గణేశ కీలక స్తోత్రం (ముద్గల పురాణం) Ganesh keelakam
గణేశ కీలక స్తోత్రం (ముద్గల పురాణం)
దక్ష ఉవాచ ।
గణేశకీలకం బ్రహ్మన్ వద సర్వార్థదాయకమ్ ।
మన్త్రాదీనాం విశేషేణ సిద్ధిదం పూర్ణభావతః ॥ ౧॥
ముద్గల ఉవాచ ।
కీలకేన విహీనాశ్చ మన్త్రా నైవ సుఖప్రదాః ।
ఆదౌ కీలకమేవం వై పఠిత్వా జపమాచరేత్ ॥ ౨॥
తదా వీర్యయుతా మన్త్రా నానాసిద్ధిప్రదాయకాః ।
భవన్తి నాత్ర సన్దేహః కథయామి యథాశ్రుతమ్ ॥ ౩॥
సమాదిష్టం చాఙ్గిరసా మహ్యం గుహ్యతమం పరమ్ ।
సిద్ధిదం వై గణేశస్య కీలకం శృణు మానద ॥ ౪॥
అస్య శ్రీగణేశకీలకస్య శివ ఋషిః । అనుష్టుప్ఛన్దః ।
శ్రీగణపతిర్దేవతా । ఓం గం యోగాయ స్వాహా । ఓం గం బీజమ్ ।
విద్యావిద్యాశక్తిగణపతిప్రీత్యర్థే జపే వినియోగః ।
ఛన్దఋష్యాదిన్యాసాంశ్చ కుర్యాదాదౌ తథా పరాన్ ।
ఏకాక్షరస్యైవ దక్ష షడఙ్గానాచరేత్ సుధీః ॥ ౫॥
తతో ధ్యాయేద్గణేశానం జ్యోతిరూపధరం పరమ్ ।
మనోవాణీవిహీనం చ చతుర్భుజవిరాజితమ్ ॥ ౬॥
శుణ్డాదణ్డముఖం పూర్ణం ద్రష్టుం నైవ ప్రశక్యతే ।
విద్యాఽవిద్యాసమాయుక్తం విభూతిభిరుపాసితమ్ ॥ ౭॥
ఏవం ధ్యాత్వా గణేశానం మానసైః పూజయేత్పృథక్ ।
పఞ్చోపచారకైర్దక్ష తతో జపం సమాచరేత్ ॥ ౮॥
ఏకవింశతివారం తు జపం కుర్యాత్ప్రజాపతే ।
తతః స్తోత్రం సముచ్చార్య పశ్చాత్సర్వం సమాచరేత్ ॥ ౯॥
రూపం బలం శ్రియం దేహి యశో వీర్యం గజానన ।
మేధాం ప్రజ్ఞాం తథా కీర్తిం విఘ్నరాజ నమోఽస్తు తే ॥ ౧౦॥
యదా దేవాదయః సర్వే కుణ్ఠితా దైత్యపైః కృతాః ।
తదా త్వం తాన్నిహత్య స్మ కరోషి వీర్యసంయుతాన్ ॥ ౧౧॥
తథా మన్త్రా గణేశాన కుణ్ఠితాశ్చ దురాత్మభిః ।
శాపైశ్చ తాన్సవీర్యాంస్తే కురుష్వ త్వం నమో నమః ॥ ౧౨॥
శక్తయః కుణ్ఠితాః సర్వాః స్మరణేన త్వయా ప్రభో ।
జ్ఞానయుక్తాః సవీర్యాశ్చ కృతా విఘ్నేశ తే నమః ॥ ౧౩॥
చరాచరం జగత్సర్వం సత్తాహీనం యదా భవేత్ ।
త్వయా సత్తాయుతం ఢుణ్ఢే స్మరణేన కృతం చ తే ॥ ౧౪॥
తత్త్వాని వీర్యహీనాని యదా జాతాని విఘ్నప ।
స్మృత్యా తే వీర్యయుక్తాని పునర్జాతాని తే నమః ॥ ౧౫॥
బ్రహ్మాణి యోగహీనాని జాతాని స్మరణేన తే ।
యదా పునర్గణేశాన యోగయుక్తాని తే నమః ॥ ౧౬॥
