ఉగ్రతారా హృదయం (భైరవీ తంత్రే) ugra Tara hridayam
ఉగ్రతారా హృదయం (భైరవీ తంత్రే)
శ్రీశివ ఉవాచ ।
శృణు పార్వతి భద్రం తే లోకానాం హితకారకమ్ ।
కథ్యతే సర్వదా గోప్యం తారాహృదయముత్తమమ్ ॥ ౧॥
శ్రీపార్వత్యువాచ ।
స్తోత్రం కథం సముత్పన్నం కృతం కేన పురా ప్రభో ।
కథ్యతాం సర్వసద్వృత్తం(సద్ వృత్తం) కృపాం కృత్వా మమోపరి ॥ ౨॥
శ్రీశివ ఉవాచ ।
రణే దేవాసురే పూర్వం కృతమిన్ద్రేణ సుప్రియే ।
దుష్టశత్రువినాశార్థం బలవృద్ధియశస్కరమ్ ॥ ౩॥
వినియోగః ।
ఓం అస్య శ్రీమదుగ్రతారాహృదయస్తోత్రమన్త్రస్య శ్రీభైరవఋషిః ।
అనుష్టుప్ ఛన్దః । శ్రీమదుగ్రతారాదేవతా । స్త్రీం బీజమ్ । హూం శక్తిః ।
నమః కీలకమ్ । సకలశత్రువినాశార్థే పాఠే వినియోగ ॥
॥ ఋష్యాదిన్యాసః ॥
శ్రీభైరవ ఋషయే నమః శిరసి ।
అనుష్టుప్ఛన్దసే నమః ముఖే ।
శ్రీమదుగ్రతారా దేవతాయై నమః హృది ।
స్త్రీం బీజాయ నమః గుహ్యే ।
హూం శక్తయే నమః నాభౌ ।
నమః కీలకాయ నమః పాదయోః ।
సకల శత్రువినాశార్థే పాఠే వినియోగాయ నమః అఞ్జలౌ ॥
॥ ఇతి ఋష్యాదిన్యాసః ॥
॥ అథ కరన్యాసః ॥
ఓం స్త్రీం అఙ్గుష్ఠాభ్యాం నమః ।
ఓం హ్రీం తర్జనీభ్యాం నమః ।
ఓం హూం మధ్యమాభ్యాం నమః ।
ఓం త్రీం అనామికాభ్యాం నమః ।
ఓం ఐం కనిష్ఠికాభ్యాం నమః ।
ఓం హంసః కరతల కరపృష్ఠాభ్యాం నమః ॥
॥ ఇతి కరన్యాసః ॥
॥ అథ హృదయాదిషడఙ్గన్యాసః ॥
ఓం స్త్రీం హృదయాయ నమః ।
ఓం హ్రీం శిరసే స్వాహా ।
ఓం హూం శిఖాయై వషట్ ।
ఓం త్రీం కవచాయ హుమ్ ।
ఓం ఐం నేత్రత్రయాయ వౌషట్ ।
ఓం హంసః అస్త్రాయ ఫట్ ॥
॥ ఇతి హృదయాదిషడఙ్గన్యాసః ॥
॥ అథ ధ్యానమ్ ॥
ఓం ధ్యాయేత్కోటిదివాకరద్యుతినిభాం బాలేన్దుయుక్శేఖరాం
రక్తాఙ్గీం రసనాం సురక్తవసనాం పూర్ణేన్దుబిమ్బాననామ్ ।
పాశం కర్త్రీమహాఙ్కుశాది దధతీం దోర్భిశ్చతుర్భిర్యుతాం
నానాభూషణభూషితాం భగవతీం తారాం జగత్తారిణీమ్ ॥ ౪॥
॥ ఇతి ధ్యానమ్ ॥
ఏవం ధ్యాత్వా శుభాం తారాం తతస్యు హృదయం పఠేత్ ॥
తారిణీ తత్త్వనిష్ఠానాం సర్వతత్త్వప్రకాశికా ।
రామాభిన్నా పరాశక్తిః శత్రునాశం కరోతు మే ॥ ౫॥
సర్వదా శత్రుసంరమ్భే తారా మే కురుతాం జయమ్ ।
స్త్రీం త్రీంస్వరూపిణీ దేవీ త్రిషు లోకేషు విశ్రుతా ॥ ౬॥
తవ స్నేహాన్మయాఖ్యాతం న పైశున్యం ప్రకాశ్యతామ్ ।
