శ్రీరామ రక్షా స్తోత్రం (ఆనంద రామాయణం) srirama raksha stotram one
శ్రీరామ రక్షా స్తోత్రం (ఆనంద రామాయణం)
విష్ణుదాస ఉవాచ -
శ్రీ రామరక్షయా ప్రోక్తం కుశాయహ్యభిమన్త్రణమ్ ।
కృతం తేనైవ మునినా గురో తాం మే ప్రకాశయ ॥ ౧॥
రామరక్షాం వరాం పుణ్యాం బాలానాం శాన్తికారిణీమ్ ।
ఇతి శిష్యవచః శ్రుత్వా రామదాసోఽప్రవీద్వచః ॥ ౨॥
శ్రీరామదాస ఉవాచ -
సమ్యక్ పృష్టం త్వయా శిష్య రామరక్షాఽధునోచ్యతే ।
యా ప్రోక్తా శంభునా పూర్వం స్కన్దార్థం గిరిజాం ప్రతి ॥ ౩॥
శ్రీ శివ ఉవాచ -
దేవ్యద్య స్కన్దపుత్రాయ రామరక్షాభిమన్త్రిణమ్ ।
కురు తారకధాతాయ సమర్థోఽయం భవిష్యతి ॥ ౪॥
ఇత్యుక్త్వా కథయామాస రామరక్షాం శివః స్త్రియై ।
నమస్కృతాయ రామచన్ద్రం శుచిర్భూత్వా జితేన్ద్రియైః ॥ ౫॥
అథ ధ్యానమ్ ।
వామే కోదణ్డదణ్డం నిజకరకమలే దక్షిణే బాణమేకం ।
పశ్చాద్భాగే చ నిత్యం దధతమభిమతం సాసితూణీరభారమ్ ।
వామేఽవామే వసద్భ్యాం సహ మిలితతనుం జానకీలక్ష్మణాభ్యామ్ ।
శ్యామం రామం భజేఽహం ప్రణత జనమనః ఖేదవిచ్ఛేదదక్షమ్ ॥ ౬॥
ఓం అస్య శ్రీ రామరక్షాస్తోత్రమన్త్రస్య బుధకౌశిక ఋషిః ।
శ్రీ రామచన్ద్రో దేవతా రామ ఇతి బీజమ్ ।
అనుష్టుప్ ఛన్దః । శ్రీ రామ ప్రీత్యర్థే జపే వినియోగః॥
॥ ఓం॥
చరితం రఘునాథస్య శతకోటి ప్రవిస్తరమ్ ।
ఏకైకమక్షరం పుంసాం మహాపాతకనాశనమ్ ॥ ౭॥
ధ్యాత్వా నీలోత్పలశ్యామం రామం రాజీవలోచనమ్ ।
జానకీ - లక్ష్మణోపేతం జటాముకుటమణ్డితమ్ ॥ ౮॥
సాసితూణ ధనుర్బాణ పాణిం నక్తఞ్చరాన్తకమ్ ।
స్వలీలయా జగత్త్రాతుమావిర్భూతమజం విభుమ్ ॥ ౯॥
రామరక్షాం పఠేత్ప్రాజ్ఞః పాపఘ్నీం సర్వకామదామ్ ।
శిరో మే రాఘవః పాతు భాలం దశరథాత్మజః ॥౧౦॥
కౌసల్యేయో దృశౌ పాతు-విశ్వామిత్రప్రియః శ్రుతీ ।
ఘ్రాణం పాతు మఖత్రాతా ముఖం సౌమిత్రివత్సలః ॥౧౧॥
జిహ్వాం విధానిధిః పాతు కణ్ఠం భరతవన్దితః ।
స్కన్ధౌ దివ్యాయుధః పాతు భుజౌ భగ్నేశకార్ముకః ॥ ౧౨॥
కరౌ సీతాపతిః పాతు హృదయం జామదగ్న్యజిత్ ।
పార్శ్వే రఘువరః పాతు కుక్షీ ఇక్ష్వాకునన్దనః ॥ ౧౩ ॥ (జాదా చరణ)
మధ్యం పాతు ఖరధ్వంసీ నాభిం జామ్బవదాశ్రయః ।
సుగ్రీవేశః కటిం పాతు సక్థినీ హనుమత్ప్రభుః ॥ ౧౪॥
ఉరూ రఘూత్తమః పాతు గుహ్యం రక్షః కులాన్తకృత్ ।
