అహల్య కృత శ్రీరామ స్తోత్రం (ఆధ్యాత్మరామాయణం) ahalya krutha srirama stotram
అహల్య కృత శ్రీరామ స్తోత్రం (ఆధ్యాత్మరామాయణం)
శ్రీ గణేశాయ నమః ।
అహల్యోవాచః ।
అహో కృతార్థాఽస్మి జగన్నివాస తే పాదాబ్జసంలగ్నరజఃకణాదహమ్ ।
స్పృశామి యత్పద్మజశఙ్కరాదిభిర్విమృగ్యతే రన్ధితమానసైః సదా ॥ ౧॥
అహో విచిత్రం తవ రామ చేష్టితం మనుష్యభావేన విమోహితం జగత్ ।
చలస్యజస్రం చరణాదివర్జితః సమ్పూర్ణ ఆనన్దమయోఽతిమాయికః ॥ ౨॥
యత్పాదపఙ్కజపరాగపవిత్రగాత్రా భాగీరథీ భవవిరిఞ్చిముఖాన్పునాతి ।
సాక్షాత్స ఏవ మమ దృగ్విషయో యదాస్తే కిం వర్ణ్యతే మమ పురాకృతభాగధేయమ్ ॥ ౩॥
మర్త్యావతారే మనుజాకృతిం హరిం రామాభిధేయం రమణీయదేహినమ్ ।
ధనుర్ధరం పద్మవిశాలలోచనం భజామి నిత్యం న పరాన్భజిష్యే ॥ ౪॥
యత్పాదపఙ్కరజః శ్రుతిభిర్విమృగ్యం యన్నాభిపఙ్కజభవః కమలాసనశ్చ ।
యన్నామసారరసికో భగవాన్పురారిస్తం రామచన్ద్రమనిశం హృది భావయామి ॥ ౫॥
యస్యావతారచరితాని విరిఞ్చిలోకే గాయన్తి నారదముఖా భవపద్మజాద్యాః ।
ఆనన్దజాశ్రుపరిషిక్తకుచాగ్రసీమా వాగీశ్వరీ చ తమహం శరణం ప్రపద్యే ॥ ౬॥
సోఽయం పరాత్మా పురుషః పురాణ ఏషః స్వయంజ్యోతిరనన్త ఆద్యః ।
మాయాతనుం లోకవిమోహనీయాం ధత్తే పరానుగ్రహ ఏష రామః ॥ ౭॥
అయం హి విశ్వోద్భవసంయమానామేకః స్వమాయాగుణబిమ్బితో యః ।
విరిఞ్చివిష్ణ్వీశ్వరనామభేదాన్ ధత్తే స్వతన్త్రః పరిపూర్ణ ఆత్మా ॥ ౮॥
నమోఽస్తు తే రామ తవాఙ్ఘ్రిపఙ్కజం శ్రియా ధృతం వక్షసి లాలితం ప్రియాత్ ।
ఆక్రాన్తమేకేన జగత్త్రయం పురా ధ్యేయం మునీన్ద్రైరభిమానవర్జితైః ॥ ౯॥
జగతామాదిభూతస్త్వం జగత్త్వం జగదాశ్రయః ।
సర్వభూతేష్వసంయుక్త ఏకో భాతి భవాన్పరః ॥ ౧౦॥
ఓంకారవాచ్యస్త్వం రామ వాచామవిషయః పుమాన్ ।
వాచ్యవాచకభేదేన భవానేవ జగన్మయః ॥ ౧౧॥
కార్యకారణకర్తృత్వఫలసాధనభేదతః ।
ఏకో విభాసి రామ త్వం మాయయా బహురూపయా ॥ ౧౨॥
త్వన్మాయామోహితధియస్త్వాం న జానన్తి తత్త్వతః ।
మానుషం త్వాఽభిమన్యన్తే మాయినం పరమేశ్వరమ్ ॥ ౧౩॥
ఆకాశవత్త్వం సర్వత్ర బహిరన్తర్గతోఽమలః ।
అసఙ్గో హ్యచలో నిత్యః శుద్ధో బుద్ధః సదవ్యయః ॥ ౧౪॥
యోషిన్మూఢాఽహమజ్ఞా తే తత్త్వం జానే కథం విభో ।
తస్మాత్తే శతశో రామ నమస్కుర్యామనన్యధీః ॥ ౧౫॥
దేవ మే యత్ర కుత్రాపి స్థితాయా అపి సర్వదా ।
త్వత్పాదకమలే సక్తా భక్తిరేవ సదాఽస్తు మే ॥ ౧౬॥
నమస్తే పురుషాధ్యక్ష నమస్తే భక్తవత్సల ।
నమస్తేఽస్తు హృషీకేశ నారాయణ నమోఽస్తు తే ॥ ౧౭॥
భవభయహరమేకం భానుకోటిప్రకాశం
కరధృతశరచాపం కాలమేఘావభాసమ్ ।
కనకరుచిరవస్త్రం రత్నవత్కుణ్డలాఢ్యం
కమలవిశదనేత్రం సానుజం రామమీడే ॥ ౧౮॥
స్తుత్వైవం పురుషం సాక్షాద్రాఘవం పురతః స్థితమ్ ।
పరిక్రమ్య ప్రణమ్యాశు సాఽనుజ్ఞాతా యయౌ పతిమ్ ॥ ౧౯॥
అహల్యయా కృతం స్తోత్రం యః పఠేద్భక్తిసంయుతః ।
స ముచ్యతేఽఖిలైః పాపైః పరం బ్రహ్మాధిగచ్ఛతి ॥ ౨౦॥
పుత్రాద్యర్థే పఠేద్భక్త్యా రామం హృది నిధాయ చ ।
సంవత్సరేణ లభతే వన్ధ్యా అపి సుపుత్రకమ్ ॥ ౨౧॥
సర్వాన్కామానవాప్నోతి రామచన్ద్రప్రసాదతః ॥ ౨౨॥
బ్రహ్మఘ్నో గురుతల్పగోఽపి పురుషః స్తేయీ సురాపోఽపి వా
మాతృభ్రాతృవిహింసకోఽపి సతతం భోగైకబద్ధాతురః ।
నిత్యం స్తోత్రమిదం జపన్ రఘుపతిం భక్త్యా హృదిస్థం స్మరన్
ధ్యాయన్ముక్తిముపైతి కిం పునరసౌ స్వాచారయుక్తో నరః ॥ ౨౩॥
॥ ఇతి శ్రీమదధ్యాత్మరామాయణే అహల్యావిరచితం శ్రీరామచన్ద్రస్తోత్రం సమ్పూర్ణమ్ ॥
All copyrights reserved 2012 digital media act
Comments
Post a Comment