కామ కళా కాళి భుజంగ ప్రయాత స్తోత్రం (మహ వామకేశ్వర తంత్రం) kama Kala Kali bhujanga prayatha stotram with Telugu lyrics
కామ కళా కాళి భుజంగ ప్రయాత స్తోత్రం
శ్రీ గణేశాయ నమః ।
మహాకాల ఉవాచ ।
అథ వక్ష్యే మహేశాని దేవ్యాః స్తోత్రమనుత్తమమ్ ।
యస్య స్మరణమాత్రేణ విఘ్నా యాన్తి పరాఙ్ముఖాః ॥ ౧॥
విజేతుం ప్రతస్థే యదా కాలకస్యా-
సురాన్ రావణో ముఞ్జమాలిప్రవర్హాన్ ।
తదా కామకాలీం స తుష్టావ
వాగ్భిర్జిగీషుర్మృధే బాహువీర్య్యేణ సర్వాన్ ॥ ౨॥
మహావర్త్తభీమాసృగబ్ధ్యుత్థవీచీ-
పరిక్షాలితా శ్రాన్తకన్థశ్మశానే ।
చితిప్రజ్వలద్వహ్నికీలాజటాలే
శివాకారశావాసనే సన్నిషణ్ణామ్ ॥ ౩॥
మహాభైరవీయోగినీడాకినీభిః
కరాలాభిరాపాదలమ్బత్కచాభిః ।
భ్రమన్తీభిరాపీయ మద్యామిషాస్రాన్యజస్రం
సమం సఞ్చరన్తీం హసన్తీమ్ ॥ ౪॥
మహాకల్పకాలాన్తకాదమ్బినీ-
త్విట్పరిస్పర్ద్ధిదేహద్యుతిం ఘోరనాదామ్ ।
స్ఫురద్ద్వాదశాదిత్యకాలాగ్నిరుద్ర-
జ్వలద్విద్యుదోఘప్రభాదుర్నిరీక్ష్యామ్ ॥ ౫॥
లసన్నీలపాషాణనిర్మాణవేది-
ప్రభశ్రోణిబిమ్బాం చలత్పీవరోరుమ్ ।
సముత్తుఙ్గపీనాయతోరోజకుమ్భాం
కటిగ్రన్థితద్వీపికృత్త్యుత్తరీయామ్ ॥ ౬॥
స్రవద్రక్తవల్గన్నృముణ్డావనద్ధా-
సృగాబద్ధనక్షత్రమాలైకహారామ్ ।
మృతబ్రహ్మకుల్యోపక్లృప్తాఙ్గభూషాం
మహాట్టాట్టహాసైర్జగత్ త్రాసయన్తీమ్ ॥ ౭॥
నిపీతాననాన్తామితోద్ధృత్తరక్తో-
చ్ఛలద్ధారయా స్నాపితోరోజయుగ్మామ్ ।
మహాదీర్ఘదంష్ట్రాయుగన్యఞ్చదఞ్చ-
ల్లలల్లేలిహానోగ్రజిహ్వాగ్రభాగామ్ ॥ ౮॥
చలత్పాదపద్మద్వయాలమ్బిముక్త-
ప్రకమ్పాలిసుస్నిగ్ధసమ్భుగ్నకేశామ్ ।
పదన్యాససమ్భారభీతాహిరాజా-
ననోద్గచ్ఛదాత్మస్తుతివ్యస్తకర్ణామ్ ॥ ౯॥
మహాభీషణాం ఘోరవింశార్ద్ధవక్త్రై-
స్తథాసప్తవింశాన్వితైర్లోచనైశ్చ ।
పురోదక్షవామే ద్వినేత్రోజ్జ్వలాభ్యాం
తథాన్యాననే త్రిత్రినేత్రాభిరామామ్ ॥ ౧౦॥
లసద్వీపిహర్య్యక్షఫేరుప్లవఙ్గ-
క్రమేలర్క్షతార్క్షద్విపగ్రాహవాహైః ।
ముఖైరీదృశాకారితైర్భ్రాజమానాం
మహాపిఙ్గలోద్యజ్జటాజూటభారామ్ ॥ ౧౧॥
భుజైః సప్తవింశాఙ్కితైర్వామభాగే
యుతాం దక్షిణే చాపి తావద్భిరేవ ।
క్రమాద్రత్నమాలాం కపాలం చ శుష్కం
తతశ్చర్మపాశం సుదీర్ఘం దధానామ్ ॥ ౧౨॥
