శ్రీ మహాలక్ష్మీ స్తోత్రం (విష్ణు పురాణం) Sri mahalakshmI stotram with Telugu lyrics

శ్రీమహాలక్ష్మీస్తోత్రమ్ విష్ణుపురాణాన్తర్గతమ్ 

శ్రీగణేశాయ నమః ।

శ్రీపరాశర ఉవాచ

సింహాసనగతః శక్రస్సమ్ప్రాప్య త్రిదివం పునః ।

దేవరాజ్యే స్థితో దేవీం తుష్టావాబ్జకరాం తతః ॥ ౧॥

ఇన్ద్ర ఉవాచ

నమస్యే సర్వలోకానాం జననీమబ్జసమ్భవామ్ । var  సర్వభూతానాం

శ్రియమున్నిద్రపద్మాక్షీం విష్ణువక్షఃస్థలస్థితామ్ ॥ ౨॥

పద్మాలయాం పద్మకరాం పద్మపత్రనిభేక్షణామ్

వన్దే పద్మముఖీం దేవీం పద్మనాభప్రియామహమ్ ॥ ౩॥

త్వం సిద్ధిస్త్వం స్వధా స్వాహా సుధా త్వం లోకపావనీ ।

సన్ధ్యా రాత్రిః ప్రభా భూతిర్మేధా శ్రద్ధా సరస్వతీ ॥ ౪॥

యజ్ఞవిద్యా మహావిద్యా గుహ్యవిద్యా చ శోభనే ।

ఆత్మవిద్యా చ దేవి త్వం విముక్తిఫలదాయినీ ॥ ౫॥

ఆన్వీక్షికీ త్రయీ వార్తా దణ్డనీతిస్త్వమేవ చ ।

సౌమ్యాసౌమ్యైర్జగద్రూపైస్త్వయైతద్దేవి పూరితమ్ ॥ ౬॥

కా త్వన్యా త్వామృతే దేవి సర్వయజ్ఞమయం వపుః ।

అధ్యాస్తే దేవదేవస్య యోగచిన్త్యం గదాభృతః ॥ ౭॥

త్వయా దేవి పరిత్యక్తం సకలం భువనత్రయమ్ ।

వినష్టప్రాయమభవత్త్వయేదానీం సమేధితమ్ ॥ ౮॥

దారాః పుత్రాస్తథాఽఽగారసుహృద్ధాన్యధనాదికమ్ ।

భవత్యేతన్మహాభాగే నిత్యం త్వద్వీక్షణాన్నృణామ్ ॥ ౯॥

శరీరారోగ్యమైశ్వర్యమరిపక్షక్షయః సుఖమ్ ।

దేవి త్వద్దృష్టిదృష్టానాం పురుషాణాం న దుర్లభమ్ ॥ ౧౦॥

త్వమమ్బా సర్వభూతానాం దేవదేవో హరిః పితా । var  త్వం మాతా సర్వలోకానాం

త్వయైతద్విష్ణునా చామ్బ జగద్వ్యాప్తం చరాచరమ్ ॥ ౧౧॥

మా నః కోశస్తథా గోష్ఠం మా గృహం మా పరిచ్ఛదమ్ ।

మా శరీరం కలత్రం చ త్యజేథాః సర్వపావని ॥ ౧౨॥

మా పుత్రాన్మా సుహృద్వర్గాన్మా పశూన్మా విభూషణమ్ ।

త్యజేథా మమ దేవస్య విష్ణోర్వక్షఃస్థలాశ్రయే ॥ ౧౩॥

సత్త్వేన సత్యశౌచాభ్యాం తథా శీలాదిభిర్గుణైః ।

త్యజ్యన్తే తే నరాః సద్యః సన్త్యక్తా యే త్వయాఽమలే ॥ ౧౪॥

త్వయాఽవలోకితాః సద్యః శీలాద్యైరఖిలైర్గుణైః ।

కులైశ్వర్యైశ్చ పూజ్యన్తే పురుషా నిర్గుణా అపి ॥ ౧౫॥

స శ్లాఘ్యః స గుణీ ధన్యః స కులీనః స బుద్ధిమాన్ ।

స శూరః స చ విక్రాన్తో యస్త్వయా దేవి వీక్షితః ॥ ౧౬॥

సద్యో వైగుణ్యమాయాన్తి శీలాద్యాః సకలా గుణాః ।

