అనాహతేశ్వరసమ్మోహన అథవా ఈశ్వరసమ్మోహనకవచమ్ eshwara sammohana kavacham

 అనాహతేశ్వరసమ్మోహన అథవా ఈశ్వరసమ్మోహనకవచమ్ (రుద్ర యామాళ తంత్రే)

ఆనన్దభైరవీ ఉవాచ
కవచం శ‍ృణు చాస్యైవ లోకనాథ శివాపతే ।
ఈశ్వరస్య పరం బ్రహ్మ నిర్వాణయోగదాయకమ్ ॥ ౬౩-౧॥

కవచం దుర్లభం లోకే నామసమ్మోహనం పరమ్ ।
కవచం ధ్యానమాత్రేణ నిర్వాణఫలభాగ్భవేత్ ॥ ౬౩-౨॥

అస్య కిం(పు)త్వత్రమాహాత్మ్యం తథాపి తద్వదామ్యహమ్ ।
కేవలం గ్రన్థిభేదాయ నిజదేహానురక్షణాత్ ॥ ౬౩-౩॥

సర్వేషామపి యోగేన్ద్ర దేవానాం యోగినాం తథా ।
భావాది సిద్ధిలాభాయ కాయనిర్మలసిద్ధయే ॥ ౬౩-౪॥

ప్రకాశితం మహాకాల తవ స్నేహవశాదపి ।
సర్వే మన్త్రాః ప్రసిద్ధ్యన్తి సమ్మోహకవచాశ్రయాః ॥ ౬౩-౫॥

కవచస్య ఋషిర్బ్రహ్మా ఛన్దోఽనుష్టుబుదాహృతమ్ ।
ఈశ్వరో దేవతా ప్రోక్తస్తథా శక్తిశ్చ కాకినీ ॥ ౬౩-౬॥

కీలకం క్రూం తథా జ్ఞేయం ధ్యానసాధనసిద్ధయే ।
హృదబ్జభేదనార్థే తు వినియోగః ప్రకీర్తితః ॥ ౬౩-౭॥

ఏతచ్ఛ్రీసమ్మోహనమహాకవచస్య బ్రహ్మా ఋషిరనుష్టుప్ ఛన్దః
ఈశ్వరో దేవతా కాకినీ శక్తిః క్రూం కీలకం
ధ్యానసాధనసిద్ధయే హృదబ్జభేదార్థే జపే వినియోగః ।
ప్రణవో మే పాతు శీర్షం లలాటం చ సదాశివః ।
ప్రాసాదో హృదయం పాతు బాహుయుగ్మం మహేశ్వరః ॥ ౬౩-౮॥

పృష్ఠం పాతు మహాదేవ ఉదరం కామనాశనః ।
పార్శ్వౌ పాతు కామరాజో బాలః పృష్ఠతలాన్తరమ్ ॥ ౬౩-౯॥

కుక్షిమూలం మహావీరో లలితాపతిరీశ్వరః ।
మృత్యుఞ్జయో నీలకణ్ఠో లిఙ్గదేశం సదావతు ॥ ౬౩-౧౦॥

లిఙ్గాధో ముద్రికా పాతు పాదయుగ్మముమాపతిః ।
అఙ్గుష్ఠం పాతు సతతం పార్వతీప్రాణవల్లభః ॥ ౬౩-౧౧॥

గుల్ఫం పాతు త్రయమ్బకశ్చ జానునీ యువతీపతిః ।
ఊరుమూలం సదా పాతు మఞ్జుఘోషః సనాతనః ॥ ౬౩-౧౨॥

సిమనీ దేశమాపాతు భైరవః క్రోధభైరవః ।
లిఙ్గదేశోద్గమం పాతు లిఙ్గరూపీ జగత్పతిః ॥ ౬౩-౧౩॥

హృదయాగ్రం సదా పాతు మహేశః కాకినీశ్వరః ।
గ్రీవాం పాతు వృషస్థశ్చ కణ్ఠదేశం దిగమ్బరః ॥ ౬౩-౧౪॥

లమ్బికాం పాతు గణపో నాసికాం భవనాశకః ।
భ్రూమధ్యం పాతు యోగీన్ద్రః మహేశః పాతు మస్తకమ్ ॥ ౬౩-౧౫॥

