శ్రీ హనుమాన్ కవచం (నారద పురాణం) sri hanuman kavacham telugu

శ్రీ హనుమాన్ కవచం (నారద పురాణం)

సనత్కుమార ఉవాచ ।
కార్తవీర్యస్య కవచం కథితం తే మునీశ్వర ।
మోహవిధ్వంసనం జైత్రం మారుతేః కవచం శృణు ॥ ౧॥

యస్య సన్ధారణాత్సద్యః సర్వే నశ్యన్త్యుపద్రవాః ।
భూతప్రేతారిజం దుఃఖం నాశమేతి న సంశయః ॥ ౨॥

ఏకదాహం గతో ద్రష్టుం రామం రమయతాం వరమ్ ।
ఆనన్దవనికాసంస్థం ధ్యాయన్తం స్వాత్మనః పదమ్ ॥ ౩॥

తత్ర రామం రమానాథం పూజితం త్రిదశేశ్వరైః ।
నమస్కృత్య తదాదిష్టమాసనం స్థితవాన్ పురః ॥ ౪॥

తత్ర సర్వం మయా వృత్తం రావణస్య వధాన్తకమ్ ।
పృష్టం ప్రోవాచ రాజేన్ద్రః శ్రీరామః స్వయమాదరాత్ ॥ ౫॥

తతః కథాన్తే భగవాన్మారుతేః కవచం దదౌ ।
మహ్యం తత్తే ప్రవక్ష్యామి న ప్రకాశ్యం హి కుత్రచిత్ ॥ ౬॥

భవిష్యదేతన్నిర్ద్దిష్టం బాలభావేన నారద ।
శ్రీరామేణాఞ్జనాసూనోర్భుక్తిముక్తిప్రదాయకమ్ ॥ ౭॥

అథ కవచమ్ ।
హనుమాన్ పూర్వతః పాతు దక్షిణే పవనాత్మజః ।
పాతు ప్రతీచ్యామక్షఘ్నః సౌమ్యే సాగరతారకః ॥ ౮॥

ఊర్ధ్వం పాతు కపిశ్రేష్ఠః కేసరిప్రియనన్దనః ।
అధస్తాద్విష్ణుభక్తస్తు పాతు మధ్యే చ పావనిః ॥ ౯॥

లఙ్కావిదాహకః పాతు సర్వాపద్భ్యో నిరన్తరమ్ ।
సుగ్రీవసచివః పాతు మస్తకం వాయునన్దనః ॥ ౧౦॥

భాలం పాతు మహావీరో భ్రువోర్మధ్యే నిరన్తరమ్ ।
నేత్రే ఛాయాపహారీ చ పాతు నః ప్లవగేశ్వరః ॥ ౧౧॥

కపోలౌ కర్ణమూలే చ పాతు శ్రీరామకిఙ్కరః ।
నాసాగ్రమఞ్జనాసూనుః పాతు వక్త్రం హరీశ్వరః ॥ ౧౨॥

పాతు కణ్ఠే తు దైత్యారిః స్కన్ధౌ పాతు సురారిజిత్ ।
భుజౌ పాతు మహాతేజాః కరౌ చ చరణాయుధః ॥ ౧౩॥

నఖాన్నఖాయుధః పాతు కుక్షౌ పాతు కపీశ్వరః ।
వక్షో ముద్రాపహారీ చ పాతు పార్శ్వే భుజాయుధః ॥ ౧౪॥

లఙ్కానిభర్జనః పాతు పృష్ఠదేశే నిరన్తరమ్ ।
నాభిం శ్రీరామభక్తస్తు కటిం పాత్వనిలాత్మజః ॥ ౧౫॥

గుహ్యం పాతు మహాప్రాజ్ఞః సక్థినీ అతిథిప్రియః ।
ఊరూ చ జానునీ పాతు లఙ్కాప్రాసాదభఞ్జనః ॥ ౧౬॥

