శ్రీరామ ఆపదుద్దారాష్టకం srirama apaduddaraka ashtakam
శ్రీరామ ఆపదుద్దారాష్టకం
ఆపదామపహర్తారం దాతారం సర్వసమ్పదాం
లోకాభిరామం శ్రీరామం భూయో భూయో నమామ్యహమ్ ।
నమః కోదణ్డహస్తాయ సన్ధీకృతశరాయ చ
దణ్డితాఖిలదైత్యాయ రామాయాపన్నివారిణే ॥ ౧॥
ఆపన్నజనరక్షైకదీక్షాయామితతేజసే ।
నమోఽస్తు విష్ణవే తుభ్యం రామాయాపన్నివారిణే ॥ ౨॥
పదామ్భోజరజస్పర్శపవిత్రమునియోషితే ।
నమోఽస్తు సీతాపతయే రామాయాపన్నివారిణే ॥ ౩॥
దానవేన్ద్రమహామత్తగజపఞ్చాస్యరూపిణే ।
నమోఽస్తు రఘునాథాయ రామాయాపన్నివారిణే ॥ ౪॥
మహిజాకుచసంలగ్నకుఙ్కుమారుణవక్షసే ।
నమః కల్యాణరూపాయ రామాయాపన్నివారిణే ॥ ౫॥
పద్మసమ్భవభూతేశమునిసంస్తుతకీర్తయే ।
నమో మార్తాణ్డవంశ్యాయ రామాయాపన్నివారిణే ॥ ౬॥
హరత్యార్తిం చ లోకానాం యో వా మధునిషూదనః ।
నమోఽస్తు హరయే తుభ్యం రామాయాపన్నివారిణే ॥ ౭॥
తాపకారణసంసారగజసింహస్వరూపిణే ।
నమో వేదాన్తవేద్యాయ రామాయాపన్నివారిణే ॥ ౮॥
రఙ్గత్తరఙ్గజలధిగర్వహృచ్ఛరధారిణే ।
నమః ప్రతాపరూపాయ రామాయాపన్నివారిణే ॥ ౯॥
దారోపహితచన్ద్రావతంసధ్యాతస్వమూర్తయే ।
నమః సత్యస్వరూపాయ రామాయాపన్నివారిణే ॥ ౧౦॥
తారానాయకసఙ్కాశవదనాయ మహౌజసే ।
నమోఽస్తు తాటకాహన్త్రే రామాయాపన్నివారిణే ॥ ౧౧॥
రమ్యసానులసచ్చిత్రకూటాశ్రమవిహారిణే ।
నమస్సౌమిత్రిసేవ్యాయ రామాయాపన్నివారిణే ॥ ౧౨॥
సర్వదేవాహితాసక్త దశాననవినాశినే ।
నమోఽస్తు దుఃఖధ్వంసాయ రామాయాపన్నివారిణే ॥ ౧౩॥
రత్నసానునివాసైక వన్ద్యపాదామ్బుజాయ చ ।
నమస్త్రైలోక్యనాథాయ రామాయాపన్నివారిణే ॥ ౧౪॥
సంసారబన్ధ మోక్షైకహేతుదామప్రకాశినే ।
నమః కలుషసంహర్త్రే రామాయాపన్నివారిణే ॥ ౧౫॥
పవనాశుగసఙ్క్షిప్తమారీచాదిసురారయే ।
నమో మఖపరిత్రాత్రే రామాయాపన్నివారిణే ॥ ౧౬॥
దామ్భికేతరభక్తౌఘమహానన్దప్రదాయినే ।
నమః కమలనేత్రాయ రామాయాపన్నివారిణే ॥ ౧౭॥
లోకత్రయోద్వేగకరకుమ్భకర్ణశిరశ్ఛిదే ।
నమో నీరదదేహాయ రామాయాపన్నివారిణే ॥ ౧౮॥
కాకాసురైకనయనహరల్లీలాస్త్రధారిణే ।
నమో భక్తైకవేద్యాయ రామాయాపన్నివారిణే ॥ ౧౯॥
భిక్షురూప సమాక్రాన్తబలిసర్వైకసమ్పదే ।
నమో వామనరూపాయ రామాయాపన్నివారిణే ॥ ౨౦॥
రాజీవనేత్రసుస్పన్దరుచిరాఙ్గసురోచిషే ।
నమః కైవల్యనిధయే రామాయాపన్నివారిణే ॥ ౨౧॥
మన్దమారుతసంవీతమన్దారద్రుమవాసినే ।
