శ్రీరామ సహస్రనామ స్తోత్రం (ఆనంద రామాయణం) srirama sahasranama stotram two
శ్రీరామ సహస్రనామ స్తోత్రం (ఆనంద రామాయణం)
శ్రీరాఘవం దశరథాత్మజమప్రమేయం
సీతాపతిం రఘుకులాన్వయరత్నదీపమ్ ।
ఆజానుబాహుమరవిన్దదలాయతాక్షం
రామం నిశాచరవినాశకరం నమామి ॥
వైదేహీసహితం సురద్రుమతలే హైమే మహామణ్డపే
మధ్యే పుష్పకమాసనే మణిమయే వీరాసనే సుస్థితమ్ ।
అగ్రే వాచయతి ప్రభఞ్జనసుతే తత్త్వం మునిభ్యః పరం
వ్యాఖ్యాన్తం భరతాదిభిః పరివృతం రామం భజే శ్యామలమ్ ॥
పార్వత్యువాచ-
శ్రోతుమిచ్ఛామ్యహం దేవ తదేవం సర్వకామదమ్ ।
నామ్నాం సహస్రం రామస్య బ్రూహి యద్యస్తి మే దయా ॥ ౧
శ్రీమహాదేవ ఉవాచ-
అథ వక్ష్యామి తే దేవి రామనామసహస్రకమ్ ।
శ‍ృణు చైకమనాః స్తోత్రం గుహ్యాదుహ్యతరం మహత్ ॥ ౨
అస్య శ్రీరామశస్రనామస్తోత్రమహామన్త్రస్య, భగవాన్ ఈశ్వర ఋషిః ।
అనుష్టుప్ఛన్దః । శ్రీరామః పరమాత్మా దేవతా ।
శ్రీమాన్మహావిష్ణురితి బీజమ్ । గుణభృన్నిర్గుణో మహానితి శక్తిః ।
సంసారతారకో రామ ఇతి మన్త్రః । సచ్చిదానన్దవిగ్రహ ఇతి కీలకమ్ ।
అక్షయః పురుషః సాక్షీతి కవచమ్ । అజేయః సర్వభూతానాం ఇత్యస్త్రమ్ ।
రాజీవలోచనః శ్రీమానితి ధ్యానమ్ ।
శ్రీరామప్రీత్యర్థే దివ్యసహస్రనామజపే
వినియోగః ।
కరన్యాసః -
శ్రీరామచన్ద్రాయేత్యఙ్గుష్ఠాభ్యాం నమః ।
సీతాపతయే ఇతి తర్జనీభ్యాం నమః ।
రఘునాథాయేతి మధ్యమాభ్యాం నమః ।
భరతాగ్రజాయేత్యనామికాభ్యాం నమః ।
దశరథాత్మజాయేతి కనిష్ఠికాభ్యాం నమః ।
హనుమత్ప్రభవే ఇతి కరతలకరపృష్ఠాభ్యాం నమః ।
ఏవం హృదయాదిన్యాసః ।
ధ్యానమ్-
విజ్ఞానహేతుం విమలాయతాక్షం ప్రజ్ఞానరూపం స్వసుఖైకహేతుమ్ ।
శ్రీరామచన్ద్రం హరిమాదిదేవం పరాత్పరం రామమహం భజామి ॥
తత్త్వస్వరూపం పురుషం పురాణం స్వతేజసా పూరితవిశ్వమేకమ్ ।
రాజాధిరాజం రవిమణ్డలస్థం విశ్వేశ్వరం రామమహం భజామి ।
లమిత్యాదిపఞ్చపూజాః ।
రామః శ్రీమాన్ మహావిష్ణుర్జిష్ణుర్దేవహితావహః ।