మూర్ధ్నిదేశం మునీన్ద్రశ్చ ద్వాదశస్థో మహేశ్వరః ।
ద్వాదశామ్భోరుహం పాతు కాకినీప్రాణవల్లభః ॥ ౬౩-౧౬॥

నాభిమూలామ్బుజం పాతు మహారుద్రో జగన్మయః ।
స్వాధిష్ఠానామ్బుజం పాతు సదా హరిహరాత్మకః ॥ ౬౩-౧౭॥

మూలపద్మం సదా పాతు బ్రహ్మేన్ద్రో డాకినీశ్వరః ।
కుణ్డలీం సర్వదా పాతు డాకినీ యోగినీశ్వరః ॥ ౬౩-౧౮॥

కుణ్డలీ మాతృకా పాతు వటుకేశః శిరోహరః ।
రాకిణీవిగ్రహం పాతు వామదేవో మహేశ్వరః ॥ ౬౩-౧౯॥

పఞ్చాననః సదా పాతు లాకినీవజ్రవిగ్రహమ్ ।
స్వస్థానం ద్వాదశారఞ్చ వీరః పాతు సుకాకినీమ్ ॥ ౬౩-౨౦॥

వీరేన్ద్రః కర్ణికాం పాతు ద్వాదశారం విషాశనః ।
షోడశారం సదా పాతు క్రోధవీరః సదాశివః ॥ ౬౩-౨౧॥

మాం పాతు వజ్రనాథేశోఽరిభయాత్ క్రోధభైరవః ।
షట్చక్రం సర్వదా పాతు లాకినీశ్రీసదాశివః ॥ ౬౩-౨౨॥

షోడశామ్భోరుహాన్తస్థం పాతు ధూమ్రాక్షపాలకః ।
దిఙ్నాథేశో మహాకాయో మాం పాతు పరమేశ్వరః ।
ఆకాశగఙ్గాజటిలో ద్విదలం పాతు మే పరమ్ ।
గఙ్గాధరః సదా పాతు హాకినీం పరమేశ్వరః ॥ ౬౩-౨౩॥

హాకినీ పరశివో మే భ్రూపద్మం పరిరక్షతు ।
దణ్డపాణీశ్వరః పాతు మనోరూపం ద్విపత్రకమ్ ॥ ౬౩-౨౪॥

సాధుకేశః సదా పాతు మనోన్మన్యాదివాసినమ్ ।
పిఙ్గాక్షేశః సదా పాతు భయభూమౌ తనూం మమ ॥ ౬౩-౨౫॥

ఉన్మనీస్థానకం పాతు రోధినీసహితం మమ ।
సుధాఘటః సదా పాతు మమానన్దాదిదేవతామ్ ॥ ౬౩-౨౬॥

ఆనన్దభైరవః పాతు గూఢదేశాధిదేవతామ్ ।
మాయామయోపహా పాతు సుషుమ్నానాడికాకలామ్ ॥ ౬౩-౨౭॥

ఇడాకలాధరం పాతు కోటిసూర్యప్రభాకరః ।
పిఙ్గలామిహిరం పాతు చన్ద్రశేఖర ఈశ్వరః ॥ ౬౩-౨౮॥

కోటికాలానలస్థానం సుషుమ్నాయాం సదావతు ।
సుధాసముద్రో మాం పాతు రత్నకోటిమణీశ్వరః ॥ ౬౩-౨౯॥

శివనాథః సదా పాతు కుణ్డలీచక్రమేవ మే ।
విష్ణుచక్రం మహాదేవః కాలరాత్రః కులాన్వితమ్ ॥ ౬౩-౩౦॥

మృత్యుజేతా సదా పాతు సహస్రారం సదా మమ ।
సహస్రదలగం శమ్భుం స్వయమ్భూః పాతు సర్వదా ॥ ౬౩-౩౧॥

సర్వరూపిణమీశానం పాతు శర్వో హి సర్వదా ।
సర్వత్ర సర్వదా పాతు శ్రీనీలకణ్ఠ ఈశ్వరః ॥ ౬౩-౩౨॥

