శ్రీవేంకటేశ కవచం Sri venkateshwara kavach

శ్రీవేంకటేశ కవచం (ఆగ్నేయ పురాణం)

అస్య శ్రీవేఙ్కటేశకవచస్తోత్రమహామన్త్రస్య బ్రహ్మా ఋషిః

గాయత్రీ ఛన్దః శ్రీవేఙ్కటేశ్వరో దేవతా ।

ఓం బీజం హ్రీం శక్తిః క్లీం కీలకమ్ । ఇష్టార్థే వినియోగః । 

ధ్యానమ్

ధ్యాయేద్వేఙ్కటనాయకం కరయుగే శఙ్ఖం చ చక్రం ముదా [గదా]

చాన్యే [చాద్య] పాణియుగే వరం కటితటే విభ్రాణమర్కచ్ఛవిమ్ ।

దేవం దేవశిఖామణిం శ్రియమథో వక్షోదధానం హరిం

భూషాజాలమనేకరత్నఖచితం దివ్యం కిరీటాఙ్గదమ్ ॥ ౧॥

వరాహః పాతు మే శీర్షం కేశాన్ శ్రీవేంఙ్కటేశ్వరః ।

శిఖామిళాపతిః కర్ణో లలాటం దివ్యవిగ్రహః ॥ ౨॥

నేత్రే యుగాన్తస్థాయీ మే కపోలే కనకామ్బరః ।

నాసికామిన్దిరానాథో వక్త్రం బ్రహ్మాదివన్దితః ॥ ౩॥

చుబుకం కామదః కణ్ఠమగస్త్యాభీష్టదాయకః ।

అంసౌ కంసాన్తకః పాతు కమఠస్స్తనమణ్డలే ॥ ౪॥

హృత్పద్మం పాత్వదీనాత్మా కుక్షిం కాలామ్బరద్యుతిః ।

కటిం కోలవపుః పాతు గుహ్యం కమలకోశభృత్ ॥ ౫॥

నాభిం పద్మాపతిః పాతు కరౌ కల్మషనాశనః ।

అఙ్గులీర్హైమశైలేన్ద్రో నఖరానమ్బరద్యుతిః ॥ ౬॥

ఊరూ తుమ్బురుగానజ్ఞో జానునీ శఙ్ఖచక్రభృత్ ।

పాదౌ పద్మేక్షణః పాతు గుల్ఫౌ చాకాశగాఙ్గదః ॥ ౭॥

దిశో దిక్పాలవన్ద్యాఙ్ఘ్రిర్భార్యాం పాణ్డవతీర్థగః ।

అవ్యాత్పుత్రాన్ శ్రీనివాసః సర్వకార్యాణి గోత్రరాట్ ॥ ౮॥

వేఙ్కటేశః సదా పాతు మద్భాగ్యం దేవపూజితః ।

కుమారధారికావాసో భక్తాభీష్టాభయప్రదః ॥ ౯॥

శఙ్ఖాభయప్రదాతా తు శమ్భుసేవితపాదుకః ।

వాఞ్ఛితం వరదో దద్యాద్వేఙ్కటాద్రిశిఖామణిః ॥ ౧౦॥

శ్వేతవారాహరూపోఽయం దినరాత్రిస్వరూపవాన్ ।

రక్షేన్మాం కమలనాథః సర్వదా పాతు వామనః ॥ ౧౧॥

శ్రీనివాసస్య కవచం త్రిసన్ధ్యం భక్తిమాన్ పఠేత్ ।

తస్మిన్ శ్రీవేఙ్కటాధీశః ప్రసన్నో భవతి ధ్రువమ్ ॥ ౧౨॥

ఆపత్కాలే జపేద్యస్తు శాన్తిమాయాత్యుపద్రవాత్ ।

రోగాః ప్రశమనం యాన్తి త్రిర్జపేద్భానువాసరే ॥ ౧౩॥

సర్వసిద్ధిమవాప్నోతి విష్ణుసాయుజ్యమాప్నుయాత్ ।

॥ ఇతి శ్రీమదాగ్నేయపురాణే వేఙ్కటాచలమాహాత్మ్యే వసిష్టనారదసంవాదే

వేఙ్కటేశదివ్యకవచస్తోత్రం నామ పఞ్చదశోఽధ్యాయః ॥

All copyrights reserved 2012 digital media act