తత్త్వాత్మా తారకం బ్రహ్మ శాశ్వతః సర్వసిద్ధిదః ॥
ఓం రాజీవలోచనః శ్రీమాన్ శ్రీరామో రఘుపుఙ్గవః ।
రామభద్రః సదాచారో రాజేన్ద్రో జానకీపతిః ॥ ౧॥
అగ్రగణ్యో వరేణ్యశ్చ వరదః పరమేశ్వరః ।
జనార్దనో జితామిత్రః పరార్థైకప్రయోజనః ॥ ౨॥
విశ్వామిత్రప్రియో దాన్తః శత్రుజిచ్ఛత్రుతాపనః ।
సర్వజ్ఞః సర్వదేవాదిః శరణ్యో వాలిమర్దనః ॥ ౩॥
జ్ఞానభావ్యోఽపరిచ్ఛేద్యో వాగ్మీ సత్యవ్రతః శుచిః ।
జ్ఞానగమ్యో దృఢప్రజ్ఞః ఖరధ్వంసీ ప్రతాపవాన్ ॥ ౪॥
ద్యుతిమానాత్మవాన్ వీరో జితక్రోధోఽరిమర్దనః ।
విశ్వరూపో విశాలాక్షః ప్రభుః పరివృఢో దృఢః ॥ ౫॥
ఈశః ఖడ్గధరః శ్రీమాన్ కౌసలేయోఽనసూయకః ।
విపులాంసో మహోరస్కః పరమేష్ఠీ పరాయణః ॥ ౬॥
సత్యవ్రతః సత్యసన్ధో గురుః పరమధార్మికః ।
లోకజ్ఞో లోకవన్ద్యశ్చ లోకాత్మా లోకకృత్పరః ॥ ౭॥
అనాదిర్భగవాన్ సేవ్యో జితమాయో రఘూద్వహః ।
రామో దయాకరో దక్షః సర్వజ్ఞః సర్వపావనః ॥ ౮॥
బ్రహ్మణ్యో నీతిమాన్ గోప్తా సర్వదేవమయో హరిః ।
సున్దరః పీతవాసాశ్చ సూత్రకారః పురాతనః ॥ ౯॥
సౌమ్యో మహర్షిః కోదణ్డీ సర్వజ్ఞః సర్వకోవిదః ।
కవిః సుగ్రీవవరదః సర్వపుణ్యాధికప్రదః ॥ ౧౦॥
భవ్యో జితారిషడ్వర్గో మహోదారోఽఘనాశనః ।
సుకీర్తిరాదిపురుషః కాన్తః పుణ్యకృతాగమః ॥ ౧౧॥
అకల్మషశ్చతుర్బాహుః సర్వావాసో దురాసదః ।
స్మితభాషీ నివృత్తాత్మా స్మృతిమాన్ వీర్యవాన్ ప్రభుః ॥ ౧౨॥
ధీరో దాన్తో ఘనశ్యామః సర్వాయుధవిశారదః ।
అధ్యాత్మయోగనిలయః సుమనా లక్ష్మణాగ్రజః ॥ ౧౩॥
సర్వతీర్థమయః శూరః సర్వయజ్ఞఫలప్రదః ।
యజ్ఞస్వరూపీ యజ్ఞేశో జరామరణవర్జితః ॥ ౧౪॥
వర్ణాశ్రమకరో వర్ణీ శత్రుజిత్ పురుషోత్తమః ।
విభీషణప్రతిష్ఠాతా పరమాత్మా పరాత్పరః ॥ ౧౫॥
ప్రమాణభూతో దుర్జ్ఞేయః పూర్ణః పరపురఞ్జయః ।
అనన్తదృష్టిరానన్దో ధనుర్వేదో ధనుర్ధరః ॥ ౧౬॥
గుణాకరో గుణశ్రేష్ఠః సచ్చిదానన్దవిగ్రహః ।
అభివన్ద్యో మహాకాయో విశ్వకర్మా విశారదః ॥ ౧౭॥
వినీతాత్మా వీతరాగస్తపస్వీశో జనేశ్వరః ।
