గణేశ స్తవరాజ స్తోత్రం (భవిష్యోత్తర పురాణం) Ganesha stavarajam
గణేశ స్తవరాజ స్తోత్రం (భవిష్యోత్తర పురాణం)
॥ శ్రీగణేశస్తవరాజ భవిష్యోత్తరపురాణే ॥
ఓం నమః శివాయ ॥
అథ శ్రీ గణేశస్తవరాజః ॥
ఓం విఘ్నేశో నః స పాయాద్విహృతిషు జలధి పుష్కరాగ్రేణ పీత్వా
యస్మిన్నుద్ధృత్య హస్తం వమతి తదఽఖిలం దృశ్యతే వ్యోమ్ని దేవైః ।
క్వాప్యఽనన్తః క్వచ శ్రీః క్వాప్యౌర్బః క్వపి శైలః క్వచన
మణిగణః క్వాపి నక్రాదిసత్వాః ॥
నిర్విఘ్నవిశ్వనిర్మాణసిద్ధయే యదనుగ్రహమ్ ।
మన్యే స వవ్రే ధాతాపి తస్మై విఘజితే నమః ॥
సర్గారమ్భేఽప్యజాతాయ బీజరుపేణ తిష్ఠతే ।
ధాత్రా కృతప్రణామాయ గణాధిపతయే నమః ॥
గణేశాయ నమః ప్రహ వవాఞ్ఛితామ్బుజభానవే ।
సితదంష్ట్రాకురస్ఫీతవిఘ్నౌఘతిమిరేన్దవే ॥
ప్రణమామ్యజమీశానం యోగశాస్త్రవిశారదమ ।
నిఃశేషగణవృన్దస్య నాయకం సువినాయకమ్ ॥
శ్రీ బ్రహ్మోవాచ
భగవఞ్ఛ్రోతుమిచ్ఛామి విస్తరేణ యథాయథమ ।
స్తవరాజస్య మాహాత్మయం స్వరుపం చ విశేషతః ॥
శ్రీ నన్దికేశ్వర ఉవాచ
స్తవరాజస్య మాహాత్మయం ప్రవక్ష్యామి సమాసతః ।
శృణుష్వావహితో భూత్వా సర్వసిద్ధికరం పరమ్ ॥
కర్మణా మనసా వాచా యే ప్రపన్నా వినాయకమ్ ।
తే తరన్తి మహాఘోరం సంసారం కామవర్జితాః ॥
సకృచ్చ జప్త్వా స్తవరాజముత్తమం తరత్యశేషం భవపాశపఞ్జరమ్ ।
విముచ్యతే సంసృతిసాగరాన్నరో విభూతిమాప్నోతి సురైః సుదుర్లభామ్ ॥
యత్ఫలం లభతే జప్త్వా స్వరుపం చాపి యాదృశమ్ ।
యః ప్రాతరుత్థితో విద్వాన్బ్రాహ్మో వాపి మహూర్తకే ॥
విషువాయనకాలేషు పుణ్యే వా సమయాన్తరే ॥
సర్వదా వా జపఞ్జన్తుః స్తవరాజం స్తవోత్తమమ్ ।
యత్ఫలం లభతే మర్త్యః తచ్ఛృణుష్వ చతుర్ముఖ ॥
గఙ్గాప్రవాహవత్తస్య వాగ్విభూతిర్విజృమ్భతే ।
బృహస్పతిసమో బుద్యా పురన్దరసమః శ్రియా ।
తేజసాదిత్యసఙ్కాశో భార్గవేణ సమో నయే ॥
ధనదేన సమో దానే తథా విత్తపరిగ్రహే ।
ధర్మరాజసమో న్యాయే శివభక్తో మయా సమః ॥
ప్రతాపే వహ్నిసఙ్కాశః ప్రసాదే శశినా సమః ।
బలేన మరుతా తుల్యో భవతా బ్రహ్మావర్చసే ॥
సర్వతత్వార్థవిజ్ఞానే మయాపి సమతాం వ్రజేత్ ।
ఏవమేతత్త్రిసన్ధ్యం వై జపన్స్తవమనుత్తమమ ॥
సర్వాన్కామాన్నరః ప్రాప్య భుక్త్వా భోగాన్యథేప్సితాన్ ।
సశరీరః సురేన్ద్రస్య పదం న్యస్యతి మూర్ధని ॥
ప్రాప్యాష్టగుణమైశ్వర్యం భుక్త్వా భోగాన్సుపుష్కలాన్ ।
అక్షయో వీతశోకశ్చ నిరాతఙ్కో నిరామయః ॥
జరామరణనిర్ముక్తో వేదశాస్త్రార్థకోవిదః ।
సిద్ధచారణగన్ధర్వదేవవిద్యాధరాదిభిః ॥
