అష్టాక్షర శ్రీరామ మంత్రస్తోత్రం astakshara srirama mantra stotram
అష్టాక్షర శ్రీరామ మంత్రస్తోత్రం
శ్రీరామః శరణం మమ ।
లక్ష్మీనాథసమారమ్భాం నాథయామునమధ్యమామ్ ।
అస్మదాచార్యపర్యన్తాం వన్దే గురుపరమ్పరామ్ ॥ ౧॥
ఓం
విశ్వస్య చాత్మనోనిత్యం పారతన్త్ర్యం విచిన్త్య చ ।
చిన్తయేచ్చేతసా నిత్యం శ్రీరామఃశరణం మమ ॥ ౨॥
అచిన్త్యోఽపి శరీరాదేః స్వాతన్త్ర్యేనైవ విద్యతే ।
చిన్తయేచ్చేతసా నిత్యం శ్రీరామఃశరణం మమ ॥ ౩॥
ఆత్మాధారం స్వతన్త్రం చ సర్వశక్తిం విచిన్త్య చ ।
చిన్తయేచ్చేతసా నిత్యం శ్రీరామఃశరణం మమ ॥ ౪॥
నిత్యాత్మ గుణ సంయుక్తో నిత్యాత్మతనుమణ్డితః ।
నిత్యాత్మకేలినిరతః శ్రీరామఃశరణం మమ ॥ ౫॥
గుణలీలాస్వరూపైశ్చ మితిర్యస్య న విద్యతే ।
అతోవాఙ్మనసా వేద్యః శ్రీరామఃశరణం మమ ॥ ౬॥
కర్తా సర్వస్య జగతో భర్తా సర్వస్య సర్వగః ।
ఆహర్తా కార్య జాతస్య శ్రీరామఃశరణం మమ ॥ ౭॥
వాసుదేవాదిమూర్తీనాం చతుర్ణాం కారణం పరమ్ ।
చతుర్వింశతి మూర్తీనాం శ్రీరామఃశరణం మమ ॥ ౮॥
నిత్యముక్తజనైర్జుష్టో నివిష్టః పరమే పదే ।
పదం పరమభక్తానాం శ్రీరామః శరణం మమ ॥ ౯॥
మహదాదిస్వరూపేణ సంస్థితః ప్రాకృతే పదే ।
బ్రహ్మాదిదేవరూపైశ్చ శ్రీరామః శరణం మమ ॥ ౧౦॥
మన్వాదినృపరూపేణ శ్రుతిమార్గం బిభర్తియః ।
యాఃప్రాకృత స్వరూపేణ శ్రీరామఃశరణం మమ ॥ ౧౧॥
ఋషిరూపేణ యో దేవో వన్యవృత్తిమపాలయత్ ।
యోఽన్తరాత్మా చ సర్వేషాం శ్రీరామఃశరణం మమ ॥ ౧౨॥
యోఽసౌ సర్వతనుః సర్వః సర్వనామా సనాతనః ।
ఆస్థితః సర్వభావేషు శ్రీరామఃశరణం మమ ॥ ౧౩॥
బహిర్మత్స్యాదిరూపేణ సద్ధర్మమనుపాలయన్ ।
పరిపాతి జనాన్దీనాన్ శ్రీరామఃశరణం మమ ॥ ౧౪॥
యశ్చాత్మానం పృథక్కృత్య భావేన పురుషోత్తమః ।
ఆర్చాయామాస్థితో దేవః శ్రీరామఃశరణం మమ ॥ ౧౫॥
అర్చావతార రూపేణ దర్శనస్పర్శనాదిభిః ।
దీనానుద్ధరతే యోఽసౌ శ్రీరామఃశరణం మమ ॥ ౧౬॥
కౌశల్యా శుక్తిసఞ్జాతో జానకీ కణ్ఠభూషణః ।