జఙ్ఘే పాతు కపిశ్రేష్ఠో గుల్ఫౌ పాతు మహాబలః ।
అచలోద్ధారకః పాతు పాదౌ భాస్కరసన్నిభః ॥ ౧౭॥

అఙ్గాని పాతు సత్త్వాఢ్యః పాతు పాదాఙ్గులీః సదా ।
ముఖాఙ్గాని మహాశూరః పాతు రోమాణి చాత్మవాన్ ॥ ౧౮॥

దివారాత్రౌ త్రిలోకేషు సదాగతిసుతోఽవతు ।
స్థితం వ్రజన్తమాసీనం పిబన్తం జక్షతం కపిః ॥ ౧౯॥

లోకోత్తరగుణః శ్రీమాన్ పాతు త్ర్యమ్బకసమ్భవః ।
ప్రమత్తమప్రమత్తం వా శయానం గహనేఽమ్బుని ॥ ౨౦॥

స్థలేఽన్తరిక్షే హ్యగ్నౌ వా పర్వతే సాగరే ద్రుమే ।
సఙ్గ్రామే సఙ్కటే ఘోరే విరాడ్రూపధరోఽవతు ॥ ౨౧॥

డాకినీశాకినీమారీకాలరాత్రిమరీచికాః ।
శయానం మాం విభుః పాతు పిశాచోరగరాక్షసీః ॥ ౨౨॥

దివ్యదేహధరో ధీమాన్సర్వసత్త్వభయఙ్కరః ।
సాధకేన్ద్రావనః శశ్వత్పాతు సర్వత ఏవ మామ్ ॥ ౨౩॥

యద్రూపం భీషణం దృష్ట్వా పలాయన్తే భయానకాః ।
స సర్వరూపః సర్వజ్ఞః సృష్టిస్థితికరోఽవతు ॥ ౨౪॥

స్వయం బ్రహ్మా స్వయం విష్ణుః సాక్షాద్దేవో మహేశ్వరః ।
సూర్యమణ్డలగః శ్రీదః పాతు కాలత్రయేఽపి మామ్ ॥ ౨౫॥

యస్య శబ్దముపాకర్ణ్య దైత్యదానవరాక్షసాః ।
దేవా మనుష్యాస్తిర్యఞ్చః స్థావరా జఙ్గమాస్తథా ॥ ౨౬॥

సభయా భయనిర్ముక్తా భవన్తి స్వకృతానుగాః ।
యస్యానేకకథాః పుణ్యాః శ్రూయన్తే ప్రతికల్పకే ॥ ౨౭॥

సోఽవతాత్సాధకశ్రేష్ఠం సదా రామపరాయణః ।
వైధాత్రధాతృప్రభృతి యత్కిఞ్చిద్దృశ్యతేఽత్యలమ్ ॥ ౨౮॥

విద్ధి వ్యాప్తం యథా కీశరూపేణానఞ్జనేన తత్ ।
యో విభుః సోఽహమేషోఽహం స్వీయః స్వయమణుర్బృహత్ ॥ ౨౯॥

ఋగ్యజుఃసామరూపశ్చ ప్రణవస్త్రివృదధ్వరః ।
తస్మై స్వస్మై చ సర్వస్మై నతోఽస్మ్యాత్మసమాధినా ॥ ౩౦॥

అనేకానన్తబ్రహ్మాణ్డధృతే బ్రహ్మస్వరూపిణే ।
సమీరణాత్మనే తస్మై నతోఽస్మ్యాత్మస్వరూపిణే ॥ ౩౧॥