సంస్తూమానో మునిభి: శంస్యమానో దినేదినే ।
విచరత్యఽఖిలాఁల్లోకోన్బన్ధువర్గైః సమం నరః ॥
ఏవం చిరాయ నిర్వాహ్య దేవస్యానుచరోభవేత్ ।
స్తవరజం సకృజ్జప్త్వా ముచ్యతే సర్వకిల్వషైః ॥
సర్వసిద్ధిమవాప్నోతి పునాత్యాసప్తమం కులమ్ ।
నాశయేద్విఘ్నసఙ్ఘాతాంస్తేన్ వైనాయకం స్మృతమ్ ॥
స్తవరాజమనుస్మరఞ్జపన్హృదయాగ్రే విలిఖన్పఠన్నపి ।
స సురాసురసిద్ధచారణైర్మునిభిః ప్రత్యహమేవ పూజ్యతే ॥
తరతి చ భవచక్రం సర్వమోహం నిహన్తి
క్షిపతి చ పరవాదం మాన్యతే బన్ధువర్గైః ।
అఖిలమపి చ లోకం క్షేమతామాశు నీత్వా
వ్రజతి యతిభిరీడ్యం శాశ్వతం ధామ మర్త్యః ॥
యో జపతి స్తవరాజమశోకః క్షేమతమం పదమేతి మనుష్యః ।
చారణసిద్ధసురైరభివన్ద్యో యాతి పదం పరమం స విముక్తః ॥
జపేద్యః స్తవరాజాఖ్యమిమం ప్రాతః స్తవోత్తమమ్ ॥
తస్యాపచారం క్షమతే సర్వదైవ వినాయకః ॥
సర్వాన్నిహన్తి వై విఘ్నాన్విపదశ్చ సమన్తతః ।
అశేషాభిర్గణాఘ్యక్షః సమ్పద్భిరభిషిఞ్చతి ॥
అస్య చ ప్రణతా లక్ష్మీః కటాక్షానువిధాయినీ ।
కిం కరోమీతి వై భీత్యా పురస్తాదేవ తిష్ఠతి ॥
తస్మాన్నిఃశ్రేయసం గన్తుమతిభక్త్యా విచక్షణః ।
స్తవరాజం జపేజ్జన్తుర్ధర్మకామార్థసిద్ధయే ॥
ఆధివ్యాధ్యస్త్రశస్త్రాగ్నితమఃపఙ్కార్ణవాదిషు ।
భయేష్వన్యేషు చాప్యేతత్స్మరన్ముక్తో భవేన్నరః ॥
స్తవరాజం సకృజ్జప్త్వా మార్గం గచ్ఛతి మానవః ।
న జాతు జాయతే తస్య చౌరవ్యాఘ్రాదిభిర్భయమ్ ॥
యథా వరిష్ఠో దేవానామశేషాణాం వినాయకః ।
తథా స్తవో వరిష్ఠోయం స్తవానాం శమ్భుభావితః ॥
అవతీర్ణో యదా దేవో విఘ్నరాజో వినాయకః ।
తదా లోకోపకారార్థం ప్రోక్తోఽయం శమ్మునా స్వయమ్ ॥
వినాయకప్రియకరో దేవస్య హృదయఙ్గమః ।
జప్యః స్తవోఽయం యత్నేన ధర్మకామార్థసిద్ధయే ॥
అస్య శ్రీమహాగణపతిస్తవరాజమన్త్రస్య శ్రీ ఈశ్వర ఋషిః నానావృత్తాని
ఛన్దాంసి వినాయకో దేవతా తత్పురుష ఇతి బీజం ఏకదన్త ఇతి శక్తిః వక్రతుణ్డ
ఇతి కీలకం ఆత్మనో వాఙ్గనఃకాయోపార్జితపాపనివారణార్థం
సర్వవిఘ్ననివారణార్థం ధర్మకామార్థసిద్ధ్యర్థే పాఠే వినియోగః
ధ్యానం
జేతుం యస్త్రిపురం హరేణ హరిణా వ్యాజాబ్దలేర్బన్ధనే
స్త్రష్టుం వారిరుహోద్భవేన బిధినా శేషేణ ధర్తుం ధరామ్ ।
పార్వత్యా మహిషాసురప్రమథనే సిద్ధాధిపైర్ముక్తయే ధ్యాతః
పఞ్చశరేణ లోకవిజయే పాయాత్స నాగాననః ॥
శ్రీ ఈశ్వర ఉవాచ
ఓంకారమమృతం బ్రహ్మ శివమక్షరమవ్యయమ్ ।
యమామనాన్తి వేదేషు తం ప్రపద్యే వినాయకమ్ ॥
