థూమవతీ స్తోత్రం dhoomavathi stotram

థూమవతీ స్తోత్రం

 శ్రీగణేశాయ నమః ।

ధూమాయాః స్తోత్రమ్ ।

ప్రాతర్యాస్యాత్ కుమారీ కుసుమకలికయా జాపమాలాం జపన్తీ

మధ్యాహ్నే ప్రౌఢరూపా వికసితవదనా చారునేత్రా నిశాయామ్ ।

సన్ధ్యాయాం వృద్ధరూపా గలితకుచయుగా ముణ్డమాలాం వహన్తీ

సా దేవీ దేవదేవీ త్రిభువనజననీ కాలికాపాతు యుష్మాన్ ॥ ౧॥

బద్ధ్వా ఖట్వాఙ్గకోటౌ కపిలవరజటా మణ్డలమ్పద్మయోనేః

కృత్వాదైత్యోత్తమాఙ్గైః స్రజమురసిశిరశ్శేఖరం తార్క్ష్యపక్షైః ।

పూర్ణంరక్తైః సురాణాం యమమహిషమహాశృఙ్గమాదాయపాణౌ

పాయాద్వోవన్ద్యమానః ప్రలయముదితయా భైరవః కాలరాత్ర్యామ్ ॥ ౨॥

చర్వన్తీమస్థిఖణ్డం ప్రకట కటకటా శబ్దసఙ్ఘాతముగ్రం

కుర్వాణి ప్రేతమధ్యే కహహకహకహా హాస్యముగ్రం కృశాంఙ్గీ ।

నిత్యం న్నిత్యప్రసక్తాం డమరుడిమడిమాం స్ఫారయన్తీం ముఖాబ్జం

పాయాన్నశ్చణ్డికేయం ఝఝమఝమఝమా జల్పమానా భ్రమన్తీ ॥ ౩॥

టణ్టణ్టణ్టణ్టటణ్టా ణ్రకట టమటమా నాటఘణ్టాం వహన్తీ

స్ఫేం స్ఫేం స్ఫేం స్ఫారకారా టకటకితహసా నాదసఙ్ఘట్ట భీమా ।

లోలమ్ముణ్డాగ్రమాలా లలహలహలహా లోలలోలాగ్రవాచం

చర్వన్తీచణ్డముణ్డం మటమటమటితే చర్యషన్తీ పునాతు ॥ ౪॥

వామే కర్ణే మృగాఙ్కం పలయపరిగతం దక్షిణే సూర్యబిమ్బం

కణ్ఠే నక్షత్రహారం వరవికటజటాజూటకే ముణ్డమాలామ్ ।

స్కన్ధేకృత్వోరగేన్ద్రధ్వజనికరయుతం బ్రహ్మకఙ్కాలభారం

సంహారే ధారయన్తీ మమహరతుభయం భద్రదా భద్రకాలీ ॥ ౫॥

తైలాభ్యక్తైకవేణీ త్రపుమయవిలసత్ । కర్ణికాక్రాన్తకర్ణా

లౌహేనైకేన కృత్వాచరణనలినకామాత్మనః పాదశోభామ్ ।

దిగ్వాసా రాసభేన గ్రసతిజగదిదం మాయయా కర్ణపూరా

వర్షిణ్యాతిప్రబద్ధా ధ్వజవితతభుజా సాసిదేవిత్వమేవ ॥ ౬॥

సఙ్గ్రామే హేతికృత్వైస్సరుధిరదశనైర్యద్భటానాం

శిరోభిర్మాలామాబద్‍ధ్యమూర్ధ్ని ధ్వజవితతభుజా త్వం శ్మశానే ప్రవిష్టా ।

దృష్టా భూతప్రభూతైః పృథుతరజఘనా బద్ధనాగేన్ద్ర కాఞ్చీ

శూలగ్రవ్యగ్రహస్తా మధురుధిరసదా తామ్రనేత్రా నిశాయామ్ ॥ ౭॥

దంష్ట్రా రౌద్రేముఖేఽస్మింస్తవవిశతిజగద్దేవి సర్వం క్షణార్ధాత్

సంసారస్యాన్తకాలే నరరుధిరవశాసమ్ప్లవేభూమధూమ్రే ।

కాలీకాపాలికీ సా శవశయనతరా యోగినీ యోగముద్రా

రక్తారుద్ధిః సభాస్థా మరణభయహరా త్వం శివా చణ్డఘణ్టా ॥ ౮॥

ధూమావత్యష్టకం పుణ్యం సర్వాపద్వినివారకమ్ ।

యః పఠేత్ సాధకో భక్త్యా సిద్ధిం విన్దతి వాఞ్ఛితామ్ ॥ ౯॥

మహాపది మహాఘోరే మహారోగే మహారణే ।

శత్రూచ్చాటే మారణాదౌ జన్తూనాం మోహనే తథా ॥ ౧౦॥

పఠేత్ స్తోత్రమిదం దేవి సర్వత్ర సిద్ధిభాగ్భవేత్ ।

దేవదానవగన్ధర్వా యక్షరాక్షసపన్నగాః ॥ ౧౧॥

సింహ వ్యాఘ్రాదికాస్సర్వే స్తోత్ర స్మరణమాత్రతః ।

దూరాద్దూరతరం యాన్తి కిం పునర్మానుషాదయః ॥ ౧౨॥

స్తోత్రేణానేన దేవేశి కిం న సిద్‍ధ్యతి భూతలే ।

సర్వశాన్తిర్భవేద్దేవిహ్యన్తే నిర్వాణతాం వ్రజేత్ ॥ ౧౩॥

ఇత్యూర్ధ్వామ్నాయే ధూమావతీ స్తోత్రం సమాప్తమ్ ॥

 All copyrights reserved 2012 digital media act