శివకృత ఆమ్నాయ స్తోత్రం (రూద్రయామళ తంత్రే) Shiva krutha amnaya stotram Telugu
శివకృత ఆమ్నాయ స్తోత్రం (రూద్రయామళ తంత్రే)
అథ రుద్రయామలతః శివవిరచితం ఆమ్నాయస్తోత్రమ్ ।
శ్రీనాథాదిగురుత్రయం గణపతిం పీఠత్రయం భైరవమ్ ।
సిద్ధౌఘం వటుకత్రయం పదయుగం దూతీక్రమం మణ్డలమ్ ॥
వీరాన్ద్వ్యష్టచతుష్కషష్టినవకం వీరావలీపఞ్చకమ్ ।
శ్రీమన్మాలినిమన్త్రరాజసహితం వన్దే గురోర్మణ్డలమ్ ॥
(గురుపాదుకామనుముచ్చార్య సుముఖాదిభిః
పఞ్చముద్రాభిః శ్రీగురుం ప్రణమ్య)
పూర్వామ్నాయః -
శుద్ధవిద్యా చ బాలా చ ద్వాదశార్ధా మతఙ్గినీ ।
ద్విజత్వసాధినీ విద్యా గాయత్రీ వేదమాతృకా ॥ ౧॥
గాణపత్యం కార్తికేయం మృత్యుఞ్జయం నీలకణ్ఠమ్ ।
త్ర్యమ్బకం జాతవేదాశ్చ తథా ప్రత్యఙ్గిరాదయః ॥ ౨॥
ముఖాత్తత్పురుషాజ్జాతా ద్వికోటీమన్త్రనాయికాః ।
ఏతాః కామగిరీన్ద్రాశ్చ పూర్వామ్నాయస్య దేవతాః ॥ ౩॥
గురుత్రయాదిపీఠాన్తం చతుర్వింశత్సహస్రకమ్ ।
ఏతదావరణోపేతం పూర్వామ్నాయం భజామ్యహమ్ ॥ ౪॥
విశుద్ధౌ చిన్తయేద్ధీమాన్ పూర్వామ్నాయస్య దేవతాః ।
దక్షిణామ్నాయః -
సౌభాగ్యవిద్యా బగళా వారాహీ వటుకస్తథా ॥ ౫॥
శ్రీతిరస్కరిణీ ప్రోక్తా మహామాయా ప్రకీర్తితా ।
అఘోరం శరభం ఖఙ్గరావణం వీరభద్రకమ్ ॥ ౬॥
రౌద్రం శాస్తా పాశుపతాద్యస్త్రశస్త్రాదిభైరవాః ।
దక్షిణామూర్తిమన్త్రాద్యాః శైవాగమసముద్భవాః ॥ ౭॥
అఘోరముఖసమ్భూతం మదంశం కోటిసఙ్ఖ్యకమ్ ।
పూర్వపీఠస్థితా దేవి దక్షిణామ్నాయదేవతాః ॥ ౮॥
ద్విసహస్రం తు దేవ్యస్తాః పరివారసమన్వితాః ।
భైరవాదిపదద్వన్ద్వం భజే దక్షిణముత్తమమ్ ॥ ౯॥
అనాహతే చిన్తయేచ్చ దక్షిణామ్నాయదేవతాః ।
పశ్చిమ్నాయాయః -
లోపాముద్రా మహాదేవీ అమ్బా చ భువనేశ్వరీ ॥ ౧౦॥
అన్నపూర్ణా కామకలా సర్వసిద్ధిప్రదాయినీ।
సుదర్శనం వైనతేయం కార్తవీర్యం నృసింహకమ్ ॥ ౧౧॥
నామత్రయం రామమన్త్రం గోపాలం సౌరమేవ చ ।
ధన్వన్తరీన్ద్వజాలం చ ఇన్ద్రాదిసురమన్త్రకమ్ ॥ ౧౨॥
దత్తాత్రేయం ద్వాదశాష్టౌ వైష్ణవాగమచోదితాః ।
సద్యోజాతముఖోద్భూతా మన్త్రాః స్యుః కోటిసఙ్ఖ్యకాః ॥ ౧౩॥
ఏతా జాలన్ధ్రపీఠస్థాః పశ్చిమామ్నాయదేవతాః ।
దూత్యాది చ చతుష్షష్టి సిద్ధాన్తం త్రిసహస్రకమ్ ॥ ౧౪॥
ఆమ్నాయ పశ్చిమం వన్దే సర్వదా సర్వకామదమ్ ।
మణిపూరే చిన్తనీయాః పశ్చిమామ్నాయదేవతాః ॥ ౧౫॥
ఉత్తరామ్నాయః -
తురీయామ్బా మహార్ధా చ అశ్వారూఢా తథైవ చ ।
మిశ్రామ్బా చ మహాలక్ష్మీః శ్రీమద్వాగ్వాదినీ అపి ॥ ౧౬॥
