నారద కృత గణేశ స్తోత్రం (ముద్గల పురాణం) narada krutha Ganesha stotram

నారద కృత గణేశ స్తోత్రం (ముద్గల పురాణం)

 నారద ఉవాచ -

నమామి గణనాథం తం సర్వవిఘ్నవినాశినమ్ ।

వేదాన్తాగోచరం తజ్జ్ఞైర్గమ్యం బ్రహ్మైవ సంస్థితమ్ ॥ 1॥

మనోవాణీవిహీనం నో మనోవాణీమయం న చ ।

బ్రహ్మేశానం కథం స్తౌమి సిద్ధిబుద్ధిపతిం పరమ్ ॥ 2॥

త్వద్దర్శనేన హేరమ్బ! కృతకృత్యోఽహమఞ్జసా ।

ఇత్యుక్త్వా పూజయామాస భక్తిభావసమన్వితః ॥ 3॥

నమో నమో గణేశాయ విఘ్నరాజాయ తే నమః ।

భక్తానాం విఘ్నహన్త్రే చాభక్తానాం విఘ్నకారిణే ॥ 4॥

అమేయమాయయా చైవ సంయుక్తాయ నమో నమః ।

యోగరూపాయ వై తుభ్యం యోగిభ్యో మోహదాయ తే ॥ 5॥

వినాయకాయ సర్వేశ! నమశ్చిన్తామణే నమః ।

అనన్తమహిమాధార నమస్తే చన్ద్రమౌలయే ॥ 6॥

ఏకదన్తాయ దేవాయ మాయిభ్యో మోహదాయ తే ।

నమో నమః పరేశాయ పరాత్పరతమాయ తే ॥ 7॥

నిర్గుణాయ నమస్తుభ్యం గుణాకారాయ సాక్షిణే ।

మహాఽఽఖువాహనాయైవ మూషకధ్వజధారిణే ॥ 8॥

అనాదయే నమస్తుభ్యం జ్యేష్ఠరాజాయ ఢుణ్ఢయే ।

హర్తే కర్త్రే సదా పాత్రే నానాభేదమయాయ చ ॥ 9॥

త్వద్దర్శనసుధాపానాద్ధతం మే భ్రాన్తిజం మహత్ ।

మరణం భిన్నభావాఖ్యం గణేశోఽహం కృతస్త్వయా ॥ 10॥

న భిన్నం పరిపశ్యామి త్వదృతే గణనాయక ! ।

శాన్తిదం యోగమాసాద్య ప్రసాదాత్తే న సంశయః ॥ 11॥

భక్తిం దేహి గణాధీశ! పరాం త్వత్పాదపద్మయోః ।

కురు మాం గాణపత్యం త్వం ప్రేమయుక్తం చ తే పది ॥ 12॥

ఇత్యుక్తా విరరామాథ తం పునర్గణపోఽవదత్ ।

మదీయా భక్తిరత్యన్తం భవిష్యతి సదాఽచలా ॥ 13॥

న యోగాచ్చలనం క్వాపి భవిష్యతి మహామునే ! ।

సదా యోగీన్ద్రపూజ్యస్త్వం సర్వమాన్యో భవిష్యసి ॥ 14॥

త్వయా కృతమిదం స్తోత్రం శాన్తియోగప్రదం భవేత్ ।

పఠతే శ‍ృణ్వతే చైవ భుక్తిముక్తిప్రదాయకమ్ ॥ 15॥

ఇత్యుక్తా తస్య హృదయే యయౌ లీనో గజాననః ।

సదా హృది గణేశానం పశ్యతి స్మ మునిః స్వయమ్ ॥ 16॥

ఇత్యాఖ్యానం నారదీయం కథితం తే ప్రజాపతే! ।

శ‍ృణుయాద్యః పఠేద్వా యః సోఽపి సద్గతిమాప్నుయాత్ ॥ 17॥

ఇతి నారదమునినా ప్రోక్తా గణేశస్తుతిః సమాప్తా

All copyrights reserved 2012 digital media act