జానునీ సేతుకృత్ పాతు జఙ్ఘే దశముఖాన్తకః ॥ ౧౫॥
పాదౌ బిభీషణశ్రీదః పాతు రామోఽఖిలం వపుః ।
ఏతాం రామబలోపేతాం రక్షాం యః సుకృతీ పఠేత్॥
స చిరాయుః సుఖీ పుత్రీ విజయీ వినయీ భవేత్ ॥ ౧౬॥
పాతాలభూతలవ్యోమ చారిణశ్ఛద్మచారిణః ।
న ద్రష్టుమపి శక్తాస్తే రక్షితం రామనామభిః ॥ ౧౭॥
రామేతి రామభద్రేతి రామచన్ద్రేతి వా స్మరన్ ।
నరో న లిప్యతే పాపైఉర్భుక్తిం ముక్తిం చ విన్దతి ॥ ౧౮॥
జగచ్చైకమన్త్రేణ రామనామ్నాఽభిరక్షితమ్ ।
యః కణ్ఠే ధరయేత్తస్య కరస్థాః సర్వసిద్ధయః ॥ ౧౯॥
వజ్రపఞ్జరనామేదం యో రామకవచం పఠేత్ ।
అవ్యాహతాజ్ఞః సర్వత్ర లభతే జయమఙ్గలమ్ ॥ ౨౦॥
ఆదిష్టవాన్ యథా స్వప్నే రామరక్షామిమాం హరః ।
తథా లిఖితవాన్ ప్రాతః ప్రబుద్ధో బుధకౌశికః ॥ ౨౧॥
రామో దశరథిః శూరో లక్ష్మణాఽనుచరో బలీ॥
కాకుత్త్స్థః పురుషః పూర్ణః కౌసల్యానన్దవర్ధనః ॥ ౨౨॥
వేదాన్తవేధో యజ్ఞేశః పురాణపురుషోత్తమః ।
జానకీవల్లభః శ్రీమానప్రమేయ పరాక్రమః ॥ ౨౩॥
ఇత్యేతాని జపేన్నిత్యం యద్భక్తః శ్రద్ధయాన్వితః ।
అశ్వమేధధికం పుణ్యం లభతే నాత్రసంశయః ॥ ౨౪॥
సన్నధ్హః కవచీ ఖడ్గీ చాయబాణధరో యువా ।
గచ్ఛన్ మనోరథోఽస్మాకం రామః పాతు సలక్ష్మణః ॥ ౨౫॥
తరుణౌ రూపసమ్పన్నౌ సుకుమారౌ మహాబలౌ ।
పుణ్డరీకవిశాలాక్షౌ చీరకృష్ణాజినామ్బరౌ ॥ ౨౬॥
ఫలమూలాశనౌ దాన్తౌ తాపసౌ బ్రహ్మచారిణౌ ।
పుత్రౌ దశరథస్యైతౌ భ్రతరౌ రామలక్ష్మణౌ ॥ ౨౭॥
ధన్వినౌ బద్ధనిస్త్రింశౌ కాకపక్షధరౌ శ్రుతౌ ।
వరౌ మాం పథి రక్షేతాం తావుబౌ రామలక్ష్మణౌ ॥ ౨౮॥
శరణ్యౌ సర్వసత్త్వానాం శ్రేష్ఠౌ సర్వ ధనుష్మతామ్ ।
రక్షః కులనిహన్తారౌ త్రాయేతాం నో రఘూత్తమౌ ॥ ౨౯॥
ఆత్తసజ్జధనుషా విషుస్పృశా వక్షయాశుగనిషఙ్గ సఙ్గినౌ ।
రక్షణాయ మమ రామలక్ష్మణా వగ్రతః పథి సదైవ గచ్ఛతామ్ ॥ ౩౦॥
ఆరామః కల్పవృక్షాణాం విరామః సకలపదామ్ ।
అభిరామస్త్రిలోకానం రామః శ్రీమాన్స నః ప్రభుః ॥ ౩౧॥
రామాయ రామభద్రాయ రామచన్ద్రాయ వేధసే ।
రఘునాథయ నాథాయ సీతయాః పతయే నమః ॥ ౩౨॥
శ్రీ రామ రఘునన్దన రామ రామ
శ్రీ రామ భరతాగ్రజ రామ రామ
శ్రీ రామ రణకర్కశ రామ రామ
శ్రీ రామ శరణం భవ రామ రామ ॥ ౩౩॥
లోకాభిరామం రణరఙ్గధీరం రాజీవనేత్రం రఘువంశనాథం
కారుణ్యరూపం కరుణాకరం తం శ్రీరామచన్ద్రం శరణం ప్రపద్యే ॥ ౩౪॥
