బాలా కర్పూర స్తోత్రం Bala karpoora stotram
బాలా కర్పూర స్తోత్రం
కర్పూరాభేన్దుగౌరాం శశిసకలధరాం రక్తపద్మాసనస్థాం
విద్యాపాత్రాక్షముద్రాధృతకరకమలాం త్వాం స్మరన్సన్ త్రిలక్షమ్ ।
జప్త్వా చన్ద్రార్ధభూషం సురుచిరమధరం బీజమాద్యం తవేదం
హుత్వా పఞ్చాత్పలాశైః స భవతి కవిరాడ్ దేవి బాలే మహేశి ॥ ౧॥
హస్తాబ్జైః పాత్రపాశాఙ్కుశకుసుమధనుర్బీజపూరాం దధానాం
రక్తాం త్వాం సంస్మరన్సన్ ప్రజపతి మనుజో యస్త్రిలక్షం భవాని ।
వామాక్షీ చన్ద్రసంస్థం క్షితిసహితవిధిం కామబీజం తవేదం
చన్ద్రైర్హుత్వా దశాంశం స నయతి సకలాన్ వశ్యతాం సర్వదైవ ॥ ౨॥
విద్యాక్షజ్ఞానముద్రాఽమృతకలశధరాం త్వాం మనోజ్ఞాం కిశోరీం
స్మేరాం ధ్యాయంస్త్రినేత్రాం శశధరధవలాం యో జపేద్వై త్రిలక్షమ్ ।
జీవం సఙ్కర్షణాఢ్యం తవ సురనమితే సర్గయుక్తం సుబీజం
హుత్వాఽన్తే మాలతీభిర్భవతి స లలితే శ్రీయుతో భోగవాంశ్చ ॥ ౩॥
ధ్యాయంస్త్వాం పుస్తక్లాక్షాభయవరదకరాం లోహితాభాం కుమారీం
కశ్చిద్యః సాధకేన్ద్రో జపతి కులవిధౌ ప్రత్యహం షట్సహస్రమ్ ।
మాతర్వాఙ్మారశక్తిప్రయుతమనుమిమం త్ర్యక్షరం త్రైపురం తే
భుక్త్వా భోగాననేకాన్ జనని స లభతేఽవశ్యమేవాష్టసిద్ధీః ॥ ౪॥
ఆరక్తాం కాన్తదోర్భ్యాం మణిచషకమథో రత్నపద్మం దధానాం
వాఙ్మాయాశ్రీయుతాన్యం మనుమయి లలితే తత్త్వలక్షం జపేద్యః ।
ధ్యాయన్ రూపం త్వదీయం తదను చ హవనం పాయసాన్నైః ప్రకుర్యాద్-
యోగీశస్తత్త్వవేత్తా పరశివమహిలే భూతలే జాయతే సః ॥ ౫॥
వాణీ చేటీ రమా వాగ్భవమథ మదనః శక్తిబీజం చ షడ్భిః
ఏతైశ్చన్ద్రార్ధచూడే భవతి తవ మహామన్త్రరాజః షడర్ణః ।
జప్త్వైనం సాధకో యః స్మరహరదయితే భక్తితస్త్వాముపాస్తే
విద్యైశ్వర్యాణి భుక్త్వా తదను స లభతే దివ్యసాయుజ్యముక్తిమ్ ॥ ౬॥
మహాబిన్దుః శుద్ధో జనని నవయోన్యన్తరగతో
భవేదేతద్బాహ్యే వసుఛదనపద్మం సురుచిరమ్ ।
తతో వేదద్వారం భవతి తవ యన్త్రం గిరిసుతే
తదస్మిన్ త్వాం ధ్యాయేత్ కహరిహరరుద్రేశ్వరపదామ్ ॥ ౭॥
నవీనాదిత్యాభాం త్రినయనయుతాం స్మేరవదనాం
మహాక్షస్రగ్విద్యాఽభయవరకరాం రక్తవసనామ్ ।
