భరద్వాజ మహర్షి కృత శ్రీరామచంద్ర వేదపాద స్తవం Bharadwaja krutha sriramachandra veda pada stavam
భరద్వాజ మహర్షి కృత శ్రీరామచంద్ర వేదపాద స్తవం
శ్రీమద్రామం రఘూత్తంసం సచ్చిదానన్దలక్షణమ్ ।
భవన్తం కరుణావన్తం గాయే త్వాం మనసా గిరా ॥ ౧॥
రామే దూర్వాదలశ్యామే జానకీ కనకోజ్జ్వలా ।
భాతి మద్దైవతే మేఘే విద్యుల్లేఖేవ భాస్వరా ॥ ౨॥
త్వదన్యం న భజే రామ నిష్కామోఽన్యే భజన్తు తాన్ ।
భక్తేభ్యో యే పురా దేవా ఆయుః కీర్తిం ప్రజాం దదుః ॥ ౩॥
భజనం పూజనం రామ కరిష్యామి తవానిశమ్ ।
శ్రియం నేచ్ఛామి సంసారాద్భయం విన్దతి మామిహ ॥ ౪॥
శ్రీరామ జానకీజానే భువనే భవనే వనే ।
స్వభక్తకులజాతానామస్మాకం భవితా భవ ॥ ౫॥
రామ రామేతి రామేతి వదన్తం వికలం భవాన్ ।
యమదూతైరనుక్రాన్తం వత్సం గౌరివ ధావతి ॥ ౬॥
స్వచ్ఛన్దచారిణం దీనం రామ రామేతి వాదినమ్ ।
భవాన్మామనునిమ్నేన యథా వారీవ ధావతి ॥ ౭॥
రామ త్వం హృదయే యేషాం సుఖం లభ్యం వనేఽపి తైః ।
మణ్డం చ నవనీతం చ క్షీరం సర్పిర్మధూదకమ్ ॥ ౮॥
ప్రార్థయే త్వాం రఘూత్తంస మా భూన్మమ కదాచన ।
సర్వతీర్థేషు సర్వత్ర పాపేభ్యశ్చ ప్రతిగ్రహః ॥ ౯॥
సర్వే మదర్థం కురుతోపకారం శ్రీరామమాకర్ణయ కర్ణ నిత్యమ్ ।
మూర్ధన్నమాలోకయ నేత్ర జిహ్వే స్తుహి శ్రుతం గర్తసదం యువానమ్ ॥ ౧౦॥
భవాన్ రఘూత్తంస తు దైవతం మే యం సచ్చిదానన్దఘనస్వరూపమ్ ।
ఏకం పరం బ్రహ్మ వదన్తి నిత్యం వేదాన్తవిజ్ఞానసునిశ్చితార్థాః ॥ ౧౧॥
భవత్కృపాపాఙ్గవిలోకితేన వైకుణ్ఠవాసః క్రియతే జనేన ।
జ్ఞాత్వా భవన్తం శరణాగతోఽస్మి యస్మాత్పరం నాపరమస్తి కిఞ్చిత్ ॥ ౧౨॥
దీనాన్భవద్భక్తకులప్రసూతాన్భవత్పదారాధనహీనచిత్తాన్ ।
అనాథబన్ధో కరుణైకసిన్ధో పితేవ పుత్రాన్ ప్రతి నో జుషస్వ ॥ ౧౩॥
భవాన్ భవవ్యాఘ్రభయాభిభూతం జరాభిభూతం సహ లక్ష్మణేన ।
సదైవ మాం రక్షతు రాఘవేశః పశ్చాత్పురస్తాదధరాదుదస్తాత్ ॥ ౧౪॥
var రక్ష రాఘవేశ - రక్షతు రాఘవేశః
కామాద్యపథ్యేన వివర్ధమానం రోగం మదీయం భవనామధేయమ్ ।
దూరీకురు త్వం యదహం త్రిలోక్యాం భిషక్తమం త్వాం భిషజాం శృణోమి ॥ ౧౫॥
శ్రీరామచన్ద్రః స జయత్యజస్రం లఙ్కాపురీద్రోణగిరౌ పయోధౌ ।
యస్య ప్రసాదాదభవద్ధనూమానణోరణీయాన్మహతో మహీయాన్ ॥ ౧౬॥
శ్రీరామ రామేతి రఘూత్తమేతి నామాని జల్పేద్యది తస్య తత్క్షణాత్ ।
దిశో ద్రవన్త్యేవ యుయుత్సవః సదా భియం దధానా హృదయేషు శత్రవః ॥ ౧౭॥
అనాదిమవ్యక్తమనన్తమాద్యం స్వయం పరం జ్యోతిషమప్రమేయమ్ ।
విలోకయే దాశరథే కదా త్వామాదిత్యవర్ణం తమసః పరస్తాత్ ॥ ౧౮॥
శ్రీరాఘవ స్వీయపదారవిన్దే సేవాం భవాన్నః సతతం దదాతు
వయం స్వజన్మాన్తరసఞ్చితాని యయాతి విశ్వా దురితా తరేమ ॥ ౧౯॥
భో చిత్త చేత్కామయసే విభూతిం తమేవ సమ్ప్రార్థయ వీరమేకమ్ ।
రఘూత్తమం శ్రీరమణం సదా యః శ్రీణాముదారో ధరుణో రయీణామ్ ॥ ౨౦॥
వన్దేఽరవిన్దేక్షణమమ్బుదాభమాకర్ణనేత్రం సుకుమారగాత్రమ్ ।
యం జానకీ హర్షయతీ వనేఽపి ప్రియం సఖాయం పరిషస్వజానా ॥ ౨౧॥
సీతాజానే నైవ జానే త్వదన్యం త్యక్తశ్రీస్త్రీపుత్రకామః సదాఽహమ్ ।
త్వాం స్మృత్వాఽన్తే దేవయానాధిరూఢస్తత్త్వాయామి బ్రహ్మణా వన్దమానః ॥ ౨౨॥
అహం భరద్వాజమునిర్నిరన్తరం శ్రీరామమేకం జగదేకనాయకమ్ ।
సంవర్ణయే కావ్యరసాదివిత్తమం కవిం కవీనాముపమశ్రవస్తమమ్ ॥ ౨౩॥
పఠన్తి స్తుతిం యే నరా ఋద్ధికామాః
సమృద్ధిం చిరాయుష్యమాయుష్యకామాః ।
లభన్తే హ నిస్సంశయం పుత్రకామాః
లభన్తే హ పుత్రాన్ లభన్తే హ పుత్రాన్ ॥ ౨౪॥
వేదపాదాభిధస్తోత్రం స్నాత్వా భక్త్యా సకృన్నరః ।
యః పఠేద్రాఘవస్యాగ్రే జీవాతి శరదః శతమ్ ॥ ౨౫॥
ఇతి శ్రీభరద్వాజమహర్షిప్రణీతః శ్రీరామచన్ద్రవేదపాదస్తవః సమాప్తః
All copyrights reserved 2012 digital media act
Comments
Post a Comment