కోదండపాణి సుప్రభాతం kodandapani suprabatham
కోదండపాణి సుప్రభాతం
వన్దే వేఙ్కటశేషార్యవత్సవంశశిరోమణిమ్ ।
వాత్స్యశ్రీవరదాచార్యతనయం కరుణానిధిమ్ ॥
శ్రీరామచన్ద్ర కరుణావరుణాలయ శ్రీ-
సీతాముఖామ్బుజవికాసక బాలసూర్య!।
సౌమిత్రిమిత్ర ! భరతాభిరతాప్తమిత్ర !
శత్రుఘ్న హే ! రఘుపతే ! తవ సుప్రభాతమ్ ॥ ౧॥
భాస్వానుదేతి వికచాని సరోరుహాణి
పశ్య స్మరన్ మధురకృజితషడ్పదాని ।
త్వద్వీక్షణోన్మిషితనాభిసరోజవేధో
వేదధ్వనేః రఘుపతే ! తవ సుప్రభాతమ్ ॥ ౨॥
త్వాం బోధయన్తి పరితః శ్రుతయః శ్రుతీనాం
సారేణ సానుజ! భవత్ప్రతిబోధకేన ।
శ్లోకేన కౌశిక ముఖోద్గలితేన కర్ణ-
పీయూషవద్రఘుపతే ! తవ సుప్రభాతమ్ ॥ ౩॥
త్వాం బోధయన్తి విబుధాః శ్రుతిభోగ్యవేణు-
వీణామృదఙ్గపణవాదితతానువాదైః ।
స్తోత్రైర్ధరాసురవరస్తుతిఘోషమిత్రైః
ఆకర్ణ్యతాం రఘుపతే ! తవ సుప్రభాతమ్ ॥ ౪॥
ఉద్యానవాసరసికాః శుకశారికాద్యాః
హృద్యా హరేహరిరితి ద్విజఘోషహృద్యైః ।
హృద్యాం ముదం విదధతీహ తవాపదాన-
పద్యైర్ద్విజాః రఘుపతే ! తవ సుప్రభాతమ్ ॥ ౫॥
బ్రహ్మా శివశ్శతమఖశ్చ మఖాశనౌఘైః
త్వద్ధామ గోపురభువి ప్రతిపాలయన్తి ।
త్వత్పాదపఙ్కజసిషేవిషవోఽవిశేష-
భక్తైర్ద్విజై రఘుపతే ! తవ సుప్రభాతమ్ ॥ ౬॥
సూర్యేన్దుసన్నిధివశాదివ దేవసఙ్ఘః
సోత్ఫుల్లవక్త్రకమలాఞ్జలికుడ్మలోకైః ।
మన్దారసున్దరకరైః ప్రతిపాల్యతేఽర్చా-
బద్ధాదరైః రఘుపతే ! తవ సుప్రభాతమ్ ॥ ౭॥
తీర్థాభిషేకపరిశుద్ధధియోఽర్చకాస్తే
పూర్ణాభిషేకకలశాః పరిచారకాశ్చ ।
స్తుత్వా భవన్తమభిషేకముఖోపచార-
చర్యోత్సుకా రఘుపతే ! తవ సుప్రభాతమ్ ॥ ౮॥
సీతాముఖేన్దుసవిధేఽపి సదా ప్రసన్నం
మన్దస్మితేన మధురం సుధయేవ లోకైః ।
లమ్బాళకాళిలలితం తవ వక్త్రపద్మం
సంశోభతాం రఘుపతే ! తవ సుప్రభాతమ్ ॥ ౯॥
శ్రీకోసలేశ్వరపురాకృతభాగ్యరాశే !
శ్రీకోసలేన్ద్రతనయానయనాభిరామ!।
సాకేతసాధుకులకాఙ్క్షితకల్పకశ్రీః !
సీతామనోహరమణే ! తవ సుప్రభాతమ్ ॥ ౧౦॥
ఉద్దణ్డశౌణ్డభుజఖణ్డితఖణ్డపర్శు-
కోదణ్డచణ్డరవపిణ్డితసాణ్డజాణ్డ!।
కోదణ్డదణ్డవరమణ్డితబాహుదణ్డ !
శ్రీఖణ్డచర్చితతనో ! తవ సుప్రభాతమ్ ॥ ౧౧॥
ఇత్థం వేఙ్కటశేషేణ సుప్రభాతస్తుతిః కృతా ।
శ్రీరామచరణామ్భోజయుగభూషా సమర్పితా ॥ ౧౨॥
నీలోత్పలాని సరసీష్విహ సఙ్కుచన్తి
సాపత్రపాణి తవ దృగ్తులయోర్విలాసే ।
ధామాని తే చ వికచాని సరోరుహాణి
శ్రీరామచన్ద్రదయితే ! తవ సుప్రభాతమ్ ॥ ౧౩॥
ప్రాతస్సువర్ణమణిదర్పణనాయికాస్య
వీక్షాం వదన్తి సుధియః శుభమేవ పత్యుః ।
సర్వం త్వదాననవిలోకనతోఽస్య సిధ్యేత్
ఉత్తిష్ఠ మైథిలసుతే ! తవ సుప్రభాతమ్ ॥ ౧౪॥
॥ ఇతి శ్రీకోదణ్డపాణిసుప్రభాతం సమాప్తమ్
All copyrights reserved 2012 digital media act
Comments
Post a Comment