మన్యు సూక్తం (ఋగ్వేదం) manyu suktam with Telugu lyrics

మన్యు సూక్తం (ఋగ్వేదం)

ఋగ్వేద సంహితా; మణ్డలం ౧౦; సూక్తం ౮౩,౮౪

 

యస్తే” మన్యో‌உవి’ధద్ వజ్ర సాయక సహ ఓజః’ పుష్యతి విశ్వ’మానుషక్ | 

సాహ్యామ దాసమార్యం త్వయా” యుజా సహ’స్కృతేన సహ’సా సహ’స్వతా || ౧ ||

 

మన్యురిన్ద్రో” మన్యురేవాస’ దేవో మన్యుర్ హోతా వరు’ణో జాతవే”దాః | 

మన్యుం విశ’ ఈళతే మాను’షీర్యాః పాహి నో” మన్యో తప’సా సజోషా”ః || ౨ ||

 

అభీ”హి మన్యో తవసస్తవీ”యాన్ తప’సా యుజా వి జ’హి శత్రూ”న్ | 

అమిత్రహా వృ’త్రహా ద’స్యుహా చ విశ్వా వసూన్యా భ’రా త్వం నః’ || ౩ ||

 

త్వం హి మ”న్యో అభిభూ”త్యోజాః స్వయమ్భూర్భామో” అభిమాతిషాహః | 

విశ్వచ’ర్-షణిః సహు’రిః సహా”వానస్మాస్వోజః పృత’నాసు ధేహి || ౪ ||

 

అభాగః సన్నప పరే”తో అస్మి తవ క్రత్వా” తవిషస్య’ ప్రచేతః | 

తం త్వా” మన్యో అక్రతుర్జి’హీళాహం స్వాతనూర్బ’లదేయా”య మేహి’ || ౫ ||

 

అయం తే” అస్మ్యుప మేహ్యర్వాఙ్ ప్ర’తీచీనః స’హురే విశ్వధాయః | 

మన్యో” వజ్రిన్నభి మామా వ’వృత్స్వహనా”వ దస్యూ”న్ ఋత బో”ధ్యాపేః || ౬ ||

 

అభి ప్రేహి’ దక్షిణతో భ’వా మే‌உధా” వృత్రాణి’ జఙ్ఘనావ భూరి’ | 

జుహోమి’ తే ధరుణం మధ్వో అగ్ర’ముభా ఉ’పాంశు ప్ర’థమా పి’బావ || ౭ ||

 

త్వయా” మన్యో సరథ’మారుజంతో హర్ష’మాణాసో ధృషితా మ’రుత్వః | 

తిగ్మేష’వ ఆయు’ధా సంశిశా”నా అభి ప్రయం”తు నరో” అగ్నిరూ”పాః || ౮ ||

 

అగ్నిరి’వ మన్యో త్విషితః స’హస్వ సేనానీర్నః’ సహురే హూత ఏ”ధి | 

హత్వాయ శత్రూన్ వి భ’జస్వ వేద ఓజో మిమా”నో విమృధో” నుదస్వ || ౯ ||

 

సహ’స్వ మన్యో అభిమా”తిమస్మే రుజన్ మృణన్ ప్ర’మృణన్ ప్రేహి శత్రూ”న్ | 

ఉగ్రం తే పాజో” నన్వా రు’రుధ్రే వశీ వశం” నయస ఏకజ త్వమ్ || ౧౦ ||

 

ఏకో” బహూనామ’సి మన్యవీళితో విశం”విశం యుధయే సం శి’శాధి | 

అకృ’త్తరుక్ త్వయా” యుజా వయం ద్యుమంతం ఘోషం” విజయాయ’ కృణ్మహే || ౧౧ ||

 

విజేషకృదిన్ద్ర’ ఇవానవబ్రవో(ఓ)౩’‌உస్మాకం” మన్యో అధిపా భ’వేహ | 

ప్రియం తే నామ’ సహురే గృణీమసి విద్మాతముత్సం యత’ ఆబభూథ’ || ౧౨ ||

 

ఆభూ”త్యా సహజా వ’జ్ర సాయక సహో” బిభర్ష్యభిభూత ఉత్త’రమ్ | 

క్రత్వా” నో మన్యో సహమేద్యే”ధి మహాధనస్య’ పురుహూత సంసృజి’ || ౧౩ ||

 

సంసృ’ష్టం ధన’ముభయం” సమాకృ’తమస్మభ్యం” దత్తాం వరు’ణశ్చ మన్యుః | 

భియం దధా”నా హృద’యేషు శత్ర’వః పరా”జితాసో అప నిల’యన్తామ్ || ౧౪ ||

 

ధన్వ’నాగాధన్వ’ నాజిఞ్జ’యేమ ధన్వ’నా తీవ్రాః సమదో” జయేమ |

ధనుః శత్రో”రపకామం కృ’ణోతి ధన్వ’ నాసర్వా”ః ప్రదిశో” జయేమ ||

భద్రం నో అపి’ వాతయ మనః’ ||

 

ఓం శాన్తా’ పృథివీ శి’వమన్తరిక్షం ద్యౌర్నో” దేవ్య‌உభ’యన్నో అస్తు |

శివా దిశః’ ప్రదిశ’ ఉద్దిశో” న‌உఆపో” విశ్వతః పరి’పాన్తు సర్వతః శాన్తిః శాన్తిః శాన్తిః’ ||