దశమహవిద్యా స్తోత్రం అథవా మహవిద్యా స్తోత్రం (ముణ్డమాలా తంత్రే) dasamahavidya kavacham
దశమహవిద్యా స్తోత్రం అథవా మహవిద్యా స్తోత్రం (ముణ్డమాలా తంత్రే)
శివ ఉవాచ -
దుర్లభ తారిణీ మార్గ దుర్లభం తారిణీ ఓఅదమ్ ।
మన్త్రార్థ మన్త్రచైతన్యం దుర్లభం శవసాధనమ్ ॥
శ్మశానసాధనం యోని సాధనం బ్రహ్మసాధనమ్ ।
క్రియా సాధనక భక్తిసాధనం ముక్తిసాధనమ్ ॥
స్తవప్రసాదాద్దేవేశి సర్వాః సిద్ధ్యన్తి సిద్ధయః ।
ఓం నమస్తే చణ్డికే చణ్డి చణ్డముణ్డవినాశిని ।
నమస్తే కాలికే కాలమహాభయవినాశిని ॥ ౧॥
శివే రక్ష జగద్ధాత్రి ప్రసీద హరవల్లభే ।
ప్రణమామి జగద్ధాత్రీం జగత్పాలనకారిణీమ్ ॥ ౨॥
జగత్ క్షోభకరీం విద్యాం జగత్సృష్టివిధాయినీమ్ ।
కరాలాం వికటాం ఘోరాం ముణ్డమాలావిభూషితామ్ ॥ ౩॥
హరార్చితాం హరారాధ్యాం నమామి హరవల్లభామ్ ।
గౌరీం గురుప్రియాం గౌరవర్ణాలఙ్కారభూషితామ్ ॥ ౪॥
హరిప్రియాం మహామాయాం నమామి బ్రహ్మపూజితామ్ ।
సిద్ధాం సిద్ధేశ్వరీం సిద్ధవిద్యాధరఙ్గణైర్యుతామ్ ॥ ౫॥
మన్త్రసిద్ధిప్రదాం యోనిసిద్ధిదాం లిఙ్గశోభితామ్ ।
ప్రణమామి మహామాయాం దుర్గాం దుర్గతినాశినీమ్ ॥ ౬॥
ఉగ్రాముగ్రమయీముగ్రతారాముగ్రగణైర్యుతామ్ ।
నీలాం నీలఘనశ్యామాం నమామి నీలసున్దరీమ్ ॥ ౭॥
శ్యామాఙ్గీం శ్యామఘటితాం శ్యామవర్ణవిభూషితామ్ ।
ప్రణమామి జగద్ధాత్రీం గౌరీం సర్వార్థసాధినీమ్ ॥ ౮॥
విశ్వేశ్వరీం మహాఘోరాం వికటాం ఘోరనాదినీమ్ ।
ఆద్యామాద్యగురోరాద్యామాద్యనాథప్రపూజితామ్ ॥ ౯॥
శ్రీం దుర్గాం ధనదామన్నపూర్ణాం పద్మాం సురేశ్వరీమ్ ।
ప్రణమామి జగద్ధాత్రీం చన్ద్రశేఖరవల్లభామ్ ॥ ౧౦॥
త్రిపురాం సున్దరీం బాలామబలాగణభూషితామ్ ।
శివదూతీం శివారాధ్యాం శివధ్యేయాం సనాతనీమ్ ॥ ౧౧॥
సున్దరీం తారిణీం సర్వశివాగణవిభూషితామ్ ।
నారాయణీం విష్ణుపూజ్యాం బ్రహ్మవిష్ణుహరప్రియామ్ ॥ ౧౨॥
సర్వసిద్ధిప్రదాం నిత్యామనిత్యాం గుణవర్జితామ్ ।
సగుణాం నిర్గుణాం ధ్యేయామర్చితాం సర్వసిద్ధిదామ్ ॥ ౧౩॥
విద్యాం సిద్ధిప్రదాం విద్యాం మహావిద్యాం మహేశ్వరీమ్ ।
మహేశభక్తాం మాహేశీం మహాకాలప్రపూజితామ్ ॥ ౧౪॥
ప్రణమామి జగద్ధాత్రీం శుమ్భాసురవిమర్దినీమ్ ।
రక్తప్రియాం రక్తవర్ణాం రక్తబీజవిమర్దినీమ్ ॥ ౧౫॥
భైరవీం భువనాం దేవీం లోలజివ్హాం సురేశ్వరీమ్ ।
చతుర్భుజాం దశభుజామష్టాదశభుజాం శుభామ్ ॥ ౧౬॥
త్రిపురేశీం విశ్వనాథప్రియాం విశ్వేశ్వరీం శివామ్ ।
అట్టహాసామట్టహాసప్రియాం ధూమ్రవినాశినీమ్ ॥ ౧౭॥
కమలాం ఛిన్నభాలాఞ్చ మాతఙ్గీం సురసున్దరీమ్ ।
షోడశీం విజయాం భీమాం ధూమాఞ్చ వగలాముఖీమ్ ॥ ౧౮॥
సర్వసిద్ధిప్రదాం సర్వవిద్యామన్త్రవిశోధినీమ్ ।
ప్రణమామి జగత్తారాం సారాఞ్చ మన్త్రసిద్ధయే ॥ ౧౯॥
ఇత్యేవఞ్చ వరారోహే స్తోత్రం సిద్ధికరం పరమ్ ।
పఠిత్వా మోక్షమాప్నోతి సత్యం వై గిరినన్దిని ॥ ౨౦॥
కుజవారే చతుర్దశ్యామమాయాం జీవవాసరే ।
శుక్రే నిశిగతే స్తోత్రం పఠిత్వా మోక్షమాప్నుయాత్ ॥
త్రిపక్షే మన్త్రసిద్ధిస్యాత్స్తోత్రపాఠాద్ధి శంకరి ।
చతుర్దశ్యాం నిశాభాగే శని భౌమ దినే తథా ॥
నిశాముఖే పఠేత్స్తోత్రం మన్త్ర సిద్ధిమవాప్నుయాత్ ।
కేవలం స్తోత్రపాఠాద్ధి మన్త్ర సిద్ధిరనుత్తమా ।
జాగర్తి సతతం చణ్డీ స్తోత్ర పాఠాభుజఙ్గినీ ॥
ఇతి ముణ్డమాలాతన్త్రోక్త దశమహావిద్యాస్తోత్రం సమ్పూర్ణమ్
All copyrights reserved 2012 digital media act
Comments
Post a Comment