దుర్గా కాళీ తతశ్చణ్డీ నకులీ చ పుళిన్దినీ ।
రేణుకా లక్ష్మివాగీశమాతృకాద్యాః స్వయంవరా ॥ ౧౭॥
పఞ్చామ్నాయసమోపేతం శ్రీవిద్యాఖ్యం మదంశకమ్ ।
వామదేవముఖోద్భూతా ద్వికోటిమన్త్రనాయికాః ॥ ౧౮॥
ఏతా ఓడ్యాణపీఠస్థాః శాక్తాగమసముద్భవాః ।
ద్విసహస్రం తు దేవ్యస్తాః పరివారసమన్వితాః ॥ ౧౯॥
ముద్రాదినవకం చైవ సిద్ధానాం మిథునం తథా ।
వీరావళీపఞ్చకం చ భజేదామ్నాయముత్తరమ్ ॥ ౨౦॥
స్వాధిష్ఠానే చిన్తనీయా ఉత్తరామ్నాయదేవతాః ।
ఊర్ధ్వామ్నాయః -
పరాపరా చ సా దేవీ పరాశామ్భవమేవ చ ॥ ౨౧॥
ప్రాసాదం దహరం హంసం మహావాక్యాదికం పరమ్ ।
పఞ్చాక్షరం మహామన్త్రం తారకం జన్మతారకమ్ ॥ ౨౨॥
ఈశానముఖసమ్భూతం స్వాత్మానన్దప్రకాశకమ్ ।
కోటిసఙ్ఖ్యా మహాదేవి మద్రూపాః సర్వసిద్ధిదాః ॥ ౨౩॥
ఏతాః శామ్భవపీఠస్థాః సహస్రపరివారితాః ।
ఆరాధ్య మాలినీపూర్వం మణ్డలాన్తం తథైవ చ ॥ ౨౪॥
సాయుజ్యహేతుకం నిత్యం వన్దే చోర్ధ్వమకల్మషమ్ ।
ఊర్ధ్వామ్నాయమనూన్నిత్యం మూలాధారే విభావయేత్ ॥ ౨౫॥
అనుత్తరామ్నాయః -
స్మర్తవ్యా పాదుకా పూర్వం చరణం తదనన్తరమ్ ।
పఞ్చామ్బా నవనాథాశ్చ మూలవిద్యాస్తతః పరమ్ ।
ఆధారవిద్యాషట్కం చ పునరఙ్ఘ్రిద్వయం క్రమాత్ ॥ ౨౬॥
శామ్భవీ చాథ హృల్లేఖా సమయా పరబోధినీ ।
కౌలపఞ్చాక్షరీ పఞ్చదశార్ణాఽనుత్తరాత్మికా ॥ ౨౭॥
షోడశీ పూర్తివిద్యా చ మహాత్రిపురసున్దరీ ।
ఊర్ధ్వశ్రీపాదుకాపూర్వం చరణాన్తం గురుక్రమాత్ ॥ ౨౮॥
పశ్చాదనుతరం వన్దే పరబ్రహ్మస్వరూపిణీమ్ ।
అనుత్తరామ్నాయమనూనాజ్ఞానాచక్రే విభావయేత్ ॥ ౨౯॥
శ్రీనాథగురుమన్త్రాదీన్ మణ్డలాన్తం యథాక్రమమ్ ।
సప్తకోటిమహామన్త్రం ద్వాదశాన్తే సదా స్మరేత్ ॥ ౩౦॥
శుచిర్వాప్యశుచిర్వాపి గచ్ఛంస్తిష్ఠన్ స్వపన్నపి ।
మన్త్రైకశరణో విద్వాన్ మనసాపి సదా స్మరన్ ॥ ౩౧॥
తత్తత్సిద్ధిం చ సాహస్రం జపేత్సాధకపుఙ్గవః ।
జపాన్తే శుద్ధమాలా చ ఆమ్నాయస్తోత్రముత్తమమ్ ॥ ౩౨॥
లలితానామసాహస్రం సర్వపూర్తికరం స్తవమ్ ।
స్తవరాజం చ పఞ్చైతే భక్తః ప్రతిదినం పఠేత్ ॥ ౩౩॥
భుక్త్వా భోగాన్ యథాకామం సర్వభూతహితే రతః ।
సభార్యాపుత్రసౌభాగ్యః సభూతిః పశుమాన్ భవేత్ ॥ ౩౪॥
ఏకవారం జపేదేతత్ కోటియజ్ఞఫల లభేత్ ।
ఏతద్విజ్ఞానమాత్రేణ సర్వేషాం దేశికోత్తమః ॥
శివసాయుజ్యమాప్నోతి శివయోరేవశాసనాత్ ॥ ౩౫॥
॥ ఇతి రుద్రయామలతన్త్రే ఉమమాహేశ్వరసంవాదే
శివేనరచితమామ్నాయస్తోత్రం సమ్పూర్ణమ్ ॥
All copyrights reserved 2012 digital media act
Comments
Post a Comment