Sri stotram agnipuranam శ్రీస్తోత్రం (అగ్నిపురాణం)
శ్రీస్తోత్రం (అగ్ని పురాణం)
పుష్కర ఉవాచ -
రాజ్యలక్ష్మీస్థిరత్వాయ యథేన్ద్రేణ పురా శ్రియః ।
స్తుతిః కృతా తథా రాజా జయార్థం స్తుతిమాచరేత్ ॥ ౧॥
ఇన్ద్ర ఉవాచ -
నమస్తే సర్వలోకానాం జననీమబ్ధిసమ్భవామ్ ।
శ్రియమున్నిన్ద్రపద్మాక్షీం విష్ణువక్షఃస్థలస్థితామ్ ॥ ౨॥
త్వం సిద్ధిస్త్వం స్వధా స్వాహా సుధా త్వం లోకపావని ।
సన్ధ్యా రాత్రిః ప్రభా భూతిర్మేధా శ్రద్ధా సరస్వతీ ॥ ౩॥
యజ్ఞవిద్యా మహావిద్యా గుహ్యవిద్యా చ శోభనే ।
ఆత్మవిద్యా చ దేవి త్వం విముక్తిఫలదాయినీ ॥ ౪॥
ఆన్వీక్షికీ త్రయీ వార్తా దణ్డనీతిస్త్వమేవ చ ।
సౌమ్యా సౌమ్యైర్జగద్రూపైస్త్వయైతద్దేవి పూరితమ్ ॥ ౫॥
కా త్వన్యా త్వామృతే దేవి సర్వయజ్ఞమయం వపుః ।
అధ్యాస్తే దేవ దేవస్య యోగిచిన్త్యం గదాభృతః ॥ ౬॥
త్వయా దేవి పరిత్యక్తం సకలం భువనత్రయమ్ ।
వినష్టప్రాయమభవత్త్వయేదానీం సమేధితమ్ ॥ ౭॥
దారాః పుత్రాస్తథాగారం సుహృద్ధాన్యధనాదికమ్ ।
భవత్యేతన్మహాభాగే నిత్యం త్వద్వీక్షణాన్నృణామ్ ॥ ౮॥
శరీరారోగ్యమైశ్వర్యమరిపక్షక్షయః సుఖమ్ । varక్షయః స్వయమ్
దేవి త్వద్దృష్టిదృష్టానాం పురుషాణాం న దుర్లభమ్ ॥ ౯॥
త్వమమ్బా సర్వభూతానాం దేవదేవో హరిః పితా ।
త్వయైతద్విష్ణునా చామ్బ జగద్వ్యాప్తం చరాచరమ్ ॥ ౧౦॥
మానం కోషం తథా కోష్ఠం మా గృహం మా పరిచ్ఛదమ్ ।
మా శరీరం కలత్రఞ్చ త్యజేథాః సర్వపావని ॥ ౧౧॥
మా పుత్రాన్మాసుహృద్వర్గాన్మా పశూన్మా విభూషణమ్ ।
త్యజేథా మమ దేవస్య విష్ణోర్వక్షఃస్థలాలయే ॥ ౧౨॥
సత్త్వేన సత్యశౌచాభ్యాం తథా శీలాదిభిర్గుణైః ।
త్యజన్తే తే నరా సద్యః సన్త్యక్తా యే త్వయామలే ॥ ౧౩॥
త్వయావలోకితాః సద్యః శీలాద్యైరఖిలైర్గుణైః ।
కులైశ్వర్యైశ్చ యుజ్యన్తే పురుషా నిర్గుణా అపి ॥ ౧౪॥
స శ్లాఘ్యః స గుణీ ధన్యః స కులీనః స బుద్ధిమాన్ ।
స శూరః స చ విక్రాన్తో యస్త్వయా దేవి వీక్షితః ॥ ౧౫॥
సద్యో వైగుణ్యమాయాన్తి శీలాద్యాః సకలా గుణాః ।
పరాఙ్ముఖీ జగద్ధాత్రీ యస్య త్వం విష్ణువల్లభే ॥ ౧౬॥
న తే వర్ణయితుం శక్తా గుణాన్ జిహ్వాపి వేధసః ।
ప్రసీద దేవి పద్మాక్షి నాస్మాంస్త్యాక్షీః కదాచన ॥ ౧౭॥
పుష్కర ఉవాచ
ఏవం స్తుతా దదౌ శ్రీశ్చ వరమిన్ద్రాయ చేప్సితమ్ ।
సుస్థిరత్వం చ రాజ్యస్య సఙ్గ్రామవిజయాదికమ్ ॥ ౧౮॥
స్వస్తోత్రపాఠశ్రవణకర్తౄణాం భుక్తిముక్తిదమ్ ।
శ్రీస్తోత్రం సతతం తస్మాత్పఠేచ్చ శృణుయాన్నరః ॥ ౧౯॥
ఇత్యాగ్నేయే మహాపురాణే శ్రీస్తోత్రం నామ
షట్త్రింశదధికద్విశతతమోఽధ్యాయః ॥
Comments
Post a Comment