జగన్నాథ అష్టకం తెలుగు తాత్పర్యముతో jagannadha ashtakam with Telugu lyrics and meaning

జగన్నాథ అష్టకం

కదాచిత్ కాళిందీ తటవిపిన సంగీత కవరో 
ముదా గోపీనారీ వదన కమలాస్వాద మధుపః | 
రమా శంభుబ్రహ్మా అమరపతిగణేశార్చిత పదో 
జగన్నాధస్వామీ నయన పథగామీ భవతు మే | 1| 

జగన్నాధస్వామి ఒక్కొక్కసారి యమునాతీర వనాలలో మధురగానము చేస్తూ ఆనందంతో గోపికాముఖాలను , తుమ్మెదపద్మాలను చుంబిచు నట్లు చుంబించుచు , వినోదించుచుండును . లక్ష్మి , శివుడు , బ్రహ్మ , ఇంద్రుడు , గణపతి మున్నగు దేవతలంతా జగన్నాధస్వామి పాదముల 
నర్చించుచుందురు . అట్టి జగన్నాథస్వామి నా కన్నులకు కనుపడుగాక . 

భుజేసవ్యే వేణుం శిరసి శిఖిపింఛం కటితటే 
దుకూలం నేత్రాంతే సహచర కటాక్షం విదధతే | 
సదా శ్రీ మద్భృందావన వసతిలీలా పరిచయో 
జగన్నాధస్వామీ నయన పథగామీ భవతు మే |2 | 

ఎడమచేత్తో పిల్లనగ్రోవిని , తలపై పింఛమును , మొలపై పట్టుబట్టను , కడ కన్నులలో సహచరులపై కటాక్షమును ధరించి . ప్రతిరోజూ మనోహరమైన బృందావనంలో విహారలీలలు చేసే ఆ జగన్నాథస్వామి నా కనులకు కనుపడుగాక . 

మహంభోధేస్తీరే కనక రుచిరే నీలశిఖరే 

వసన్ ప్రాసాదాంత స్సహజ బలభద్రేణ బలినా | 
సుభద్రా మధ్యస్థ స్సకల సురసేవావసరదో 
జగన్నాధస్వామీ నయన పథగామీ భవతు మే | 3 | 

నల్లని శిఖరముగలిగి బంగారు కాంతితో మెరుస్తూ సముద్రతీరమున దివ్యభవనమున తోబుట్టువులైన సుభద్రా బలరాముల మధ్యనుండి సకలదేవతలకు సేవించుకునే అవకాశాన్నిస్తూ వెలసియున్న ఆ జగన్నాథ స్వామి నా కనులకు అగుపడు గాక . 

కృపాపారావార స్సజల జలదశ్రేణి రుచిరో 
రమావాణీ సోమస్ఫురదమల పద్మోద్భవముఖైః | 
సురేంద్రారారాధ్యై శ్శృతిగణ శీఖాగీత చరతో 
జగన్నాథస్వామీ నయన పథగామీ భవతు మే | | 4 

దయాసముద్రుడు , నీటితో నిండిన మబ్బులవలే మెరయువాడు , లక్ష్మి,సరస్వతి , చంద్ర , సూర్యాగ్నులు బ్రహ్మ మున్నగు దేవతా శ్రేష్ఠులచేత పూజింపబడువాడు , సర్వవేదములకు పైనుండు ఉపనిషత్తులచే వర్ణింపబడిన చరిత్రగలవాడు . అట్టి జగన్నాథస్వామి నా కనులకు అగుపడు గాక . 

రథారూఢోగచ్ఛన్ పథమిళిత భూదేవ పటలై 
స్తుతి ప్రాదుర్భావం ప్రతిపద ముపాకర్ణ్య సదయః | 
దయాసింధు ర్భన్దు స్సకల జగతాం సింధుసుతయా 

జగన్నాథస్వామీ నయన పథగామీ భవతు మే | 5 | 

దయాసింధువూ సకలలోక బంధువూ అయిన ఆ స్వామి లక్ష్మీదేవితో కూడి 
రథమునెక్కి వెళ్ళుచుండగా దారిలో అనేక బ్రాహ్మణులు అనేక రీతుల కొనియాడగా అతి శ్రద్ధతో ఆ స్తోత్రముల ప్రతిపదమునువిని వారి యందు 
ఎంతోదయచూపునట్టి జగన్నాథస్వామి నాకు అగుపడుగాక

పరబ్రహ్మాపీడః కువలయదళోత్పుల్ల నయనో 
నివాసీ నీలాద్రీ నిహిత చరణోఅనంత శిరసి | 
రసానందో రాధాసరసవపు రాలింగన సుఖో 
జగన్నాథస్వామీ నయన పథగామీ భవతు మే | | 6 

కలవరేకువలే వికసించిన కన్నులుకలవాడు , నీలాద్రివాసి , అనంతుడు , 
సర్పరాజు శిరమున కాలూనినవాడు , రసానంద స్వరూపుడు , రాధా శరీరాలింగన సుఖమునందియున్నవాడు . అట్టి జగన్నాథస్వామి నా కన్నుల 
కగుపడుగాక . 

నవై ప్రార్థ్యం రాజ్యం నచకనకతాం భోగవిభవాం 
నయాచేఅహం రమ్యాం నిఖిలజనకామ్యాం వరవధూం | 
సదాకాలేకాలే ప్రమథపతినా గీతచరితో 
జగన్నాథస్వామీ నయన పథగామీ భవతు మే | 7 | 

నాకు రాజ్యం వద్దు , బంగారంవద్దు . వైభవంవద్దు , అందరూ కోరుకునే 
అందమైన స్త్రీ కూడా వద్దు . సదా మహేశ్వరుడు పొగిడే దివ్య చరిత్రగల 
ఆ జగన్నాథస్వామి కన్నుల కగుపడుటయే నాకు కావలసినది . 

హరత్వం సంసారం ద్రుతతర మసారం సురపతే ! 
హరత్వం పాపానాం వితతమపరాం యాదవపతే ! 
అహోదీనానాధం నిహితమచలం నిశ్చితపదం 
జగన్నాథస్వామీ నయన పథగామీ భవతు మే | | 

ఓ దేవాధిదేవా ! అపారమైన నా యీ సంసారమును హరింపుము 
స్వామీ ! ఈ సంసారమునకు కారణమైన నా పాపములను చెదరగొట్టటుము. అయ్యో దీనుడనై దిక్కులేక కొండవలె బండనై యున్న నన్ను 
సర్వదా రక్షించుటకై ఆ జగన్నాథస్వామి నా కన్నులకగుపడుగాక . 

ఇతి శ్రీ శంకరాచార్య విరచిత జగన్నాథాష్టకము సమాప్తము . 

All copyrights reserved 2012 digital media act