యతః ప్రవృత్తిర్జగతాం యః సాక్షీ హృదయస్థితః ।
ఆధారభూతో విశ్వస్య తం ప్రపద్యే వినాయకమ్ ॥
యస్య ప్రసాదాచ్ఛక్రాద్యాః ప్రాణన్తి నిమిషన్తి చ ।
ప్రవర్తకం తం లోకానాం ప్రణమామి వినాయకమ్ ॥
శిఖాగ్రే ద్వాదశాఙ్గుల్యే స్థితం సూక్ష్మతనుం విభుమ్ ।
యుఞ్జన్తి యం మరీచ్యాద్యాస్తం నమామి గణాధిపమ్ ॥
లీలయా లోకరక్షార్థం ద్విధాభూతో మహేశ్వరః ।
యః స్వయం జగతః సాక్షీ తం వన్దే ద్విరదాననమ్ ॥
విఘ్నేశ్వరం విధాతారం ధాతారం జగతామపి ।
ప్రణమామి గణాధ్యక్షం ప్రణతార్తివినాశనమ్ ॥
ఉత్సఙ్గతల్పే యో దేవ్యా భవాన్యాః క్రీడతే విభు ।
బాలో హరన్మనస్తస్యాస్తం ప్రపద్యే వినాయకమ్ ॥
విధాయ భూషణైశ్చిత్రైర్వేశకర్మ మనోరమమ్ ।
యం హృష్టా పశ్యతీశానీ తం ప్రపద్యే వినాయకమ్ ॥
లీలయా యః సృజఁల్లోకాన్భిన్దన్నపి ముహుర్ముహుః ।
సఙ్క్రీడతే మహాసత్వస్తం నతోస్మి గణాధిపమ్ ॥
సిన్దూరితమహాకుమ్భస్తుఙ్గదన్తః సుభైరవః ।
భినత్తి దైత్యకరిణస్తం వన్దే ద్విరడననమ్ ॥
యస్య మూర్తి వ్రజన్త్యాశు మదామోదానుషఙ్గిణః ।
భ్రమరాస్తీవ్రసంరావీస్తం నమామి వినాయకమ్ ॥
గమ్భీరభీమనినదం శ్రుత్వా యద్బృంహితం క్షణాత్ ।
పతన్త్యసురనాగేన్ద్రాస్తం వన్దే ద్విరదాననమ్ ॥
యో భినత్తి గిరీన్సర్వానిఘోరనిర్ఘాతభైరవైః ।
రవైః సన్త్రాసజననైస్తం వన్దే ద్విరదాననమ్ ॥
లీలయా ప్రహతా యేన్ పాదాభ్యాం ధరణీ క్షణాత్ ।
సంశీర్యతే సశైలౌఘా తం వన్దే చణ్డవిక్రమమ్ ॥
యత్కరాతాడనైర్భిన్నమమ్భః శతసహస్రధా ।
విశీర్యతే సముద్రాణాం తం నతోస్మి గణాధిపమ్ ॥
విముఖా యత్ర దృశ్యన్తే భ్రష్టవీర్యాః పదచ్యుతాః ।
నిష్ప్రభా విబుధాః సద్యస్తం ప్రపద్యే వినాయకమ్ ॥
యద్భ్ ప్రణిహితాం లక్ష్మీం లభన్తే వాసవాదయః ।
స్వతన్త్రమేకం నేతారం విఘ్నరాజం నమామ్యహమ్ ॥
యత్పాదపాంసునిచయం విభ్రాణా మణిమౌలిషు ।
అమరా బహు మన్యన్తే తం నతోస్మి గణాధిపమ్ ॥
వేదాన్తగీతం పురుషం వరేన్యమఽభయప్రదమ్ ।
హిరణ్మయపురాన్తఃస్థం తమస్మి శరణం గతః ॥
చిత్సుధానన్దసన్మాత్రం పరానన్దస్వరుపిణమ్ ।
నిష్కలం నిర్మలం సాక్షాద్వినాయకముపైమి తమ్ ॥
అనపాయం చ సద్భుతం భూతిదం భూతివర్ధనమ్ ।
నమామి సత్యంవిజ్ఞానమనన్తం బ్రహ్మరుపిణమ్ ॥
అనాద్యన్తం మహాదేవప్రియపుత్రం మనోరమమ్ ॥
ద్విపాననం విభుం సాక్షాదాత్మానం తం నమామ్యహమ్ ॥
విశ్వామరేశ్వరైర్వన్ద్యమాధారం జగతామపి ।
ప్రణమామి గణాధ్యక్షం ప్రణతాజ్ఞానమోచనమ్ ॥
శిఖాగ్రే ద్వాదశాఙ్గుల్యే స్థితం స్ఫటికసన్నిభమ్ ।
