ఏకదంత గణపతి శరణాగత స్తోత్రం (ముద్గల పురాణం) ekadantha ganapathi stotram Telugu

ఏకదంత గణపతి శరణాగత స్తోత్రం (ముద్గల పురాణం)

శ్రీగణేశాయ నమః ।
దేవర్షయ ఊచుః ।
సదాత్మరూపం సకలాదిభూతమమాయినం సోఽహమచిన్త్యబోధమ్ ।
అనాదిమధ్యాన్తవిహీనమేకం తమేకదన్తం శరణం వ్రజామః ॥ ౧॥

అనన్తచిద్రూపమయం గణేశమభేదభేదాదివిహీనమాద్యమ్ ।
హృది ప్రకాశస్య ధరం స్వధీస్థం తమేకదన్తం శరణం వ్రజామః ॥ ౨॥

సమాధిసంస్థం హృది యోగినాం యం ప్రకాశరూపేణ విభాతమేతమ్ ।
సదా నిరాలమ్బసమాధిగమ్యం తమేకదన్తం శరణం వ్రజామః ॥ ౩॥

స్వబిమ్బభావేన విలాసయుక్తాం ప్రత్యక్షమాయాం వివిధస్వరూపామ్ ।
స్వవీర్యకం తత్ర దదాతి యో వై తమేకదన్తం శరణం వ్రజామః ॥ ౪॥

త్వదీయవీర్యేణ సమర్థభూతస్వమాయయా సంరచితం చ విశ్వమ్ ।
తురీయకం హ్యాత్మప్రతీతిసంజ్ఞం తమేకదన్తం శరణం వ్రజామః ॥ ౫॥

స్వదీయసత్తాధరమేకదన్తం గుణేశ్వరం యం గుణబోధితారమ్ ।
భజన్తమత్యన్తమజం త్రిసంస్థం తమేకదన్తం శరణం వ్రజామః ॥ ౬॥

తతస్వయా ప్రేరితనాదకేన సుషుప్తిసంజ్ఞం రచితం జగద్వై ।
సమానరూపం హ్యుభయత్రసంస్థం తమేకదన్తం శరణం వ్రజామః ॥ ౭॥

తదేవ విశ్వం కృపయా ప్రభూతం ద్విభావమాదౌ తమసా విభాన్తమ్ ।
అనేకరూపం చ తథైకభూతం తమేకదన్తం శరణం వ్రజామః ॥ ౮॥

తతస్త్వయా ప్రేరితకేన సృష్టం బభూవ సూక్ష్మం జగదేకసంస్థమ్ ।
సుసాత్వికం స్వప్నమనన్తమాద్యం తమేకదన్తం శరణ వ్రజామః ॥ ౯॥

తదేవ స్వప్నం తపసా గణేశ సుసిద్ధరూపం వివిధం బభూవ ।
సదైకరూపం కృపయా చ తేఽద్య తమేకదన్తం శరణం వ్రజామః ॥ ౧౦॥

త్వదాజ్ఞయా తేన త్వయా హృదిస్థం తథా సుసృష్టం జగదంశరూపమ్ ।
విభిన్నజాగ్రన్మయమప్రమేయం తమేకదన్తం శరణం వ్రజామః ॥ ౧౧॥

తదేవ జాగ్రద్రజసా విభాతం విలోకితం త్వత్కృపయా స్మృతేన ।
బభూవ భిన్నం చ సదైకరూపం తమేకదన్తం శరణం వ్రజామః ॥ ౧౨॥

సదేవ సృష్ట్వా ప్రకృతిస్వభావాత్తదన్తరే త్వం చ విభాసి నిత్యమ్ ।
ధియః ప్రదాతా గణనాథ ఏకస్తమేకదన్తం శరణం వ్రజామః ॥ ౧౩॥

త్వదాజ్ఞయా భాన్తి గ్రహాశ్చ సర్వే  ప్రకాశరూపాణి విభాన్తి ఖే వై ॥

భ్రమన్తి నిత్యం స్వవిహారకార్యాస్తమేకదన్తం శరణం వ్రజామః ॥ ౧౪॥

త్వదాజ్ఞయా సృష్టికరో విధాతా త్వదాజ్ఞయా పాలక ఏవ విష్ణుః ।
త్వదాజ్ఞయా సంహరకో హరోఽపి తమేకదన్తం శరణం వ్రజామః ॥ ౧౫॥