కిశోరీం త్వాం ధ్యాయన్నిజహృదయపద్మే పరశివే
జపేన్మోక్షాప్త్యర్థం తదను జుహుయాత్ కింశుకసుమైః ॥ ౮॥
హృదమ్భోజే ధ్యాయన్ కనకసదృశామిన్దుముకుటాం
త్రినేత్రాం స్మేరాస్యాం కమలమధులుఙ్గాఙ్కితకరామ్ ।
జపేద్దిగ్లక్షం యస్తవ మనుమయో దేవి జుహుయాత్
సుపక్వైర్మాలూరైరతులధనవాన్ స ప్రభవతి ॥ ౯॥
స్మరేద్ధస్తైర్వేదాభయవరసుధాకుమ్భధరిణీం
స్రవన్తీం పీయూషం ధవలవసనామిన్దుశకలామ్ ।
సువిద్యాప్త్యై మన్త్రం తవ హరనుతే లక్షనవకం
జపేత్త్వాం కర్పూరైరగరు సహితైరేవ జుహుయాత్ ॥ ౧౦॥
సహస్రారే ధ్యాయన్ శశధరనిభాం శుభ్రవసనాం
అకారాదిక్షాన్తావయవయుతరూపాం శశిధరామ్ ।
జపేద్భక్త్యా మన్త్రం తవ రససహస్రం ప్రతిదినం
తథారోగ్యాప్త్యర్థం భగవతి గుడూచ్యైః ప్రజుహుయాత్ ॥ ౧౧॥
కులజ్ఞః కశ్చిద్యో యజతి కులపుష్పైః కులవిధౌ
కులాగారే ధ్యాయన్ కులజనని తే మన్మథకలామ్ ।
షడర్ణం పూర్వోక్తం జపతి కులమన్త్రం తవ శివే
స జీవన్ముక్తః స్యాదకులకులపఙ్కేరుహగతే ॥ ౧౨॥
శివే మద్యైర్మాంసేశ్చణకవటకైర్మీనసహితైః
ప్రకుర్వంశ్చక్రార్చాం సుకులభగలిఙ్గామృతరసైః ।
బలిం శఙ్కామోహాదికపశుగణాన్యో విదధతి
త్రికాలజ్ఞో జ్ఞానీ స భవతి మహాభైరవసమః ॥ ౧౩॥
మనోవాచాగమ్యామకులకులగమ్యాం పరశివాం
స్తవీమి త్వాం మాతః కథమహమహో దేవి జడధీః ।
తథాపి త్వద్భక్తిర్ముఖరయతి మాం తద్విరచితం
స్తవం క్షన్తవ్యం మే త్రిపురలలితే దోషమధునా ॥ ౧౪॥
అనుష్ఠానధ్యానార్చామను సముద్ధారణయుతం
శివే తే కర్పూరస్తవమితి పఠేదర్చనపరః ।
స యోగీ భోగీ స్యాత్ స హి నిఖిలశాస్త్రేషు నిపుణః
యమోఽన్యో వైరీణాం విలసతి సదా కల్పతరువత్ ॥ ౧౫॥
బాలాం బాలదివాకరద్యుతినిభాం పద్మాసనే సంస్థితాం
పఞ్చప్రేతమయామ్బుజాసనగతాం వాగ్వాదినీరూపిణీమ్ ।
చన్ద్రార్కానలభూషితత్రినయనాం చన్ద్రావతంసాన్వితాం
విద్యాక్షాభయధారిణీం వరకరాం వన్దే పరామమ్బికామ్ ॥ ౧౬॥
ఇతి శ్రీపరాతన్త్రాన్తర్గతం శ్రీబాలాకర్పూరస్తోత్రం సమ్పూర్ణమ్
All copyrights reserved 2012 digital media act
Comments
Post a Comment