తారాకవచం అథవా ఉగ్రతారా కవచం (రుద్రయామళ తంత్రే) Tara kavacham ugra Tara kavacham telugu
తారాకవచం అథవా ఉగ్రతారా కవచం (రుద్రయామళ తంత్రే)
శ్రీగణేశాయ నమః ।
ఈశ్వర ఉవాచ ।
కోటితన్త్రేషు గోప్యా హి విద్యాతిభయమోచినీ ।
దివ్యం హి కవచం తస్యాః శృణుష్వ సర్వకామదమ్ ॥ ౧॥
అస్య తారాకవచస్య అక్షోభ్య ఋషిః , త్రిష్టుప్ ఛన్దః ,
భగవతీ తారా దేవతా , సర్వమన్త్రసిద్ధిసమృద్ధయే జపే వినియోగః ।
ప్రణవో మే శిరః పాతు బ్రహ్మరూపా మహేశ్వరీ ।
లలాటే పాతు హ్రీంకారో బీజరూపా మహేశ్వరీ ॥ ౨॥
స్త్రీంకారో వదనే నిత్యం లజ్జారూపా మహేశ్వరీ ।
హూఁకారః పాతు హృదయే భవానీరూపశక్తిధృక్ ॥ ౩॥
ఫట్కారః పాతు సర్వాఙ్గే సర్వసిద్ధిఫలప్రదా ।
ఖర్వా మాం పాతు దేవేశీ గణ్డయుగ్మే భయాపహా ॥ ౪॥
నిమ్నోదరీ సదా స్కన్ధయుగ్మే పాతు మహేశ్వరీ ।
వ్యాఘ్రచర్మావృతా కట్యాం పాతు దేవీ శివప్రియా ॥ ౫॥
పీనోన్నతస్తనీ పాతు పార్శ్వయుగ్మే మహేశ్వరీ ।
రక్తవర్తులనేత్రా చ కటిదేశే సదాఽవతు ॥ ౬॥
లలజిహ్వా సదా పాతు నాభౌ మాం భువనేశ్వరీ ।
కరాలాస్యా సదా పాతు లిఙ్గే దేవీ హరప్రియా ॥ ౭॥
పిఙ్గోగ్రైకజటా పాతు జఙ్ఘాయాం విఘ్ననాశినీ ।
ప్రేతఖర్పరభృద్దేవీ జానుచక్రే మహేశ్వరీ ॥ ౮॥
నీలవర్ణా సదా పాతు జానునీ సర్వదా మమ ।
నాగకుణ్డలధర్త్రీ చ పాతు పాదయుగే తతః ॥ ౯॥
నాగహారధరా దేవీ సర్వాఙ్గం పాతు సర్వదా ।
నాగకఙ్కధరా దేవీ పాతు ప్రాన్తరదేశతః ॥ ౧౦॥
చతుర్భుజా సదా పాతు గమనే శత్రునాశినీ ।
ఖడ్గహస్తా మహాదేవీ శ్రవణే పాతు సర్వదా ॥ ౧౧॥
నీలామ్బరధరా దేవీ పాతు మాం విఘ్ననాశినీ ।
కర్త్రిహస్తా సదా పాతు వివాదే శత్రుమధ్యతః ॥ ౧౨॥
బ్రహ్మరూపధరా దేవీ సఙ్గ్రామే పాతు సర్వదా ।
నాగకఙ్కణధర్త్రీ చ భోజనే పాతు సర్వదా ॥ ౧౩॥
శవకర్ణా మహాదేవీ శయనే పాతు సర్వదా ।
వీరాసనధరా దేవీ నిద్రాయాం పాతు సర్వదా ॥ ౧౪॥
ధనుర్బాణధరా దేవీ పాతు మాం విఘ్నసఙ్కులే ।
నాగాఞ్చితకటీ పాతు దేవీ మాం సర్వకర్మసు ॥ ౧౫॥
ఛిన్నముణ్డధరా దేవీ కాననే పాతు సర్వదా ।
చితామధ్యస్థితా దేవీ మారణే పాతు సర్వదా ॥ ౧౬॥
ద్వీపిచర్మధరా దేవీ పుత్రదారధనాదిషు ।
అలఙ్కారాన్వితా దేవీ పాతు మాం హరవల్లభా ॥ ౧౭॥
రక్ష రక్ష నదీకుఞ్జే హూం హూం ఫట్ సుసమన్వితే ।
బీజరూపా మహాదేవీ పర్వతే పాతు సర్వదా ॥ ౧౮॥
మణిభృద్వజ్రిణీ దేవీ మహాప్రతిసరే తథా ।
రక్ష రక్ష సదా హూం హూం ఓం హ్రీం స్వాహా మహేశ్వరీ ॥ ౧౯॥
పుష్పకేతురజార్హేతి కాననే పాతు సర్వదా ।
