Srirama paduka stotram శ్రీరామ పాదుకా స్తోత్రం
శ్రీరామ పాదుకా స్తోత్రం
శ్రీవేదాన్తదేశికకృతమ్)
సన్తః శ్రీరఙ్గ-పృథ్వీశ-చరణత్రాణ-శేఖరాః ।
జయన్తి భువన-త్రాణపదపఙ్కజ-రేణవః ॥ ౧॥
వన్దే విష్ణుపదాసక్తం తమృషిం తాం చ పాదుకామ్ ।
యథార్థా శఠజిత్సంజ్ఞా మచ్చిత్తవిజయాద్యయోః ॥ ౨॥
వన్దే తద్రఙ్గనాథస్య మాన్యం పాదుకయోర్యుగమ్ ।
ఉన్నతానామవనతిః నతానాం యత్ర చోన్నతిః ॥ ౩॥
భజామః పాదుకే యాభ్యాం భరతస్యాగ్రజస్తదా ।
ప్రాయః ప్రతి-ప్రయాణాయ ప్రాస్థానికమకల్పయత్ ॥ ౪॥
ప్రశస్తే రామపాదాభ్యాం పాదుకే పర్యుపాస్మహే ।
ఆనృశంస్యం యయోరాసీదాశ్రితేష్వనవగ్రహమ్ ॥ ౫॥
అధీష్టే పాదుకా సా మే యస్యాః సాకేతవాసిభిః ।
అన్వయవ్యతిరేకాభ్యామన్వమీయత వైభవమ్ ॥ ౬॥
పాహి నః పాదుకే యస్యాః విధాస్యన్నభిషేచనమ్ ।
ఆభిషేచనికం భాణ్డం చక్రే రామః ప్రదక్షిణమ్ ॥ ౭॥
అభిషేకోత్సవాత్తస్మాద్యస్యా నిర్యాతనోత్సవః ।
అత్యరిచ్యత తాం వన్దే భవ్యాం భరతదేవతామ్ ॥ ౮॥
నమస్తే పాదుకే పుంసాం సంసారార్ణవసేతవే ।
పదారోహస్య వేదాన్తాః వన్దివైతాలికాః స్వయమ్ ॥ ౯॥
శౌరేః శృఙ్గారచేష్టానాం ప్రసూతిం పాదుకాం భజే ।
యామేష భుఙ్క్తే శుద్ధాన్తాత్పూర్వం పశ్చాదపి ప్రభుః ॥ ౧౦॥
అగ్రతస్తే గమిష్యామి మృద్నన్తీ కుశ-కణ్టకాన్ ।
ఇతి సీతాఽపి యద్వృత్తిం ఇయేష ప్రణమామి తామ్ ॥ ౧౧॥
శౌరేః సఞ్చారకాలేషు పుష్పవృష్టిర్దివశ్చ్యుతా ।
పర్యవస్యతి యత్రైవ ప్రపద్యే తాం పదావనీమ్ ॥ ౧౨॥
పాన్తు వః పద్మనాభస్య పాదుకాకేలిపాంసవః ।
అహల్యాదేహనిర్మాణపర్యాయపరమాణవః ॥ ౧౩॥
శ్రుతీనాం భూషణానాం తే శఙ్కే రఙ్గేన్ద్రపాదుకే ।
మిథః సఙ్ఘర్షసఞ్జాతం రజః కిమపి శిఞ్జితమ్ ॥ ౧౪॥
ఉదర్చిషస్తే రఙ్గేన్ద్రపదావని బహిర్మణీన్ ।
అన్తర్మణిరవం శ్రుత్వా మన్యే రోమాఞ్చితాకృతీన్ ॥ ౧౫॥
ముఖబాహూరూపాదేభ్యో వర్ణాన్ సృష్టవతః ప్రభోః ।
ప్రపద్యే పాదుకాం రత్నైర్వ్యక్తవర్ణవ్యవస్థితిమ్ ॥ ౧౬॥
ప్రపద్యే రఙ్గనాథస్య పాదుకాం పద్మరాగిణీమ్ ।
పదేకనియతాం తస్య పద్మవాసామివాపరామ్ ॥ ౧౭॥