నమః పల్లవపాదాయ రామాయాపన్నివారిణే ॥ ౨౨॥
శ్రీకణ్ఠచాపదలనధురీణబలబాహవే ।
నమః సీతానుషక్తాయ రామాయాపన్నివారిణే ॥ ౨౩॥
రాజరాజసుహృద్యోషార్చితమఙ్గలమూర్తయే ।
నమ ఇక్ష్వాకువంశ్యాయ రామాయాపన్నివారిణే ॥ ౨౪॥
మఞ్జులాదర్శవిప్రేక్షణోత్సుకైకవిలాసినే ।
నమః పాలితభక్త్తాయ రామాయాపన్నివారిణే ॥ ౨౫॥
భూరిభూధరకోదణ్డమూర్తిధ్యేయస్వరూపిణే ।
నమోఽస్తు తేజోనిధయే రామాయాపన్నివారిణే ॥ ౨౬॥
యోగీన్ద్రహృత్సరోజాతమధుపాయ మహాత్మనే ।
నమో రాజాధిరాజాయ రామాయాపన్నివారిణే ॥ ౨౭॥
భూవరాహస్వరూపాయ నమో భూరిప్రదాయినే ।
నమో హిరణ్యగర్భాయ రామాయాపన్నివారిణే ॥ ౨౮॥
యోషాఞ్జలివినిర్ముక్త లాజాఞ్చితవపుష్మతే ।
నమస్సౌన్దర్యనిధయే రామాయాపన్నివారిణే ॥ ౨౯॥
నఖకోటివినిర్భిన్నదైత్యాధిపతివక్షసే ।
నమో నృసింహరూపాయ రామాయాపన్నివారిణే ॥ ౩౦॥
మాయామానుషదేహాయ వేదోద్ధరణహేతవే ।
నమోఽస్తు మత్స్యరూపాయ రామాయాపన్నివారిణే ॥ ౩౧॥
మితిశూన్య మహాదివ్యమహిమ్నే మానితాత్మనే ।
నమో బ్రహ్మస్వరూపాయ రామాయాపన్నివారిణే ॥ ౩౨॥
అహఙ్కారేతరజనస్వాన్తసౌధవిహారిణే ।
నమోఽస్తు చిత్స్వరూపాయ రామాయాపన్నివారిణే ॥ ౩౩॥
సీతాలక్ష్మణసంశోభిపార్శ్వాయ పరమాత్మనే ।
నమః పట్టాభిషిక్తాయ రామాయాపన్నివారిణే ॥ ౩౪॥
ఆపదామపహర్తారం దాతారం సర్వసమ్పదామ్ ।
లోకాభిరామం శ్రీరామం భూయో భూయో నమామ్యహమ్ ॥ ౩౫॥
ఫలశ్రుతి
ఇమం స్తవం భగవతః పఠేద్యః ప్రీతమానసః ।
ప్రభాతే వా ప్రదోషే వా రామస్య పరమాత్మనః ॥ ౧॥
స తు తీర్త్వా భవామ్భోధిమాపదస్సకలా అపి ।
రామసాయుజ్యమాప్నోతి దేవదేవప్రసాదతః ॥ ౨॥
కారాగృహాదిబాధాసు సమ్ప్రాప్తే బహుసఙ్కటే ।
అపన్నివారకస్తోత్రం పఠేద్యస్తు యథావిధి ॥ ౩॥
సంయోజ్యానుష్టుభం మన్త్రమనుశ్లోకం స్మరన్ విభుమ్ ।
సప్తాహాత్సర్వబాధాభ్యో ముచ్యతే నాత్ర సంశయః ॥ ౪॥
ద్వాత్రింశద్వారజపతః ప్రత్యహం తు దృఢవ్రతః ।
వైశాఖే భానుమాలోక్య ప్రత్యహం శతసఙ్ఖ్యయా ॥ ౫॥
ధనవాన్ ధనదప్రఖ్యస్స భవేన్నాత్ర సంశయః ।
బహునాత్ర కిముక్తేన యం యం కామయతే నరః ॥ ౬॥
తం తం కామమవాప్నోతి స్తోత్రేణానేన మానవః ।
యన్త్రపూజావిధానేన జపహోమాదితర్పణైః ॥ ౭॥
యస్తు కుర్వీత సహసా సర్వాన్ కామానవాప్నుయాత్ ।
ఇహ లోకే సుఖీ భూత్వా పరే ముక్తో భవిష్యతి ॥ ౮॥
All copyrights reserved 2012 digital media act
Comments
Post a Comment