సర్వబీజస్వరూపో మే బీజమాలాం సదావతు ।
మాతృకాం సర్వబీజేశో మాతృకార్ణం శివో మమ ॥ ౬౩-౩౩॥

అహఙ్కారం హరః పాతు కరమాలాం సదా మమ ।
జలేఽరణ్యే మహాభీతౌ పర్వతే శూన్యమణ్డపే ॥ ౬౩-౩౪॥

వ్యాఘ్రభల్లూకమహిషపశ్వాదిభయదూషితే ।
మహారణ్యే ఘోరయుద్ధే గగనే భూతలేఽతలే ॥ ౬౩-౩౫॥

అత్యుత్కటే శస్త్రఘాతే శత్రుచౌరాదిభీతిషు ।
మహాసింహభయే క్రూరే మత్తహస్తిభయే తథా ॥ ౬౩-౩౬॥

గ్రహవ్యాధిమహాభీతౌ సర్పభీతౌ చ సర్వదా ।
పిశాచభూతవేతాలబ్రహ్మదైత్యభయాదిషు ॥ ౬౩-౩౭॥

అపవాదాపవాదేషు మిథ్యావాదేషు సర్వదా ।
కరాలకాలికానాథః ప్రచణ్డః ప్రఖరః పరః ॥ ౬౩-౩౮॥

ఉగ్రః కపర్దీ భీదంష్ట్రీ కాలాచ్ఛన్నకరః కవిః ।
క్రోధాచ్ఛన్నో మహోన్మత్తో గరుడీశో మహేశభృత ॥ ౬౩-౩౯॥

పఞ్చాననః పఞ్చరశ్మిః పావనః పావమానకః ।
శిఖా మాత్రామహాముద్రాధారకః క్రోధభూపతిః ॥ ౬౩-౪౦॥

ద్రావకః పూరకః పుష్టః పోషకః పారిభాషికః ।
ఏతే పాన్తు మహారుద్రా ద్వావింశతిమహాభయే ॥ ౬౩-౪౧॥

ఏతే సర్వే శక్తియుక్తా ముణ్డమాలావిభూషితాః ।
అహఙ్కారేశ్వరాః క్రుద్ధా యోగినస్తత్త్వచిన్తకాః ॥ ౬౩-౪౨॥

చతుర్భుజా మహావీరాః ఖడ్గఖేటకధారకాః ।
కపాలశఙ్ఖమాలాఢ్యా నానారత్నవిభూషితాః ॥ ౬౩-౪౩॥

కిఙ్కిణీజాలమాలాఢ్యా హేమనూపురరాజితాః ।
నానాలఙ్కారశోభాఢ్యాశ్చన్ద్రచూడావిభూషితాః ॥ ౬౩-౪౪॥

సదానన్దయుతాః శ్రీదా మోక్షదాః కర్మయోగినామ్ ।
సర్వదా భగవాన్ పాతు ఈశ్వరాః పాన్తు నిత్యశః ॥ ౬౩-౪౫॥

బ్రహ్మా పాతు మూలపద్మం శ్రీవిష్ణుః పాతు షడ్దలమ్ ।
రుద్రః పాతు దశదలమీశ్వరః పాత్వనాహతమ్ ॥ ౬౩-౪౬॥

సదాశివః పాతు నిత్యం షోడశారం సదా మమ ।
పరో ద్విదలమాపాతు షట్శివాః పాన్తు నిత్యశః ॥ ౬౩-౪౭॥

అపరాః పాన్తు సతతం మమ దేహం కులేశ్వరాః ।
పూర్ణం బ్రహ్మ సదా పాతు సర్వాఙ్గం సర్వదేవతాః ॥ ౬౩-౪౮॥

కాలరూపీ సదా పాతు మనోరూపీ శిరో మమ ।
ఆత్మలీనః సదా పాతు లలాటం వేదవిత్ప్రభుః ॥ ౬౩-౪౯॥

వారాణసీశ్వరః పాతు మమ భ్రూమధ్యపీఠకమ్ ।
యోగినాథః సదా పాతు మమ దన్తావలిం దృఢమ్ ॥ ౬౩-౫౦॥