కల్యాణప్రకృతిః కల్పః సర్వేశః సర్వకామదః ॥ ౧౮॥
అక్షయః పురుషః సాక్షీ కేశవః పురుషోత్తమః ।
లోకాధ్యక్షో మహామాయో విభీషణవరప్రదః ॥ ౧౯॥
ఆనన్దవిగ్రహో జ్యోతిర్హనుమత్ప్రభురవ్యయః ।
భ్రాజిష్ణుః సహనో భోక్తా సత్యవాదీ బహుశ్రుతః ॥ ౨౦॥
సుఖదః కారణం కర్తా భవబన్ధవిమోచనః ।
దేవచూడామణిర్నేతా బ్రహ్మణ్యో బ్రహ్మవర్ధనః ॥ ౨౧॥
సంసారోత్తారకో రామః సర్వదుఃఖవిమోక్షకృత్ ।
విద్వత్తమో విశ్వకర్తా విశ్వహర్తా చ విశ్వకృత్ ॥ ౨౨॥
నిత్యో నియతకల్యాణః సీతాశోకవినాశకృత్ ।
కాకుత్స్థః పుణ్డరీకాక్షో విశ్వామిత్రభయాపహః ॥ ౨౩॥
మారీచమథనో రామో విరాధవధపణ్డితః ।
దుఃస్వప్ననాశనో రమ్యః కిరీటీ త్రిదశాధిపః ॥ ౨౪॥
మహాధనుర్మహాకాయో భీమో భీమపరాక్రమః ।
తత్త్వస్వరూపీ తత్త్వజ్ఞస్తత్త్వవాదీ సువిక్రమః ॥ ౨౫॥
భూతాత్మా భూతకృత్స్వామీ కాలజ్ఞానీ మహాపటుః ।
అనిర్విణ్ణో గుణగ్రాహీ నిష్కలఙ్కః కలఙ్కహా ॥ ౨౬॥
స్వభావభద్రః శత్రుఘ్నః కేశవః స్థాణురీశ్వరః ।
భూతాదిః శమ్భురాదిత్యః స్థవిష్ఠః శాశ్వతో ధ్రువః ॥ ౨౭॥
కవచీ కుణ్డలీ చక్రీ ఖడ్గీ భక్తజనప్రియః ।
అమృత్యుర్జన్మరహితః సర్వజిత్సర్వగోచరః ॥ ౨౮॥
అనుత్తమోఽప్రమేయాత్మా సర్వాదిర్గుణసాగరః ।
సమః సమాత్మా సమగో జటాముకుటమణ్డితః ॥ ౨౯॥
అజేయః సర్వభూతాత్మా విష్వక్సేనో మహాతపాః ।
లోకాధ్యక్షో మహాబాహురమృతో వేదవిత్తమః ॥ ౩౦॥
సహిష్ణుః సద్గతిః శాస్తా విశ్వయోనిర్మహాద్యుతిః ।
అతీన్ద్ర ఊర్జితః ప్రాంశురుపేన్ద్రో వామనో బలీ ॥ ౩౧॥
ధనుర్వేదో విధాతా చ బ్రహ్మా విష్ణుశ్చ శఙ్కరః ।
హంసో మరీచిర్గోవిన్దో రత్నగర్భో మహామతిః ॥ ౩౨॥
వ్యాసో వాచస్పతిః సర్వదర్పితాసురమర్దనః ।
జానకీవల్లభః పూజ్యః ప్రకటః ప్రీతివర్ధనః ॥ ౩౩॥
సమ్భవోఽతీన్ద్రియో వేద్యోఽనిర్దేశో జామ్బవత్ప్రభుః ।
మదనో మథనో వ్యాపీ విశ్వరూపో నిరఞ్జనః ॥ ౩౪॥
నారాయణోఽగ్రణీః సాధుర్జటాయుప్రీతివర్ధనః ।
నైకరూపో జగన్నాథః సురకార్యహితః స్వభూః ॥ ౩౫॥
