ఇక్ష్వాకు కృత గణేశ స్తోత్రం (నృసింహ పురాణం) ikasvaku krutha ganapathi stotram
ఇక్ష్వాకు కృత గణేశ స్తోత్రం (నృసింహ పురాణం)
భరద్వాజ ఉవాచ
కథం స్తుతో గణాధ్యక్షస్తేన రాజ్ఞా మహాత్మనా ।
యథా తేన తపస్తప్తం తన్మే వద మహామతే ॥ ౧॥
సూత ఉవాచ
చతుర్థీదివసే రాజా స్నాత్వా త్రిషవణం ద్విజ ।
రక్తామ్బరధరో భూత్వా రక్తగన్ధానులేపనః ॥ ౨॥
సురక్తకుసుమైర్హృద్యైర్వినాయకమథార్చయత్ ।
రక్తచన్దనతోయేన స్నానపూర్వం యథావిధి ॥ ౩॥
విలిప్య రక్తగన్ధేన రక్తపుష్పైః ప్రపూజయత్ ।
తతోఽసౌ దత్తవాన్ ధూపమాజ్యయుక్తం సచన్దనమ్ ।
నైవేద్యం చైవ హారిద్రం గుడఖణ్డఘృతప్లుతమ్ ॥ ౪॥
ఏవం సువిధినా పూజ్య వినాయకమథాస్తవీత్ ।
ఇక్ష్వాకురువాచ
నమస్కృత్య మహాదేవం స్తోష్యేఽహం తం వినాయకమ్ ॥ ౫॥
మహాగణపతిం శూరమజితం జ్ఞానవర్ధనమ్ ।
ఏకదన్తం ద్విదన్తం చ చతుర్దన్తం చతుర్భుజమ్ ॥ ౬॥
త్ర్యక్షం త్రిశూలహస్తం చ రక్తనేత్రం వరప్రదమ్ ।
ఆమ్బికేయం శూర్పకర్ణం ప్రచణ్డం చ వినాయకమ్ ॥ ౭॥
ఆరక్తం దణ్డినం చైవ వహ్నివక్త్రం హుతప్రియమ్ ।
అనర్చితో విఘ్నకరః సర్వకార్యేషు యో నృణామ్ ॥ ౮॥
తం నమామి గణాధ్యక్షం భీమముగ్రముమాసుతమ్ ।
మదమత్తం విరూపాక్షం భక్తివిఘ్ననివారకమ్ ॥ ౯॥
సూర్యకోటిప్రతీకాశం భిన్నాఞ్జనసమప్రభమ్ ।
బుద్ధం సునిర్మలం శాన్తం నమస్యామి వినాయకమ్ ॥ ౧౦॥
నమోఽస్తు గజవక్త్రాయ గణానాం పతయే నమః ।
మేరుమన్దరరూపాయ నమః కైలాసవాసినే ॥ ౧౧॥
విరూపాయ నమస్తేఽస్తు నమస్తే బ్రహ్మచారిణే ।
భక్తస్తుతాయ దేవాయ నమస్తుభ్యం వినాయక ॥ ౧౨॥
త్వయా పురాణ పూర్వేషాం దేవానాం కార్యసిద్ధయే ।
గజరూపం సమాస్థాయ త్రాసితాః సర్వదానవాః ॥ ౧౩॥
ఋషీణాం దేవతానాం చ నాయకత్వం ప్రకాశితమ్ ।
యతస్తతః సురైరగ్రే పూజ్యసే త్వం భవాత్మజ ॥ ౧౪॥
త్వామారాధ్య గణాధ్యక్షం సర్వజ్ఞం కామరూపిణమ్ ।
కార్యార్థం రక్తకుసుమై రక్తచన్దనవారిభిః ॥ ౧౫॥
రక్తామ్బరధరో భూత్వా చతుర్థ్యామర్చయేజ్జపేత్ ।
త్రికాలమేకకాలం వా పూజయేన్నియతాశనః ॥ ౧౬॥
రాజానం రాజపుత్రం వా రాజమన్త్రిణమేవ వా ।
రాజ్యం చ సర్వవిఘ్నేశ వశం కుర్యాత్ సరాష్ట్రకమ్ ॥ ౧౭॥
అవిఘ్నం తపసో మహ్యం కురు నౌమి వినాయక ।
మయేత్థం సంస్తుతో భక్త్యా పూజితశ్చ విశేషతః ॥ ౧౮॥
యత్ఫలం సర్వతీర్థేషు సర్వయజ్ఞేషు యత్ఫలమ్ ।
తత్ఫలం పూర్ణమాప్నోతి స్తుత్వా దేవం వినాయకమ్ ॥ ౧౯॥
విషమం న భవేత్ తస్య న చ గచ్ఛేత్ పరాభవమ్ ।
న చ విఘ్నో భవేత్ తస్య జాతో జాతిస్మరో భవేత్ ॥ ౨౦॥
య ఇదం పఠతే స్తోత్రం షడ్భిర్మాసైర్వరం లభేత్ ।
సంవత్సరేణ సిద్ధిం చ లభతే నాత్ర సంశయః ॥ ౨౧॥
సూత ఉవాచ
ఏవం స్తుత్వా పురా రాజా గణాధ్యక్షం ద్విజోత్తమ ।
తాపసం వేషమాస్థాయ తపశ్చర్తుం గతో వనమ్ ॥ ౨౨॥
ఉత్సృజ్య వస్త్రం నాగత్వక్సదృశం బహుమూల్యకమ్ ।
కఠినాం తు త్వచం వాక్షీం కట్యాం ధత్తే నృపోత్తమః ॥ ౨౩॥
తథా రత్నాని దివ్యాని వలయాని నిరస్య తు ।
అక్షసూత్రమలఙ్కారం ఫలైః పద్మస్య శోభనమ్ ॥ ౨౪॥
తథోత్తమాఙ్గే ముకుటం రత్నహాటకశోభితమ్ ।
త్యక్త్వా జటాకలాపం తు తపోఽర్థే విభృయాన్నృపః
All copyrights reserved 2012 digital media act
Comments
Post a Comment