ఆనన్దలహరి (శంకరాచార్య కృతం) anandalahari stotram Telugu
ఆనన్దలహరి (శంకరాచార్య కృతం)
భవాని స్తోతుం త్వాం ప్రభవతి చతుర్భిర్న వదనైః
ప్రజానామీశానస్త్రిపురమథనః పఞ్చభిరపి ।
న షడ్భిః సేనానీర్దశశతముఖైరప్యహిపతిః
తదాన్యేషాం కేషాం కథయ కథమస్మిన్నవసరః ॥ ౧॥
ఘృతక్షీరద్రాక్షామధుమధురిమా కైరపి పదైః
విశిష్యానాఖ్యేయో భవతి రసనామాత్ర విషయః ।
తథా తే సౌన్దర్యం పరమశివదృఙ్మాత్రవిషయః
కథంకారం బ్రూమః సకలనిగమాగోచరగుణే ॥ ౨॥
ముఖే తే తామ్బూలం నయనయుగళే కజ్జలకలా
లలాటే కాశ్మీరం విలసతి గళే మౌక్తికలతా ।
స్ఫురత్కాఞ్చీ శాటీ పృథుకటితటే హాటకమయీ
భజామి త్వాం గౌరీం నగపతికిశోరీమవిరతమ్ ॥ ౩॥
విరాజన్మన్దారద్రుమకుసుమహారస్తనతటీ
నదద్వీణానాదశ్రవణవిలసత్కుణ్డలగుణా
నతాఙ్గీ మాతఙ్గీ రుచిరగతిభఙ్గీ భగవతీ
సతీ శమ్భోరమ్భోరుహచటులచక్షుర్విజయతే ॥ ౪॥
నవీనార్కభ్రాజన్మణికనకభూషణపరికరైః
వృతాఙ్గీ సారఙ్గీరుచిరనయనాఙ్గీకృతశివా ।
తడిత్పీతా పీతామ్బరలలితమఞ్జీరసుభగా
మమాపర్ణా పూర్ణా నిరవధిసుఖైరస్తు సుముఖీ ॥ ౫॥
హిమాద్రేః సంభూతా సులలితకరైః పల్లవయుతా
సుపుష్పా ముక్తాభిర్భ్రమరకలితా చాలకభరైః ।
కృతస్థాణుస్థానా కుచఫలనతా సూక్తిసరసా
రుజాం హన్త్రీ గన్త్రీ విలసతి చిదానన్దలతికా ॥ ౬॥
సపర్ణామాకీర్ణాం కతిపయగుణైః సాదరమిహ
శ్రయన్త్యన్యే వల్లీం మమ తు మతిరేవం విలసతి ।
అపర్ణైకా సేవ్యా జగతి సకలైర్యత్పరివృతః
పురాణోఽపి స్థాణుః ఫలతి కిల కైవల్యపదవీమ్ ॥ ౭॥
విధాత్రీ ధర్మాణాం త్వమసి సకలామ్నాయజననీ
త్వమర్థానాం మూలం ధనదనమనీయాంఘ్రికమలే ।
త్వమాదిః కామానాం జనని కృతకన్దర్పవిజయే
సతాం ముక్తేర్బీజం త్వమసి పరమబ్రహ్మమహిషీ ॥ ౮॥
ప్రభూతా భక్తిస్తే యదపి న మమాలోలమనసః
త్వయా తు శ్రీమత్యా సదయమవలోక్యోఽహమధునా ।
పయోదః పానీయం దిశతి మధురం చాతకముఖే
భృశం శఙ్కే కైర్వా విధిభిరనునీతా మమ మతిః ॥ ౯॥
కృపాపాఙ్గాలోకం వితర తరసా సాధుచరితే
న తే యుక్తోపేక్షా మయి శరణదీక్షాముపగతే ।
న చేదిష్టం దద్యాదనుపదమహో కల్పలతికా
విశేషః సామాన్యైః కథమితరవల్లీపరికరైః ॥ ౧౦॥
మహాన్తం విశ్వాసం తవ చరణపఙ్కేరుహయుగే
