త్రిపుర సుందరీ ప్రాతఃస్మరణ స్తోత్రం tripura sundari pratahasmarna stotram

త్రిపుర సుందరీ ప్రాతఃస్మరణ స్తోత్రం

శ్రీగణేశాయ నమః ।

కస్తూరికాకృతమనోజ్ఞలలామభాస్వదర్ధేన్దుముగ్ధనిటిలాఞ్చలనీలకేశీమ్ ।

ప్రాలమ్బమాననవమౌక్తికహారభూషాం ప్రాతః స్మరామి లలితాం కమలాయతాక్షీమ్ ॥ ౧॥

ఏణాఙ్కచూడసముపార్జితపుణ్యరాశిముత్తప్తహేమతనుకాన్తిఝరీపరీతామ్ ।

ఏకాగ్రచిత్తమునిమానసరాజహంసీం ప్రాతః స్మరామి లలితాపరమేశ్వరీం తామ్ ॥ ౨॥

ఈషద్వికాసినయనాన్తనిరీక్షణేన సామ్రాజ్యదానచతురాం చతురాననేడ్యామ్ ।

ఈశాఙ్కవాసరసికాం రససిద్ధిదాత్రీం ప్రాతః స్మరామి మనసా లలితాధినాథామ్ ॥ ౩॥

లక్ష్మీశపద్మభవనాదిపదైశ్చతుర్భిః సంశోభితే చ ఫలకేన సదాశివేన ।

మఞ్చే వితానసహితే ససుఖం నిషణ్ణాం ప్రాతః స్మరామి మనసా లలితాధినాథామ్ ॥ ౪॥

హ్రీం‍కారమన్త్రజపతర్పణహోమతుష్టాం హ్రీం‍కారమన్త్రజలజాతసురాజహంసీమ్ ।

హ్రీం‍కారహేమనవపఞ్జరసారికాం తాం ప్రాతః స్మరామి మనసా లలితాధినాథామ్ ॥ ౫॥

హల్లీసలాస్యమృదుగీతిరసం పిబన్తీమాకూణితాక్షమనవద్యగుణామ్బురాశిమ్ ।

సుప్తోత్థితాం శ్రుతిమనోహరకీరవాగ్భిః ప్రాతః స్మరామి మనసా లలితాధినాథామ్॥ ౬॥

సచ్చిన్మయీం సకలలోకహితైషిణీ చ సమ్పత్కరీహయముఖీముఖదేవతేడ్యామ్ ।

సర్వానవద్యసుకుమారశరీరరమ్యాం ప్రాతః స్మరామి మనసా లలితాధినాథామ్ ॥ ౭॥

కన్యాభిరర్ధశశిముగ్ధకిరీటభాస్వచ్చూడాభిరఙ్కగతహృద్యవిపఞ్చికాభిః ।

సంస్తూయమానచరితాం సరసీరుహాక్షీం ప్రాతః స్మరామి మనసా లలితాధినాథామ్ ॥ ౮॥

హత్వాఽసురేన్ద్రమతిమాత్రబలావలిప్తభణ్డాసురం సమరచణ్డమఘోరసైన్యమ్ ।

సంరక్షితార్తజనతాం తపనేన్దునేత్రాం ప్రాతః స్మరామి మనసా లలితాధినాథామ్ ॥ ౯॥

లజ్జావనమ్రరమణీయముఖేన్దుబిమ్బాం లాక్షారుణాఙ్ఘ్రిసరసీరుహశోభమానామ్ ।

రోలమ్బజాలసమనీలసుకున్తలాడ్యాం ప్రాతః స్మరామి మనసా లలితాధినాథామ్ ॥ ౧౦॥

హ్రీం‍కారిణీ హిమమహీధరపుణ్యరాశిం హ్రీం‍కారమన్త్రమహనీయమనోజ్ఞరూపామ్ ।

హ్రీం‍కారగర్భమనుసాధకసిద్ధిదాత్రీం ప్రాతః స్మరామి మనసా లలితాధినాథామ్ ॥ ౧౧॥

సఞ్జాతజన్మమరణాదిభయేన దేవీం సమ్ఫుల్లపద్మవిలయాం శరదిన్దుశుభ్రామ్ ।

అర్ధేన్దుచూడవనితామణిమాదివన్ద్యాం ప్రాతః స్మరామి మనసా లలితాధినాథామ్ ॥ ౧౨॥

కల్యాణశైలశిఖరేషు విహారశీలాం కామేశ్వరాఙ్కనిలయాం కమనీయరూపామ్ ।

కాద్యర్ణమన్త్రమహనీయమహానుభావాం ప్రాతః స్మరామి మనసా లలితాధినాథామ్ ॥ ౧౩॥

లమ్బోదరస్య జననీం తనురోమరాజీం బిమ్బాధరాం చ శరదిన్దుముఖీం మృడానీమ్ ।

లావణ్యపూర్ణజలధిం జలజాతహస్తాం ప్రాతః స్మరామి మనసా లలీతాధినాథామ్ ॥ ౧౪॥

హ్రీం‍కారపూర్ణనిగమైః ప్రతిపాద్యమానాం హ్రీం‍కారపద్మనిలయాం హతదానవేన్ద్రామ్ ।

హ్రీం‍కారగర్భమనురాజనిషేవ్యమాణాం ప్రాతః స్మరామి మనసా లలితాధినాథామ్ ॥ ౧౫॥

శ్రీచక్రరాజనిలయాం శ్రితకామధేనుం శ్రీకామరాజజననీం శివభాగధేయామ్ ।

శ్రీమద్గుహస్య కుల్యమఙ్గలదేవతాం తాం ప్రాతః స్మరామి మనసా లలితాధినాథామ్ ॥ ౧౬॥

ఇతి శ్రీత్రిపురసున్దరీప్రాతఃస్మరణం సమాప్తమ్

All copyrights reserved 2012 digital media act