శ్రీ మహాలక్ష్మీ స్తవ కవచం (బ్రహ్మ వైవర్త పురాణం) sri Mahalakshmi kavacham with Telugu lyrics
శ్రీమహాలక్ష్మీస్తవకవచం
శ్రీగణేశాయ నమః ।
నారద ఉవాచ ।
ఆవిర్భూయ హరిస్తస్మై కిం స్తోత్రం కవచం దదౌ ।
మహాలక్ష్మ్యాశ్చ లక్ష్మీశస్తన్మే బ్రూహి తపోధన ॥ ౧॥
నారాయణ ఉవాచ ।
పుష్కరే చ తపస్తప్త్వా విరరామ సురేశ్వరః ।
ఆవిర్బభూవ తత్రైవ క్లిష్టం దృష్ట్వా హరిః స్వయమ్ ॥ ౨॥
తమువాచ హృషీకేశో వరం వృణు యథేప్సితమ్ ।
స చ వవ్రే వరం లక్ష్మీమీశస్తస్మై దదౌ ముదా ॥ ౩॥
వరం దత్త్వా హృషీకేశః ప్రవక్తుముపచక్రమే ।
హితం సత్యం చ సారం చ పరిణామసుఖావహమ్ ॥ ౪॥
మధుసూదన ఉవాచ ।
గృహాణ కవచం శక్ర సర్వదుఃఖవినాశనమ్ ।
పరమైశ్వర్యజనకం సర్వశత్రువిమర్దనమ్ ॥ ౫॥
బ్రహ్మణే చ పురా దత్తం విష్టపే చ జలప్లుతే ।
యద్ధృత్వా జగతాం శ్రేష్ఠః సర్వైశ్వర్యయుతో విధిః ॥ ౬॥
బభూవుర్మనవః సర్వే సర్వైశ్వర్యయుతా యతః ।
సర్వైశ్వర్యప్రదస్యాస్య కవచస్య ఋషిర్విధిః ॥ ౭॥
పఙ్క్తిశ్ఛన్దశ్చ సా దేవీ స్వయం పద్మాలయా వరా ।
సిద్ధ్యైశ్వర్యసుఖేష్వేవ వినియోగః ప్రకీర్తితః ॥ ౮॥
యద్ధృత్వా కవచం లోకః సర్వత్ర విజయీ భవేత్ ।
మస్తకం పాతు మే పద్మా కణ్ఠం పాతు హరిప్రియా ॥ ౯॥
నాసికాం పాతు మే లక్ష్మీః కమలా పాతు లోచనే ।
కేశాన్కేశవకాన్తా చ కపాలం కమలాలయా ॥ ౧౦॥
జగత్ప్రసూర్గణ్డయుగ్మం స్కన్ధం సమ్పత్ప్రదా సదా ।
ఓం శ్రీం కమలవాసిన్యై స్వాహా పృష్ఠం సదాఽవతు ॥ ౧౧॥
ఓం హ్రీం శ్రీం పద్మాలయాయై స్వాహా వక్షః సదాఽవతు ।
పాతు శ్రీర్మమ కఙ్కాలం బాహుయుగ్మం చ తే నమః ॥ ౧౨॥
ఓం హ్రీం శ్రీం లక్ష్మ్యై నమః పాదౌ పాతు మే సన్తతం చిరమ్ ।
ఓం హ్రీం శ్రీం నమః పద్మాయై స్వాహా పాతు నితమ్బకమ్ ॥ ౧౩॥
ఓం శ్రీం మహాలక్ష్మ్యై స్వాహా సర్వాఙ్గం పాతు మే సదా ।
ఓం హ్రీం శ్రీం క్లీం మహాలక్ష్మ్యై స్వాహా మాం పాతు సర్వతః ॥ ౧౪॥
ఇతి తే కథితం వత్స సర్వసమ్పత్కరం పరమ్ ।
సర్వైశ్వర్యప్రదం నామ కవచం పరమాద్భుతమ్ ॥ ౧౫॥
గురుమభ్యర్చ్య విధివత్కవచం ధారయేత్తు యః ।
కణ్ఠే వా దక్షిణే బాహౌ స సర్వవిజయీ భవేత్ ॥ ౧౬॥
మహాలక్ష్మీర్గృహం తస్య న జహాతి కదాచన ।
తస్యచ్ఛాయేవ సతతం సా చ జన్మని జన్మని ॥ ౧౭॥
ఇదం కవచమజ్ఞాత్వా భజేల్లక్ష్మీం స మన్దధీః ।
శతలక్షప్రజాపేఽపి న మన్త్రః సిద్ధిదాయకః ॥ ౧౮॥
నారాయణ ఉవాచ ।
దత్త్వా తస్మై చ కవచం మన్త్రం వై షోడశాక్షరమ్ ।
సన్తుష్టశ్చ జగన్నాథో జగతాం హితకారణమ్ ॥ ౧౯॥
ఓం హ్రీం శ్రీం క్లీం నమో మహాలక్ష్మ్యై స్వాహా ।
దదౌ తస్మై చ కృపయా చేన్ద్రాయ చ మహామునే ॥ ౨౦॥
ధ్యానం చ సామవేదోక్తం గోపనీయం సుదుర్లభమ్ ।