శృణుదేవి తవ స్నేహాత్ తారానామాని తత్త్వతః ॥ ౭॥
వర్ణయిష్యామి గుప్తాని దుర్లభాని జగత్త్రయే ।
తారిణీ తరలా తారా త్రిరూపా తరణిప్రభా ॥ ౮॥
సత్త్వరూపా మహాసాధ్వీ సర్వసజ్జనపాలికా ।
రమణీయా రజోరూపా జగత్సృష్టికరీ పరా ॥ ౯॥
తమోరూపా మహామాయా ఘోరరావాం భయానకా ।
కాలరూపా కాలికాఖ్యా జగద్విధ్వంసకారికా ॥ ౧౦॥
తత్త్వజ్ఞానపరానన్దా తత్త్వజ్ఞానప్రదాఽనఘా ।
రక్తాఙ్గీ రక్తవస్త్రా చ రక్తమాలాప్రశోభితా ॥ ౧౧॥
సిద్ధిలక్ష్మీశ్చ బ్రహ్మాణీ మహాకాలీ మహాలయా ।
నామాన్యేతాని యే మర్త్త్యాః సర్వదైకాగ్రమానసాః ॥ ౧౨॥
ప్రపఠన్తి ప్రియే తేషాం కిఙ్కరత్వం కరోమ్యహమ్ ।
తారాం తారపరాం దేవీం తారకేశ్వరపూజితామ్ ॥ ౧౩॥
తారిణీం భవపాథోధేరుగ్రతారాం భజామ్యహమ్ ।
స్త్రీం హ్రీం హూం త్రీం ఫట్ మన్త్రేణ జలం జప్త్వాఽభిషేచయేత్ ॥ ౧౪॥
సర్వే రోగాః ప్రణశ్యన్తి సత్యం సత్యం వదామ్యహమ్ ।
త్రీం స్వాహాన్తైర్మహామన్త్రైశ్చన్దనం సాధయేత్తతః ॥ ౧౫॥
తిలకం కురుతే ప్రాజ్ఞో లోకో వశ్యో భవేత్ప్రియే ।
స్త్రీం హ్రీం త్రీం స్వాహా మన్త్రేణ శ్మశానం భస్మమన్త్రయేత్ ॥ ౧౬॥
శత్రోర్గృహే ప్రతిక్షిప్త్వా శత్రోర్మృత్యుర్భవిష్యతి ।
హ్రీం హూం స్త్రీం ఫడన్తమన్త్రైః పుష్పం సంశోధ్య సప్తధా ॥ ౧౭॥
ఉచ్చాటనం నయత్యాశు రిపూణాం నైవ సంశయః । var భవత్యాశు
స్త్రీం త్రీం హ్రీం మన్త్రవర్యేణ అక్షతాశ్చాభిమన్త్రితాః ॥ ౧౮॥
తత్ప్రతిక్షేపమాత్రేణ శీఘ్రమాయాతి మానినీ।
(హంసః ఓం హ్రీం స్త్రీం హూం హంసః)
ఇతి మన్త్రేణ జప్తేన శోధితం కజ్జలం ప్రియే ॥ ౧౯॥
తస్యైవ తిలకం కృత్వా జగన్మోహం సమాచరేత్ ।
తారాయాః హృదయం దేవి సర్వపాపప్రణాశనమ్ ॥ ౨౦॥
వాజపేయాదియజ్ఞానాం కోటికోటిగుణోత్తరమ్ ।
గఙ్గాదిసర్వతీర్థానాం ఫలం కోటిగుణాత్స్మృతమ్ ॥ ౨౧॥
మహాదుఃఖే మహారోగే సఙ్కటే ప్రాణసంశయే ।
మహాభయే మహాఘోరే పఠేత్స్తోత్రం మహోత్తమమ్ ॥ ౨౨॥
సత్యం సత్యం మయోక్తం తే పార్వతి ప్రాణవల్లభే।
గోపనీయం ప్రయత్నేన న ప్రకాశ్యమిదం క్వచిత్ ॥ ౨౩॥
॥ ఇతి శ్రీభైరవీతన్త్రే శివపార్వతీసమ్వాదే
శ్రీమదుగ్రతారాహృదయం సమ్పూర్ణమ్ ॥
All copyrights reserved 2012 digital media act
Comments
Post a Comment