ముక్తాఫలసమో యోఽసౌ శ్రీరామఃశరణం మమ ॥ ౧౭॥
విశ్వామిత్రమఖత్రాతా తాడకాగతిదాయకః ।
అహల్యాశాప శమనః శ్రీరామఃశరణం మమ ॥ ౧౮॥
పినాకభఞ్జనః శ్రీమాన్ జానకీప్రేమపాలకః ।
జామదగ్న్యప్రతాపఘ్నః శ్రీరామఃశరణం మమ ॥ ౧౯॥
రాజ్యాభిషేకసంహృష్టః కైకేయీ వచనాత్పునః ।
పిత్రదత్తవనక్రీడః శ్రీరామఃశరణం మమ ॥ ౨౦॥
జటాచీరధరోధన్వీ జానకీలక్ష్మణాన్వితః ।
చిత్రకూటకృతావాసః శ్రీరామఃశరణం మమ ॥ ౨౧॥
మహాపఞ్చవటీలీలా సఞ్జాతపరమోత్సవః ।
దణ్డకారణ్య సఞ్చారీ శ్రీరామఃశరణం మమ ॥ ౨౨॥
ఖరదూషణవిచ్ఛేదీ దుష్టరాక్షస భఞ్జనః ।
హృతశూర్పనఖాశోభః శ్రీరామఃశరణం మమ ॥ ౨౩॥
మాయామృగ విభేత్తా చ హృతసీతానుతాపకృత్ ।
జానకీవిరహాక్రోశీ శ్రీరామఃశరణం మమ ॥ ౨౪॥
లక్ష్మణానుచరోధన్వీ లోకయాత్రవిడమ్బకృత్ ।
పమ్పాతీర కృతాన్వేషః శ్రీరామఃశరణం మమ ॥ ౨౫॥
జటాయుగతి దాతా చ కబన్ధగతిదాయకః ।
హనుమత్కృతసాహిత్య శ్రీరామఃశరణం మమ ॥ ౨౬॥
సుగ్రీవరాజ్యదః శ్రీశో బాలినిగ్రహ కారకః ।
అఙ్గదాశ్వాసనకరః శ్రీరామఃశరణం మమ ॥ ౨౭॥
సీతాన్వేషణనిర్ముక్త హనుమత్ప్రముఖబ్రజః ।
ముద్రానివేశితబలః శ్రీరామఃశరణం మమ ॥ ౨౮॥
హేలోత్తరితపాథోధిర్బలనిర్ధూతరాక్షసః ।
లఙ్కాదాహకరో ధీరః శ్రీరామఃశరణం మమ ॥ ౨౯॥
రోషసమ్బద్ధపాథోధిర్లఙ్కాప్రాసాదరోధకః ।
రావణాదిప్రభేత్తా చ శ్రీరామఃశరణం మమ ॥ ౩౦॥
జానకీ జీవనత్రాతా విభీషణసమృద్ధిదః ।
పుష్పకారోహణాసక్తః శ్రీరామఃశరణం మమ ॥ ౩౧॥
రాజ్యసింహాసనారూఢః కౌశల్యానన్దవర్ద్ధనః ।
నామనిర్ధూతనిరయః శ్రీరామఃశరణం మమ ॥ ౩౨॥
యజ్ఞకర్త్తా యజ్ఞభోక్తా యజ్ఞభర్తామహేశ్వరః ।
అయోధ్యాముక్తిదః శాస్తా శ్రీరామఃశరణం మమ ॥ ౩౩॥
ప్రపఠేద్యః శుభం స్తోత్రం ముచ్యేత్ భవబన్ధనాత్ ।
మన్త్రశ్చాష్టాక్షరో దేవః శ్రీరామఃశరణం మమ ॥ ౪॥
॥ ఇతి అష్టాక్షర శ్రీరామమన్త్రస్తోత్రమ్ ॥
All copyrights reserved 2012 digital media act
Comments
Post a Comment