ఓష్ఠాధరౌ సదా పాతు ఝిల్టీశో భౌతికేశ్వరః ।
నాసాపుటద్వయం పాతు భారభూతీశోఽతిథీశ్వరః ॥ ౬౩-౫౧॥

గణ్డయుగ్మం సదా పాతు స్థాణుకేశో హరేశ్వరః ।
కర్ణదేశం సదా పాతు అమరోఽర్ధీశ్వరో మమ ॥ ౬౩-౫౨॥

మహాసేనేశ్వరస్తుణ్డం మమ పాతు నిరన్తరమ్ ।
శ్రీకణ్ఠాదిమహారుద్రాః స్వాఙ్గగ్రన్థిషు మాతృకాః ॥ ౬౩-౫౩॥

మాం పాతు కాలరుద్రశ్చ సర్వాంఙ్గ కాలసంక్షయః ।
అకాల తారకః పాతు ఉదరం పరిపూరకః ॥ ౬౩-౫౪॥

అగస్త్యాదిమునిశ్రేష్ఠాః పాన్తు యోగిన ఈశ్వరాః ।
శ్రీనాథేశ్వర ఈశానః పాతు మే సూక్ష్మనాడికాః ॥ ౬౩-౫౫॥

త్రిశూలీ పాతు పూర్వస్యాం దక్షిణే మృత్యునాశనః ।
పశ్చిమే వారుణీమత్తో మహాకాలః సదాఽవతు ॥ ౬౩-౫౬॥

ఉత్తరే చావధూతేశో భైరవః కాలభైరవః ।
ఈశానే పాతు శాన్తీశో వాయవ్యాం యోగివల్లభః ॥ ౬౩-౫౭॥

మరుత్కోణే దైత్యహన్తా పాతు మాం సతతం శివః ।
వహ్నికోణే సదా పాతు కాలానలముఖామ్బుజః ॥ ౬౩-౫౮॥

ఊర్ధ్వం బ్రహ్మా సదా పాతు అధోఽనన్తః సదాఽవతు ।
సర్వదేవః సదా పాతు సర్వదేహగతం సుఖమ్ ॥ ౬౩-౫౯॥

ఇహార్హా వల్లభః పాతు కాలాఖ్యేశో గుణో మమ ।
రవినాథః సదా పాతు హృదయం మానసం మమ ॥ ౬౩-౬౦॥

చన్ద్రేశః పాతు సతతం భ్రూమధ్యం మమ కామదః ।
వజ్రదణ్డధరః పాతు రక్తాఙ్గేశస్త్రిలోచనమ్ ॥ ౬౩-౬౧॥

బుధశ్యామసున్దరేశః పాతు మే హృదయస్థలమ్ ।
సువర్ణవర్ణగుర్వీశో మమ కణ్ఠం సదాఽవతు ॥ ౬౩-౬౨॥

సిన్దూరజలదచ్ఛన్నాద్యర్కశుక్రేశ్వరో గలమ్ ।
నాభిదేశం సదా పాతు శనిశ్యామేశ ఈశ్వరః ॥ ౬౩-౬౩॥

రాహుః పాతు మహావక్త్రః కేవలం ముఖమణ్డలమ్ ।
కేతుః పాతు మహాకాయః సదా మే గుహ్యదేశకమ్ ॥ ౬౩-౬౪॥

ఇన్ద్రాదిదేవతాః పాన్తు పరివారగణైర్యుతాః ।
శిరోమణ్డలదిగ్రూపం పాన్తు వైకుణ్ఠవాసినః ॥ ౬౩-౬౫॥

భైరవా భైరవీయుక్తాః సర్వదేహసముద్భవాః ।
భీమదంష్ట్రా మహాకాయా మమ పాన్తు నిరన్తరమ్ ॥ ౬౩-౬౬॥

యజ్ఞభుఙ్నీలకణ్ఠో మే హృదయం పాతు సర్వదా ।
ఉన్మత్తభైరవాః పాన్తు ఈశ్వరాః పాన్తు సర్వదా ॥ ౬౩-౬౭॥

క్రోధభూపతయః పాన్తు శ్రీమాయామదనాన్వితాః ।
ఫలశ్రుతికథనం
ఇత్యేతత్ కవచం తారం తారకబ్రహ్మమఙ్గలమ్ ॥ ౬౩-౬౮॥