పరాఙ్గముఖీ జగద్ధాత్రీ యస్య త్వం విష్ణువల్లభే ॥ ౧౭॥

న తే వర్ణయితుం శక్తా గుణాఞ్జిహ్వాఽపి వేధసః ।

ప్రసీద దేవి పద్మాక్షి మాఽస్మాంస్త్యాక్షీః కదాచన ॥ ౧౮॥

శ్రీపరాశర ఉవాచ

ఏవం శ్రీః సంస్తుతా సమ్యక్ ప్రాహ హృష్టా శతక్రతుమ్ ।

శృణ్వతాం సర్వదేవానాం సర్వభూతస్థితా ద్విజ ॥ ౧౯॥

శ్రీరువాచ

పరితుష్టాస్మి దేవేశ స్తోత్రేణానేన తే హరే ।

వరం వృణీష్వ యస్త్విష్టో వరదాఽహం తవాగతా ॥ ౨౦॥

ఇన్ద్ర ఉవాచ

వరదా యదిమేదేవి వరార్హో యది వాఽప్యహమ్ ।

త్రైలోక్యం న త్వయా త్యాజ్యమేష మేఽస్తు వరః పరః ॥ ౨౧॥

స్తోత్రేణ యస్తథైతేన త్వాం స్తోష్యత్యబ్ధిసమ్భవే ।

స త్వయా న పరిత్యాజ్యో ద్వితీయోఽస్తు వరో మమ ॥ ౨౨॥

శ్రీరువాచ

త్రైలోక్యం త్రిదశశ్రేష్ఠ న సన్త్యక్ష్యామి వాసవ ।

దత్తో వరో మయాఽయం తే స్తోత్రారాధనతుష్టయా ॥ ౨౩॥

యశ్చ సాయం తథా ప్రాతః స్తోత్రేణానేన మానవః ।

స్తోష్యతే చేన్న తస్యాహం భవిష్యామి పరాఙ్గ్ముఖీ ॥ ౨౪॥

శ్రీపారాశర ఉవాచ

ఏవం వరం దదౌ దేవీ దేవరాజాయ వై పురా ।

మైత్రేయ శ్రీర్మహాభాగా స్తోత్రారాధనతోషితా ॥ ౨౫॥

భృగోః ఖ్యాత్యాం సముత్పన్నా శ్రీః పూర్వముదధేః పునః ।

దేవదానవయత్నేన ప్రసూతాఽమృతమన్థనే ॥ ౨౬॥

ఏవం యదా జగత్స్వామీ దేవరాజో జనార్దనః ।

అవతారః కరోత్యేషా తదా శ్రీస్తత్సహాయినీ ॥ ౨౭॥

పునశ్చపద్మా సమ్భూతా యదాఽదిత్యోఽభవద్ధరిః ।

యదా చ భార్గవో రామస్తదాభూద్ధరణీత్వియమ్ ॥ ౨౮॥

రాఘవత్వేఽభవత్సీతా రుక్మిణీ కృష్ణజన్మని ।

అన్యేషు చావతారేషు విష్ణోరేఖాఽనపాయినీ ॥ ౨౯॥

దేవత్వే దేవదేహేయం మానుషత్వే చ మానుషీ ।

విష్ణోర్దేహానురుపాం వై కరోత్యేషాఽఽత్మనస్తనుమ్ ॥ ౩౦॥

యశ్చైతశృణుయాజ్జన్మ లక్ష్మ్యా యశ్చ పఠేన్నరః ।

శ్రియో న విచ్యుతిస్తస్య గృహే యావత్కులత్రయమ్ ॥ ౩౧॥

పఠ్యతే యేషు చైవర్షే గృహేషు శ్రీస్తవం మునే ।

అలక్ష్మీః కలహాధారా న తేష్వాస్తే కదాచన ॥ ౩౨॥

ఏతత్తే కథితం బ్రహ్మన్యన్మాం త్వం పరిపృచ్ఛసి ।

క్షీరాబ్ధౌ శ్రీర్యథా జాతా పూర్వం భృగుసుతా సతీ ॥ ౩౩॥

ఇతి సకలవిభూత్యవాప్తిహేతుః స్తుతిరియమిన్ద్రముఖోద్గతా హి లక్ష్మ్యాః ।

అనుదినమిహ పఠ్యతే నృభిర్యైర్వసతి న తేషు కదాచిదప్యలక్ష్మీః ॥ ౩౪॥

॥ ఇతి శ్రీవిష్ణుపురాణే మహాలక్ష్మీ స్తోత్రం సమ్పూర్ణమ్ ॥