భక్తమనోరథ సిద్దిప్రద గణేశస్తోత్రం (ముద్గలపురాణం) baktha manoradha Ganesha stotram
భక్తమనోరథ సిద్దిప్రద గణేశస్తోత్రం (ముద్గలపురాణం)
శ్రీ గణేశాయ నమః । స్కన్ద ఉవాచ ।
నమస్తే యోగరూపాయ సమ్ప్రజ్ఞాతశరీరిణే ।అసమ్ప్రజ్ఞాతమూర్ధ్నే తే తయోర్యోగమయాయ చ ॥ ౧॥
వామాఙ్గభ్రాన్తిరూపా తే సిద్ధిః సర్వప్రదా ప్రభో ।
భ్రాన్తిధారకరూపా వై బుద్ధిస్తే దక్షిణాఙ్గకే ॥ ౨॥
మాయాసిద్ధిస్తథా దేవో మాయికో బుద్ధిసంజ్ఞితః ।
తయోర్యోగే గణేశాన త్వం స్థితోఽసి నమోఽస్తు తే ॥ ౩॥
జగద్రూపో గకారశ్చ ణకారో బ్రహ్మవాచకః ।
తయోర్యోగే హి గణపో నామ తుభ్యం నమో నమః ॥ ౪॥
చతుర్విధం జగత్సర్వం బ్రహ్మ తత్ర తదాత్మకమ్ ।
హస్తాశ్చత్వార ఏవం తే చతుర్భుజ నమోఽస్తు తే ॥ ౫॥
స్వసంవేద్యం చ యద్బ్రహ్మ తత్ర ఖేలకరో భవాన్ ।
తేన స్వానన్దవాసీ త్వం స్వానన్దపతయే నమః ॥ ౬॥
ద్వంద్వం చరసి భక్తానాం తేషాం హృది సమాస్థితః ।
చౌరవత్తేన తేఽభూద్వై మూషకో వాహనం ప్రభో ॥ ౭॥
జగతి బ్రహ్మణి స్థిత్వా భోగాన్భుంక్షి స్వయోగగః ।
జగద్భిర్బ్రహ్మభిస్తేన చేష్టితం జ్ఞాయతే న చ ॥ ౮॥
చౌరవద్భోగకర్తా త్వం తేన తే వాహనం పరమ్ ।
మూషకో మూషకారూఢో హేరమ్బాయ నమో నమః ॥ ౯॥
కిం స్తౌమి త్వాం గణాధీశ యోగశాన్తిధరం పరమ్ ।
వేదాదయో యయుః శాన్తిమతో దేవం నమామ్యహమ్ ॥ ౧౦॥
ఇతి స్తోత్రం సమాకర్ణ్య గణేశస్తమువాచ హ ।
వరం వృణు మహాభాగ దాస్యామి దుర్లభం హ్యపి ॥ ౧౧॥
త్వయా కృతమిదం స్తోత్రం యోగశాన్తిప్రదం భవేత్ ।
మయి భక్తికరం స్కంద సర్వసిద్ధిప్రదం తథా ॥ ౧౨॥
యం యమిచ్ఛసి తం తం వై దాస్యామి స్తోత్రయంత్రితః ।
పఠతే శృణ్వతే నిత్యం కార్తికేయ విశేషతః ॥ ౧౩॥
ఇతి శ్రీముద్గలపురాణన్తర్వర్తి గణేశస్తోత్రం సమాప్తమ్
All copyrights reserved 2012 digital media act
Comments
Post a Comment