అర్థనారీశ్వర స్తోత్రం (శివ మహా పురాణం) ardhanareeswara stotram
అర్థనారీశ్వర స్తోత్రం (శివ మహా పురాణం)
బ్రహ్మోవాచ -
జయ దేవ మహాదేవ జయేశ్వర మహేశ్వర ।
జయ సర్వగుణశ్రేష్ఠ జయ సర్వసురాధిప ॥ ౧॥
జయ ప్రకృతికల్యాణి జయ ప్రకృతినాయికే ।
జయ ప్రకృతిదూరే త్వం జయ ప్రకృతిసున్దరి ॥ ౨॥
జయామోఘమహామాయ జయామోఘమనోరథ ।
జయామోఘమహాలీల జయామోఘమహాబల ॥ ౩॥
జయ విశ్వజగన్మాతర్జయ విశ్వజగన్మయే ।
జయ విశ్వజగద్ధాత్రి జయ విశ్వజగత్సఖి ॥ ౪॥
జయ శాశ్వతికైశ్వర్యే జయ శాశ్వతికాలయ ।
జయ శాశ్వతికాకార జయశాశ్వతికానుగ ॥ ౫॥
జయాత్మత్రయనిర్మాత్రి జయాత్మత్రయపాలిని ।
జయాత్మత్రయసంహర్త్రి జయాత్మత్రయనాయికే ॥ ౬॥
జయావలోకనాయత్తజగత్కారణబృంహణ । var జయావలోకనోత్కృష్ట
జయోపేక్షాకటాక్షోత్థహుతభుగ్భుక్తమౌక్తిక ॥ ౭॥
జయ దేవాద్యవిజ్ఞేయస్వాత్మసూక్ష్మదృశోజ్జ్వలే ।
జయ స్థూలాత్మశక్త్యేశేజయ వ్యాప్తచరాచరే ॥ ౮॥
var స్థూలాత్మశక్త్యంశవ్యాప్తవిశ్వచరాచరే
జయ నామైకవిన్యస్తవిశ్వతత్త్వసముచ్చయ ।
జయాసురశిరోనిష్ఠశ్రేష్ఠానుగకదమ్బక ॥ ౯॥
జయోపాశ్రితసంరక్షాం సంవిధానపటీయసీ ।
జయోన్మూలితసంసారవిషవృక్షాఙ్కురోద్గమే ॥ ౧౦॥
జయ ప్రాదేశికైశ్వర్యవీర్యశౌర్యవిజృమ్భిణే ।
జయ విశ్వబహిర్భూత నిరస్తపరవైభవ ॥ ౧౧॥
జయ ప్రణీతపఞ్చార్థప్రయోగపరమామృత ।
జయ పఞ్చార్థవిజ్ఞానసుధాస్తోత్రస్వరూపిణే ॥ ౧౨॥ var సుఖస్రోతఃస్వరూపిణే
జయతి ఘోరసంసారమహారోగభిషగ్వర ।
జయానాదిమలాజ్ఞానతమఃపటలచన్ద్రికే ॥ ౧౩॥
జయ త్రిపురకాలాగ్నే జయ త్రిపురభైరవి ।
జయ త్రిగుణనిర్ముక్తే జయ త్రిగుణమర్దిని ॥ ౧౪॥
జయ ప్రథమసర్వజ్ఞ జయ సర్వప్రబోధిక । var ప్రమథసర్వజ్ఞ
జయ ప్రచురదివ్యాఙ్గ జయ ప్రార్థితదాయిని ॥ ౧౫॥
క్వ దేవ తే పరం ధామ క్వ చ తుచ్ఛం చ నో వచః ।
తథాపి భగవన్ భక్త్యా ప్రలపన్తం క్షమస్వ మామ్ ॥ ౧౬॥
విజ్ఞాప్యైవంవిధైః సూక్తైర్విశ్వకర్మా చతుర్ముఖః ।
నమశ్చకార రుద్రాయ రుద్రాణ్యై చ ముహుర్ముహుః ॥ ౧౭॥
ఇదం స్తోత్రవరం పుణ్యం బ్రహ్మణా సముదీరితమ్ ।
అర్ధనారీశ్వరం నామ శివయోర్హర్షవర్ధనమ్ ॥ ౧౮॥
య ఇదం కీర్తయేద్భక్త్యా యస్య కస్యాపి శిక్షయా । var శుచిస్తద్గతమానసః ।
మహత్ఫలమవాప్నోతి శివయోః ప్రీతికారణాత్ ॥ ౧౯॥
సకలభువనభూతభావనాభ్యాం
జననవినాశవిహీనవిగ్రహాభ్యామ్ ।
నరవరయువతీవపుర్ధరాభ్యాం
సతతమహం ప్రణతోఽస్మి శఙ్కరాభ్యామ్ ॥ ౨౦॥
॥ ఇతి శ్రీశైవే మహాపురాణే వాయవీయసంహితాయాం పూర్వభాగే
శివశివాస్తుతివర్ణనం నామ పఞ్చదశాధ్యాయే
అర్ధనారీశ్వరస్తోత్రం సమ్పూర్ణమ్ ॥
All copyrights reserved 2012 digital media act
Comments
Post a Comment