యదాజ్ఞయా భూమిజలేఽత్ర సంస్థే యదాజ్ఞయాపః ప్రవహన్తి నద్యః ।
స్వతీర్థసంస్థశ్చ కృతః సముద్రస్తమేకదన్తం శరణం వ్రజామః॥ ౧౬॥

యదాజ్ఞయా దేవగణా దివిస్థా దదన్తి వై కర్మఫలాని నిత్యమ్ ।
యదాజ్ఞయా శైలగణాః స్థిరా వై తమేకదన్తం శరణం వ్రజామః ॥ ౧౭॥

యదాజ్ఞయా శేషధరాధరో వై యదాజ్ఞయా మోహప్రదశ్చ కామః ।
యదాజ్ఞయా కాలధరోఽర్యమా చ తమేకదన్తం శరణం వ్రజామః ॥ ౧౮॥

యదాజ్ఞయా వాతి విభాతి వాయుర్యదాజ్ఞయాగ్నిర్జఠరాదిసంస్థః ।
యదాజ్ఞయేదం సచరాచరం చ తమేకదన్తం శరణం వ్రజామః ॥ ౧౯॥

యదన్తరే సంస్థితమేకదన్తస్తదాజ్ఞయా సర్వమిదం విభాతి ।
అనన్తరూపం హృది బోధకం యస్తమేకదన్తం శరణం వ్రజామః ॥ ౨౦॥

సుయోగినో యోగబలేన సాధ్యం ప్రకుర్వతే కః స్తవనేన స్తౌతి ।
అతః ప్రణామేన సుసిద్ధిదోఽస్తు తమేకదన్తం శరణం వ్రజామః ॥ ౨౧॥

గృత్సమద ఉవాచ ।
ఏవం స్తుత్వా గణేశానం దేవాః సమునయః ప్రభుమ్ ॥

తూష్ణీమ్భావం ప్రపద్యైవ ననృతుర్హర్షసంయుతాః ॥ ౨౨॥

స తానువాచ ప్రీతాత్మా దేవర్షీణాం స్తవేన వై ॥

ఏకదన్తో మహాభాగో దేవర్షీన్ భక్తవత్సలః ॥ ౨౩॥

ఏకదన్త ఉవాచ ।
స్తోత్రేణాఽహం ప్రసన్నోఽస్మి సురాః సర్షిగణాః కిల ।
వరదం భో వృణుత వో దాస్యామి మనసీప్సితమ్ ॥ ౨౪॥

భవత్కృతం మదీయం యత్స్తోత్రం ప్రీతిప్రదం చ తత్ ।
భవిష్యతి న సన్దేహః సర్వసిద్ధిప్రదాయకమ్ ॥ ౨౫॥

యం యమిచ్ఛతి తం తం వై దాస్యామి స్తోత్రపాఠతః ।
పుత్రపౌత్రాదికం సర్వం కలత్రం ధనధాన్యకమ్ ॥ ౨౬ ।
గజాశ్వాదికమత్యన్తం రాజ్యభోగాదికం ధ్రువమ్ ।
భుక్తిం ముక్తిం చ యోగం వై లభతే శాన్తిదాయకమ్ ॥ ౨౭॥

మారణోచ్చాటనాదీని రాజ్యబన్ధాదికం చ యత్ ।
పఠతాం శృణ్వతాం నౄణాం భవేచ్చ బన్ధహీనతామ్ ॥ ౨౮॥

ఏకవింశతివారం యః శ్లోకానేవైకవింశతీన్ ।
పఠేచ్చ హృది మాం స్మృత్వా దినాని త్వేకవింశతిః ॥ ౨౯॥

న తస్య దుర్లభం కిఞ్చిత్రిషు లోకేషు వై భవేత్ ।
అసాధ్యం సాధయేన్మర్త్యః సర్వత్ర విజయీ భవేత్ ॥ ౩౦॥

నిత్యం యః పఠతి స్తోత్రం బ్రహ్మభూతః స వై నరః ।
తస్య దర్శనతః సర్వే దేవాః పూతా భవన్తి చ ॥ ౩౧॥


ఇతి శ్రీముద్గలపురాణే ఏకదన్తశరణాగతిస్తోత్రం సమ్పూర్ణమ్



All copyrights reserved 2012 digital media act