లక్ష్మీ కవచం (తంత్ర గ్రంథ) lakshmi kavacham
శ్రీలక్ష్మీకవచమ్ తన్త్రోక్త
శ్రీగణేశాయ నమః ।
ఓం అస్య శ్రీలక్ష్మీకవచస్తోత్రస్య, శ్రీఈశ్వరో దేవతా,
అనుష్టుప్ ఛన్దః, శ్రీలక్ష్మీప్రీత్యర్థే పాఠే వినియోగః ।
ఓం లక్ష్మీ మే చాగ్రతః పాతు కమలా పాతు పృష్ఠతః ।
నారాయణీ శీర్షదేశే సర్వాఙ్గే శ్రీస్వరూపిణీ ॥ ౧॥
రామపత్నీ తు ప్రత్యఙ్గే సదాఽవతు శమేశ్వరీ।
విశాలాక్షీ యోగమాయా కౌమారీ చక్రిణీ తథా ॥ ౨॥
జయదాత్రీ ధనదాత్రీ పాశాక్షమాలినీ శుభా ।
హరిప్రియా హరిరామా జయఙ్కరీ మహోదరీ ॥ ౩॥
కృష్ణపరాయణా దేవీ శ్రీకృష్ణమనమోహినీ ।
జయఙ్కరీ మహారౌద్రీ సిద్ధిదాత్రీ శుభఙ్కరీ ॥ ౪॥
సుఖదా మోక్షదా దేవీ చిత్రకూటనివాసినీ ।
భయం హరతు భక్తానాం భవబన్ధం విముచ్యతు ॥ ౫॥
కవచం తన్మహాపుణ్యం యః పఠేద్భక్తిసంయుతః ।
త్రిసన్ధ్యమేకసన్ధ్యం వా ముచ్యతే సర్వసఙ్కటాత్ ॥ ౬॥
ఏతత్కవచస్య పఠనం ధనపుత్రవివర్ధనమ్ ।
భీతిర్వినాశనఞ్చైవ త్రిషు లోకేషు కీర్తితమ్ ॥ ౭॥
భూర్జపత్రే సమాలిఖ్య రోచనాకుఙ్కుమేన తు ।
ధారణాద్గలదేశే చ సర్వసిద్ధిర్భవిష్యతి ॥ ౮॥
అపుత్రో లభతే పుత్ర ధనార్థీ లభతే ధనమ్ ।
మోక్షార్థీ మోక్షమాప్నోతి కవచస్య ప్రసాదతః ॥ ౯॥
గర్భిణీ లభతే పుత్రం వన్ధ్యా చ గర్భిణీ భవేత్ ।
ధారయేద్యపి కణ్ఠే చ అథవా వామబాహుకే ॥ ౧౦॥
యః పఠేన్నియతం భక్త్యా స ఏవ విష్ణువద్భవేత్ ।
మృత్యువ్యాధిభయం తస్య నాస్తి కిఞ్చిన్మహీతలే ॥ ౧౧॥
పఠేద్వా పాఠయేద్వాఽపి శృణుయాచ్ఛ్రావయేద్యది ।
సర్వపాపవిముక్తస్తు లభతే పరమాం గతిమ్ ॥ ౧౨॥
సఙ్కటే విపదే ఘోరే తథా చ గహనే వనే ।
రాజద్వారే చ నౌకాయాం తథా చ రణమధ్యతః ॥ ౧౩॥
పఠనాద్ధారణాదస్య జయమాప్నోతి నిశ్చితమ్ ।
అపుత్రా చ తథా వన్ధ్యా త్రిపక్షం శృణుయాద్యది ॥ ౧౪॥
సుపుత్రం లభతే సా తు దీర్ఘాయుష్కం యశస్వినమ్ ।
శృణుయాద్యః శుద్ధబుద్ధ్యా ద్వౌ మాసౌ విప్రవక్త్రతః ॥ ౧౫॥
సర్వాన్కామానవాప్నోతి సర్వబన్ధాద్విముచ్యతే ।
మృతవత్సా జీవవత్సా త్రిమాసం శ్రవణం యది ॥ ౧౬॥
రోగీ రోగాద్విముచ్యేత పఠనాన్మాసమధ్యతః ।
లిఖిత్వా భూర్జపత్రే చ అథవా తాడపత్రకే ॥ ౧౭॥
స్థాపయేన్నియతం గేహే నాగ్నిచౌరభయం క్వచిత్ ।
శృణుయాద్ధారయేద్వాపి పఠేద్వా పాఠయేదపి ॥ ౧౮॥
యః పుమాన్సతతం తస్మిన్ప్రసన్నాః సర్వదేవతాః ।
బహునా కిమిహోక్తేన సర్వజీవేశ్వరేశ్వరీ ॥ ౧౯॥
ఆద్యా శక్తిర్మహాలక్ష్మీర్భక్తానుగ్రహకారిణీ ।
ధారకే పాఠకే చైవ నిశ్చలా నివసేద్ ధ్రువమ్ ॥ ౨౦॥
॥ ఇతి తన్త్రోక్తం లక్ష్మీకవచం సమ్పూర్ణమ్ ॥
Comments
Post a Comment