దక్షిణే లక్ష్మణో యస్య వామే తు జనకాత్మజా ।
పురతో మారుతిర్యస్య తం వన్దే రఘునన్దనమ్ ॥ ౩౫
గోష్పదీకృతవారీశం మశకీకృరరాక్షసమ్ ।
రామాయణమహామాలా రత్నం వన్దేఽనిలాత్మజమ్ ॥ ౩౬॥
అఘౌధ తిష్ఠ దూరే త్వం రోగాస్తిష్ఠన్తు దూరతః ।
వరీవర్తీ సదాఽస్మాకం హృది రమో ధనుర్ధరః ॥ ౩౭॥
మనోజవం మారుతతుల్యవేగం జితేన్ద్రియం బుద్ధిమతాం వరిష్ఠమ్ ।
వాతాత్మజం వానరయూతముఖ్యం శ్రీరామదూతం శరణం ప్రపద్యే ॥ ౩౮॥
రామ రామ తవ పాద పఙ్కజం చిన్తయామి భవబన్ధముక్తయే ।
వన్దితం సురనరేన్ద్రమౌలిభిర్ధ్యాయితం మనసి యోగిభిః సదా ॥ ౩౭॥
రామం లక్షమణపూర్వజం రఘువరం సీతాపతిం సున్దరమ్ ।
కాకుత్స్యం కరుణార్ణవం గుణనిధిం విప్రప్రియం ధర్ర్మికమ్ ।
రాజేన్ద్రం సత్యసన్ధం దశరథనయం శామలం శాన్తిమూర్తిమ్ ।
వన్దే లోకాభిరామం రఘుకులతిలకం రాఘవం రావణారిమ్ ॥ ౪౦॥
ఏతాని రామనామానీ ప్రాతరుత్థాయ యః పఠేత్ ।
అపుత్రో లభతే పుత్రం ధనార్థీ లభతే ధనమ్ ॥ ౪౧॥
మాతా రామో మత్పితా రామచన్ద్రః స్వామీ రామో మత్సఖా రామచన్ద్రః ।
సర్వస్వం మే రామచన్ద్రో దయాలుర్నాన్యం జానే నైవ జానే న జానే ॥ ౪౨॥
శ్రీరామనామామృత మన్త్రబీజ సఞ్జీవనీ చేన్మనసి ప్రవిష్టా ।
హాలాహలం వా ప్రలయానలం వా మృత్యోర్ముఖం వా విశతాం కుతో భీః ॥ ౪౩॥
శ్రీశబ్దపూర్వం జయశబ్దమధ్యం జయద్వయేనాపి పునః ప్రయుక్తమ్ ।
త్రిఃసప్తకృత్వో రఘునాథ నామ జపాన్నిహన్యాద్ద్విజకోటిహత్యాః ॥ ౪౪॥
ఏవం గిరీన్ద్రజే ప్రోక్తా రామరక్షా మయా తవ ।
మయోపదిష్టా యా స్వప్నే విశ్వామిత్రాయ వై పురా ॥ ౪౫॥
రామదాస ఉవాచ -
ఏవం శివేనోపదిష్టం శ్రుత్వా దేవీ గిరీన్ద్రజా ।
రామరక్షాం పఠిత్వా సా స్కన్దం సమభిమన్త్రయత్ ॥ ౪౬॥
తస్యాస్తేజోబలేనైవ జఘాన తారకాసురమ్ ।
షడాననః క్షణదేవ కృతకృత్యోఽభవత్ పురా ॥ ౪౭॥
సైవేయం రామరక్షాస్తే మయాఖ్యాతాఽతిపుణ్యదా ।
యస్యాః శ్రవణమత్రేణ కస్యాపి న భయం భవేత్ ॥ ౪౮॥
వాల్మికీనాఽనయాపూర్వం కుశాయహ్యభిశేచనమ్ ।
కృతం బాలగ్రహాణాం చ శాన్త్యర్థం సా మయోదితా ॥ ౪౯॥
బాలానాం గ్రహశాన్త్యర్థం జపనీయా నిరన్తరమ్ ।
రామరక్షా మహాశ్రేష్ఠా మహాఘౌఘ నివారిణీ ॥ ౫౦॥
All copyrights reserved 2012 digital media act
Comments
Post a Comment