ఛిన్నమస్తా ధ్యానం chinnamastha dyanam telugu
ఛిన్నమస్తా ధ్యానం
౧. ప్రత్యాలీఢపదాం సదైవ దధతీం ఛిన్నం శిరః కర్త్రికాం
దిగ్వస్త్రాం స్వకబన్ధశోణితసుధాధారాం పిబన్తీం ముదా ।
నాగాబద్ధశిరోమణిం త్రినయనాం హృద్యుత్పలాలఙ్కృతాం
రత్యాసక్తమనోభవోపరి దృఢాం వన్దే జపాసన్నిభామ్ ॥ ౧॥
౨. దక్షే చాతిసితా విముక్తచికురా కర్త్రీం తథా ఖర్పరమ్ ।
హస్తాభ్యాం దధతీ రజోగుణభవా నామ్నాపి సా వర్ణినీ ॥
దేవ్యాశ్ఛిన్నకబన్ధతః పతదసృగ్ధారాం పిబన్తీ ముదా ।
నాగాబద్ధశిరోమణిర్మనువిదా ధ్యేయా సదా సా సురైః ॥ ౨॥
ప్రత్యాలీఢపదా కబన్ధవిగలద్రక్తం పిబన్తీ ముదా ।
సైషా యా ప్రలయే సమస్తభువనం భోక్తుం క్షమా తామసీ ॥
శక్తిః సాపి పరాత్పరా భగవతీ నామ్నా పరా డాకినీ ।
ధ్యేయా ధ్యానపరైః సదా సవినయం భక్తేష్టభూతిప్రదా ॥ ౩॥
౨. భాస్వన్మణ్డలమధ్యగాం నిజశిరశ్ఛిన్నం వికీర్ణాలకమ్ ।
స్ఫారాస్యం ప్రపిబద్గలాత్స్వరుధిరం వామే కరే బిభ్రతీమ్ ॥
యాభాసక్తరతిస్మరోపరిగతాం సఖ్యౌ నిజే డాకినీ-
వర్ణిన్యౌ పరిదృశ్య మోదకలితాం శ్రీఛిన్నమస్తాం భజే ॥ ౪॥
౩. స్వనాభౌ నీరజం ధ్యాయామ్యర్ధం వికసితం సితమ్ ।
తత్పద్మకోశమధ్యే తు మణ్డలం చణ్డరోచిషః ॥ ౫॥
జపాకుసుమసఙ్కాశం రక్తబన్ధూకసన్నిభమ్ ।
రజస్సత్వతమోరేఖా యోనిమణ్డలమణ్డితమ్ ॥ ౬॥
తన్మధ్యే తాం మహాదేవీం సూర్యకోటిసమప్రభామ్ ।
ఛిన్నమస్తాం కరే వామే ధారయన్తీం స్వమస్తకమ్ ॥ ౭॥
ప్రసారితముఖీం దేవీం లేలిహానాగ్రజిహ్వికామ్ ।
పిబన్తీం రౌధిరీం ధారాం నిజకణ్ఠవినిర్గతామ్ ॥ ౮॥
వికీర్ణకేశపాశాం చ నానాపుష్పసమన్వితామ్ ।
దక్షిణే చ కరే కర్త్రీం ముణ్డమాలావిభూషితామ్ ॥ ౯॥
దిగమ్బరాం మహాఘోరాం ప్రత్యాలీఢపదే స్థితామ్ ।
అస్థిమాలాధరాం దేవీం నాగయజ్ఞేపవీతినీమ్ ॥ ౧౦॥
రతికామోపరిష్ఠాం చ సదా ధ్యాతాం చ మన్త్రిభిః ।
సదా షోడశవర్షీయాం పీనోన్నతపయోధరామ్ ॥ ౧౧॥
౪. విపరీతరతాసక్తౌ ధ్యాయామి రతిమన్మథౌ ।
శాకినీవర్ణినీయుక్తాం వామదక్షిణయోగతః ॥ ౧౨॥
దేవీగలోచ్ఛలద్రక్తధారాపానం ప్రకుర్వతీమ్ ।
వర్ణినీం లోహితాం సౌమ్యాం ముక్తకేశీం దిగమ్బరామ్ ॥ ౧౩॥
కపాలకర్త్రికాహస్తాం వామదక్షిణయోగతః ।
నాగయజ్ఞేపవీతాఢ్యాం జ్వలత్తేజోమయీమివ ॥ ౧౪॥
ప్రత్యాలీఢపదాం విద్యాం నానాలఙ్కారభూషితామ్ ।
సదా ద్వాదశవర్షీయాం అస్థిమాలావిభూషితామ్ ॥ ౧౫॥
డాకినీం వామపార్శ్వే తు కల్పసూర్యానలోపమామ్ ।
విద్యుజ్జటాం త్రినయనాం దన్తపఙ్క్తిబలాకినీమ్ ॥ ౧౬॥
దంష్ట్రాకరాలవదనాం పీనోన్నతపయోధరామ్ ।
మహాదేవీం మహాఘోరాం ముక్తకేశీం దిగమ్బరామ్ ॥ ౧౭॥
లేలిహానమహాజిహ్వాం ముణ్డమాలావిభూషితామ్ ।
కపాలకర్త్రికాహస్తాం వామదక్షిణయోగతః ॥ ౧౮॥
దేవీగలోచ్ఛలద్రక్తధారాపానం ప్రకుర్వతీమ్ ।
కరస్థితకపాలేన భీషణేనాతిభీషణామ్ ।
ఆభ్యాం నిషేవ్యమాణాం తాం కలయే జగదీశ్వరీమ్ ॥
All copyrights reserved 2012 digital media act
Comments
Post a Comment