Srilakshmi hayavadana prapatthi శ్రీలక్ష్మీ హయవదన ప్రపత్తి

శ్రీలక్ష్మీ హయవదన ప్రపత్తి

 శ్రీలక్ష్మీహయవదన ప్రపత్తిః 

విశుద్ధవిజ్ఞానఘనస్వరూపం విజ్ఞానవిశ్రాణనబద్ధదీక్షమ్ ।

దయానిధిం దేహభృతాం శరణ్యం దేవం హయగ్రీవమహం ప్రపద్యే ॥ ౧॥

బ్రహ్మాణమాదౌ వ్యదధాదముష్మై వేదాశ్చ యః స్మ ప్రహిణోతి నిత్యాన్ ।

స్వగోచరజ్ఞానవిధాయినం తం దేవం హయగ్రీవమహం ప్రపద్యే ॥ ౨॥

ఉద్గీథతారస్వరపూర్వమన్తఃప్రవిశ్య పాతాలతలాదహార్షీత్ ।

ఆమ్నాయమాకణ్ఠహయో య ఏతం దేవం హయగ్రీవమహం ప్రపద్యే ॥ ౩॥

ప్రదాయ పుత్రాయ పునః శ్రుతీర్యో జఘాన దైత్యౌ నియతాబ్ధివాసమ్ ।

హవ్యైశ్చ కవ్యైశ్చ తమర్చ్యమానం దేవం హయగ్రీవమహం ప్రపద్యే ॥ ౪॥

యన్నాభినాలీకదలస్థనీరవిన్దూత్థితౌ తౌ మధుకైటభాఖ్యౌ ।

వేదాపహారాయ తమో రజస్తం దేవం హయగ్రీవమహం ప్రపద్యే ॥ ౫॥

కామ్యార్చ్యతాం ప్రాప్య వరం సురేషు గతేషు యజ్ఞాగ్రహరోఽర్థితో యః ।

అదర్శయత్ కాయ హయం వపుస్తం దేవం హయగ్రీవమహం ప్రపద్యే ॥ ౬॥

యో జాయమానం పురుషం ప్రపశ్యన్ మోక్షార్థచిన్తాపరమాతనోతి ।

విద్యాధిదేవం మధుసూదనం తం దేవం హయగ్రీవమహం ప్రపద్యే ॥ ౭॥

ఆదిత్యబిమ్బేఽశ్వవపుర్దధత్సన్ అయాతయామాన్ నిగమానదిక్షత్ ।

యో యాజ్ఞవల్క్యాయ దయానిధిం తం దేవం హయగ్రీవమహం ప్రపద్యే ॥ ౮॥

విజ్ఞానదానప్రథితా జగత్యాం వ్యాసాదయో వాగపి దక్షిణా సా ।

యద్వీక్షణాంశాహితవైభవాంస్తం దేవం హయగ్రీవమహం ప్రపద్యే ॥ ౯॥

మత్స్యాదిరూపాణి యథా తథైవ నానావిధాచార్యవపూంషి గృహ్ణన్ ।

వేదాన్తవిద్యాః ప్రచినోతి యస్తం దేవం హయగ్రీవమహం ప్రపద్యే ॥ ౧౦॥

శ్రేష్ఠః కృతజ్ఞః సులభోఽన్వితానాం శాన్తః సుబుద్ధిః ప్రథితో హి వాజీ ।

తదాననావిష్కృతసద్గుణౌఘం దేవం హయగ్రీవమహం ప్రపద్యే ॥ ౧౧॥

హస్తైర్దధానం దరచక్రకోశవ్యాఖ్యానముద్రాః సితపద్మపీఠమ్ ।

విద్యాఖ్యలక్ష్మ్యఞ్చితవామభాగం దేవం హయగ్రీవమహం ప్రపద్యే ॥ ౧౨॥

ఇతి శ్రీలక్ష్మీహయవదనప్రపత్తిః సమాప్తా

All copyrights reserved 2012 digital media act