ఓం హ్రీం వజ్రపుష్పం హుం ఫట్ ప్రాన్తరే సర్వకామదా ॥ ౨౦॥
ఓం పుష్పే పుష్పే మహాపుష్పే పాతు పుత్రాన్మహేశ్వరీ ।
హూం స్వాహా శక్తిసంయుక్తా దారాన్ రక్షతు సర్వదా ॥ ౨౧॥
ఓం ఆం హూం స్వాహా మహేశానీ పాతు ద్యూతే హరప్రియా ।
ఓం హ్రీం సర్వవిఘ్నోత్సారిణీ దేవీ విఘ్నాన్మాం సదాఽవతు ॥ ౨౨॥
ఓం పవిత్రవజ్రభూమే హుంఫట్స్వాహా సమన్వితా ।
పూరికా పాతు మాం దేవీ సర్వవిఘ్నవినాశినీ ॥ ౨౩॥
ఓం ఆః సురేఖే వజ్రరేఖే హుంఫట్స్వాహాసమన్వితా ।
పాతాలే పాతు సా దేవీ లాకినీ నామసంజ్ఞికా ॥ ౨౪॥
హ్రీంకారీ పాతు మాం పూర్వే శక్తిరూపా మహేశ్వరీ ।
స్త్రీంకారీ పాతు దేవేశీ వధూరూపా మహేశ్వరీ ॥ ౨౫॥
హూంస్వరూపా మహాదేవీ పాతు మాం క్రోధరూపిణీ ।
ఫట్స్వరూపా మహామాయా ఉత్తరే పాతు సర్వదా ॥ ౨౬॥
పశ్చిమే పాతు మాం దేవీ ఫట్స్వరూపా హరప్రియా ।
మధ్యే మాం పాతు దేవేశీ హూంస్వరూపా నగాత్మజా ॥ ౨౭॥
నీలవర్ణా సదా పాతు సర్వతో వాగ్భవా సదా ।
భవానీ పాతు భవనే సర్వైశ్వర్యప్రదాయినీ ॥ ౨౮॥
విద్యాదానరతా దేవీ వక్త్రే నీలసరస్వతీ ।
శాస్త్రే వాదే చ సఙ్గ్రామే జలే చ విషమే గిరౌ ॥ ౨౯॥
భీమరూపా సదా పాతు శ్మశానే భయనాశినీ ।
భూతప్రేతాలయే ఘోరే దుర్గమా శ్రీఘనాఽవతు ॥ ౩౦॥
పాతు నిత్యం మహేశానీ సర్వత్ర శివదూతికా ।
కవచస్య మాహాత్మ్యం నాహం వర్షశతైరపి ॥ ౩౧॥
శక్నోమి గదితుం దేవి భవేత్తస్య ఫలం చ యత్ ।
పుత్రదారేషు బన్ధూనాం సర్వదేశే చ సర్వదా ॥ ౩౨॥
న విద్యతే భయం తస్య నృపపూజ్యో భవేచ్చ సః ।
శుచిర్భూత్వాఽశుచిర్వాపి కవచం సర్వకామదమ్ ॥ ౩౩॥
ప్రపఠన్ వా స్మరన్మర్త్యో దుఃఖశోకవివర్జితః ।
సర్వశాస్త్రే మహేశాని కవిరాడ్ భవతి ధ్రువమ్ ॥ ౩౪॥
సర్వవాగీశ్వరో మర్త్యో లోకవశ్యో ధనేశ్వరః ।
రణే ద్యూతే వివాదే చ జయస్తత్ర భవేద్ ధ్రువమ్ ॥ ౩౫॥
పుత్రపౌతాన్వితో మర్త్యో విలాసీ సర్వయోషితామ్ ।
శత్రవో దాసతాం యాన్తి సర్వేషాం వల్లభః సదా ॥ ౩౬॥
గర్వీ ఖర్వీ భవత్యేవ వాదీ స్ఖలతి దర్శనాత్ ।
మృత్యుశ్చ వశ్యతాం యాతి దాసాస్తస్యావనీభుజః ॥ ౩౭॥
ప్రసఙ్గాత్కథితం సర్వం కవచం సర్వకామదమ్ ।
ప్రపఠన్వా స్మరన్మర్త్యః శాపానుగ్రహణే క్షమః ॥ ౩౮॥
ఆనన్దవృన్దసిన్ధూనామధిపః కవిరాడ్ భవేత్ ।
సర్వవాగిశ్వరో మర్త్యో లోకవశ్యః సదా సుఖీ ॥ ౩౯॥
గురోః ప్రసాదమాసాద్య విద్యాం ప్రాప్య సుగోపితామ్ ।
తత్రాపి కవచం దేవి దుర్లభం భువనత్రయే ॥ ౪౦॥
గురుర్దేవో హరః సాక్షాత్తత్పత్నీ తు హరప్రియా ।
