Sri venkateshwara ashtottara Shatanama stothram శ్రీవేంకటేశ అష్టోత్తర శతనామ స్తోత్రం (వరాహ పురాణం)
శ్రీవేంకటేశ అష్టోత్తర శతనామ స్తోత్రం (వరాహ పురాణం)
ఋషయ ఊచుః ।
సూత సర్వార్థతత్త్వజ్ఞ సర్వవేదాఙ్గపారగ ।
యేనచారాధితః సద్యః శ్రీమద్వేంకటనాయకః ॥ ౧॥
భవత్యభీష్టసర్వార్థప్రదస్తద్బ్రూహి నో మునే ।
ఇతి పృష్టస్తదా సూతో ధ్యాత్వా స్వాత్మని తత్ క్షణాత్ ॥
ఉవాచ మునిశార్దూల శ్రూయతామితి వై మునీన్ ॥ ౨॥
॥ శ్రీసూత ఉవాచ॥
అస్తి కించిన్మహద్గోప్యం భగవత్ప్రియకారకమ్ ।
పురా శేషేణ కథితం కపిలాయ మహాత్మనే ॥ ౩॥
నామ్నామష్టశతం పుణ్యం పవిత్రం పాపనాశనమ్ ।
ఆదాయ హేమపద్మాని స్వర్ణదీసంభవాని చ ॥ ౪॥
బ్రహ్మా వై పూర్వమభ్యర్చ్య శ్రీమద్వేంకటనాయకమ్ ।
అష్టోత్తరశతైర్దివ్యైర్నామభిర్మునిపుష్పకైః ॥ ౫॥
స్వాభీష్టం లబ్ధవాన్ బ్రహ్మా సర్వలోకపితామహః ।
భవద్భిరపి పద్మైశ్చ సమభ్యర్చ్య చ నామతః ॥ ౬॥
తేషాం శేషనగాధీశో మనసో హ్లాదకారకః ।
నామ్నామష్టశతం పుణ్యం వేంకటాద్రినివాసినః ॥ ౭॥
ఆయురారోగ్యదం పుంసాం ధనధాన్యసుఖప్రదమ్ ।
జ్ఞానప్రదం విశేషేణ మహదైశ్వర్యకారకమ్ ॥ ౮॥
అర్చయేన్నామభిర్దివ్యైః వేంకటేశపదాంతికైః ।
నామ్నామష్టశతస్యాస్య ఋషిర్బహుః ప్రకీర్తితః ॥ ౯॥
ఛందోఽనుష్టుప్ తథా దేవో వేంకటేశ ఉదాహృతః ।
నీలగోక్షీరసంభూతో బీజమిత్యుచ్యతే బుధైః ॥ ౧౦॥
శ్రీనివాసస్తథా శక్తిర్హృదయం వేంకటాధిపః ।
వినియోగస్తథాఽభీష్టసిద్ధ్యర్థే వినిగద్యతే ॥ ౧౧॥
ఓం నమో వేంకటేశాయ శేషాద్రినిలయాయ చ ।
వృషదృగ్గోచరాయాథ విష్ణవే సతతం నమః ॥ ౧౨॥
సదంజనగిరీశాయ వృషాద్రిపతయే నమః ।
మేరుపుత్రగిరీశాయ సరస్స్వామితటం జుషే ॥ ౧౩॥
కుమారకల్పసేవ్యాయ వజ్రదృగ్విషయాయ చ ।
సువర్చలాసుతాన్యస్త-సేనాపత్యకరాయ చ ॥ ౧౪॥
రామాయ పద్మనాభాయ సదా వాయుస్తుతాయ చ ।
త్యక్తవైకుణ్టలోకాయ గుహ్యకుంజవిహారిణే ॥ ౧౫॥
హరిచందనగోప్తేంద్రస్వామినే సతతం నమః ।
శంకరఽజననేత్రాబ్జవిషయాయ నమో నమః ॥ ౧౬॥
వసూపరిచరిత్రాయ కృష్ణాయ సతతం నమః ।
అబ్ధికన్యాపరిష్వక్తవక్షసే వేంకటాయ చ ॥ ౧౭॥
సనకాదిమహాయోగిపూజితాయ నమో నమః ।
దేవజిత్ప్రముఖానంతదైత్యసంఘప్రణాసినే ॥ ౧౮॥
శ్వేతద్వీపే వసన్ముక్తపూజితాంఘ్రియుగాయ చ ।
శేషపర్వతరూపత్వప్రశాసనవరాయ చ ॥ ౧౯॥ ప్రకాశనపరాయ
సానుస్థాపితతార్క్ష్యాయ తార్క్ష్యాచలనివాసినే ।
మాయాగూఢవిమానాయ గరుడస్కన్ధవాసినే ॥ ౨౦॥
అనంతశిరసే నిత్యమనంతాక్షాయ తే నమః ।
అనంతచరణాయ శ్రీశైలనిలయాయ చ ॥ ౨౧॥
దామోదరయ తే నిత్యం నీలమేఘనిభాయ చ ।
బ్రహ్మాదిదేవదృష్టాయ విశ్వరూపాయ తే నమః ॥ ౨౨॥
వేంకటాగతసద్ధేమవిమానాంతర్గతాయ చ ।
అగస్త్యార్చితాశేషజనదృగ్విషయాయ చ ॥ ౨౩॥
వాసుదేవాయ హరయే తీర్థపంచకవాసినే ।
వామదేవప్రియాయాథ జనకేష్టప్రదాయ చ ॥ ౨౪॥