గోక్షీరధవలాకారం ప్రణమామి గజాననమ్ ॥
అనాధారం నవాధారమనన్తాధారసంస్థితమ్ ।
ధాతారం చ విధాతారం తమస్మి శరణం గతః ॥
అనన్తదృష్టిం లోకాదిమనన్తం విద్రుమప్రభమ్ ।
అప్రతర్క్యమనిర్దేశ్యం నిరాలమ్బం నమామ్యహమ్ ॥
భూతాలయం జగద్యోనిమణీయాంసమణోరపి ।
స్వసంవేద్యమసంవేద్యం వేద్యావేద్యం నమామ్యహమ్ ॥
ప్రమాణప్రత్యయాతీతం హంసమవ్యక్తలక్షణమ్ ।
అనావిలమనాకారం తమస్మి శరణం గతః ॥
విశ్వాకారమనాకారం విశ్వావాసమనామయమ్ ।
సకలం నిష్కలం నిత్యం నిత్యానిత్యం నమామ్యహమ్ ॥
సంసారవైద్యం సర్వజ్ఞం సర్వభేషజభేషజమ్ ।
ఆత్మానం సదసత్వ్యక్తం ధాతారం ప్రణమామ్యహమ్ ॥
భ్రూమధ్యే సంస్థితం దేవం నాభిమధ్యే ప్రతిష్ఠితమ్ ।
హృన్మధ్యే దీపవత్సంస్థం వన్దే సర్వస్య మధ్యగమ్ ॥
హృత్పుణ్డరీకనిలయం సూర్యమణ్డలనిష్ఠితమ్ ।
తారకాన్తరసంస్థానం తారకం తం నమామ్యహమ్ ॥
తేజస్వినం వికర్తారం సర్వకారణకారణమ్ ।
భక్తిగమ్యమహం వన్దే ప్రణవప్రతిపాదితమ్ ॥
అన్తర్యోగరతైర్యుక్తైః కల్పితైః స్వస్తికాసనైః ॥
బద్ధం హృత్కర్ణికామధ్యే ధ్యానగమ్యం నమామ్యహమ్ ॥
ధ్యేయం దుర్జ్ఞేయమద్వైతం త్రయీసారం త్రిలోచనమ్ ।
ఆత్మానం త్రిపురారాతేః ప్రియసూనుం నమామ్యహమ్ ॥
స్కనదప్రియం స్కన్దగురుం స్కన్దస్యాగ్రజమేవ చ ।
స్కన్దేన సహితం శశ్వన్నమామి స్కన్దవత్సలమ్ ॥
నమస్తే విఘ్నరాజాయ భక్తవిఘ్నవినాశినే ।
విఘ్నాధ్యక్షాయ విఘ్నానాం నిహన్త్రే విశ్వచక్షుషే ॥
విఘ్నదాత్రేఽప్యభక్తానాం భక్తానాం విఘ్నహారిణే ॥
విఘ్నేశ్వరాయ వీరాయ విఘ్నేశాయ నమోనమః ॥
కులాద్రిమేరుకైలాసశిఖరాణాం ప్రభేదినే ।
దన్తభిన్నాభ్రమాలాయ కరిరాజాయ తే నమః ॥
కిరీటినే కుణ్డలినే మాలినే హారిణే తథా ।
నమో మౌఞ్జీసనాథాయ జటినే బ్రహ్మచారిణే ॥
డిణ్డిముణ్దాయ చణ్డాయ నమోఽధ్యయనశీలినే ॥
వేదాధ్యయనయుక్తాయ సామగానపరాయ చ ।
త్ర్యక్షాయ చ వరిష్ఠాయ నమశ్చన్ద్రశిఖణ్డినే ॥
కపర్దినే కరాలాయ శఙ్కరప్రియసూనవే ।
సుతాయ హైమవత్యాశ్చ హర్త్రే చ సురవిద్విషామ్ ॥
ఐరావణాదిభిర్దివ్యైర్దిగ్గజైః సంస్తుతాయ చ ।
స్వబృంహితపరిత్రస్తైర్నమస్తే ముక్తిహేతవే ॥
కూష్మాణ్డగణనాథాయ గణానాం పతయే నమః ।
వజ్రిణారాధితాయైవ వజ్రివజ్రనివారిణే ॥
పూష్ణో దన్తభిదే సాక్షాన్మరుతాం భీషణాయ చ ।
బ్రహ్మణశ్చ శిరోహర్త్రే వివస్వద్బన్ధనాయ చ ॥
అగ్నేశ్చైవ సరస్వత్యా ఇన్ద్రస్య చ బలచ్ఛిదే ।
భైరవాయ సుభీమాయ భయానకరవాయ చ ॥
విభీషణాయ భీష్మాయ నాగాభరణధారిణే ।
