దశమయీ బాలాత్రిపుర సుందరీ స్తోత్రం (మేరు తంత్రే) dasamayee Bala tripura sundari stotram
దశమయీ బాలాత్రిపుర సుందరీ స్తోత్రం (మేరు తంత్రే)
శ్రీకాలీ బగలాముఖీ చ లలితా ధూమావతీ భైరవీ
మాతఙ్గీ భువనేశ్వరీ చ కమలా శ్రీవజ్రవైరోచనీ ।
తారా పూర్వమహాపదేన కథితా విద్యా స్వయం శమ్భునా
లీలారూపమయీ చ దేశదశధా బాలా తు మాం పాతు సా ॥ ౧॥
శ్యామాం శ్యామఘనావభాసరుచిరాం నీలాలకాలఙ్కృతాం
బిమ్బోష్ఠీం బలశత్రువన్దితపదాం బాలార్కకోటిప్రభామ్ ।
త్రాసత్రాణకృపాణముణ్డదధతీం భక్తాయ దానోద్యతాం
వన్దే సఙ్కటనాశినీం భగవతీం బాలాం స్వయం కాలికామ్ ॥ ౨॥
బ్రహ్మాస్త్రాం సుముఖీం బకారవిభవాం బాలాం బలాకీనిభాం
హస్తన్యస్తసమస్తవైరిరసనామన్యే దధానాం గదామ్ ।
పీతాం భూషణగన్ధమాల్యరుచిరాం పీతామ్బరాఙ్గాం వరాం
వన్దే సఙ్కటనాశినీం భగవతీం బాలాం చ బగలాముఖీమ్ ॥ ౩॥
బాలార్కశ్రుతిభస్కరాం త్రినయనాం మన్దస్మితాం సన్ముఖీం
వామే పాశధనుర్ధరాం సువిభవాం బాణం తథా దక్షిణే ।
పారావారవిహారిణీం పరమయీం పద్మాసనే సంస్థితాం
వన్దే సఙ్కటనాశినీం భగవతీం బాలాం స్వయం షోడశీమ్ ॥ ౪॥
దీర్ఘాం దీర్ఘకుచాముదగ్రదశనాం దుష్టచ్ఛిదాం దేవతాం
క్రవ్యాదాం కుటిలేక్షణాం చ కుటిలాం కాకధ్వజాం క్షుత్కృశామ్ ।
దేవీం శూర్పకరాం మలీనవసనాం తాం పిప్పలాదార్చితామ్ ।
బాలాం సఙ్కటనాశినీం భగవతీం ధ్యాయామి ధూమావతీమ్ ॥ ౫॥
ఉద్యత్కోటిదివాకరప్రతిభటాం బాలార్కభాకర్పటాం
మాలాపుస్తకపాశమఙ్కుశధరాం దైత్యేన్ద్రముణ్డస్రజామ్ ।
పీనోత్తుఙ్గపయోధరాం త్రినయనాం బ్రహ్మాదిభిః సంస్తుతాం
బాలాం సఙ్కటనాశినీం భగవతీం శ్రీభైరవీం ధీమహి ॥ ౬॥
వీణావాదనతత్పరాం త్రినయనాం మన్దస్మితాం సన్ముఖీం
వామే పాశధనుర్ధరాం తు నికరే బాణం తథా దక్షిణే ।
పారాపారవిహారిణీం పరమయీం బ్రహ్మాసనే సంస్థితాం
వన్దే సఙ్కటనాశినీం భగవతీం మాతఙ్గినీం బాలికామ్ ॥ ౭॥
ఉద్యత్సూర్యనిభాం చ ఇన్దుముకుటామిన్దీవరే సంస్థితాం
హస్తే చారువరాభయం చ దధతీం పాశం తథా చాఙ్కుశమ్ ।
చిత్రాలఙ్కృతమస్తకాం త్రినయనాం బ్రహ్మాదిభిః సేవితాం
వన్దే సఙ్కటనాశినీం చ భువనేశీమాదిబాలాం భజే ॥ ౮॥
దేవీం కాఞ్చనసన్నిభాం త్రినయనాం ఫుల్లారవిన్దస్థితాం
విభ్రాణాం వరమబ్జయుగ్మమభయం హస్తైః కిరీటోజ్జ్వలామ్ ।
ప్రాలేయాచలసన్నిభైశ్చ కరిభిరాసిఞ్చ్యమానాం సదా
బాలాం సఙ్కటనాశినీం భగవతీం లక్ష్మీమ్భజే చేన్దిరామ్ ॥ ౯॥
సచ్ఛిన్నాం స్వశిరోవికీర్ణకుటిలాం వామే కరే విభ్రతీం
తృప్తాస్యస్వశరీరజైశ్చ రుధిరైః సన్తర్పయన్తీం సఖీమ్ ।
సద్భక్తాయ వరప్రదాననిరతాం ప్రేతాసనాధ్యాసినీం
బాలాం సఙ్కటనాశినీం భగవతీం శ్రీఛిన్నమస్తాం భజే ॥ ౧౦॥
ఉగ్రామేకజటామనన్తసుఖదాం దూర్వాదలాభామజాం
కర్త్రీఖడ్గకపాలనీలకమలాన్ హస్తైర్వహన్తీం శివామ్ ।
కణ్ఠే ముణ్డస్రజాం కరాలవదనాం కఞ్జాసనే సంస్థితాం
వన్దే సఙ్కటనాశినీం భగవతీం బాలాం స్వయం తారిణీమ్ ॥ ౧౧॥
ముఖే శ్రీమాతఙ్గీ తదను కిల తారా చ నయనే
తదన్తరగా కాలీ భృకుటిసదనే భైరవి పరా ।
కటౌ ఛిన్నా ధూమావతీ జయ కుచేన్దౌ కమలజా
పదాంశే బ్రహ్మాస్త్రా జయతి కిల బాలా దశమయీ ॥ ౧౨॥
విరాజన్ మన్దారద్రుమకుసుమహారస్తనతటీ
పరిత్రాసత్రాణాస్ఫటికగుటికాపుస్తకవరా ।
గలే రేఖాస్తిస్రో గమకగతిగీతైకనిపుణా
సదాపీలాహాలా జయతి కిల బాలా దశమయీ ॥ ౧౩॥
ఇతి శ్రీమేరుతన్త్రే దశమయీబాలాత్రిపురసున్దరీస్తోత్రం సమ్పూర్ణమ్
All copyrights reserved 2012 digital media act
Comments
Post a Comment