బద్ధానాం యత్ర నిత్యానాం ముక్తానామీశ్వరస్య చ ।
ప్రత్యక్షం శేషశేషిత్వం సా మే సిద్‍ధ్యతు పాదుకా ॥ ౧౮॥
వన్దే గారుత్మతీం వృత్త్యా మణిస్తోమైశ్చ పాదుకామ్ ।
యయా నిత్యం తులస్యేవ హరితత్వం ప్రకాశ్యతే ॥ ౧౯॥
హరిణా హరినీలైశ్చ ప్రతియత్నవతీం సదా ।
అయత్నలభ్యనిర్వాణామాశ్రయే మణిపాదుకామ్ ॥ ౨౦॥
శౌరేః శుద్ధాన్తనారీణాం విహారమణిదర్పణమ్ ।
ప్రసత్తేరివ సంస్థానం పదత్రాణముపాస్మహే ॥ ౨౧॥
కల్యాణప్రకృతిం వన్దే భజన్తీం కాఞ్చనశ్రియమ్ ।
పదార్హాం పాదుకాం శౌరేః పద ఏవ నివేశితామ్ ॥ ౨౨॥
సృష్టం భూమావనన్తేన నిత్యం శేషసమాధినా ।
అహం సమ్భావయామి త్వామాత్మానమివ పాదుకే ॥ ౨౩॥
ప్రపద్యే పాదుకారూపం ప్రణవస్య కలాద్వయమ్ ।
ఓన్తం మితమిదం యస్మిన్ అనన్తస్యాపి తత్పదమ్ ॥ ౨౪॥
అణోరణీయసీం విష్ణోర్మహతోఽపి మహీయసీమ్ ।
ప్రపద్యే పాదుకాం నిత్యం తత్పదేనైవ సమ్మతామ్ ॥ ౨౫॥
ఉదగ్రయన్త్రకాం వన్దే పాదుకాం యన్నివేశనాత్ ।
ఉపర్యపి పదం విష్ణోః ప్రత్యాదిష్టప్రసాధనమ్ ॥ ౨౬॥
సూచయన్తీం స్వరేఖాభిరనాలేఖ్యసరస్వతీమ్ ।
ఆలేఖనీయసౌన్దర్యామాశ్రయే శౌరిపాదుకామ్ ॥ ౨౭॥
కలాసు కాష్ఠామాతిష్ఠన్ భూమ్నే సమ్బన్ధినామపి ।
పాదుకా రఙ్గధుర్యస్య భరతారాధ్యతాం గతా ॥ ౨౮॥
విధౌ ప్రవృత్తే యద్ద్రవ్యం గుణసంస్కారనామభిః ।
శ్రేయస్సాధనమామ్నతం తత్పదత్రం తథాస్తు మే ॥ ౨౯॥
ప్రతిష్ఠాం సర్వచిత్రాణాం ప్రపద్యే మణిపాదుకామ్ ।
విచిత్రజగదాధారో విష్ణుర్యత్ర ప్రతిష్ఠితః ॥ ౩౦॥
ప్రపద్యే పాదుకాం దేవీం పరవిద్యామివ స్వయమ్ ।
యామర్పయతి దీనానాం దయమానో జగద్గురుః ॥ ౩౧॥
ఉపాఖ్యాతం తథాత్వేన వసిష్ఠాద్యైర్మహర్షిభిః ।
ఉపాయఫలయోః కాష్ఠాముపాసే రామపాదుకామ్ ॥ ౩౨॥
జయతి యతిరాజసూక్తిర్జయతి ముకున్దస్య పాదుకాయుగళీ ।
తదుభయధనాస్త్రివేదీమవన్ధ్యయన్తో జయన్తి భువి సన్తః ॥ ౩౩॥
ఇతి శ్రీవేదాన్తదేశికకృతం శ్రీరామపాదుకాస్తోత్రం సమ్పూర్ణమ్
All copyrights reserved 2012 digital media act
Comments
Post a Comment