నమో హనుమతే తస్మై నమో మారుతసూనవే ।
నమః శ్రీరామభక్తాయ శ్యామాయ మహతే నమః ॥ ౩౨॥

నమో వానరవీరాయ సుగ్రీవసఖ్యకారిణే ।
లఙ్కావిదహనాయాథ మహాసాగరతారిణే ॥ ౩౩॥

సీతాశోకవినాశాయ రామముద్రాధరాయ చ ।
రావణాన్తనిదానాయ నమః సర్వోత్తరాత్మనే ॥ ౩౪॥

మేఘనాదమఖధ్వంసకారణాయ నమో నమః ।
అశోకవనవిధ్వంసకారిణే జయదాయినే ॥ ౩౫॥

వాయుపుత్రాయ వీరాయ ఆకాశోదరగామినే ।
వనపాలశిరశ్ఛేత్రే లఙ్కాప్రాసాదభఞ్జినే ॥ ౩౬॥

జ్వలత్కాఞ్చనవర్ణాయ దీర్ఘలాఙ్గూలధారిణే ।
సౌమిత్రిజయదాత్రే చ రామదూతాయ తే నమః ॥ ౩౭॥

అక్షస్య వధకర్త్రే చ బ్రహ్మశస్త్రనివారిణే ।
లక్ష్మణాఙ్గమహాశక్తిజాతక్షతవినాశినే ॥ ౩౮॥

రక్షోఘ్నాయ రిపుఘ్నాయ భూతఘ్నాయ నమో నమః ।
ఋక్షవానరవీరౌఘప్రాసాదాయ నమో నమః ॥ ౩౯॥

పరసైన్యబలఘ్నాయ శస్త్రాస్త్రఘ్నాయ తే నమః ।
విషఘ్నాయ ద్విషఘ్నాయ భయఘ్నాయ నమో నమః ॥ ౪౦॥

మహారిపుభయఘ్నాయ భక్తత్రాణైకకారిణే ।
పరప్రేరితమన్త్రాణాం మన్త్రాణాం స్తమ్భకారిణే ॥ ౪౧॥


పయఃపాషాణతరణకారణాయ నమో నమః ।
బాలార్కమణ్డలగ్రాసకారిణే దుఃఖహారిణే ॥ ౪౨॥

నఖాయుధాయ భీమాయ దన్తాయుధధరాయ చ ।
విహఙ్గమాయ శర్వాయ వజ్రదేహాయ తే నమః ॥ ౪౩॥

ప్రతిగ్రామస్థితాయాథ భూతప్రేతవధార్థినే ।
కరస్థశైలశస్త్రాయ రామశస్త్రాయ తే నమః ॥ ౪౪॥

కౌపీనవాససే తుభ్యం రామభక్తిరతాయ చ ।
దక్షిణాశాభాస్కరాయ సతాం చన్ద్రోదయాత్మనే ॥ ౪౫॥

కృత్యాక్షతవ్యథాఘ్నాయ సర్వక్లేశహరాయ చ ।
స్వామ్యాజ్ఞాపార్థసఙ్గ్రామసఖ్యసఞ్జయకారిణే ॥ ౪౬॥

భక్తానాం దివ్యవాదేషు సఙ్గ్రామే జయకారిణే ।
కిల్కిలారవకారాయ ఘోరశబ్దకరాయ చ ॥ ౪౭॥    

సర్వాగ్నివ్యాధిసంస్తమ్భకారిణే భయహారిణే ।
సదా వనఫలాహారసన్తృప్తాయ విశేషతః ॥ ౪౮॥

మహార్ణవశిలాబద్ధసేతుబన్ధాయ తే నమః ।

ఫలశ్రుతిః ।
ఇత్యేతత్కథితం విప్ర మారుతేః కవచం శివమ్ ॥ ౪౯॥

యస్మై కస్మై న దాతవ్యం రక్షణీయం ప్రయత్నతః ।
అష్టగన్ధైర్విలిఖ్యాథ కవచం ధారయేత్తు యః ॥ ౫౦॥

కణ్ఠే వా దక్షిణే బాహౌ జయస్తస్య పదే పదే ।
కిం పునర్బహునోక్తేన సాధితం లక్షమాదరాత్ ॥ ౫౧॥

ప్రజప్తమేతత్కవచమసాధ్యం చాపి సాధయేత్ ॥ ౫౨॥




All copyrights reserved 2012 digital media act