జితక్రోధో జితారాతిః ప్లవగాధిపరాజ్యదః ।
వసుదః సుభుజో నైకమాయో భవ్యప్రమోదనః ॥ ౩౬॥
చణ్డాంశుః సిద్ధిదః కల్పః శరణాగతవత్సలః ।
అగదో రోగహర్తా చ మన్త్రజ్ఞో మన్త్రభావనః ॥ ౩౭॥
సౌమిత్రివత్సలో ధుర్యో వ్యక్తావ్యక్తస్వరూపధృక్ ।
వసిష్ఠో గ్రామణీః శ్రీమాననుకూలః ప్రియంవదః ॥ ౩౮॥
అతులః సాత్త్వికో ధీరః శరాసనవిశారదః ।
జ్యేష్ఠః సర్వగుణోపేతః శక్తిమాంస్తాటకాన్తకః ॥ ౩౯॥
వైకుణ్ఠః ప్రాణినాం ప్రాణః కమఠః కమలాపతిః ।
గోవర్ధనధరో మత్స్యరూపః కారుణ్యసాగరః ॥ ౪౦॥
కుమ్భకర్ణప్రభేత్తా చ గోపీగోపాలసంవృతః ।
మాయావీ వ్యాపకో వ్యాపీ రైణుకేయబలాపహః ॥ ౪౧॥
పినాకమథనో వన్ద్యః సమర్థో గరుడధ్వజః ।
లోకత్రయాశ్రయో లోకచరితో భరతాగ్రజః ॥ ౪౨॥
శ్రీధరః సద్గతిర్లోకసాక్షీ నారాయణో బుధః ।
మనోవేగీ మనోరూపీ పూర్ణః పురుషపుఙ్గవః ॥ ౪౩॥
యదుశ్రేష్ఠో యదుపతిర్భూతావాసః సువిక్రమః ।
తేజోధరో ధరాధారశ్చతుర్మూర్తిర్మహానిధిః ॥ ౪౪॥
చాణూరమర్దనో దివ్యః శాన్తో భరతవన్దితః ।
శబ్దాతిగో గభీరాత్మా కోమలాఙ్గః ప్రజాగరః ॥ ౪౫॥
లోకగర్భః శేషశాయీ క్షీరాబ్ధినిలయోఽమలః ।
ఆత్మయోనిరదీనాత్మా సహస్రాక్షః సహస్రపాత్ ॥ ౪౬॥
అమృతాంశుర్మహాగర్భో నివృత్తవిషయస్పృహః ।
త్రికాలజ్ఞో మునిః సాక్షీ విహాయసగతిః కృతీ ॥ ౪౭॥
పర్జన్యః కుముదో భూతావాసః కమలలోచనః ।
శ్రీవత్సవక్షాః శ్రీవాసో వీరహా లక్ష్మణాగ్రజః ॥ ౪౮॥
లోకాభిరామో లోకారిమర్దనః సేవకప్రియః ।
సనాతనతమో మేఘశ్యామలో రాక్షసాన్తకృత్ ॥ ౪౯॥
దివ్యాయుధధరః శ్రీమానప్రమేయో జితేన్ద్రియః ।
భూదేవవన్ద్యో జనకప్రియకృత్ప్రపితామహః ॥ ౫౦॥
ఉత్తమః సాత్త్వికః సత్యః సత్యసన్ధస్త్రివిక్రమః ।
సువ్రతః సులభః సూక్ష్మః సుఘోషః సుఖదః సుధీః ॥ ౫౧॥
దామోదరోఽచ్యుతః శార్ఙ్గీ వామనో మధురాధిపః ।
దేవకీనన్దనః శౌరిః శూరః కైటభమర్దనః ॥ ౫౨॥
సప్తతాలప్రభేత్తా చ మిత్రవంశప్రవర్ధనః ।
కాలస్వరూపీ కాలాత్మాకాలః కల్యాణదఃకవిః ।