ఇత్యాది వివిధం సర్వం స్మరణేన చ తే ప్రభో ।
సత్తాయుక్తం బభూవైవ విఘ్నేశాయ నమో నమః ॥ ౧౭॥
తథా మన్త్రా గణేశాన వీర్యహీనా బభూవిరే ।
స్మరణేన పునర్ఢుణ్ఢే వీర్యయుక్తాన్కురుష్వ తే ॥ ౧౮॥
సర్వం సత్తాసమాయుక్తం మన్త్రపూజాదికం ప్రభో ।
మమ నామ్నా భవతు తే వక్రతుణ్డాయ తే నమః ॥ ౧౯॥
ఉత్కీలయ మహామన్త్రాన్ జపేన స్తోత్రపాఠతః ।
సర్వసిద్ధిప్రదా మన్త్రా భవన్తు త్వత్ప్రసాదతః ॥ ౨౦॥
గణేశాయ నమస్తుభ్యం హేరమ్బాయైకదన్తినే ।
స్వానన్దవాసినే తుభ్యం బ్రహ్మణస్పతయే నమః ॥ ౨౧॥
గణేశకీలకమిదం కథితం తే ప్రజాపతే ।
శివప్రోక్తం తు మన్త్రాణాముత్కీలనకరం పరమ్ ॥ ౨౨॥
యః పఠిష్యతి భావేన జప్త్వా తే మన్త్రముత్తమమ్ ।
స సర్వసిద్ధిమాప్నోతి నానామన్త్రసముద్భవామ్ ॥ ౨౩॥
ఏనం త్యక్త్వా గణేశస్య మన్త్రం జపతి నిత్యదా ।
స సర్వఫలహీనశ్చ జాయతే నాత్ర సంశయః ॥ ౨౪॥
సర్వసిద్ధికరం ప్రోక్తం కీలకం పరమాద్భుతమ్ ।
పురానేన స్వయం శమ్భుర్మన్త్రజాం సిద్ధిమాలభత్ ॥ ౨౫॥
విష్ణుర్బ్రహ్మాదయో దేవా మునయో యోగినః పరే ।
అనేన మన్త్రసిద్ధిం తే లేభిరే చ ప్రజాపతే ॥ ౨౬॥
ఐలః కీలకమాద్యం వై కృత్వా మన్త్రపరాయణః ।
గతః స్వానన్దపూర్యాం స భక్తరాజో బభూవ హ ॥ ౨౭॥
సస్త్రీకో జడదేహేన బ్రహ్మాణ్డమవలోక్య తు ।
గణేశదర్శనేనైవ జ్యోతీరూపో బభూవ హ ॥ ౨౮॥
దక్ష ఉవాచ ।
ఐలో జడశరీరస్థః కథం దేవాదికైర్యుతమ్ ।
బ్రహ్మాణ్డం స దదర్శైవ తన్మే వద కుతూహలమ్ ॥ ౨౯॥
పుణ్యరాశిః స్వయం సాక్షాన్నరకాదీన్ మహామతే ।
అపశ్యచ్చ కథం సోఽపి పాపిదర్శనయోగ్యకాన్ ॥ ౩౦॥
ముద్గలవాచ ।
విమానస్థః స్వయం రాజా కృపయా తాన్ దదర్శ హ ।
గాణేశానాం జడస్థశ్చ శివవిష్ణుముఖాన్ ప్రభో ॥ ౩౧॥
స్వానన్దగే విమానే యే సంస్థితాస్తే శుభాశుభే ।
యోగరూపతయా సర్వే దక్ష పశ్యన్తి చాఞ్జసా ॥ ౩౨॥
ఏతత్తే కథితం సర్వమైలస్య చరితం శుభమ్ ।
యః శృణోతి స వై మర్త్యః భుక్తిం ముక్తిం లభేద్ధ్రువమ్ ॥ ౩౩॥
ఇతి శ్రీముద్గలమహాపురాణే పఙ్చమే ఖణ్డే లమ్బోదరచరితే
శ్రవణమాహాత్మ్యవర్ణనం నామ పఞ్చచత్వారింశత్తమోఽధ్యాయే
శ్రీగణేశకీలకస్తోత్రం సమ్పూర్ణమ్ ।
All copyrights reserved 2012 digital media act
Comments
Post a Comment