శివ కృత గణేశ స్తోత్రం (ముద్గల పురాణం) Shiva krutha Ganesha stotram
శివ కృత గణేశ స్తోత్రం (ముద్గల పురాణం)
శివ ఉవాచ ।
నమస్తే విఘ్నరాజాయ నమస్తే విఘ్నహారిణే ।
విఘ్నకర్త్రే గణేశాయ విఘ్నానాం పతయే నమః ॥ 1॥
లమ్బోదరాయ సర్వాయ వక్రతుణ్డస్వరూపిణే ।
త్రైగుణ్యేన జగద్రూపనానాభేదప్రధారిణే ॥ 2॥
నైర్గుణ్యేన చ వై సాక్షాద్బ్రహ్మరూపధరాయ చ ।
నమో నమో బన్ధహన్త్రే భక్తానాం పాలకాయ తే ॥ 3॥
అభక్తేభ్యస్తమోదాయ నానాభయకరాయ చ ।
హేరమ్బాయ నమస్తుభ్యం వేదవేద్యాయ శాశ్వతే ॥ 4॥
అనన్తాననరూపాయానన్తబాహ్వఙ్ఘ్రికాయ తే ।
అనన్తకరకర్ణాయానన్తోదరధరాయ తే ॥ 5॥
నమో నమస్తే గణనాయకాయ తే అనాదిపూజ్యాయ చ సర్వరూపిణే ।
అఖణ్డలీలాకరపూర్ణమూర్తయే మహోత్కటాయాస్తు నమో మహాత్మనే ॥ 6॥
ఆదౌ చ నిర్మాయ విధిం రజోమయం తేనైవ సృష్టిం విదధాసి దేవ ।
సత్త్వాత్మకం విష్ణుమథో హి మధ్యే నిర్మాయ పాసి త్వమఖణ్డవిక్రమ ॥ 7॥
అన్తే తమోరూపిణమేవ సృష్ట్వా శమ్భుం స్వశక్త్యా హరసి త్వమాద్య ।
ఏవంవిధం త్వాం ప్రవదన్తి వేదాః తం వై గణేశం శరణం ప్రపద్యే ॥ 8॥
మాయామయం వై గుణపం తు సృష్ట్వా తస్మాత్పురస్త్వం గణరాజ చాదౌ ।
స్వానన్దసంజ్ఞే నగరే విభాసి సిద్ధ్యా చ వుద్ధ్యా సహితః పరేశ ॥ 9॥
తం త్వాం గణేశం శరణం ప్రపద్యే స్థితం సదా హృత్సు చ యోగినాం వై ।
వేదైర్న వేద్యం మనసా న లభ్యం తం వక్రతుణ్డం హృది చిన్తయామి ॥ 10॥
అర్ధనారీశ్వరత్వం యత్తద్గతం మేఽధునా ప్రభో ।
శక్తిహీనత్వమాపన్నో నష్టవత్కర్మణా కృతః ॥ 11॥
నానైశ్వర్యయుతా దేవీ సా గతా గణప ప్రభో ।
అనీశ్వరపదం ప్రాప్తం మమ వై దేవదేవ భోః ॥ 12॥
నిర్గుణోఽహం సదా శమ్భుః సగుణః సర్వభావవిత్ ।
శత్త్యా యుక్తో యదా స్వామిన్నధునా కిం కరోమ్యహమ్ ॥ 13॥
శక్తిహీనః పదా గన్తుం న శక్నోమి గణేశ్వర ।
అతస్త్వం కృపయా దేవ శక్తం మాం కురు కర్మణి ॥ 14॥
తతః ప్రాదురభూత్తస్య పురతః స గణాధిపః ।
ఉవాచ శఙ్కరం తత్ర హర్షయన్ శ్లక్ష్ణయా గిరా ॥ 15॥
అహో పశ్య చ మాం శమ్భో కిం శోచసి మహేశ్వర ।
భవితాసి సశక్తిస్త్వం మద్వాక్యాన్నాత్ర సంశయః ॥ 16॥
అహమేవేశ్వరో దేవో హ్యేకో బ్రహ్మాణ్డమణ్డలే ।
తేన గర్వేణ యుక్తస్త్వం స విఘ్నః సహసా కృతః ॥ 17॥
అధునా తే గతో మోహో మదీయా స్మృతిరాగతా ।
ధ్యాతస్తుతశ్చ తేనాఽహం ప్రసన్నోఽస్మి న సంశయః ॥ 18॥
హిమాచలసుతా దేవీ భవిష్యతి న సంశయః ।
వృణోషి త్వం సతీం తాం వై పార్వతీం చ పునఃశివ ॥ 19॥
రమసే చ తయా సార్ధం మత్తయా భావితో దృఢమ్ ।
ఈశ్వరః సహశక్తిస్త్వం మత్ప్రసాదాత్సదా భవ ॥ 20॥
స్మృతమాత్రస్తవాగ్రేఽహం ప్రత్యక్షః స్యాం సదాశివ ।
ఇతి దత్త్వా వరం దేవస్తత్రైవాన్తరధీయత ॥ 21॥
ఇతి శ్రీముద్గలపురాణే ప్రథమే ఖణ్డే వక్త్రతుణ్డచరితే
చతుర్థాధ్యాయాన్తర్గతా శివకృతా గణేశస్తుతిః సమాప్తా
All copyrights reserved 2012 digital media act
Comments
Post a Comment