సంవత్సర ఋతుః పక్షో హ్యయనం దివసో యుగః ॥ ౫౩॥
స్తవ్యో వివిక్తో నిర్లేపః సర్వవ్యాపీ నిరాకులః ।
అనాదినిధనః సర్వలోకపూజ్యో నిరామయః ॥ ౫౪॥
రసో రసజ్ఞః సారజ్ఞో లోకసారో రసాత్మకః ।
సర్వదుఃఖాతిగో విద్యారాశిః పరమగోచరః ॥ ౫౫॥
శేషో విశేషో విగతకల్మషో రఘునాయకః ।
వర్ణశ్రేష్ఠో వర్ణవాహ్యో వర్ణ్యో వర్ణ్యగుణోజ్జ్వలః ॥ ౫౬॥
కర్మసాక్ష్యమరశ్రేష్ఠో దేవదేవః సుఖప్రదః ।
దేవాధిదేవో దేవర్షిర్దేవాసురనమస్కృతః ॥ ౫౭॥
సర్వదేవమయశ్చక్రీ శార్ఙ్గపాణీ రఘూత్తమః ।
మనో బుద్ధిరహఙ్కారః ప్రకృతిః పురుషోఽవ్యయః ॥ ౫౮॥
అహల్యాపావనః స్వామీ పితృభక్తో వరప్రదః ।
న్యాయో న్యాయీ నయీ శ్రీమాన్నయో నగధరో ధ్రువః ॥ ౫౯॥
లక్ష్మీవిశ్వమ్భరాభర్తా దేవేన్ద్రో బలిమర్దనః ।
వాణారిమర్దనో యజ్వానుత్తమో మునిసేవితః ॥ ౬౦॥
దేవాగ్రణీః శివధ్యానతత్పరః పరమః పరః ।
సామగేయః ప్రియోఽక్రూరః పుణ్యకీర్తిః సులోచనః ॥ ౬౧॥
పుణ్యః పుణ్యాధికః పూర్వః పూర్ణః పూరయితా రవిః ।
జటిలః కల్మషధ్వాన్తప్రభఞ్జనవిభావసుః ॥ ౬౨॥
అవ్యక్తలక్షణోఽవ్యక్తో దశాస్యద్విపకేసరీ ।
కలానిధిః కలానాథో కమలానన్దవర్ధనః ॥ ౬౩॥
జయీ జితారిః సర్వాదిః శమనో భవభఞ్జనః ।
అలఙ్కరిష్ణురచలో రోచిష్ణుర్విక్రమోత్తమః ॥ ౬౪॥
ఆశుః శబ్దపతిః శబ్దాగోచరో రఞ్జనో రఘుః ।
నిఃశబ్దః ప్రణవో మాలీ స్థూలః సూక్ష్మో విలక్షణః ॥ ౬౫॥
ఆత్మయోనిరయోనిశ్చ సప్తజిహ్వః సహస్రపాత్ ।
సనాతనతమః స్రగ్వీ పేశలో జవినాం వరః ॥ ౬౬॥
శక్తిమాఞ్శఙ్ఖభృన్నాథః గదాపద్మరథాఙ్గభృత్ ।
నిరీహో నిర్వికల్పశ్చ చిద్రూపో వీతసాధ్వసః ॥ ౬౭॥
శతాననః సహస్రాక్షః శతమూర్తిర్ధనప్రభః ।
హృత్పుణ్డరీకశయనః కఠినో ద్రవ ఏవ చ ॥ ౬౮॥
ఉగ్రో గ్రహపతిః శ్రీమాన్ సమర్థోఽనర్థనాశనః ।
అధర్మశత్రూ రక్షోఘ్నః పురుహూతః పురుష్టుతః ॥ ౬౯॥
బ్రహ్మగర్భో బృహద్గర్భో ధర్మధేనుర్ధనాగమః ।
హిరణ్యగర్భో జ్యోతిష్మాన్ సులలాటః సువిక్రమః ॥ ౭౦॥
