భద్రాచల రామ సుప్రభాతం bhadrachala Rama suprabatham
భద్రాచల రామ సుప్రభాతం
శ్రీభద్రాద్రిరామసుప్రభాతస్తోత్రమ్
వామాఙ్కస్థితజానకీపరిలసత్కోదణ్డదణ్డం కరే
చక్రం చోర్ధ్వకరేణ బాహుయుగలే శఙ్ఖం శరం దక్షిణే ।
బిభ్రాణం జలజాతపత్రనయనం భద్రాద్రిమూర్ధస్థితం
కేయూరాదివిభూషితం రఘుపతిం సౌమిత్రియుక్తం భజే ॥ ౧॥
శ్రీమచ్చన్దనచర్చితోన్నతకుచవ్యాలోలమాలాఙ్కితాం
తాటఙ్కద్యుతిసత్కపోలయుగలాం పీతామ్బరాలఙ్కృతామ్ ।
కాఞ్చీకఙ్కణహారనూపురలసత్కల్యాణదామాన్వితాం
శ్రీ వామాఙ్కగతాం సరోరుహకరాం సీతాం మృగాక్షీం భజే ॥ ౨॥
ద్విభుజం స్వర్ణవపుషం పద్మపత్రనిభేక్షణమ్ ।
ధనుర్బాణధరం ధీరం రామానుజమహం భజే ॥ ౩॥
కౌసల్యా సుప్రజా రామ పూర్వా సన్ధ్యా ప్రవర్తతే ।
ఉత్తిష్ఠ నరశార్దూల కర్తవ్యం దైవమాహ్నికమ్ ॥ ౪॥
ఉత్తిష్ఠోత్తిష్ఠ గోవిన్ద ఉత్తిష్ఠ గరుడధ్వజ ।
ఉత్తిష్ఠ కమలాకాన్త త్రైలోక్యం మఙ్గలం కురు ॥ ౫॥
వన్దే శ్రీరఘునన్దనం జనకజానేత్రాసితామ్భోరుహం
ప్రాలేయామ్బుమనల్పమఞ్జులగుణం పద్మాసనోద్భాసినమ్ ।
చక్రాబ్జేషుశరాసనాని దధతం హస్తారవిన్దోత్తమైః
శ్రీమన్మారుతిపూజితాఙ్ఘ్రియుగలం భద్రాద్రిచిన్తామణిమ్ ॥ ౬॥
శ్రీరామచన్ద్రవరకౌముది భక్తలోక
కల్పాఖ్యవల్లరివినతజనైకబన్ధో ।
కారుణ్యపూరపరిపూరితసత్కటాక్షే
భద్రాద్రినాధదయితే తవ సుప్రభాతమ్ ॥ ౭॥
అమ్లానభక్తికుసుమా మలినాః ప్రదీపాః
సౌధాన్ జయత్యవిరలాగురుధూమరాజిః ।
నాకం స్వృశన్తి ధరణీసురవేదనాదాః
భద్రాద్రిశేఖర విభో తవ సుప్రభాతమ్ ॥ ౮॥
సాన్ద్రోడురమ్యసుషమా న విభాతిరాజా
దీనో యథా గతవసుర్మలినాన్తరఙ్గః ।
దైన్యం గతా కుముదినీ ప్రియవిప్రయోగాత్
భద్రాద్రిశేఖర విభో తవ సుప్రభాతమ్ ॥ ౯॥
పూర్వాద్రిపీఠమధితిష్ఠతి భానుబిమ్బం
గాఢం ప్రయాతి తిమిరం కకుభః ప్రసన్నాః ।
త్వత్స్వాగతం ఖగరుతైః కథయన్తి మన్ద్రం
భద్రాద్రిశేఖర విభో తవ సుప్రభాతమ్ ॥ ౧౦॥
ఆదిత్యలోలకరలాలనజాతహర్షా
సా పద్మినీ త్యజతి మా సకృదాస్యముద్రామ్ ।
భృఙ్గావలీ విశతి చాటువచాస్సరోజం
భద్రాద్రిశేఖర విభో తవ సుప్రభాతమ్ ॥ ౧౧॥
ప్రాలేయబిన్దునికరా నవపల్లవేషు
బిమ్బాధరే స్మితరుచిం తవ సంవదన్తి ।