ప్రమత్తాయ ప్రచణ్డాయ వక్రతుణ్డాయ తే నమః ॥
హేరమ్బాయ నమస్తుభ్యం ప్రలమ్బజఠరాయ చ ।
ఆఖువాహాయ దేవాయ చైకదన్తాయ తే నమః ॥
శూర్పకర్ణాయ శూరాయ పరశ్వధధరాయ చ ।
సృణిహస్తాయ ధీరాయ నమః పాశాసిపాణయే ॥
ధారణాయ నమస్తుభ్యం ధారణాభిరతాయ చ ।
ధారణాభ్యాసయుక్తానాం పురస్తాత్సంస్తుతాయ చ ॥
ప్రత్యాహారాయ వై తుభ్యం ప్రత్యాహారరతాయ చ ।
ప్రత్యాహారరతానాం చ ప్రత్యాహారస్థితాత్మనే ॥
విఘ్నాధ్యక్షాయ దక్షాయ లోకాధ్యక్షాయ ధీమతే ।
భూతాధ్యక్షాయ భవ్యాయ గణాధ్యక్షాయ తే నమః ॥
యోగపీఠాన్తరస్థాయ యోగినే యోగధారిణే ।
యోగినాం హృదిసంస్థాయ యోగగమ్యాయ తే నమః ॥
ధ్యానాయ ధ్యానగమ్యాయ శివధ్యానపరాయ చ ।
ధ్యేయానామపి ధ్యేయాయ నమో ధ్యేయతమాయ చ ॥
సప్తపాతాలపాదాయ సప్తబ్దీపోరుజఙ్ఘినే ।
నమో దిగ్బాహవే తుభ్యం వ్యోమదేహాయ తే నమః ॥
సోమసూర్యాగ్నినేత్రాయ బ్రహ్మవిద్యామదామ్భసే ।
బ్రహ్మాణ్డకుణ్డపీఠాయ హృదయాలానకాయ చ ॥
జ్యోతిర్మణ్డలపుచ్ఛాయ హృద్యాలానకాయ చ ।
ధ్యానార్ద్రబద్ధపాదాయ పూజాధోరణధారిణే ॥
సోమార్కబిమ్బఘణ్టాయ దిక్కరీన్ద్రవియోగినే ।
ఆకాశసరసో మధ్యే క్రీడాగహనశాలినే ॥
సుమేరుదన్తకోశాయ పృథివీస్థలగాయ చ ।
సుఘోషాయ సుభీమాయ సురకుఞ్జరభేదినే ॥
హేమాద్రికూటభేత్త్రే చ దైత్యదానవమర్దినే ।
గజాకారాయ దేవాయ గజరాజాయ తే నమః ॥
బ్రహ్మణే బ్రహ్మరుపాయ బ్రహ్మగోత్రేఽవ్యయాయ చ ।
బ్రహ్మఘ్నే బ్రహ్మణాయైవ బ్రహ్మణః ప్రియబన్ధవే ॥
యజ్ఞాయ యజ్ఞగోప్త్రే చ యజ్ఞానాం ఫలదాయినే ॥
యజ్ఞహర్త్రే యజ్ఞకర్త్రే సర్వయజ్ఞమయాయ చ ।
సర్వనేత్రాధివాసాయ సర్వైశ్వర్యప్రదాయినే ।
గుహాశయాయ గుహ్యాయ యోగినే బ్రహ్మవాదినే ॥ ౧౦౦ ॥
ఓం గం తత్పురుషాయ విద్మహే
వక్రతుణ్డాయ ధీమహి తన్నో
దన్తీ ప్రచోదయాత్ ॥
ఏకాక్షరపరాయైవ మాయినే బ్రహ్మచారిణే ।
భూతానాం భువనేశానాం పతయే పాపహారిణే ॥
సర్వారమ్భనిహన్త్రే చ విముఖానాం నిజార్చనే ।
నమో నమో గణేశాయ విఘ్నేశాయ నమో నమః ॥
త్రిపురం దగ్ధుకామేన పూజితాయ త్రిశూలినా ।
దయాశీల దయాహార దయాపర నమోస్తు తే ॥
వినాయకాయ వై తుభ్యం వికృతాయ నమో నమః ।
నమస్తుభ్యం జగద్ధాత్రే నమస్తుభ్యం వియోగినే ॥
నమస్తుభ్యం త్రినేత్రాయ త్రినేత్రప్రియసూనవే ।
సప్తకోటిమహామన్త్రైర్మన్త్రితావయవాయ తే ॥
మన్త్రాయ నమ్త్రిణాం నిత్యం మన్త్రాణాం ఫలదాయినే ।
లీలయా లోకరక్షార్థం విభక్తనిజమూర్తయే ॥
స్వయం శివాయ దేవాయ లోకక్షేమానుపాలినే ।
నమో నమః క్షమాభర్త్రే నమః క్షేమతమాయ చ ॥