శివపూజారతః శ్రీమాన్ భవానీప్రియకృద్వశీ ।
నరో నారాయణః శ్యామః కపర్దీ నీలలోహితః ॥ ౭౧॥
రుద్రః పశుపతిః స్థాణుర్విశ్వామిత్రో ద్విజేశ్వరః ।
మాతామహో మాతరిశ్వా విరిఞ్చో విష్టరశ్రవాః ॥ ౭౨॥
అక్షోభ్యః సర్వభూతానాం చణ్డః సత్యపరాక్రమః ।
వాలఖిల్యో మహాకల్పః కల్పవృక్షః కలాధరః ॥ ౭౩॥
నిదాఘస్తపనోఽమోఘః శ్లక్ష్ణః పరబలాపహృత్ ।
కబన్ధమథనో దివ్యః కమ్బుగ్రీవశివప్రియః ॥ ౭౪॥
శఙ్ఖోఽనిలః సునిష్పన్నః సులభః శిశిరాత్మకః ।
అసంసృష్టోఽతిథిః శూరః ప్రమాథీ పాపనాశకృత్ ॥ ౭౫॥
వసుశ్రవాః కవ్యవాహః ప్రతప్తో విశ్వభోజనః ।
రామో నీలోత్పలశ్యామో జ్ఞానస్కన్ధో మహాద్యుతిః ॥ ౭౬॥
పవిత్రపాదః పాపారిర్మణిపూరో నభోగతిః ।
ఉత్తారణో దుష్కృతిహా దుర్ధర్షో దుఃసహోఽభయః ॥ ౭౭॥
అమృతేశోఽమృతవపుర్ధర్మీ ధర్మః కృపాకరః ।
భర్గో వివస్వానాదిత్యో యోగాచార్యో దివస్పతిః ॥ ౭౮॥
ఉదారకీర్తిరుద్యోగీ వాఙ్మయః సదసన్మయః ।
నక్షత్రమాలీ నాకేశః స్వాధిష్ఠానః షడాశ్రయః ॥ ౭౯॥
చతుర్వర్గఫలో వర్ణీ శక్తిత్రయఫలం నిధిః ।
నిధానగర్భో నిర్వ్యాజో గిరీశో వ్యాలమర్దనః ॥ ౮౦॥
శ్రీవల్లభః శివారమ్భః శాన్తిర్భద్రః సమఞ్జసః ।
భూశయో భూతికృద్భూతిర్భూషణో భూతవాహనః ॥ ౮౧॥
అకాయో భక్తకాయస్థః కాలజ్ఞానీ మహావటుః ।
పరార్థవృత్తిరచలో వివిక్తః శ్రుతిసాగరః ॥ ౮౨॥
స్వభావభద్రో మధ్యస్థః సంసారభయనాశనః ।
వేద్యో వైద్యో వియద్గోప్తా సర్వామరమునీశ్వరః ॥ ౮౩॥
సురేన్ద్రః కరణం కర్మ కర్మకృత్కర్మ్యధోక్షజః ।
ధ్యేయో ధుర్యో ధరాధీశః సంకల్పః శర్వరీపతిః ॥ ౮౪॥
పరమార్థగురుర్వృద్ధః శుచిరాశ్రితవత్సలః ।
విష్ణుర్జిష్ణుర్విభుర్వన్ద్యో యజ్ఞేశో యజ్ఞపాలకః ॥ ౮౫॥
ప్రభవిష్ణుర్గ్రసిష్ణుశ్చ లోకాత్మా లోకభావనః ।
కేశవః కేశిహా కావ్యః కవిః కారణకారణమ్ ॥ ౮౬॥
కాలకర్తా కాలశేషో వాసుదేవః పురుష్టుతః ।
ఆదికర్తా వరాహశ్చ మాధవో మధుసూదనః ॥ ౮౭॥
నారాయణో నరో హంసో విష్వక్సేనో జనార్దనః ।