అభేదేన భజేద్యస్తు తస్య సిద్ధిదూరతః ॥ ౪౧॥
మన్త్రాచారా మహేశాని కథితాః పూర్వవత్ప్రియే ।
నాభౌ జ్యోతిస్తథా రక్తం హృదయోపరి చిన్తయేత్ ॥ ౪౨॥
ఐశ్వర్యం సుకవిత్వం చ మహావాగిశ్వరో నృపః ।
నిత్యం తస్య మహేశాని మహిలాసఙ్గమం చరేత్ ॥ ౪౩॥
పఞ్చాచారరతో మర్త్యః సిద్ధో భవతి నాన్యథా ।
శక్తియుక్తో భవేన్మర్త్యః సిద్ధో భవతి నాన్యథా ॥ ౪౪॥
బ్రహ్మా విష్ణుశ్చ రుద్రశ్చ యే దేవాసురమానుషాః ।
తం దృష్ట్వా సాధకం దేవి లజ్జాయుక్తా భవన్తి తే ॥ ౪౫॥
స్వర్గే మర్త్యే చ పాతాలే యే దేవాః సిద్ధిదాయకాః ।
ప్రశంసన్తి సదా దేవి తం దృష్ట్వా సాధకోత్తమమ్ ॥ ౪౬॥
విఘ్నాత్మకాశ్చ యే దేవాః స్వర్గే మర్త్యే రసాతలే ।
ప్రశంసన్తి సదా సర్వే తం దృష్ట్వా సాధకోత్తమమ్ ॥ ౪౭॥
ఇతి తే కథితం దేవి మయా సమ్యక్ప్రకీర్తితమ్ ।
భుక్తిముక్తికరం సాక్షాత్కల్పవృక్షస్వరూపకమ్ ॥ ౪౮॥
ఆసాద్యాద్యగురుం ప్రసాద్య య ఇదం కల్పద్రుమాలమ్బనం
మోహేనాపి మదేన చాపి రహితో జాడ్యేన వా యుజ్యతే ।
సిద్ధోఽసౌ భువి సర్వదుఃఖవిపదాం పారం ప్రయాత్యన్తకే
మిత్రం తస్య నృపాశ్చ దేవి విపదో నశ్యన్తి తస్యాశు చ ॥ ౪౯॥
తద్గాత్రం ప్రాప్య శస్త్రాణి బ్రహ్మాస్త్రాదీని వై భువి ।
తస్య గేహే స్థిరా లక్ష్మీర్వాణీ వక్త్రే వసేద్ ధ్రువమ్ ॥ ౫౦॥
ఇదం కవచమజ్ఞాత్వా తారాం యో భజతే నరః ।
అల్పాయుర్నిర్ద్ధనో మూర్ఖో భవత్యేవ న సంశయః ॥ ౫౧॥
లిఖిత్వా ధారయేద్యస్తు కణ్ఠే వా మస్తకే భుజే ।
తస్య సర్వార్థసిద్ధిః స్యాద్యద్యన్మనసి వర్తతే ॥ ౫౨॥
గోరోచనాకుఙ్కుమేన రక్తచన్దనకేన వా ।
యావకైర్వా మహేశాని లిఖేన్మన్త్రం సమాహితః ॥ ౫౩॥
అష్టమ్యాం మఙ్గలదినే చతుర్ద్దశ్యామథాపి వా ।
సన్ధ్యాయాం దేవదేవేశి లిఖేద్యన్త్రం సమాహితః ॥ ౫౪॥
మఘాయాం శ్రవణే వాపి రేవత్యాం వా విశేషతః ।
సింహరాశౌ గతే చన్ద్రే కర్కటస్థే దివాకరే ॥ ౫౫॥
మీనరాశౌ గురౌ యాతే వృశ్చికస్థే శనైశ్చరే ।
లిఖిత్వా ధారయేద్యస్తు ఉత్తరాభిముఖో భవేత్ ॥ ౫౬॥
శ్మశానే ప్రాన్తరే వాపి శూన్యాగారే విశేషతః ।
నిశాయాం వా లిఖేన్మన్త్రం తస్య సిద్ధిరచఞ్చలా ॥ ౫౭॥
భూర్జపత్రే లిఖేన్మన్త్రం గురుణా చ మహేశ్వరి ।
ధ్యానధారణయోగేన ధారయేద్యస్తు భక్తితః ॥ ౫౮॥
అచిరాత్తస్య సిద్ధిః స్యాన్నాత్ర కార్యా విచారణా ॥ ౫౯॥
॥ ఇతి శ్రీరుద్రయామలే తన్త్రే ఉగ్రతారాకవచం సమ్పూర్ణమ్ ॥
All copyrights reserved 2012 digital media act
Comments
Post a Comment