దక్షిణ కాళి హృదయం (కాళి రహస్య) dakshina Kali Hrudayam with Telugu lyrics
శ్రీ దక్షిణ కాళికా హృదయం
కాళీరహస్యే మహాకౌతూహల దక్షిణాకాళీ హృదయ స్తోత్రమ్
॥ శ్రీగణేశాయ నమః ॥
॥ శ్రీఉమామహేశ్వరాభ్యాం నమః ॥
అథ శ్రీకాళిహృదయప్రారమ్భః ।
శ్రీమహాకాల ఉవాచ ।
మహాకౌతూహలస్తోత్రం హృదయాఖ్యం మహోత్తమమ్ ।
శృణు ప్రియే మహాగోప్యం దక్షిణాయాః సుగోపితమ్ ॥ ౧॥
అవాచ్యమపి వక్ష్యామి తవ ప్రీత్యా ప్రకాశితమ్ ।
అన్యేభ్యః కురు గోప్యం చ సత్యం సత్యం చ శైలజే ॥ ౨॥
శ్రీదేవ్యువాచ ।
కస్మిన్ యుగే సముత్పన్నం కేన స్తోత్రం కృతం పురా ।
తత్సర్వం కథ్యతాం శమ్భో దయానిధే మహేశ్వర ॥ ౩॥
శ్రీమహాకాల ఉవాచ ।
పురా ప్రజాపతేః శీర్షచ్ఛేదనం కృతవానహమ్ ।
బ్రహ్మహత్యాకృతైః పాపైర్భైరవత్వం మమాగతమ్ ॥ ౪॥
బ్రహ్మహత్యావినాశాయ కృతం స్తోత్రం మయా ప్రియే ।
కృత్యావినాశకం స్తోత్రం బ్రహ్మహత్యాపహారకమ్ ॥ ౫॥
ఓం అస్య శ్రీదక్షిణకాల్యా హృదయస్తోత్రమన్త్రస్య శ్రీమహాకాల ఋషిః ।
ఉష్ణిక్ఛన్దః । శ్రీదక్షిణకాలికా దేవతా ।
క్రీం బీజం । హ్రీం శక్తిః । నమః కీలకం ।
సర్వత్ర సర్వదా జపే వినియోగః ॥
అథ హృదయాదిన్యాసః ।
ఓం క్రాం హృదయాయ నమః ।
ఓం క్రీం శిరసే స్వాహా ।
ఓం క్రూం శిఖాయై వషట్ ।
ఓం క్రైం కవచాయ హుం ।
ఓం క్రౌం నేత్రత్రయాయ వౌషట్ ।
ఓం క్రః అస్త్రాయ ఫట్ ॥
ఇతి హృదయాదిన్యాసః ॥
అథ ధ్యానమ్ ।
ఓం ధ్యాయేత్కాలీం మహామాయాం త్రినేత్రాం బహురూపిణీమ్ ।
చతుర్భుజాం లలజిహ్వాం పూర్ణచన్ద్రనిభాననామ్ ॥ ౧॥
నీలోత్పలదలప్రఖ్యాం శత్రుసఙ్ఘవిదారిణీమ్ ।
నరముణ్డం తథా ఖఙ్గం కమలం వరదం తథా ॥ ౨॥
బిభ్రాణాం రక్తవదనాం దంష్ట్రాలీం ఘోరరూపిణీమ్ ।
అట్టాట్టహాసనిరతాం సర్వదా చ దిగమ్బరామ్ ॥ ౩॥
శవాసనస్థితాం దేవీం ముణ్డమాలావిభూషితామ్ ।
ఇతి ధ్యాత్వా మహాదేవీం తతస్తు హృదయం పఠేత్ ॥ ౪॥
ఓం కాలికా ఘోరరూపాఢయా సర్వకామఫలప్రదా ।
సర్వదేవస్తుతా దేవీ శత్రునాశం కరోతు మే ॥ ౫॥
హ్రీంహ్రీంస్వరూపిణీ శ్రేష్ఠా త్రిషు లోకేషు దుర్లభా ।
తవ స్నేహాన్మయా ఖ్యాతం న దేయం యస్య కస్యచిత్ ॥ ౬॥
అథ ధ్యానం ప్రవక్ష్యామి నిశామయ పరాత్మికే ।
యస్య విజ్ఞానమాత్రేణ జీవన్ముక్తో భవిష్యతి ॥ ౭॥
నాగయజ్ఞోపవీతాఞ్చ చన్ద్రార్ద్ధకృతశేఖరామ్ ।
జటాజూటాఞ్చ సఞ్చిన్త్య మహాకాలసమీపగామ్ ॥ ౮॥
ఏవం న్యాసాదయః సర్వే యే ప్రకుర్వన్తి మానవాః ।
ప్రాప్నువన్తి చ తే మోక్షం సత్యం సత్యం వరాననే ॥ ౯॥
యన్త్రం శృణు పరం దేవ్యాః సర్వార్థసిద్ధిదాయకమ్ ।
గోప్యం గోప్యతరం గోప్యం గోప్యం గోప్యతరం మహత్ ॥ ౧౦॥
త్రికోణం పఞ్చకం చాష్టకమలం భూపురాన్వితమ్ ।