దయామయాయ దేవాయ సర్వభూతదయాలవే ॥
దయాకర దయారుప దయామూర్తే దయాపర ॥
దయాప్రాప్య దయాసార దయాకృతిరతాత్మక ॥
జగతాం తు దయాకర్త్రే సర్వకర్త్రే నమో నమః ॥
నమః కారుణ్యదేహాయ వీరాయ శుభదన్తినే ।
భక్తిగమ్యాయ భక్తానాం దుఃఖహర్త్రే నమోస్తు తే ॥
నమః సమస్తగీర్వాణవన్దితాఙిఘ్రయుగాయ తే ।
జగతాం తస్థుషాం భర్త్రే విఘ్నహర్త్రే నమోస్తు తే ॥
నమో నమస్తే గణనాయకాయ
సునాయకాయాఖిలనాయకాయ ।
వినాయకాయాభయదాయకాయ
నమః శుభానాముపనాయకాయ ॥
గణాధిరాజాయ గణానుశాస్త్రే
గజాధిరాజాయ గజాననాయ ।
శతాననాయామితమాననాయ
నమో నమో దైత్యవినాశనాయ ॥
అనామయాయామలధీమయాయ ।
స్వమాయయావిష్టజగన్మయాయ ।
అమేయమాయావికసన్మయాయ
నమో నమస్తేస్తు మనోమయాయ ॥
నమస్తే సమస్తాధినాథాధికర్త్రే
నమస్తే సమస్తోరువిస్తారభాజే ।
నమస్తే సమస్తాధికాయాతిభూమ్నే
నమస్తే పునర్వ్యస్తవిన్యస్తధామ్నే ॥
పాత్రే సురాణాం ప్రమథేశ్వరాణాం
శాస్త్రేఽనుశాస్త్రే సచరాచరస్య ।
నేత్రే ప్రనేత్రే చ శరీరభాజాం
ధాత్రే వరాణాం భవతే నమోఽస్తే ॥
నమోస్తు తే విఘ్నవినాశకాయ
నమోస్తు తే భక్తభయాపహాయ ।
నమోస్తు తే ముక్తమనస్థితాయ
నమశ్చ భూయో గణనాయకాయ ॥
అఖిలభువనభర్త్రే సమ్పదామేకదాత్రే
నిఖిలతిమిరభేత్త్రే నిష్కలాయావ్యయాయ ।
ప్రణతమనుజగోప్త్రే ప్రాణినాం త్రాణకర్త్రే
సకలవిబుధశాస్త్రే విశ్వనేత్రే నమోఽస్తు ॥
దశనకులలిశభిన్నైర్నిర్గతేర్దిగ్గజానాం
విలసితశుభదన్తం మౌక్తికైశ్చన్ద్రగౌరైః ।
భవన్ముపసరన్తం ప్రేక్ష్య గౌరీ భవన్తం
సుదృఢమథ కరాభ్యాం శ్లిష్యతే ప్రేమనున్నా ॥
మృదుని లలితశీతే తల్పరఙ్గే భవాన్యాః
శుభవిలసితభావాం నృత్యలీలాం విధాయ ।
అచలదుహితురఙ్కాదఽఙ్కమన్యం విసర్పన్-
పితురుపహరసి త్వం నృత్యహర్షోపహారమ్ ॥
భుజగవలయితేనోపస్పృశ్న్పాణినా త్వాం
సరభసమథ బాహ్వోరన్తరాలే నివేశ్య ।
కలమధురసుగీతం నృత్తమాలోకయంస్తే
కలమఽవికలతాలం చుమ్బతే హస్తేపద్మే ॥
కువలయశతశీతైర్భూరికల్హారహృద్యైః
తవ ముహురపి గాత్రస్పర్శనైః సమ్ప్రహృష్యన్ ।
క్షిపతి చ సువిశాలే స్వాఙ్కమధ్యే భవన్తం
తవ ముహురనురాగాన్మూర్ధ్ని జిఘ్రన్మహేశః ॥
బాలోఽబాలపరాక్రమః సురగణైః సమ్ప్రార్థ్యసేఽహర్నిశం
గాయన్కిమ్పురుషఙ్గనావిరచితైః స్తోత్రైరభిష్టూయసే ।
హాహాహూహుకతుమ్బురుప్రభృతిభిస్త్వం గీయసే నారద
స్తోత్రైరద్భుతచేష్టితైః ప్రతిదినం ప్రోద్ధోషసే సామభిః ॥
త్వాం నమన్తి సురసిద్ధచారణా-
స్త్వాం యజన్తి నిఖిలా ద్విజాతయః ।
త్వాం పఠన్తి మునయః పురావిద-
