శ్రీబగలా(వల్గా)ముఖీస్తోత్రమ్ (రుద్రయామళ తంత్రే) bagalamukhi stotram Telugu

  శ్రీబగలా(వల్గా)ముఖీస్తోత్రమ్  (రుద్రయామళ తంత్రే)

శ్రీగణేశాయ నమః ।
చలత్కనకకుణ్డలోల్లసితచారుగణ్డస్థలీం
లసత్కనకచమ్పకద్యుతిమదిన్దుబిమ్బాననామ్ ।
గదాహతవిపక్షకాం కలితలోలజిహ్వాంచలాం
స్మరామి బగలాముఖీం విముఖవాఙ్మనస్స్తమ్భినీమ్ ॥ ౧॥

పీయూషోదధిమధ్యచారువిలద్రక్తోత్పలే మణ్డపే
సత్సింహాసనమౌలిపాతితరిపుం ప్రేతాసనాధ్యాసినీమ్ ।
స్వర్ణాభాం కరపీడితారిరసనాం భ్రామ్యద్గదాం విభ్రతీమిత్థం
ధ్యాయతి యాన్తి తస్య సహసా సద్యోఽథ సర్వాపదః ॥ ౨॥

దేవి త్వచ్చరణామ్బుజార్చనకృతే యః పీతపుష్పాఞ్జలీన్భక్త్యా
వామకరే నిధాయ చ మనుం మన్త్రీ మనోజ్ఞాక్షరమ్ ।
పీఠధ్యానపరోఽథ కుమ్భకవశాద్బీజం స్మరేత్పార్థివం
తస్యామిత్రముఖస్య వాచి హృదయే జాడ్యం భవేత్తత్క్షణాత్ ॥ ౩॥

వాదీ మూకతి రఙ్కతి క్షితిపతిర్వైశ్వానరః శీతతి క్రోధీ
శామ్యతి దుర్జనః సుజనతి క్షిప్రానుగః ఖఞ్జతి ।
గర్వీ ఖర్వతి సర్వవిచ్చ జడతి త్వన్మన్త్రిణా యన్త్రితః
శ్రీర్నిత్యే బగలాముఖి ప్రతిదినం కల్యాణి తుభ్యం నమః ॥ ౪॥

మన్త్రస్తావదలం విపక్షదలనే స్తోత్రం పవిత్రం చ తే
యన్త్రం వాదినియన్త్రణం త్రిజగతాం జైత్రం చ చిత్రం చ తే ।
మాతః శ్రీబగలేతి నామ లలితం యస్యాస్తి జన్తోర్ముఖే
త్వన్నామగ్రహణేన సంసది ముఖే స్తమ్భో భవేద్వాదినామ్ ॥ ౫॥

దుష్టస్తమ్భనముగ్రవిఘ్నశమనం దారిద్ర్యవిద్రావణం
భూభృత్సన్దమనం చలన్మృగదృశాం చేతఃసమాకర్షణమ్ ।
సౌభాగ్యైకనికేతనం సమదృశః కారుణ్యపూర్ణేక్షణమ్
మృత్యోర్మారణమావిరస్తు పురతో మాతస్త్వదీయం వపుః ॥ ౬॥

మాతర్భఞ్జయ మద్విపక్షవదనం జిహ్వాం చ సఙ్కీలయ
బ్రాహ్మీం ముద్రయ దైత్యదేవధిషణాముగ్రాం గతిం స్తంభయ ।
శత్రూంశ్చూర్ణయ దేవి తీక్ష్ణగదయా గౌరాఙ్గి పీతామ్బరే
విఘ్నౌఘం బగలే హర ప్రణమతాం కారుణ్యపూర్ణేక్షణే ॥ ౭॥

మాతర్భైరవి భద్రకాలి విజయే వారాహి విశ్వాశ్రయే
శ్రీవిద్యే సమయే మహేశి బగలే కామేశి వామే రమే ।
మాతఙ్గి త్రిపురే పరాత్పరతరే స్వర్గాపవర్గప్రదే
దాసోఽహం శరణాగతః కరుణయా విశ్వేశ్వరి త్రాహి మామ్ ॥ ౮॥

సంరమ్భే చౌరసఙ్ఘే ప్రహరణసమయే బన్ధనే వ్యాధిమధ్యే
విద్యావాదే వివాదే ప్రకుపితనృపతౌ దివ్యకాలే నిశాయామ్ ।
వశ్యే వా స్తమ్భనే వా రిపువధసమయే నిర్జనే వా వనే వా
గచ్ఛంస్తిష్ఠంస్త్రికాలం యది పఠతి శివం ప్రాప్నుయాదాశు ధీరః ॥ ౯॥

త్వం విద్యా పరమా త్రిలోకజననీ విఘ్నౌఘసంఛేదినీ
యోషిత్కర్షణకారిణీ జనమనఃసమ్మోహసన్దాయినీ ।
స్తమ్భోత్సారణకారిణీ పశుమనఃసమ్మోహసన్దాయినీ
జిహ్వాకీలనభైరవీ విజయతే బ్రహ్మాదిమన్త్రో యథా ॥ ౧౦॥

విద్యా లక్ష్మీర్నిత్యసౌభాగ్యమాయుః పుత్రైః పౌత్రైః సర్వసామ్రాజ్యసిద్ధిః ।
మానో భోగో వశ్యమారోగ్యసౌఖ్యం ప్రాప్తం తత్తద్భూతలేఽస్మిన్నరేణ ॥ ౧౧॥

త్వత్కృతే జపసన్నాహం గదితం పరమేశ్వరి ।
దుష్టానాం నిగ్రహార్థాయ తద్గృహాణ నమోఽస్తు తే ॥ ౧౨॥

పీతామ్బరాం చ ద్విభుజాం త్రినేత్రాం గాత్రకోమలామ్ ।
శిలాముద్గరహస్తాం చ స్మరే తాం బగలాముఖీమ్ ॥ ౧౩॥

బ్రహ్మాస్త్రమితి విఖ్యాతం త్రిషు లోకేషు విశ్రుతమ్ ।
గురుభక్తాయ దాతవ్యం న దేయం యస్య కస్యచిత్ ॥ ౧౪॥

నిత్యం స్తోత్రమిదం పవిత్రమిహ యో దేవ్యాః పఠత్యాదరాద్ధృత్వా
యన్త్రమిదం తథైవ సమరే బాహౌ కరే వా గలే ।
రాజానోఽప్యరయో మదాన్ధకరిణః సర్పా మృగేన్ద్రాదికాస్తే
వై యాన్తి విమోహితా రిపుగణా లక్ష్మీః స్థిరా సిద్ధయః ॥ ౧౫॥

॥ ఇతి శ్రీరుద్రయామలే తన్త్రే శ్రీబగలాముఖీస్తోత్రం సమాప్తమ్ ॥



 All copyrights reserved 2012 digital media act