ముణ్డపఙ్క్తిం చ జ్వాలాం చ కాలీయన్త్రం సుసిద్ధిదమ్ ॥ ౧౧॥
మన్త్రం తు పూర్వకథితం ధారయస్వ సదా ప్రియే ।
దేవ్యా దక్షిణకాల్యాస్తు నామమాలాం నిశామయ ॥ ౧౨॥
కాలీ దక్షిణకాలీ చ కృష్ణరూపా పరాత్మికా ।
ముణ్డమాలా విశాలాక్షీ సృష్టిసంహారకారికా ॥ ౧౩ ॥
స్థితిరూపా మహామాయా యోగనిద్రా భగాత్మికా ।
భగసర్పిఃపానరతా భగోద్యోతా భగాఙ్గజా ॥ ౧౪ ॥
ఆద్యా సదా నవా ఘోరా మహాతేజాః కరాలికా ।
ప్రేతవాహా సిద్ధిలక్ష్మీరనిరుద్ధా సరస్వతీ ॥ ౧౫॥
ఏతాని నామమాల్యాని యే పఠన్తి దినే దినే ।
తేషాం దాసస్య దాసోఽహం సత్యం సత్యం మహేశ్వరి ॥ ౧౬॥
ఓం కాలీం కాలహరాం దేవీ కఙ్కాలబీజరూపిణీమ్ ।
కాలరూపాం కలాతీతాం కాలికాం దక్షిణాం భజే ॥ ౧౭॥
కుణ్డగోలప్రియాం దేవీం ఖయమ్భూకుసుమే రతామ్ ।
రతిప్రియాం మహారౌద్రీం కాలికాం ప్రణమామ్యహమ్ ॥ ౧౮॥
దూతీప్రియాం మహాదూతీం దూతీయోగేశ్వరీం పరామ్ ।
దూతోయోగోద్భవరతాం దూతీరూపాం నమామ్యహమ్ ॥ ౧౯॥
క్రీంమన్త్రేణ జలం జప్త్వా సప్తధా సేచనేన తు ।
సర్వే రోగా వినశ్యన్తి నాత్ర కార్యా విచారణా ॥ ౨౦॥
క్రీంస్వాహాన్తైర్మహామన్త్రైశ్చన్దనం సాధయేత్తతః ।
తిలకం క్రియతే ప్రాజ్ఞైర్లోకో వశ్యో భవేత్సదా ॥ ౨౧॥
క్రీం హూం హ్రీం మన్త్రజప్తైశ్చ హ్యక్షతైః సప్తభిః ప్రియే ।
మహాభయవినాశశ్చ జాయతే నాత్ర సంశయః ॥ ౨౨॥
క్రీం హ్రీం హ్రూం స్వాహా మన్త్రేణ శ్మశానాగ్నిం చ మన్త్రయేత్ ।
శత్రోర్గృహే ప్రతిక్షిప్త్వా శత్రోర్మృత్యుర్భవిష్యతి ॥ ౨౩॥
హ్రూం హ్రీం క్రీం చైవ ఉచ్చాటే పుష్పం సంశోధ్య సప్తధా ।
రిపూణాం చైవ చోచ్చాటం నయత్యేవ న సంశయః ॥ ౨౪॥
ఆకర్షణే చ క్రీం క్రీం క్రీం జప్త్వాఽక్షతాన్ ప్రతిక్షిపేత్ ।
సహస్రయోజనస్థా చ శీఘ్రమాగచ్ఛతి ప్రియే ॥ ౨౫॥
క్రీం క్రీం క్రీం హ్రూం హ్రూం హ్రీం హ్రీం చ కజ్జలం శోధితం తథా ।
తిలకేన జగన్మోహః సప్తధా మన్త్రమాచరేత్ ॥ ౨౬॥
హృదయం పరమేశాని సర్వపాపహరం పరమ్ ।
అశ్వమేధాదియజ్ఞానాం కోటికోటిగుణోత్తరమ్ ॥ ౨౭॥
కన్యాదానాదిదానానాం కోటికోటిగుణం ఫలమ్ ।
దూతీయాగాదియాగానాం కోటికోటిఫలం స్మృతమ్ ॥ ౨౮॥
గఙ్గాదిసర్వతీర్థానాం ఫలం కోటిగుణం స్మృతమ్ ।
ఏకధా పాఠమాత్రేణ సత్యం సత్యం మయోదితమ్ ॥ ౨౯॥
కౌమారీస్వేష్టరూపేణ పూజాం కృత్వా విధానతః ।
పఠేత్స్తోత్రం మహేశాని జీవన్ముక్తః స ఉచ్యతే ॥ ౩౦॥
రజస్వలాభగం దృష్ట్వా పఠేదేకాగ్రమానసః ।
లభతే పరమం స్థానం దేవీలోకే వరాననే ॥ ౩౧॥
మహాదుఃఖే మహారోగే మహాసఙ్కటకే దినే ।
మహాభయే మహాఘోరే పఠేతస్తోత్రం మహోత్తమమ్ ।
సత్యం సత్యం పునః సత్యం గోపాయేన్మాతృజారవత్ ॥ ౩౨॥
ఇతి కాళీరహస్యే శ్రీకాళీహృదయం సమాప్తమ్
Comments
Post a Comment