ఆయాన్తి చక్రమిథునాని గృహస్థభావం
భద్రాద్రిశేఖర విభో తవ సుప్రభాతమ్ ॥ ౧౨॥
ఆనేతుమాస్యపవనం తవ సత్సుగన్ధీ
మాల్యాని జాతికుసుమాని సరోరుహాణి ।
ఆమర్దయన్ సురభిగన్ధమహో భివాతి
భద్రాద్రిశేఖర విభో తవ సుప్రభాతమ్ ॥ ౧౩॥
గోపీకరాకలితమన్థనరమ్యనాదాః
గోపాలవేణునినదేన సమం ప్రవృత్తాః ।
ధున్వన్తి హంసమిథునాని తుషారపక్షాన్
భద్రాద్రిశేఖర విభో తవ సుప్రభాతమ్ ॥ ౧౪॥
స్తమ్భే రమా ఉభయపక్షవినీతనిద్రాః
కర్షన్తి తే కలితఘీఙ్కృతిశ‍ృఙ్ఖలాని ।
వాద్యా ముఖోష్మమలినీకృతసైన్ధవాంశాః
భద్రాద్రిశేఖర విభో తవ సుప్రభాతమ్ ॥ ౧౫॥
శ్రీవన్దినస్తవ పఠన్తి చ మఞ్జుకణ్ఠైః
రమ్యావధానచరితాన్యమృతోపమాని ।
మన్ద్రం నదన్తి మురజాశ్శుభశఙ్ఖనాదైః
భద్రాద్రిశేఖర విభో తవ సుప్రభాతమ్ ॥ ౧౬॥
ఉత్తానకేతనరతా రవయో మహేశాః
శుద్ధోక్షవాహనగతా వసవోఽపి సిద్ధాః ।
ద్వారే వసన్తి తవ దర్శనలాలసాస్తే
భద్రాద్రిశేఖర విభో తవ సుప్రభాతమ్ ॥ ౧౭॥
చక్రాఙ్గవాహవిధిరేష సురేశ్వరోఽయం
దేవర్షిభిర్మునిగణైస్సహ లోకపాలైః ।
రత్నోపదాఞ్జలిభరోఽభిముఖం సమాస్తే
భద్రాద్రిశేఖర విభో తవ సుప్రభాతమ్ ॥ ౧౯॥
దాతుం భవాన్ వివిధగోధనరత్నపూగాన్
ఆలోకనాయ ముకురాది శుభార్థపుఞ్జాన్ ।
ఆదాయ దేహలితలే త్రిదశా నిషణ్ణాః
భద్రాద్రిశేఖర విభో తవ సుప్రభాతమ్ ॥ ౧౯॥
గోదావరీవిమలవారిసముద్భవాని
నిర్హారిపుష్పవిసరాణి ముదా హరన్తః ।
శుశ్రూషయా తవ బుధాః ప్రతిపాలయన్తి
భద్రాద్రిశేఖర విభో తవ సుప్రభాతమ్ ॥ ౨౦॥
ఏలాలవఙ్గవరకుఙ్కుమకేసరాద్యైః
పున్నాగనాగతులసీవకులాదిపుష్పైః ।
నీతాస్సుతీర్థకలశా అభిషేచనాయ
భద్రాద్రిశేఖర విభో తవ సుప్రభాతమ్ ॥ ౨౧॥
కస్తూరికాసురభిచన్దనపద్మమాలాః
పీతామ్బరం చ తడిదాభమనల్పమూల్యమ్ ।
సజ్జీకృతాని రఘునాయక మఞ్జులాని
భద్రాద్రిశేఖర విభో తవ సుప్రభాతమ్ ॥ ౨౨॥
కేయూరకఙ్కణకలాపకిరీటదేవ
ఛన్దాఙ్గులీయకముఖా నవరత్నభూషాః ।
రాజన్తి తావకపురో రవికాన్తికాన్తాః
భద్రాద్రిశేఖర విభో తవ సుప్రభాతమ్ ॥ ౨౩॥
గోదావరీసలిలసమ్ప్లవనిర్మలాఙ్గాః
దీప్తోర్ధ్వపుణ్డ్రతులసీనలినాక్షమాలాః ।
శ్రీవైష్ణవాస్తవ పఠన్తి విబోధగాథాః
భద్రాద్రిశేఖర విభో తవ సుప్రభాతమ్ ॥ ౨౪॥
