జ్వాలాముఖీ స్తోత్రం. Jwalamukhi stotram Telugu

 జ్వాలాముఖీస్తోత్రమ్ 

ఓం నతాః స్తుతిపరాః సర్వే యస్యా నిత్యం దివౌకసః ।
తమో హృత్వా శఙ్కరస్య భూత్యై భూయాత్సదాశివా ॥ ౧॥

శ్రీసున్దరీం జగద్ధాత్రీం జ్వాలావ్యాప్తదిగన్తరామ్ ।
సురైః సిద్ధైః స్తుతాం భూపైః సుముఖీం నౌమ్యహం శివామ్ ॥ ౨॥

దైత్యానాం భటకోటికోటిముకుటాటోపానధః కుర్వతీం
     విఘ్నానాం కటకాన్యతీవ కటకాన్యాపాటయన్తీం స్ఫుటమ్ ।
భక్తానామభయం వరం చ దధతీం శాన్తాత్మనాం సర్వదా
     షడ్వక్త్రేణ జితాం క్రియావిరహతో జ్వాలాముఖీం నౌమ్యహమ్ ॥ ౩॥

బ్రహ్మాణం మధుకైటభౌ వధపరౌ సన్త్రాసయన్తౌ పరం
     నానారూపధరావతీవ భయదౌ స్థూలోన్నతౌ సంయుగే ।
తౌ హత్వా వినివర్తితాం కృతవతీం తన్మేదసా మేదినీం
     సర్వేషాం శుభదాయినీం భగవతీం జ్వాలాముఖీం నౌమ్యహమ్ ॥ ౪॥

సైన్యానాం మహిషాసురస్య మృతిదాం సింహాధిరూఢాం చ తాం
     నానాకారవిశేషసౌఖ్యజననీం దేహాన్తరే సంస్థితామ్ ।
బాలామధ్యమవృద్ధరూపరమణీం శ్రీసున్దరీం వైష్ణవీం
     స్త్రీరూపేణ జగద్విమోహనకరీం జ్వాలాముఖీం నౌమ్యహమ్ ॥ ౫॥

దేవానాం భయదాయకౌ సుకఠినౌ శుమ్భో నిశుమ్భస్తథా
     నానాశస్త్రధరౌ రిపూ ధృతిహరౌ తౌ చణ్డముణ్డాఙ్కితౌ ।
సఙ్గ్రామేఽప్యపరాజితౌ వికసితౌ ద్వౌ రక్తబీజాన్వితౌ
     హత్వైవం సుబలాం ప్రసన్నవదనాం జ్వాలాముఖీం నౌభ్యహమ్ ॥ ౬॥

సంసారార్ణవతారిణరిణీం రవిశశికోటిప్రభాం సుప్రభాం
     పాపాతఙ్కనివారిణీం హరిహరబ్రహ్మాదిభిః సంస్తుతామ్ ।
దారిద్ర్యస్య వినాశినీం సుకృతినాం జాడ్యం హరన్తీం భృశ-
     మజ్ఞానాన్ధమతేః కవిత్వజననీం జ్వాలాముఖీం నౌభ్యహమ్ ॥ ౭॥

రత్నపఞ్చకనామానం శ్రీసున్దర్యాః స్తవం వరమ్ ।
అవ్యాకులం యః పఠతి సోఽభీష్టాం సిద్ధిమాప్నుయాత్ ॥ ౮॥

జ్వాలాముఖి మహాజ్వాలే జ్వాలాపిఙ్గలలోచనే ।
జ్వాలాతేజీ మహాతేజీ జ్వాలాముఖి నమోఽస్తు తే ॥

ఇతి జ్వాలాముఖీస్తోత్రం సమ్పూర్ణమ్ 



All copyrights reserved 2012 digital media act