బ్రహ్మ కృత ఛిన్నమస్తా స్తోత్రం brahmma krutha chinnamasta stotram Telugu

బ్రహ్మ కృత ఛిన్నమస్తా స్తోత్రం

 శ్రీగణేశాయ నమః ।

అథ స్తోత్రమ్ ।

ఈశ్వర ఉవాచ -

స్తవరాజమహం వన్దే వైరోచన్యాః శుభప్రదమ్ ।

నాభౌ శుభ్రారవిన్దం తదుపరి విలసన్మణ్డలం చణ్డరశ్మేః

సంసారస్యైకసారాం త్రిభువనజననీం ధర్మకామార్థదాత్రీమ్ ।

తస్మిన్మధ్యే త్రిమార్గే త్రితయతనుధరాం ఛిన్నమస్తాం ప్రశస్తాం

తాం వన్దే ఛిన్నమస్తాం శమనభయహరాం యోగినీం యోగముద్రామ్ ॥ ౧॥

నాభౌ శుద్ధసరోజవక్త్రవిలసద్బన్ధూకపుష్పారుణం

భాస్వద్భాస్కరమణ్డలం తదుదరే తద్యోనిచక్రం మహత్ ।

తన్మధ్యే విపరీతమైథునరతప్రద్యుమ్నసత్కామిన్-

పృష్ఠస్థామ్ తరుణార్కకోటివిలసత్తేజస్స్వరూపాం భజే ॥ ౨॥

వామే ఛిన్నశిరోధరాం తదితరే పాణౌ మహత్కర్తృకాం

ప్రత్యాలీఢపదాం దిగన్తవసనామున్ముక్తకేశవ్రజామ్ ।

ఛిన్నాత్మీయశిరస్సముచ్ఛలదసృగ్ధారాం పిబన్తీం పరాం

బాలాదిత్యసమప్రకాశవిలసన్నేత్రత్రయోద్భాసినీమ్ ॥ ౩॥

వామాదన్యత్ర నాలం బహుగహనగలద్రక్తధారాభిరుచ్చైః

గాయన్తీమస్థిభూషాం కరకమలలసత్కర్తృకాముగ్రరూపామ్ ।

రక్తామారక్తకేశీమపగతవసనాం వర్ణినీమాత్మశక్తిం

ప్రత్యాలీఢోరుపాదామరుణితనయనాం యోగినీం యోగనిద్రామ్ ॥ ౪॥

దిగ్వస్త్రాం ముక్తకేశీం ప్రలయఘనఘటాఘోరరూపాం ప్రచణ్డాం

దంష్ట్రా దుష్ప్రేక్ష్య  వక్త్రోదరవివరలసల్లోలజిహ్వాగ్రభాసామ్ ।

విద్యుల్లోలాక్షియుగ్మాం హృదయతటలసద్భోగినీం భీమమూర్త్తిం

సద్యశ్ఛిన్నాత్మకణ్ఠప్రగలితరుధిరైర్డాకినీం వర్ధయన్తీమ్ ॥ ౫॥

బ్రహ్మేశానాచ్యుతాద్యైః శిరసి వినిహతా మన్దపాదారవిన్దై-

రాప్తైర్యోగీన్ద్రముఖ్యైః ప్రతిపదమనిశం చిన్తితాం చిన్త్యరూపామ్ ।

సంసారే సారభూతాం త్రిభువనజననీం ఛిన్నమస్తాం ప్రశస్తా-

మిష్టాం తామిష్టదాత్రీం కలికలుషహరాం చేతసా చిన్తయామి ॥ ౬॥

ఉత్పత్తిస్థితిసంహతీర్ఘటయితుం ధత్తే త్రిరూపాం తనుమ్ ।

త్రైగుణ్యాజ్జగతో యదీయ వికృతిర్బ్రహ్మాచ్యుతః శూలభృత్ ॥

తామాద్యాం ప్రకృతిం స్మరామి మనసా సర్వార్థసంసిద్ధయే ।

యస్యాః స్మేరపదారవిన్దయుగలే లాభం భజన్తే నరాః ॥ ౭॥

అభిలషితపరస్త్రీయోగపూజాపరోఽహం

బహువిధజనభావారమ్భసమ్భావితోఽహమ్ ।

పశుజనవిరతోఽహం భైరవీసంస్థితోఽహం

గురుచరణపరోఽహం భైరవోఽహం శివోఽహమ్ ॥ ౮॥

ఇదం స్తోత్రం మహాపుణ్యం బ్రహ్మణా భాషితం పురా ।

సర్వసిద్ధిప్రదం సాక్షాన్మహాపాతకనాశనమ్ ॥ ౯॥

యః పఠేత్ప్రాతరుత్థాయ దేవ్యాః సన్నిహితోఽపి వా ।

తస్య సిద్ధిర్భవేద్దేవి వాఞ్ఛితార్త్థప్రదాయినీ ॥ ౧౦॥

ధనం ధాన్యం సుతం జాయాం హయం హస్తినమేవ చ ।

వసున్ధరాం మహావిద్యామష్టసిద్ధిం లభేద్ ధ్రువమ్ ॥ ౧౧॥

వైయాఘ్రాజినరఞ్జితస్వజఘనేఽరణ్యే ప్రలమ్బోదరే

ఖర్వేఽనిర్వచనీయపర్వసుభగే ముణ్డావలీమణ్డితే ।

కర్త్రీం కున్దరుచిం విచిత్రవనితాం జ్ఞానే దధానే పదే

మాతర్భక్తజనానుకమ్పిని మహామాయేఽస్తు తుభ్యం నమః ॥ ౧౨

ఇతి బ్రహ్మకృతం ఛిన్నమస్తాస్తోత్రమ్ 

All copyrights reserved 2012 digital media act