గణేశ స్తోత్రం (ఆదిత్య పురాణం) Ganesha stotram Aditya puranam
గణేశ స్తోత్రం (ఆదిత్య పురాణం)
శ్రీగణేశాయ నమః ।
సిన్దూరకుఙ్కుమహుతాశనవిద్రుమార్క-
రక్తాబ్జదాడిమనిభాయ చతుర్భుజాయ ।
హేరమ్బభైరవగణేశ్వరనాయకాయ
సర్వార్థసిద్ధిఫలదాయ గణేశ్వరాయ ॥ ౧॥
చిదచిత్పదగమ్భీరం గమాగమపదోజ్ఝితమ్ ।
గహనాకాశసఙ్కాశం వన్దే దేవం గణేశ్వరమ్ ॥ ౨॥
శ్రీసనత్కుమార ఉవాచ ।
శఙ్కరాద్బ్రహ్మణా ప్రాప్తం పద్మయోనేర్మయా ప్రభోః ।
తదహం కీర్తయిష్యామి స్తోత్రం పరమదుర్లభమ్ ॥ ౩॥
షష్ట్యాం చతుర్థ్యామష్టమ్యాం చతుర్దశ్యాం విశేషతః ।
పూజయేచ్చ గణాధ్యక్షం శ్రద్ధాభక్తిసమన్వితః ॥ ౪॥
అర్ఘైః పుష్పైస్తథా ధూపైర్దీపైర్మాల్యైశ్చ చామరైః ।
వస్త్రైః కుణ్డలకేయూరైర్మౌలిభిశ్చ వితానకైః ॥ ౫॥
భక్ష్యైర్భోజ్యైరపూపైశ్చ మత్స్యైర్మాంసైశ్చ మోదకైః ।
పానకైః ఫలమూలైశ్చ హోమైర్మన్త్రాదిభిస్తథా ॥ ౬॥
గఙ్గాహ్రదే తు గాఙ్గేయం శ్రీశైలే తు గణేశ్వరమ్ ।
వారాణస్యాం గజవక్త్రం గయాయాం టఙ్కధారిణమ్ ॥ ౭॥
ప్రయాగే తు గణాధ్యక్షం కేదారే వికటాననమ్ ।
లమ్బోదరం కురుక్షేత్రే నైమిషే చ మదోత్కటమ్ ॥ ౮॥
జమ్బుకం దణ్డకారణ్యే లోకేశం హిమవద్గిరౌ ।
విశ్వక్సేనం తు విన్ధ్యాద్రౌ మలయే హేమకుమ్భకమ్ ॥ ౯॥
నాయకం పుష్కరద్వీపే విఘ్నేశం శల్మలే స్థితమ్ ।
ఇలావృతే విశ్వరూపం హరివర్షే ఘటోదరమ్ ॥ ౧౦॥
త్రినేత్రం సింహలద్వీపే శ్వేతద్వీపే తు వామనమ్ ।
ఉజ్జయిన్యాం చ లమ్బోష్టం మాలవే శూర్పకర్ణకమ్ ॥ ౧౧॥
సౌరాష్ట్రే వరదం దేవం కశ్మీరే భీమరూపిణమ్ ।
సిన్ధుసాగరయోర్మధ్యే స్థితం వై మన్త్రనాయకమ్ ॥ ౧౨॥
హర్యక్షం యక్షభవనే హరియక్షాభిధం విభుమ్ ।
పద్మాభరణనామానం కైలాసే పరమేశ్వరమ్ ॥ ౧౩॥
మహాయోగం మహేన్ద్రే చ సహ్యే వారాహరూపిణమ్ ।
మహోదరం చ లుమ్పాయాం చమ్పాయాం శిఖివాహనమ్ ॥ ౧౪॥
పాశహస్తం త్రికూటే చ పూజయేత్సర్వసిద్ధిదమ్ ।
బలమగ్నిగుహాయాం చ పాటలే సింహవాహనమ్ ॥ ౧౫॥
పౌణ్డ్రే రౌద్రముఖం చాపి కలాపిగ్రామకే జయమ్ ।
మేరుపృష్ఠే కామరూపం నన్దనం నన్దనే వనే ॥ ౧౬॥
విజయం వై గన్ధవనే దేవదారువనే గణమ్ ।
ఆర్తానాం విఘ్నహరణం గఙ్గాసాగరసఙ్గమే ॥ ౧౭॥
మహాపథే విరూపాక్షం చిత్రకూటే మదోత్కటమ్ ।
దుర్జయం యమునాతీరే స్తమ్భనం గన్ధమాధనే ॥ ౧౮॥
భద్రవటే చామ్బరీశం మోహనం హస్తినాపురే ।
కిష్కిన్దాయాముగ్రకేతుం లఙ్కాయాం తు విభీషణమ్ ॥ ౧౯॥
కలిఙ్గే వరుణం చైవ గాన్ధారే చ మదోత్కటమ్ ।
అశ్వత్థం చ తురుష్కేషు చీనే శత్రుజయావహమ్ ॥ ౨౦॥
వజ్రహస్తం కోసలేషు దాక్షిణాత్యేషు లోహితమ్ ।
శూలోద్ధృతకరం చైవ మధ్యదేశే ప్రకీర్తితమ్ ॥ ౨౧॥
ఏకదంష్ట్రం పశ్చిమాబ్ధౌ పూర్వదేశే పరాజితమ్ ।
ఉత్తరే చారువక్త్రం చ వరిష్ఠం త్రిపురేషు చ ॥ ౨౨॥
సువర్ణగర్భం విఘ్నేశం నదీనాం సఙ్గమే స్థితమ్ ।
గిరిసన్ధిషు విజ్ఞేయం హిరణ్యకవచాభిధమ్ ॥ ౨౩॥
సుముఖం నాగరన్ధ్రేషు నర్మదాయాం చ షడ్భుజమ్ ।
మహాపురే మహామాయాం భద్రకర్ణే హ్రదే శివమ్ ॥ ౨౪॥
గోకర్ణే గజకర్ణం తు కాన్యకుబ్జే వరాననమ్ ।
పద్మాసనం కామరూపే శ్రీముఖం సర్వతః స్థితమ్ ॥ ౨౫॥
వేదవేదాఙ్గశాస్త్రేషు పూజయేద్బ్రహ్మణస్పతిమ్ ।
అష్టాషష్టిస్తు నామాని స్తుతాన్యద్భుతకర్మణః ॥ ౨౬॥
నిత్యం ప్రభాతకాలే తు చిన్తయేద్గణనాయకమ్ ।
ఏతత్స్తోత్రం పవిత్రం చ మాఙ్గల్యం పాపనాశనమ్ ॥ ౨౭॥
శస్త్ర-ఖార్ఖోద-వేతాల-యక్ష రక్షో భయాపహమ్ ।
చౌరారణ్యభయవ్యాఘ్రవ్యాధిదుర్భిక్షనాశనమ్ ॥ ౨౮॥
కృత్యాదిమాయాశమనం సర్వశత్రువిమర్దనమ్ ।
త్రికాలం యః పఠేద్భక్త్యా స భవేత్సర్వసిద్ధిభాక్ ॥ ౨౯॥
గణేశ్వరప్రసాదేన లభతే శాఙ్కరం పదమ్ ॥ ౩౦॥
ఇతి ఆదిత్యపురాణే గణేశస్తోత్రం సమ్పూర్ణమ్
All copyrights reserved 2012 digital media act
Comments
Post a Comment