కథితం నాథ యత్నేన కుత్రాపి న ప్రకాశితమ్ ।
తవ స్నేహవశాదేవ ప్రసన్నహృదయాన్వితా ॥ ౬౩-౬౯॥

కృపాం కురు దయానాథ తవైవ కవచాద్భుతమ్ ।
హితాయ జగతాం మోహవినాశాయామృతాయ చ ॥ ౬౩-౭౦॥

పఠితవ్యం సాధకేన్ద్రైర్యోగీన్ద్రైరుపవన్దితమ్ ।
దుర్లభం సర్వలోకేషు సులభం తత్త్వవేదిభిః ॥ ౬౩-౭౧॥

అసాధ్యం సాధయేదేవ పఠనాత్ కవచస్య చ ।
ధారణాత్ పూజనాత్ సాక్షాత్ సర్వపీఠఫలం లభేత్ ॥ ౬౩-౭౨॥

కాకచఞ్చుపుటం కృత్వా సప్తధా పఞ్చధాపి వా ।
కవచం ప్రపఠేద్విద్వాన్ గూఢసిద్ధినిబన్ధనాత్ ॥ ౬౩-౭౩॥

కాకినీశ్వరసంయోగం సుయోగం కవచాన్వితమ్ ।
ఈశ్వరాఙ్గం విభావ్యైవ కల్పవృక్షసమో భవేత్ ॥ ౬౩-౭౪॥

ఏతత్కవచపాఠేన దేవత్వం లభతే ధ్రువమ్ ।
ఆరోగ్యం పరమం జ్ఞానం మోహనం జగతాం వశమ్ ॥ ౬౩-౭౫॥

స్తమ్భయేత్ పరసైన్యాని పఠేద్వారత్రయం యది ।
శాన్తిమాప్నోతి శీఘ్రం స షట్కర్మకరణక్షమః ॥ ౬౩-౭౬॥

ఆకాఙ్క్షారసలాలిత్యవిషయాశావివర్జితః ।
సాధకః కామధేనుః స్యాదిచ్ఛాదిసిద్ధిభాగ్భవేత్ ॥ ౬౩-౭౭॥

సర్వత్ర గతిశక్తిః స్యాత్ స్త్రీణాం మన్మథరూపధృక్ ।
అణిమాలఘిమాప్రాప్తిగుణాదిసిద్ధిమాప్నుయాత్ ॥ ౬౩-౭౮॥

యోగినీవల్లభో భూత్వా విచరేత్ సాధకాగ్రణీః ।
యథా గుహో గణేశశ్చ తథా స మే హి పుత్రకః ॥ ౬౩-౭౯॥

శ్రీమాన్ కులీనః సారజ్ఞః సర్వధర్మవివర్జితః ।
శనైః శనైర్ముదా యాతి షోడశారే యతీశ్వరః ॥ ౬౩-౮౦॥

యత్ర భాతి శాకినీశః సదాశివగురుః ప్రభుః ।
క్రమేణ పరమం స్థానం ప్రాప్నోతి మమ యోగతః ॥ ౬౩-౮౧॥

మమ యోగం వినా నాథ తవ భక్తిః కథం భవేత్ ।
ఏతత్సమ్మోహనాఖ్యస్య కవచస్య ప్రపాఠతః ॥ ౬౩-౮౨॥

వాణీ వశ్యా స్థిరా లక్ష్మీః సర్వైశ్వర్యసమన్వితః ।
త్యాగితా లభ్యతే పశ్చాన్నిఃసఙ్గో విహరేత్ శివః ।
సదాశివే మనో యాతి సిద్ధమన్త్రీ మనోలయః ॥ ౬౩-౮౩॥

ఇతి శ్రీరుద్రయామలే ఉత్తరతన్త్రే మహాతన్త్రోద్దీపనే సిద్ధమన్త్రప్రకరణే
షట్చక్రప్రకాశే భైరవీభైరవ సంవాదేఽనాహతేశ్వరసమ్మోహనాఖ్యకవచం
నామ త్రిషష్టితమః పటలః ॥ ౬౩॥



All copyrights reserved 2012 digital media act