గణేశ కవచం (గణేశ పురాణం) Ganesh kavacham Ganesh purana
గణేశ కవచం (గణేశ పురాణం)
శ్రీగణేశాయ నమః ॥
గౌర్యువాచ ।
ఏషోఽతిచపలో దైత్యాన్బాల్యేఽపి నాశయత్యహో ।
అగ్రే కిం కర్మ కర్తేతి న జానే మునిసత్తమ ॥ ౧॥
దైత్యా నానావిధా దుష్టాః సాధుదేవద్రుహః ఖలాః ।
అతోఽస్య కణ్ఠే కించిత్త్వం రక్షార్థం బద్ధుమర్హసి ॥ ౨॥
మునిరువాచ ।
ధ్యాయేత్సింహహతం వినాయకమముం దిగ్బాహుమాద్యే యుగే
త్రేతాయాం తు మయూరవాహనమముం షడ్బాహుకం సిద్ధిదమ్ ।
ద్వాపారే తు గజాననం యుగభుజం రక్తాఙ్గరాగం విభుమ్
తుర్యే తు ద్విభుజం సితాఙ్గరుచిరం సర్వార్థదం సర్వదా ॥ ౩॥
వినాయకః శిఖాం పాతు పరమాత్మా పరాత్పరః ।
అతిసున్దరకాయస్తు మస్తకం సుమహోత్కటః ॥ ౪॥
లలాటం కశ్యపః పాతు భృయుగం తు మహోదరః ।
నయనే భాలచన్ద్రస్తు గజాస్యస్త్వోష్ఠపల్లవౌ ॥ ౫॥
జిహ్వాం పాతు గణక్రీడశ్చిబుకం గిరిజాసుతః ।
వాచం వినాయకః పాతు దన్తాన్ రక్షతు విఘ్నహా ॥ ౬॥
శ్రవణౌ పాశపాణిస్తు నాసికాం చిన్తితార్థదః ।
గణేశస్తు ముఖం కణ్ఠం పాతు దేవో గణఞ్జయః ॥ ౭॥
స్కన్ధౌ పాతు గజస్కన్ధః స్తనౌ విఘ్నవినాశనః ।
హృదయం గణనాథస్తు హేరంబో జఠరం మహాన్ ॥ ౮॥
ధరాధరః పాతు పార్శ్వౌ పృష్ఠం విఘ్నహరః శుభః ।
లిఙ్గం గుహ్యం సదా పాతు వక్రతుణ్డో మహాబలః ॥ ౯॥
గణక్రీడో జానుసఙ్ఘే ఊరు మఙ్గలమూర్తిమాన్ ।
ఏకదన్తో మహాబుద్ధిః పాదౌ గుల్ఫౌ సదాఽవతు ॥ ౧౦॥
క్షిప్రప్రసాదనో బాహూ పాణీ ఆశాప్రపూరకః ।
అఙ్గులీశ్చ నఖాన్పాతు పద్మహస్తోఽరినాశనః ॥ ౧౧॥
సర్వాఙ్గాని మయూరేశో విశ్వవ్యాపీ సదాఽవతు ।
అనుక్తమపి యత్స్థానం ధూమ్రకేతుః సదాఽవతు ॥ ౧౨॥
ఆమోదస్త్వగ్రతః పాతు ప్రమోదః పృష్ఠతోఽవతు ।
ప్రాచ్యాం రక్షతు బుద్ధీశ ఆగ్నేయాం సిద్ధిదాయకః ॥౧౩॥
దక్షిణాస్యాముమాపుత్రో నైరృత్యాం తు గణేశ్వరః ।
ప్రతీచ్యాం విఘ్నహర్తాఽవ్యాద్వాయవ్యాం గజకర్ణకః ॥ ౧౪॥
కౌబేర్యాం నిధిపః పాయాదీశాన్యామీశనన్దనః ।
దివాఽవ్యాదేకదన్తస్తు రాత్రౌ సన్ధ్యాసు విఘ్నహృత్ ॥ ౧౫॥
రాక్షసాసురవేతాలగ్రహభూతపిశాచతః ।
పాశాఙ్కుశధరః పాతు రజఃసత్త్వతమః స్మృతిః ॥ ౧౬॥
జ్ఞానం ధర్మం చ లక్ష్మీం చ లజ్జాం కీర్తి తథా కులమ్ ।
వపుర్ధనం చ ధాన్యం చ గృహాన్దారాన్సుతాన్సఖీన్ ॥ ౧౭॥
సర్వాయుధధరః పౌత్రాన్ మయూరేశోఽవతాత్సదా ।
కపిలోఽజాదికం పాతు గజాశ్వాన్వికటోఽవతు ॥ ౧౮॥
భూర్జపత్రే లిఖిత్వేదం యః కణ్ఠే ధారయేత్సుధీః ।
న భయం జాయతే తస్య యక్షరక్షఃపిశాచతః ॥ ౧౮॥
త్రిసన్ధ్యం జపతే యస్తు వజ్రసారతనుర్భవేత్ ।
యాత్రాకాలే పఠేద్యస్తు నిర్విఘ్నేన ఫలం లభేత్ ॥ ౨౦॥
యుద్ధకాలే పఠేద్యస్తు విజయం చాప్నుయాద్ద్రుతమ్ ।
మారణోచ్చాటకాకర్షస్తమ్భమోహనకర్మణి ॥ ౨౧॥
సప్తవారం జపేదేతద్దినానామేకవింశతిమ్ ।
తత్తత్ఫలవాప్నోతి సాధకో నాత్రసంశయః ॥౨౨॥
ఏకవింశతివారం చ పఠేత్తావద్దినాని యః ।
కారాగృహగతం సద్యోరాజ్ఞా వధ్యం చ మోచయేత్ ॥ ౨౩॥
రాజదర్శనవేలాయాం పఠేదేతత్త్రివారతః ।
స రాజసం వశం నీత్వా ప్రకృతీశ్చ సభాం జయేత్ ॥ ౨౪॥
ఇదం గణేశకవచం కశ్యపేన సమీరితమ్ ।
ముద్గలాయ చ తే నాథ మాణ్డవ్యాయ మహర్షయే ॥ ౨౫॥
మహ్యం స ప్రాహ కృపయా కవచం సర్వసిద్ధిదమ్ ।
న దేయం భక్తిహీనాయ దేయం శ్రద్ధావతే శుభమ్ ॥ ౨౬॥
యస్యానేన కృతా రక్షా న బాధాస్య భవేత్క్వచిత్ ।
రాక్షసాసురవేతాలదైత్యదానవసమ్భవా ॥ ౨౭॥
ఇతి శ్రీగణేశపురాణే ఉత్తరఖణ్డే బాలక్రీడాయాం
షడశీతితమేఽధ్యాయే గణేశకవచం సమ్పూర్ణమ్
All copyrights reserved 2012 digital media act
Comments
Post a Comment