ సేతుబన్ధే విమలా పురుషోత్తమే ।
విరజా ఔడ్రదేశే చ కామాక్ష్యా నీలపర్వతే ॥ ౯॥

కాలికా వఙ్గదేశే చ అయోధ్యాయాం మహేశ్వరీ ।
వారాణస్యామన్నపూర్ణా గయాక్షేత్రే గయేశ్వరీ ॥ ౧౦॥

కురుక్షేత్రే భద్రకాలీ వ్రజే కాత్యాయనీ పరా ।
ద్వారకాయాం మహామాయా మథురాయాం మాహేశ్వరీ ॥ ౧౧॥

క్షుధా త్వం సర్వభూతానాం వేలా త్వం సాగరస్య చ ।
నవమీ శుక్లపక్షస్య కృష్ణసైకాదశీ పరా ॥ ౧౨॥

దక్షసా దుహితా దేవీ దక్షయజ్ఞ వినాశినీ ।
రామస్య జానకీ త్వం హి రావణధ్వంసకారిణీ ॥ ౧౩॥

చణ్డముణ్డవధే దేవీ రక్తబీజవినాశినీ ।
నిశుమ్భశుమ్భమథినీ మధుకైటభఘాతినీ ॥ ౧౪॥

విష్ణుభక్తిప్రదా దుర్గా సుఖదా మోక్షదా సదా ।
ఆద్యాస్తవమిమం పుణ్యం యః పఠేత్ సతతం నరః ॥ ౧౫॥

సర్వజ్వరభయం న స్యాత్ సర్వవ్యాధివినాశనమ్ ।
కోటితీర్థఫలం తస్య లభతే నాత్ర సంశయః ॥ ౧౬॥

జయా మే చాగ్రతః పాతు విజయా పాతు పృష్ఠతః ।
నారాయణీ శీర్షదేశే సర్వాఙ్గే సింహవాహినీ ॥ ౧౭॥

శివదూతీ ఉగ్రచణ్డా ప్రత్యఙ్గే పరమేశ్వరీ ।
విశాలాక్షీ మహామాయా కౌమారీ సఙ్ఖినీ శివా ॥ ౧౮॥

చక్రిణీ జయధాత్రీ చ రణమత్తా రణప్రియా ।
దుర్గా జయన్తీ కాలీ చ భద్రకాలీ మహోదరీ ॥ ౧౯॥

నారసింహీ చ వారాహీ సిద్ధిదాత్రీ సుఖప్రదా ।
భయఙ్కరీ మహారౌద్రీ మహాభయవినాశినీ ॥ ౧౦॥

ఇతి బ్రహ్మయామలే బ్రహ్మనారదసంవాదే ఆద్యా స్తోత్రం సమాప్తమ్ ॥

॥ ఓం నమ ఆద్యాయై ఓం నమ ఆద్యాయై ఓం నమ ఆద్యాయై ॥




All copyrights reserved 2012 digital media act