స్త్వాం స్మరన్తి యతయః సనాతనాః ॥
పరం పురాణం గుణినం మహాన్తం
హిరణ్మయం పురుషం యోగగమ్యమ్ ।
యమామనన్త్యాత్మభువం మనీషిణో
విపస్చితం కవిమప్యక్షయం చ ॥
గణానాన్త్వా గణనాథం సురేన్ద్రం
కవిం కవీనామతిమేధ్యవిగ్రహమ్ ।
జ్యేష్ఠరాజమృషభం కేతుమేకమానః
శృణ్వన్నూతిభిః సీద శశ్వత్ ॥
నమో నమో వాఙ్మనసాతిభూమయే
నమో నమో వాఙ్మనసైకభూతయే ।
నమో నమోనన్తసుఖైకదాయినే
నమో నమోనన్తసుఖైకసిన్ధవే ॥
నమో నమః శాశ్వతశాన్తిహేతవే
క్షమాదయాపూరితచారుచేతసే ।
గజేన్ద్రరుపాయ గణేశ్వరాయ తే
పరస్య పుంసః ప్రథమాయ సూనవే ॥
నమో నమః కారణకారణాయ తే
నమో నమో మఙ్గలమఙ్గలాత్మనే ।
నమో నమో వేదవిదాం మనీషిణా-
ముపాసనీయాయ నమో నమో నమః ॥ ౩॥
శ్రీ ఈశ్వర ఉవాచ
వైనాయకం స్తవం పుణ్యం సర్వపాపప్రణాశనమ్ ।
చిన్తాశోకప్రశమనమాయురారోగ్యవర్ధనమ్ ॥
నృపాణాం సతతం రక్షా ద్విజానాం చ విశేషతః ।
స్తవరాజ ఇతి ఖ్యాతం సర్వ సిద్ధికరం పరమ్ ॥
యః పఠేచ్ఛృణుయాద్వాపి సర్వపాపైః ప్రముచ్యతే ।
రుపం వీర్యం బలం ప్రజ్ఞాం యశశ్చాయుః సమన్వితమ్ ॥
మనీషాం సిద్ధిమారోగ్యం శ్రియమప్యక్షయిష్ణుతామ్ ।
సర్వలోకాధిపత్యం చ సర్వదేవాధిరాజతామ్ ॥
ప్రాప్యాష్టగుణమైశ్వర్యం చ సర్వదేవాధిరాజతామ్ ॥
ప్రాప్యాష్టగుణమైశ్వర్యం ప్రాప్య భూతిం చ శాశ్వతీమ్ ।
ఉద్ధృత్యాసప్తమం వంశం దుస్తరాద్భ్వసాగరాత్ ॥
కాఞ్చనేన విమానేన శతనామాయుతేన చ ।
విచరత్యఖిలాఁల్లోకాన్సశరీరో గణాధిపః ॥
భత్ప్రిశ్చ భవేన్మర్త్యః సర్వదేవప్రియః సదా ।
ప్రియౌ వినాయకస్యాపి ప్రియోస్మాకం విశేషతః ॥
సఙ్కల్పసిద్ధః సర్వజ్ఞః సర్వభూతహితే రతః ।
స్తవరాజం జపన్మర్త్యః సుహృద్భిః సహ మోదతే॥
స్తవరాజజపాసక్తభావయుక్తస్య ధీమతః ।
అస్మిఞ్జపన్త్రయేప్యస్తి నాసాధ్యం న చ దుష్కరమ్ ॥
తస్మాత్సర్వప్రయత్నేన స్తవరాజం జపేన్నరః ।
సకృజ్జప్త్వా లభేన్ముక్తిం దుఃస్వప్నేషు భయేష్వపి ॥
సర్వం తరతి పాష్మానం బ్రహ్మభూతో భవేన్నరః ।
తస్మాత్సమ్పూజితో హ్యేష ధర్మకామార్థసిద్ధయే ॥
స్తవరాజమిమం స్తవోత్తమం
ప్రలపంశ్చైవ పఠన్స్మరన్నపి ।
కురుతే శుభకర్మ మానవః
శుభమభ్యేతి శుభాని చాక్షుతే ॥
బహునాత్ర కిముక్తేన స్తవరాజమిమం జపన్ ।
సర్వం తద్భద్రమాద్యౌతి యద్యదిచ్ఛతి శాశ్వతమ్ ॥
స్తవానామ్ప్యశేషాణాం వరిష్ఠోయం యతః స్తవః ।
స్తవరాజ ఇతి ఖ్యాతిం సర్వలోకేషు యాస్యతి ॥
శ్రీనన్దికేశ్వర ఉవాచ
ఇత్థమేషం స్తవః ప్రోక్తః ప్రశస్తః శమ్భునాస్వయమ్ ।
సర్వసిద్ధికరో నౄణాం సర్వాభీషటఫలప్రదః ॥