విశ్వకర్తా మహాయజ్ఞో జ్యోతిష్మాన్ పురుషోత్తమః ॥ ౮౮॥
వైకుణ్ఠః పుణ్డరీకాక్షః కృష్ణః సూర్యః సురార్చితః ।
నారసింహో మహాభీమో వక్రదంష్ట్రో నఖాయుధః ॥ ౮౯॥
ఆదిదేవో జగత్కర్తా యోగీశో గరుడధ్వజః ।
గోవిన్దో గోపతిర్గోప్తా భూపతిర్భువనేశ్వరః ॥ ౯౦॥
పద్మనాభో హృషీకేశో ధాతా దామోదరః ప్రభుః ।
త్రివిక్రమస్త్రిలోకేశో బ్రహ్మేశః ప్రీతివర్ధనః ॥ ౯౧॥
వామనో దుష్టదమనో గోవిన్దో గోపవల్లభః ।
భక్తప్రియోఽచ్యుతః సత్యః సత్యకీర్తిర్ధృతిః స్మృతిః ॥ ౯౨॥
కారుణ్యం కరుణో వ్యాసః పాపహా శాన్తివర్ధనః ।
సంన్యాసీ శాస్త్రతత్త్వజ్ఞో మన్దరాద్రినికేతనః ॥ ౯౩॥
బదరీనిలయః శాన్తస్తపస్వీ వైద్యుతప్రభః ।
భూతావాసో గుహావాసః శ్రీనివాసః శ్రియః పతిః ॥ ౯౪॥
తపోవాసో ముదావాసః సత్యవాసః సనాతనః ।
పురుషః పుష్కరః పుణ్యః పుష్కరాక్షో మహేశ్వరః ॥ ౯౫॥
పూర్ణమూర్తిః పురాణజ్ఞః పుణ్యదః ప్రీతివర్ధనః ।
శఙ్ఖీ చక్రీ గదీ శార్ఙ్గీ లాఙ్గలీ ముసలీ హలీ ॥ ౯౬॥
కిరీటీ కుణ్డలీ హారీ మేఖలీ కవచీ ధ్వజీ ।
యోద్ధా జేతా మహావీర్యః శత్రుజిచ్ఛత్రుతాపనః ॥ ౯౭॥
శాస్తా శాస్త్రకరః శాస్త్రం శఙ్కరః శఙ్కరస్తుతః ।
సారథిః సాత్త్వికః స్వామీ సామవేదప్రియః సమః ॥ ౯౮॥
పవనః సంహతః శక్తిః సమ్పూర్ణాఙ్గః సమృద్ధిమాన్ ।
స్వర్గదః కామదః శ్రీదః కీర్తిదోఽకీర్తినాశనః ॥ ౯౯॥
మోక్షదః పుణ్డరీకాక్షః క్షీరాబ్ధికృతకేతనః ।
సర్వాత్మా సర్వలోకేశః ప్రేరకః పాపనాశనః ॥ ౧౦౦॥
సర్వవ్యాపీ జగన్నాథః సర్వలోకమహేశ్వరః ।
సర్గస్థిత్యన్తకృద్దేవః సర్వలోకసుఖావహః ॥ ౧౦౧॥
అక్షయ్యః శాశ్వతోఽనన్తః క్షయవృద్ధివివర్జితః ।
నిర్లేపో నిర్గుణః సూక్ష్మో నిర్వికారో నిరఞ్జనః ॥ ౧౦౨॥
సర్వోపాధివినిర్ముక్తః సత్తామాత్రవ్యవస్థితః ।
అధికారీ విభుర్నిత్యః పరమాత్మా సనాతనః ॥ ౧౦౩॥
అచలో నిర్మలో వ్యాపీ నిత్యతృప్తో నిరాశ్రయః ।
శ్యామో యువా లోహితాక్షో దీప్తాస్యో మితభాషణః ॥ ౧౦౪॥
ఆజానుబాహుః సుముఖః సింహస్కన్ధో మహాభుజః ।
