సర్వేష్టప్రద గజానన స్తోత్రం (ముద్గల పురాణం) gajanana stotram Telugu mudgala purana
సర్వేష్టప్రద గజానన స్తోత్రం (ముద్గల పురాణం)
శ్రీగణేశాయ నమః ।
కపిల ఉవాచ ।
నమస్తే విఘ్నరాజాయ భక్తానాం విఘ్నహారిణే ।
అభక్తానాం విశేషేణ విఘ్నకర్త్రే నమో నమః ॥ ౧॥
ఆకాశాయ చ భూతానాం మనసే చామరేషు తే ।
బుద్ధ్యైరిన్ద్రియవర్గేషు త్రివిధాయ నమో నమః ॥ ౨॥
దేహానాం బిన్దురూపాయ మోహరూపాయ దేహినామ్ ।
తయోరభేదభావేషు బోధాయ తే నమో నమః ॥ ౩॥
సాఙ్ఖ్యాయ వై విదేహానాం సంయోగానాం నిజాత్మనే ।
చతుర్ణాం పఞ్చ మాయైవ సర్వత్ర తే నమో నమః ॥ ౪॥
నామరూపాత్మకానాం వై శక్తిరూపాయ తే నమః ।
ఆత్మనాం రవయే తుభ్యం హేరమ్బాయ నమో నమః ॥ ౫॥
ఆనన్దానాం మహావిష్ణురూపాయ నేతి ధారిణామ్ ।
శఙ్కరాయ చ సర్వేషాం సంయోగే గణపాయ తే ॥ ౬॥
కర్మణాం కర్మయోగాయ జ్ఞానయోగాయ జానతామ్।
సమేషు సమరూపాయ లమ్బోదర నమోఽస్తు తే ॥ ౭॥
స్వాధీనానాం గణాధ్యక్ష సహజాయ నమో నమః ।
తేషామభేదభావేషు స్వానన్దాయ చ తే నమః ॥ ౮॥
నిర్మాయికస్వరూపాణామయోగాయ నమో నమః ।
యోగానాం యోగరూపాయ గణేశాయ నమో నమః ॥ ౯॥
శాన్తియోగప్రదాత్రే తే శాన్తియోగమయాయ చ ।
కిం స్తౌమి తత్ర దేవేశ అతస్త్వాం ప్రణమామ్యహమ్ ॥ ౧౦॥
తతస్తం గణనాథో వై జగాద భక్తముత్తమమ్ ।
హర్షేణ మహతా యుక్తో హర్షయన్మునిసత్తమ ॥ ౧౧॥
శ్రీగణేశ ఉవాచ ।
త్వయా కృతం మదీయం యత్స్తోత్రం యోగప్రదం భవేత్ ।
ధర్మార్థకామమోక్షాణాం దాయకం ప్రభవిష్యతి ॥ ౧౨॥
వరం వరయ మత్తస్త్వం దాస్యామి భక్తియన్త్రితః ।
త్వత్సమో న భవేత్తాత తత్త్వజ్ఞానప్రకాశకః ॥ ౧౩॥
తస్య తద్వచనం శ్రుత్వా కపిలస్తమువాచ హ ।
త్వదీయామచలాం భక్తిం దేహి విఘ్నేశ మే పరామ్ ॥ ౧౪॥
త్వదీయభూషణం దైత్యో హృత్వా సద్యో జగామ హ ।
తతశ్చిన్తామణిం నాథ తం జిత్వా మణిమానయ ॥ ౧౫॥
యదాహం త్వాం స్మరిష్యామి తదాత్మానం ప్రదర్శయ ।
ఏతదేవ వరం పూర్ణం దేహి నాథ నమోఽస్తు తే ॥ ౧౬॥
గృత్సమద ఉవాచ ।
తస్య తద్వచనం శ్రుత్వా హర్షయుక్తో గజాననః ।
ఉవాచ తం మహాభక్తం ప్రేమయుక్తం విశేషతః ॥ ౧౭॥
త్వయా యత్ప్రార్థితం విష్ణో తత్సర్వం ప్రభవిష్యతి ।
తవ పుత్రో భవిష్యామి గణాసురవధాయ చ ॥ ౧౮॥
ఇతి శ్రీముద్గలపురాణే గజాననస్తోత్రం సమాప్తమ్
All copyrights reserved 2012 digital media act
Comments
Post a Comment