వాక్పతిబ్రహ్మధాత్రే చ చంద్రలావణ్యదాయినే ।
మార్కణ్డేయమహాతీర్థజాతపుణ్యప్రదాయ చ ॥ ౨౫॥
నారాయణనగేశాయ బ్రహ్మకౢప్తోత్సవాయ చ ।
శంకచక్రగదాపద్మలసత్కరతలాయ చ ॥ ౨౬॥
ద్రవన్మృగమదాసక్తవిగ్రహాయ నమో నమః ।
కేశవాయ నమస్తుభ్యం నిత్యయౌవనమూర్తయే ॥ ౨౭॥
అర్థితార్థప్రదాత్రే చ విశ్వతోర్థౌఘహారిణే ।
తీర్థస్వామిసరఃస్నాతజనాభీష్టప్రదాయ చ ॥ ౨౮॥
కుమారధారికాస్కన్దమహ్యశక్తి-ప్రదాయ చ ।
జమదగ్నిసమద్భూతపౌత్రిణే కూర్మమూర్తయే ॥ ౨౯॥
కిన్నరద్వంద్వశాపాంతప్రదాత్రే మాధవాయ చ ।
వైఖానసమునిశ్రేష్ఠ-పూజితాయ నమో నమః ॥ ౩౦॥
సింహాచలనివాసాయ శ్రీమన్నారాయణాయ చ ।
సద్భక్తనీలకణ్ఠాయ నృసింహాయ నమో నమః ॥ ౩౧॥
కుముదాక్షగణశ్రేష్ఠసేనాపత్యప్రదాయ చ ।
దుర్మేధఃప్రాణహర్త్రే చ వామనాయ నమో నమః ॥ ౩౨॥
క్షత్రియాన్తకరామాయ మత్స్యరూపాయ తే నమః ।
పాణ్డవాఘప్రహర్త్రే చ శ్రీధరాయ నమో నమః ॥ ౩౩॥
ఉపత్యకాప్రదేశస్థశంకరధ్యానమూర్తయే ।
రుక్మాబ్జసరసీకూలలక్ష్మీకృతతపస్వినే ॥ ౩౪॥
లసల్లక్ష్మీకరాంభోజదత్తకల్హారకస్రజే ।
శాలిగ్రామనివాసాయ శుకదృగ్విషయాయ చ ॥ ౩౫॥
నారాయణార్థితాశేషజనదృగ్విషయాయ చ ।
మృగయారసికాయాథ వృషభాసురహారిణే ॥ ౩౬॥
అంజనాగోత్రపతయే వృషభాచలవాసినే ।
అంజనాసుతదాత్రే చ మాధవస్యాఘహారిణే ॥ ౩౭॥
ప్రియాఙ్గప్రియకోలాయ శ్వేతకోలవరాయ చ ।
నీలధేనుపయోధారాసేకదేహోద్భవాయ చ ॥ ౩౮ ।
సగరప్రియమిత్రాయ చోలపుత్రప్రియాయ చ ।
సుధర్మిణే సుచైతన్యప్రదాత్రే మధుఘాతినే ॥ ౩౯॥
కృష్ణాఖ్యవిప్రవేదాన్తదేశికత్వ ప్రియాయ చ ।
వరాహాచలనాథాయ బలభద్రాయ తే నమః ॥ ౪౦॥
త్రివిక్రమాయ మహతే హృషీకేశాయ తే నమః ।
అచ్యుతాయ నమో నిత్యం నీలాద్రినిలయాయ చ ॥ ౪౧॥
నమః క్షీరాబ్ధినాథాయ వైకుంఠాచలవాసినే ।
ముకుందాయ నమో నిత్యం అనంతాయ నమో నమః ॥ ౪౨॥
విరించభ్యర్తితానీతసౌమ్యరూపాయ తే నమః ।
సువర్ణముఖరీస్నాతమనుజాభీష్టదాయినే ॥ ౪౩॥
హలాయుధజగత్తీర్థసమస్తఫలదాయినే ।
గోవిన్దాయ నమో నిత్యం శ్రీనివాసాయ తే నమః ॥ ౪౪॥
అష్టోత్తరశతం నామ్నాం చతుర్థ్యా నమసాన్వితమ్ ।
యః పఠేచ్ఛృణుయాన్నిత్యం శ్రద్ధాభక్తిసమన్వితః ॥ ౪౫॥
వేంకటేశాభిధే యంత్రే వేంకటాద్రినివాసినః ।
అర్చయన్నామభిస్తస్య ఫలముక్తం ప్రసిధ్యతే ॥ ౪౬॥
అర్చనాయాం విశేషేణ గ్రాహ్యమష్టోత్తరం శతమ్ ।
తస్య శ్రీవేంకటేశశ్చ ప్రసన్నో భవతి ధ్రువమ్ ॥ ౪౭॥
గోపనీయమిదం స్తోత్రం సర్వేషాం న ప్రకాశయేత్ ।
శ్రద్ధాభక్తియుజామేవ దాపయేన్నామసంగ్రహమ్ ॥ ౪౮॥
ఇతి శేషేణ కథితం కపిలాయ మహాత్మనే ।
కపిలాఖ్యమహాయోగిసకాశాత్తు మయాశ్రుతమ్ ।
తదుక్తం భవతామద్య సద్యః ప్రీతికరం హరేః ॥ ౪౯॥
॥ ఇతి శ్రీవరాహపురాణే శ్రీవేంకటేశాష్టోత్తరశతనామస్తోత్రం సంపూర్ణమ్ ॥
All copyrights reserved 2012 digital media act
Comments
Post a Comment