సత్యవాన్ గుణసమ్పన్నః స్వయన్తేజాః సుదీప్తిమాన్ ॥ ౧౦౫॥
కాలాత్మా భగవాన్ కాలః కాలచక్రప్రవర్తకః ।
నారాయణః పరఞ్జ్యోతిః పరమాత్మా సనాతనః ॥ ౧౦౬॥
విశ్వసృడ్ విశ్వగోప్తా చ విశ్వభోక్తా చ శాశ్వతః ।
విశ్వేశ్వరో విశ్వమూర్తిర్విశ్వాత్మా విశ్వభావనః ॥ ౧౦౭॥
సర్వభూతసుహృచ్ఛాన్తః సర్వభూతానుకమ్పనః ।
సర్వేశ్వరేశ్వరః సర్వః శ్రీమానాశ్రితవత్సలః ॥ ౧౦౮॥
సర్వగః సర్వభూతేశః సర్వభూతాశయస్థితః ।
అభ్యన్తరస్థస్తమసశ్ఛేత్తా నారాయణః పరః ॥ ౧౦౯॥
అనాదినిధనః స్రష్టా ప్రజాపతిపతిర్హరిః ।
నరసింహో హృషీకేశః సర్వాత్మా సర్వదృగ్వశీ ॥ ౧౧౦॥
జగతస్తస్థుషశ్చైవ ప్రభుర్నేతా సనాతనః ।
కర్తా ధాతా విధాతా చ సర్వేషాం ప్రభురీశ్వరః ॥ ౧౧౧॥
సహస్రమూర్తిర్విశ్వాత్మా విష్ణుర్విశ్వదృగవ్యయః ।
పురాణపురుషః స్రష్టా సహస్రాక్షః సహస్రపాత్ ॥ ౧౧౨॥
తత్త్వం నారాయణో విష్ణుర్వాసుదేవః సనాతనః ।
పరమాత్మా పరం బ్రహ్మ సచ్చిదానన్దవిగ్రహః ॥ ౧౧౩॥
పరఞ్జ్యోతిః పరన్ధామః పరాకాశః పరాత్పరః ।
అచ్యుతః పురుషః కృష్ణః శాశ్వతః శివ ఈశ్వరః ॥ ౧౧౪॥
నిత్యః సర్వగతః స్థాణురుగ్రః సాక్షీ ప్రజాపతిః ।
హిరణ్యగర్భః సవితా లోకకృల్లోకభృద్విభుః ॥ ౧౧౫॥
రామః శ్రీమాన్ మహావిష్ణుర్జిష్ణుర్దేవహితావహః ।
తత్త్వాత్మా తారకం బ్రహ్మ శాశ్వతః సర్వసిద్ధిదః ॥ ౧౧౬॥
అకారవాచ్యో భగవాన్ శ్రీర్భూ లీలాపతిః పుమాన్ ।
సర్వలోకేశ్వరః శ్రీమాన్ సర్వజ్ఞః సర్వతోముఖః ॥ ౧౧౭॥
స్వామీ సుశీలః సులభః సర్వజ్ఞః సర్వశక్తిమాన్ ।
నిత్యః సమ్పూర్ణకామశ్చ నైసర్గికసుహృత్సుఖీ ॥ ౧౧౮॥
కృపాపీయూషజలధిః శరణ్యః సర్వదేహినామ్ ।
శ్రీమాన్నారాయణః స్వామీ జగతాం పతిరీశ్వరః ॥ ౧౧౯॥
శ్రీశః శరణ్యో భూతానాం సంశ్రితాభీష్టదాయకః ।
అనన్తః శ్రీపతీ రామో గుణభృన్నిర్గుణో మహాన్ ॥ ౧౨౦॥
॥ ఇతి శ్రీరామసహస్రనామస్తోత్రం సమ్పూర్ణమ్ ॥
All copyrights reserved 2012 digital media act
Comments
Post a Comment