స్వర్లోకవారవనితాస్సురలోకతోఽమీ
రమ్భాదయో విమలమఙ్గలకుమ్భదీపైః ।
సఙ్ఘీభవన్తి భవదఙ్గణపూర్వభాగే
భద్రాద్రిశేఖర విభో తవ సుప్రభాతమ్ ॥ ౨౫॥
సీతాప్రవాలసుమనోహరపాణియుగ్మ-
సంవాహితాత్మపదపఙ్కజపద్మనేత్ర ।
సౌమిత్రిసాదరసమర్పితసౌమ్యశయ్యా
భద్రాద్రిశేఖర విభో తవ సుప్రభాతమ్ ॥ ౨౬॥
శ్రీశేషతల్ప శరణాగతరక్షకార్క-
వంశే నిశాచరవధాయ కృతావతార ।
పాదాబ్జరేణుహృతగౌతమదారశాప
భద్రాద్రిశేఖర విభో తవ సుప్రభాతమ్ ॥ ౨౭॥
పాఠీనకూర్మకిటిమానుషసింహవేష
కుబ్జావతార భృగునన్దన రాఘవేన్ద్ర ।
తాలాఙ్కకృష్ణయవనాన్తకబుద్ధరూప
భద్రాద్రిశేఖర విభో తవ సుప్రభాతమ్ ॥ ౨౮॥
బ్రహ్మాదిసర్వవిబుధాంస్తవ పాదభక్తాన్
సమ్ఫుల్లతామరసభాసురలోచనాద్యైః ।
ఆనన్దయస్వ రిపుశోధన చాపధారిన్
భద్రాద్రిశేఖర విభో తవ సుప్రభాతమ్ ॥ ౨౯॥
తల్పం విహాయ కృపయా వరభద్రపీఠం
ఆస్థాయ పూజనమశేషమిదం గృహీత్వా ।
భక్తానశేషభువనాని చ పాలయస్వ
భద్రాద్రిశేఖర విభో తవ సుప్రభాతమ్ ॥ ౩౦॥
కున్దసున్దరదన్తపఙ్క్తివిభాసమానముఖామ్బుజం
నీలనీరదకాయశోభితజానకీతడిదుజ్జ్వలమ్ ।
శఙ్ఖచక్రశరాసనేషువిరాజమానకరామ్బుజం
భద్రభూధరశేఖరం ప్రణమామి రామసుధాకరమ్ ॥ ౩౧॥
అబ్జసమ్భవశఙ్కరాదిభిరర్చితాఙ్ఘ్రిపయోరుహం
మేరునన్దనభద్రతాపసమానసాబ్జదివాకరమ్ ।
నమ్రభక్తజనేష్టదాయకపద్మపీఠసమాస్థితం
గౌతమీక్షణలాలసం ప్రణమామి రామసుధాకరమ్ ॥ ౩౨॥
భీతభానుతనూభవార్తినివారణాతివిశారదం
పాదనమ్రవిభీషణాహితవైరిరాజ్యవిభూతికమ్ ।
భీమరావణమత్తవారణసింహముత్తమవిగ్రహం
భద్రభూధరశేఖరం ప్రణమామి రామసుధాకరమ్ ॥ ౩౩॥
ఘోరసంసృతిదుస్తరామ్బుధి కుమ్భవసమ్భవసన్నిభం
యోగివృన్దమనోఽరవిన్దసుకేసరోజ్జ్వలషట్పదమ్ ।
భక్తలోకవిలోచనామృతవర్తికాయితవిగ్రహం
భద్రభూధరశేఖరం ప్రణమామి రామసుధాకరమ్ ॥ ౩౪॥
భూసుతాచిరరోచిషం వరసత్పథైకవిహారిణం
తాపనాశనదీక్షితం నతచాతకావలిరక్షకమ్ ।
చిత్రచాపకృపామ్బుమణ్డలనీలవిగ్రహభాసురం
భద్రభూధరశేఖరం ప్రణమామి రామపయోధరమ్ ॥ ౩౫॥
ఇతి భద్రాద్రిరామ (భద్రాచలరామ) సుప్రభాతస్తోత్రం సమ్పూర్ణమ్ ।
All copyrights reserved 2012 digital media act
Comments
Post a Comment