నిధాయాన్యన్నైవాశ్రితమిహ మయా దైవతముమే ।
తథాపి త్వచ్చేతో యది మయి న జాయేత సదయం
నిరాలమ్బో లమ్బోదరజనని కం యామి శరణమ్ ॥ ౧౧॥
అయః స్పర్శే లగ్నం సపది లభతే హేమపదవీం
యథా రథ్యాపాథః శుచి భవతి గంగౌఘమిలితమ్ ।
తథా తత్తత్పాపైరతిమలినమన్తర్మమ యది
త్వయి ప్రేమ్ణాసక్తం కథమివ న జాయేత విమలమ్ ॥ ౧౨॥
త్వదన్యస్మాదిచ్ఛావిషయఫలలాభే న నియమః
త్వమర్థానామిచ్ఛాధికమపి సమర్థా వితరణే ।
ఇతి ప్రాహుః ప్రాఞ్చః కమలభవనాద్యాస్త్వయి మనః
త్వదాసక్తం నక్తం దివముచితమీశాని కురు తత్ ॥ ౧౩॥
స్ఫురన్నానారత్నస్ఫటికమయభిత్తిప్రతిఫల
త్త్వదాకారం చఞ్చచ్ఛశధరకలాసౌధశిఖరమ్ ।
ముకున్దబ్రహ్మేన్ద్రప్రభృతిపరివారం విజయతే
తవాగారం రమ్యం త్రిభువనమహారాజగృహిణి ॥ ౧౪॥
నివాసః కైలాసే విధిశతమఖాద్యాః స్తుతికరాః
కుటుమ్బం త్రైలోక్యం కృతకరపుటః సిద్ధినికరః ।
మహేశః ప్రాణేశస్తదవనిధరాధీశతనయే
న తే సౌభాగ్యస్య క్వచిదపి మనాగస్తి తులనా ॥ ౧౫॥
వృషో వృద్ధో యానం విషమశనమాశా నివసనం
శ్మశానం క్రీడాభూర్భుజగనివహో భూషణవిధిః
సమగ్రా సామగ్రీ జగతి విదితైవ స్మరరిపోః
యదేతస్యైశ్వర్యం తవ జనని సౌభాగ్యమహిమా ॥ ౧౬॥
అశేషబ్రహ్మాణ్డప్రలయవిధినైసర్గికమతిః
శ్మశానేష్వాసీనః కృతభసితలేపః పశుపతిః ।
దధౌ కణ్ఠే హాలాహలమఖిలభూగోలకృపయా
భవత్యాః సంగత్యాః ఫలమితి చ కల్యాణి కలయే ॥ ౧౭॥
త్వదీయం సౌన్దర్యం నిరతిశయమాలోక్య పరయా
భియైవాసీద్గంగా జలమయతనుః శైలతనయే ।
తదేతస్యాస్తస్మాద్వదనకమలం వీక్ష్య కృపయా
ప్రతిష్ఠామాతన్వన్నిజశిరసివాసేన గిరిశః ॥ ౧౮॥
విశాలశ్రీఖణ్డద్రవమృగమదాకీర్ణఘుసృణ
ప్రసూనవ్యామిశ్రం భగవతి తవాభ్యఙ్గసలిలమ్ ।
సమాదాయ స్రష్టా చలితపదపాంసూన్నిజకరైః
సమాధత్తే సృష్టిం విబుధపురపఙ్కేరుహదృశామ్ ॥ ౧౯॥
వసన్తే సానన్దే కుసుమితలతాభిః పరివృతే
స్ఫురన్నానాపద్మే సరసి కలహంసాలిసుభగే ।
సఖీభిః ఖేలన్తీం మలయపవనాన్దోలితజలే
స్మరేద్యస్త్వాం తస్య జ్వరజనితపీడాపసరతి ॥ ౨౦॥
॥ ఇతి శ్రీమచ్ఛఙ్కరాచార్యవిరచితా ఆనన్దలహరీ సమ్పూర్ణా ॥
All copyrights reserved 2012 digital media act
Comments
Post a Comment