గణపతి స్తోత్రం (మహాలక్ష్మీ కృతం) mahalakshmI krutha ganapathi stotram

గణపతి స్తోత్రం (మహాలక్ష్మీ కృతం)

నమో మహాధరాయైవ నానాలీలాధరాయ తే ।

సదా స్వానన్దసంస్థాయ భక్తిగమ్యాయ వై నమః ॥ ౧॥

అనన్తాననదేహాయ హ్యనన్తవిభవాయ తే ।

అనన్తహస్తపాదాయ సదానన్దాయ వై నమః ॥ ౨॥

చరాచరమయాయైవ చరాచరవివర్జిత ।

యోగశాన్తిప్రదాత్రే తే సదా యోగిస్వరూపిణే ॥ ౩॥

అనాదయే గణేశాయాదిమధ్యాన్తస్వరూపిణే ।

ఆదిమధ్యాన్తహీనాయ విఘ్నేశాయ నమో నమః ॥ ౪॥

సర్వాతిపూజ్యకాయైవ సర్వపూజ్యాయ తే నమః ।

సర్వేషాం కారణాయైవ జ్యేష్ఠరాజాయ తే నమః ॥ ౫॥

వినాయకాయ సర్వేషాం నాయకాయ విశేషతః ।

ఢుణ్డిరాజాయ హేరమ్బ భక్తేశాయ నమో నమః ॥ ౬॥

సృష్టికర్త్రే సృష్టిహర్త్రే పాలకాయ నమో నమః ।

త్రిభిర్హీనాయ దేవేశ గుణేశాయ నమో నమః ॥ ౭॥

కర్మణాం ఫలదాత్రే చ కర్మణాం చాలకాయ తే ।

కర్మాకర్మాదిహీనాయ లమ్బోదర నమోఽస్తు తే ॥ ౮॥

యోగేశాయ చ యోగిభ్యో యోగదాయ గజానన ।

సదా శాన్తిఘనాయైవ బ్రహ్మభూతాయ తే నమః ॥ ౯॥

కిం స్తౌమి గణనాథం త్వాం సతాం బ్రహ్మపతిం ప్రభో ।

అతశ్చ ప్రణమామి త్వాం తేన తుష్టో భవ ప్రభో ॥ ౧౦॥

ధన్యాహం కృతకృత్యాహం సఫలో మే భవోఽభవత్ ।

ధన్యౌ మే జనకౌ నాథ యయా దృష్టో గజాననః ॥ ౧౧॥

ఏవం స్తుతవతీ సా తం భక్తియుక్తేన చేతసా ।

సాశ్రుయుక్తా బభూవాథ బాష్పకణ్ఠా యుధిష్ఠిర ॥ ౧౨॥

తామువాచ గణాధీశో వరం వృణు యథేప్సితమ్ ।

దాస్యామి తే మహాలక్ష్మి భక్తిభావేన తోషితః ॥ ౧౩॥

త్వయా కృతం చ మే స్తోత్రం భుక్తిముక్తిప్రదం భవేత్ ।

పఠతాం శృణ్వతాం దేవి నానాకార్యకరం తథా ।

ధనధాన్యాదిసమ్భూతం సుఖం విన్దతి మానవః ॥ ౧౪॥

ఇతి శ్రీమహాలక్ష్మికృతమ్ గణపతిస్తోత్రం సమ్పూర్ణమ్ ।