తస్మాదనేన స్తోత్రేణ స్తవరాజేన మానవః ।
స్తవఞ్జపన్స్మరన్వాపి కుర్వన్నిర్వాణమృచ్ఛతి ॥
ఏవం తే కథితం హ్యేతత్క్రమేణ పరిపృచ్ఛతః ।
వినాయకస్య మాహాత్మ్వం ప్రతిష్ఠాచర్నయోర్విధిః ॥
ప్రశంసా బ్రహ్మగాయత్ర్యాః కల్పస్తస్యాశ్చ శోభనః ।
ఉక్తమేతత్పరం బ్రహ్మ కిం భూయః శ్రోతుమిచ్ఛసి ॥
ఇతి విరచయతి స్మ త్ర్యమ్బకః
స్తోత్రమేతద్వరమిభవదనస్య స్వామినోఽత్యాదరేణ ।
గురువరచరణాగ్రాన్మూర్ధ్ని కృత్వా వరాజ్ఞాం
పఠితమిహ వరేణ్యం ధోరవిఘ్నౌఘశాన్త్యై ॥
లాక్షాసిన్దూరవర్ణం సురవరనమితం
మోదకర్మోదితాస్యం
హస్తే దన్తం దదానం దినకరసదృశం
తేజసోగ్రం త్రినేత్రమ్ ।
దక్షే రత్నాక్షసూత్రం వరపరశుధరం
సాఖుసింహాసనస్థం
గాఙ్గేయం రౌద్రమూర్తిం త్రిపురవధకరం
విఘ్నభక్షం నమామి ॥
నమతాశేషవిఘ్నౌధవారణం వారణాననమ్ ।
కారణం సర్వసిద్ధీనాం దురితార్ణవతారణమ్ ॥
శఙ్కర జగదమ్బికయోరఙ్కే పఙ్కేన ఖేలన్తమ్ ।
లమ్బోదరమవలమ్బే స్తమ్భేరమరాజచారుముఖమ్ ॥
ఇతి శ్రీభవిష్యోత్తర ఉత్తరఖణ్డే
నన్దికేశ్వరసంవాదే గణేశస్తవరాజః
సమ్పూర్ణః ॥
॥ గణేశస్తుతి ॥
హేమజా సుతం భజే గణేశమీశనన్దనమ్ ।
ఏకదన్త వక్రతుణ్డ నాగయజ్ఞసూత్రకమ్ ।
రక్త గాత్ర ధూమ్రనేత్ర శుక్ల వస్త్ర మణ్డితమ్ ।
కల్పవృక్ష భక్త రక్ష నమోఽస్తుతే గజాననమ్ ॥ ౧ ॥
పాశపాణి చక్రపాణి మూషకాది రోహిణమ్ ।
అగ్నికోటి సూర్యజ్యోతి వజ్రకోటి నిర్మలమ్ ।
చిత్రభాల భక్తిజాల భాలచన్ద్ర శోభితమ్ ।
కల్పవృక్ష భక్త రక్ష నమోఽస్తుతే గజాననమ్ ॥ ౨ ॥
భూతభవ్య హవ్యకవ్య భృగు భార్గవార్చితమ్ ।
దివ్యవహ్ని కాలజాల లోకపాల వన్దితమ్ ।
పూర్ణబ్రహ్మ సూర్యవర్ణ పూరుషం పురాన్తకమ్ ।
కల్పవృక్ష భక్త రక్ష నమోఽస్తుతే గజాననమ్ ॥ ౩ ॥
విశ్వవీర్య విశ్వసుర్య విశ్వకర్మ నిర్మలమ్ ।
విశ్వహర్తా విశ్వకర్తా యత్ర తత్ర పూజితమ్ ।
చతుర్ముఖం చతుర్భుజం సేవితం చతుర్యగమ్ ।
కల్పవృక్ష భక్త రక్ష నమోఽస్తుతే గజాననమ్ ॥ ౪ ॥
ఋద్ధి బుద్ధి అష్టసిద్ధి నవనిధాన దాయకమ్ ।
యజ్ఞకర్మ సర్వధర్మ సర్వవర్ణ అర్చితమ ।
పూత ధూమ్ర దుష్ట ముష్ట దాయకం వినాయకమ్ ।
కల్పవృక్ష భక్త రక్ష నమోఽస్తుతే గజాననమ్ ॥ ౫ ॥
హర్ష రుప వర్ష రుప పురుష రుప వన్దితమ్ ।
శూర్పకర్ణ రక్తవర్ణ రక్త చన్దన లేపితమ్ ।
యోగ ఇష్ట యోగ సృష్ట యోగ దృష్టిదాయకమ్ ।
కల్పవృక్ష భక్త రక్ష నమోఽస్తుతే గజాననమ్ ॥౬॥
All copyrights reserved 2012 digital media act
Comments
Post a Comment