తతః శక్తిఖట్వాఙ్గముణ్డం భుశుణ్డీం
ధనుశ్చక్రఘణ్టాశిశుప్రేతశైలాన్ ।
తతో నారకఙ్కాలబభ్రూరగోన్మాద-
వంశీం తథా ముద్గరం వహ్నికుణ్డమ్ ॥ ౧౩॥
అధో డమ్మరుం పారిఘం భిన్దిపాలం
తథా మౌశలం పట్టిశం ప్రాశమేవమ్ ।
శతఘ్నీం శివాపోతకం చాథ దక్షే
మహారత్నమాలాం తథా కర్త్తుఖడ్గౌ ॥ ౧౪॥
చలత్తర్జ్జనీమఙ్కుశం దణ్డముగ్రం
లసద్రత్నకుమ్భం త్రిశూలం తథైవ ।
శరాన్ పాశుపత్యాంస్తథా పఞ్చ కున్తం
పునః పారిజాతం ఛురీం తోమరం చ ॥ ౧౫॥
ప్రసూనస్రజం డిణ్డిమం గృధ్రరాజం
తతః కోరకం మాంసఖణ్డం శ్రువం చ ।
ఫలం బీజపూరాహ్వయం చైవ సూచీం
తథా పర్శుమేవం గదాం యష్టిముగ్రామ్ ॥ ౧౬॥
తతో వజ్రముష్టిం కుణప్పం సుఘోరం
తథా లాలనం ధారయన్తీం భుజైస్తైః ।
జవాపుష్పరోచిష్ఫణీన్ద్రోపక్లృప్త-
క్వణన్నూపురద్వన్ద్వసక్తాఙ్ఘ్రిపద్మామ్ ॥ ౧౭॥
మహాపీతకుమ్భీనసావద్ధనద్ధ
స్ఫురత్సర్వహస్తోజ్జ్వలత్కఙ్కణాం చ ।
మహాపాటలద్యోతిదర్వీకరేన్ద్రా-
వసక్తాఙ్గదవ్యూహసంశోభమానామ్ ॥ ౧౮॥
మహాధూసరత్త్విడ్భుజఙ్గేన్ద్రక్లృప్త-
స్ఫురచ్చారుకాటేయసూత్రాభిరామామ్ ।
చలత్పాణ్డురాహీన్ద్రయజ్ఞోపవీత-
త్విడుద్భాసివక్షఃస్థలోద్యత్కపాటామ్ ॥ ౧౯॥
పిషఙ్గోరగేన్ద్రావనద్ధావశోభా-
మహామోహబీజాఙ్గసంశోభిదేహామ్ ।
మహాచిత్రితాశీవిషేన్ద్రోపక్లృప్త-
స్ఫురచ్చారుతాటఙ్కవిద్యోతికర్ణామ్ ॥ ౨౦॥
వలక్షాహిరాజావనద్ధోర్ధ్వభాసి-
స్ఫురత్పిఙ్గలోద్యజ్జటాజూటభారామ్ ।
మహాశోణభోగీన్ద్రనిస్యూతమూణ్డో-
ల్లసత్కిఙ్కణీజాలసంశోభిమధ్యామ్ ॥ ౨౧॥
సదా సంస్మరామీదృశోం కామకాలీం
జయేయం సురాణాం హిరణ్యోద్భవానామ్ ।
స్మరేయుర్హి యేఽన్యేఽపి తే వై జయేయు-
ర్విపక్షాన్మృధే నాత్ర సన్దేహలేశః ॥ ౨౨॥
పఠిష్యన్తి యే మత్కృతం స్తోత్రరాజం
ముదా పూజయిత్వా సదా కామకాలీమ్ ।
న శోకో న పాపం న వా దుఃఖదైన్యం
న మృత్యుర్న రోగో న భీతిర్న చాపత్ ॥ ౨౩॥
ధనం దీర్ఘమాయుః సుఖం బుద్ధిరోజో
యశః శర్మభోగాః స్త్రియః సూనవశ్చ ।
శ్రియో మఙ్గలం బుద్ధిరుత్సాహ ఆజ్ఞా
లయః శర్మ సర్వ విద్యా భవేన్ముక్తిరన్తే ॥ ౨౪॥
॥ ఇతిశ్రీమహావామకేశ్వరతన్త్రే కాలకేయహిరణ్యపురవిజయే
రావణకృతం కామకలాకాలీభుజఙ్గప్రయాతస్తోత్రరాజం సమ్పూర్ణమ్
Comments
Post a Comment