సిద్ధైర్మునీన్ద్రైర్దుష్ప్రాప్యం ధ్రువం సిద్ధిప్రదం శుభమ్ ॥ ౨౧॥
శ్వేతచమ్పకవర్ణాభాం శతచన్ద్రసమప్రభామ్ ।
వహ్నిశుద్ధాంశుకాధానాం రత్నభూషణభూషితామ్ ॥ ౨౨॥
ఈషద్ధాస్యప్రసన్నాస్యాం భక్తానుగ్రహకారికామ్ ।
కస్తూరీబిన్దుమధ్యస్థం సిన్దూరం భూషణం తథా ॥ ౨౩॥
అమూల్యరత్నరచితకుణ్డలోజ్జ్వలభూషణమ్ ।
బిమ్రతీ కబరీభారం మాలతీమాల్యశోభితమ్ ॥ ౨౪॥
సహస్రదలపద్మస్థాం స్వస్థాం చ సుమనోహరామ్ ।
శాన్తాం చ శ్రీహరేః కాన్తాం తాం భజేజ్జగతాం ప్రసూమ్ ॥ ౨౫॥
ధ్యానేనానేన దేవేన్ద్రో ధ్యాత్వా లక్ష్మీం మనోహరామ్ ।
భక్త్యా సమ్పూజ్య తస్యై చ చోపచారాంస్తు షోడశ ॥ ౨౬॥
స్తుత్వాఽనేన స్తవేనైవ వక్ష్యమాణేన వాసవ ।
నత్వా వరం గృహీత్వా చ లభిష్యసి చ నిర్వృతిమ్ ॥ ౨౭॥
స్తవనం శృణు దేవేన్ద్ర మహాలక్ష్మ్యాః సుఖప్రదమ్ ।
కథయామి సుగోప్యం చ త్రిషు లోకేషు దుర్లభమ్ ॥ ౨౮॥
నారాయణ ఉవాచ ।
దేవి త్వాం స్తోతుమిచ్ఛామి న క్షమాః స్తోతుమీశ్వరాః ।
బుద్ధేరగోచరాం సూక్ష్మాం తేజోరూపాం సనాతనీమ్ ।
అత్యనిర్వచనీయాం చ కో వా నిర్వక్తుమీశ్వరః ॥ ౨౯॥
స్వేచ్ఛామయీం నిరాకారాం భక్తానుగ్రహవిగ్రహామ్ ।
స్తౌమి వాఙ్మనసోః పారాం కింవాఽహం జగదమ్బికే ॥ ౩౦॥
పరాం చతుర్ణాం వేదానాం పారబీజం భవార్ణవే ।
సర్వసస్యాధిదేవీం చ సర్వాసామపి సమ్పదామ్ ॥ ౩౧॥
యోగినాం చైవ యోగానాం జ్ఞానానాం జ్ఞానినాం తథా ।
వేదానాం వై వేదవిదాం జననీం వర్ణయామి కిమ్ ॥ ౩౨॥
యయా వినా జగత్సర్వమబీజం నిష్ఫలం ధ్రువమ్ ।
యథా స్తనన్ధయానాం చ వినా మాత్రా సుఖం భవేత్ ॥ ౩౩॥
ప్రసీద జగతాం మాతా రక్షాస్మానతికాతరాన్ ।
వయం త్వచ్చరణామ్భోజే ప్రపన్నాః శరణం గతాః ॥ ౩౪॥
నమః శక్తిస్వరూపాయై జగన్మాత్రే నమో నమః ।
జ్ఞానదాయై బుద్ధిదాయై సర్వదాయై నమో నమః ॥ ౩౫॥
హరిభక్తిప్రదాయిన్యై ముక్తిదాయై నమో నమః ।
సర్వజ్ఞాయై సర్వదాయై మహాలక్ష్మ్యై నమో నమః ॥ ౩౬॥
కుపుత్రాః కుత్రచిత్సన్తి న కుత్రాపి కుమాతరః ।
కుత్ర మాతా పుత్రదోషం తం విహాయ చ గచ్ఛతి ॥ ౩౭॥
స్తనన్ధయేభ్య ఇవ మే హే మాతర్దేహి దర్శనమ్ ।
కృపాం కురు కృపాసిన్ధో త్వమస్మాన్భక్తవత్సలే ॥ ౩౮॥
ఇత్యేవం కథితం వత్స పద్మాయాశ్చ శుభావహమ్ ।
సుఖదం మోక్షదం సారం శుభదం సమ్పదః ప్రదమ్ ॥ ౩౯॥
ఇదం స్తోత్రం మహాపుణ్యం పూజాకాలే చ యః పఠేత్ ।
మహాలక్ష్మీర్గృహం తస్య న జహాతి కదాచన ॥ ౪౦॥
ఇత్యుక్త్వా శ్రీహరిస్తం చ తత్రైవాన్తరధీయత ।
దేవో జగామ క్షీరోదం సురైః సార్ధం తదాజ్ఞయా ॥ ౪౧॥
॥ ఇతి శ్రీబ్రహ్మవైవర్తమహాపురాణే గణపతిఖణ్డే
నారదనారాయణసంవాదే లక్ష్మీస్తవకవచపూజా
Comments
Post a Comment